| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
6. බ්‍යසනසුත්‌තං
6. Byasanasuttaṃ
6. ‘‘යො සො, භික්‌ඛවෙ, භික්‌ඛු අක්‌කොසකො පරිභාසකො අරියූපවාදො සබ්‍රහ්‌මචාරීනං, ඨානමෙතං අවකාසො යං සො එකාදසන්‌නං බ්‍යසනානං අඤ්‌ඤතරං බ්‍යසනං නිගච්‌ඡෙය්‍ය.
6. ‘‘Yo so, bhikkhave, bhikkhu akkosako paribhāsako ariyūpavādo sabrahmacārīnaṃ, ṭhānametaṃ avakāso yaṃ so ekādasannaṃ byasanānaṃ aññataraṃ byasanaṃ nigaccheyya.
කතමෙසං එකාදසන්‌නං? අනධිගතං නාධිගච්‌ඡති, අධිගතා පරිහායති, සද්‌ධම්‌මස්‌ස න වොදායන්‌ති, සද්‌ධම්‌මෙසු වා අධිමානිකො හොති, අනභිරතො වා බ්‍රහ්‌මචරියං චරති, අඤ්‌ඤතරං වා සංකිලිට්‌ඨං ආපත්‌තිං ආපජ්‌ජති, සික්‌ඛං වා පච්‌චක්‌ඛාය හීනායාවත්‌තති, ගාළ්‌හං වා රොගාතඞ්‌කං ඵුසති, උම්‌මාදං වා පාපුණාති චිත්‌තක්‌ඛෙපං වා, සම්‌මූළ්‌හො කාලං කරොති, කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති – යො සො, භික්‌ඛවෙ, භික්‌ඛු අක්‌කොසකො පරිභාසකො අරියූපවාදො සබ්‍රහ්‌මචාරීනං, ඨානමෙතං අවකාසො යං සො ඉමෙසං එකාදසන්‌නං බ්‍යසනානං අඤ්‌ඤතරං බ්‍යසනං නිගච්‌ඡෙය්‍ය. 1
Katamesaṃ ekādasannaṃ? Anadhigataṃ nādhigacchati, adhigatā parihāyati, saddhammassa na vodāyanti, saddhammesu vā adhimāniko hoti, anabhirato vā brahmacariyaṃ carati, aññataraṃ vā saṃkiliṭṭhaṃ āpattiṃ āpajjati, sikkhaṃ vā paccakkhāya hīnāyāvattati, gāḷhaṃ vā rogātaṅkaṃ phusati, ummādaṃ vā pāpuṇāti cittakkhepaṃ vā, sammūḷho kālaṃ karoti, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati – yo so, bhikkhave, bhikkhu akkosako paribhāsako ariyūpavādo sabrahmacārīnaṃ, ṭhānametaṃ avakāso yaṃ so imesaṃ ekādasannaṃ byasanānaṃ aññataraṃ byasanaṃ nigaccheyya. 2
‘‘යො සො, භික්‌ඛවෙ, භික්‌ඛු අක්‌කොසකො පරිභාසකො අරියූපවාදො සබ්‍රහ්‌මචාරීනං, අට්‌ඨානමෙතං අනවකාසො යං සො එකාදසන්‌නං බ්‍යසනානං අඤ්‌ඤතරං බ්‍යසනං න නිගච්‌ඡෙය්‍ය.
‘‘Yo so, bhikkhave, bhikkhu akkosako paribhāsako ariyūpavādo sabrahmacārīnaṃ, aṭṭhānametaṃ anavakāso yaṃ so ekādasannaṃ byasanānaṃ aññataraṃ byasanaṃ na nigaccheyya.
කතමෙසං එකාදසන්‌නං? අනධිගතං නාධිගච්‌ඡති, අධිගතා පරිහායති, සද්‌ධම්‌මස්‌ස න වොදායන්‌ති, සද්‌ධම්‌මෙසු වා අධිමානිකො හොති, අනභිරතො වා බ්‍රහ්‌මචරියං චරති, අඤ්‌ඤතරං වා සංකිලිට්‌ඨං ආපත්‌තිං ආපජ්‌ජති, සික්‌ඛං වා පච්‌චක්‌ඛාය හීනායාවත්‌තති, ගාළ්‌හං වා රොගාතඞ්‌කං ඵුසති, උම්‌මාදං වා පාපුණාති චිත්‌තක්‌ඛෙපං වා, සම්‌මූළ්‌හො කාලං කරොති, කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති – යො සො, භික්‌ඛවෙ, භික්‌ඛු අක්‌කොසකො පරිභාසකො අරියූපවාදො සබ්‍රහ්‌මචාරීනං, අට්‌ඨානමෙතං අනවකාසො යං සො ඉමෙසං එකාදසන්‌නං බ්‍යසනානං අඤ්‌ඤතරං බ්‍යසනං න නිගච්‌ඡෙය්‍යා’’ති. ඡට්‌ඨං.
Katamesaṃ ekādasannaṃ? Anadhigataṃ nādhigacchati, adhigatā parihāyati, saddhammassa na vodāyanti, saddhammesu vā adhimāniko hoti, anabhirato vā brahmacariyaṃ carati, aññataraṃ vā saṃkiliṭṭhaṃ āpattiṃ āpajjati, sikkhaṃ vā paccakkhāya hīnāyāvattati, gāḷhaṃ vā rogātaṅkaṃ phusati, ummādaṃ vā pāpuṇāti cittakkhepaṃ vā, sammūḷho kālaṃ karoti, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati – yo so, bhikkhave, bhikkhu akkosako paribhāsako ariyūpavādo sabrahmacārīnaṃ, aṭṭhānametaṃ anavakāso yaṃ so imesaṃ ekādasannaṃ byasanānaṃ aññataraṃ byasanaṃ na nigaccheyyā’’ti. Chaṭṭhaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1-6. කිමත්‌ථියසුත්‌තාදිවණ්‌ණනා • 1-6. Kimatthiyasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. කිමත්‌ථියසුත්‌තාදිවණ්‌ණනා • 1-10. Kimatthiyasuttādivaṇṇanā
