| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. சக்கவக்³கோ³
4. Cakkavaggo
1. சக்கஸுத்தவண்ணனா
1. Cakkasuttavaṇṇanā
31. சதுத்த²ஸ்ஸ பட²மே சத்தாரி சக்கானீதி எத்த² சக்கங் நாம தா³ருசக்கங், ரதனசக்கங், த⁴ம்மசக்கங், இரியாபத²சக்கங், ஸம்பத்திசக்கந்தி பஞ்சவித⁴ங். தத்த² ‘‘யங் பனித³ங், ஸம்ம, ரத²காரசக்கங் ச²ஹி மாஸேஹி நிட்டி²தங் சா²ரத்தூனேஹீ’’தி (அ॰ நி॰ 3.15) இத³ங் தா³ருசக்கங். ‘‘பிதரா பவத்திதங் சக்கங் அனுவத்தேதீ’’தி (ஸங்॰ நி॰ 1.215) இத³ங் ரதனசக்கங். ‘‘மயா பவத்திதங் சக்க’’ந்தி (ஸு॰ நி॰ 562; பு³॰ வங்॰ 27.17; ஜா॰ 1.1.104; 1.5.100, 103) இத³ங் த⁴ம்மசக்கங். ‘‘சதுசக்கங் நவத்³வார’’ந்தி (ஸங்॰ நி॰ 1.29, 109) இத³ங் இரியாபத²சக்கங். ‘‘சத்தாரிமானி, பி⁴க்க²வே, சக்கானி யேஹி ஸமன்னாக³தானங் தே³வமனுஸ்ஸானங் சதுசக்கங் பவத்ததீ’’தி (அ॰ நி॰ 4.31) இத³ங் ஸம்பத்திசக்கங். இதா⁴பி ஏததே³வ அதி⁴ப்பேதந்தி ஆஹ ‘‘சத்தாரி ஸம்பத்திசக்கானி வத்தந்தீ’’தி. அனுச்ச²விகே தே³ஸேதி புஞ்ஞகிரியாய ஸம்மாபடிபத்தியா அனுரூபதே³ஸே. ஸேவனங் காலேன காலங் உபஸங்கமனங். ப⁴ஜனங் ப⁴த்திவஸேன பயிருபாஸனங். அத்தனோ ஸம்மா ட²பனந்தி அத்தனோ சித்தஸந்தானஸ்ஸ யோனிஸோ ட²பனங். ஸத்³தா⁴தீ³ஸு நிவேஸனந்தி ஆஹ ‘‘ஸசே’’திஆதி³. இத³மேவ செத்த² பமாணந்தி இத³மேவ புப்³பே³கதபுஞ்ஞதாஸங்கா²தங் ஸம்பத்திசக்கங் ஏவ ஏதேஸு ஸம்பத்திசக்கேஸு பமாணபூ⁴தங் இதரேஸங் காரணபா⁴வதோ . தேனாஹ ‘‘யேன ஹீ’’திஆதி³. ஸோ ஏவ ச கதபுஞ்ஞோ புக்³க³லோ அத்தானங் ஸம்மா ட²பேதி அகதபுஞ்ஞஸ்ஸ தத³பா⁴வதோ.
31. Catutthassa paṭhame cattāri cakkānīti ettha cakkaṃ nāma dārucakkaṃ, ratanacakkaṃ, dhammacakkaṃ, iriyāpathacakkaṃ, sampatticakkanti pañcavidhaṃ. Tattha ‘‘yaṃ panidaṃ, samma, rathakāracakkaṃ chahi māsehi niṭṭhitaṃ chārattūnehī’’ti (a. ni. 3.15) idaṃ dārucakkaṃ. ‘‘Pitarā pavattitaṃ cakkaṃ anuvattetī’’ti (saṃ. ni. 1.215) idaṃ ratanacakkaṃ. ‘‘Mayā pavattitaṃ cakka’’nti (su. ni. 562; bu. vaṃ. 27.17; jā. 1.1.104; 1.5.100, 103) idaṃ dhammacakkaṃ. ‘‘Catucakkaṃ navadvāra’’nti (saṃ. ni. 1.29, 109) idaṃ iriyāpathacakkaṃ. ‘‘Cattārimāni, bhikkhave, cakkāni yehi samannāgatānaṃ devamanussānaṃ catucakkaṃ pavattatī’’ti (a. ni. 4.31) idaṃ sampatticakkaṃ. Idhāpi etadeva adhippetanti āha ‘‘cattāri sampatticakkāni vattantī’’ti. Anucchavike deseti puññakiriyāya sammāpaṭipattiyā anurūpadese. Sevanaṃ kālena kālaṃ upasaṅkamanaṃ. Bhajanaṃ bhattivasena payirupāsanaṃ. Attano sammā ṭhapananti attano cittasantānassa yoniso ṭhapanaṃ. Saddhādīsu nivesananti āha ‘‘sace’’tiādi. Idameva cettha pamāṇanti idameva pubbekatapuññatāsaṅkhātaṃ sampatticakkaṃ eva etesu sampatticakkesu pamāṇabhūtaṃ itaresaṃ kāraṇabhāvato . Tenāha ‘‘yena hī’’tiādi. So eva ca katapuñño puggalo attānaṃ sammā ṭhapeti akatapuññassa tadabhāvato.
சக்கஸுத்தவண்ணனா நிட்டி²தா.
Cakkasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. சக்கஸுத்தங் • 1. Cakkasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. சக்கஸுத்தவண்ணனா • 1. Cakkasuttavaṇṇanā
