| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৪. চক্কৰগ্গো
4. Cakkavaggo
১. চক্কসুত্তৰণ্ণনা
1. Cakkasuttavaṇṇanā
৩১. চতুত্থস্স পঠমে চত্তারি চক্কানীতি এত্থ চক্কং নাম দারুচক্কং, রতনচক্কং, ধম্মচক্কং, ইরিযাপথচক্কং, সম্পত্তিচক্কন্তি পঞ্চৰিধং। তত্থ ‘‘যং পনিদং, সম্ম, রথকারচক্কং ছহি মাসেহি নিট্ঠিতং ছারত্তূনেহী’’তি (অ॰ নি॰ ৩.১৫) ইদং দারুচক্কং। ‘‘পিতরা পৰত্তিতং চক্কং অনুৰত্তেতী’’তি (সং॰ নি॰ ১.২১৫) ইদং রতনচক্কং। ‘‘মযা পৰত্তিতং চক্ক’’ন্তি (সু॰ নি॰ ৫৬২; বু॰ ৰং॰ ২৭.১৭; জা॰ ১.১.১০৪; ১.৫.১০০, ১০৩) ইদং ধম্মচক্কং। ‘‘চতুচক্কং নৰদ্ৰার’’ন্তি (সং॰ নি॰ ১.২৯, ১০৯) ইদং ইরিযাপথচক্কং। ‘‘চত্তারিমানি, ভিক্খৰে, চক্কানি যেহি সমন্নাগতানং দেৰমনুস্সানং চতুচক্কং পৰত্ততী’’তি (অ॰ নি॰ ৪.৩১) ইদং সম্পত্তিচক্কং। ইধাপি এতদেৰ অধিপ্পেতন্তি আহ ‘‘চত্তারি সম্পত্তিচক্কানি ৰত্তন্তী’’তি। অনুচ্ছৰিকে দেসেতি পুঞ্ঞকিরিযায সম্মাপটিপত্তিযা অনুরূপদেসে। সেৰনং কালেন কালং উপসঙ্কমনং। ভজনং ভত্তিৰসেন পযিরুপাসনং। অত্তনো সম্মা ঠপনন্তি অত্তনো চিত্তসন্তানস্স যোনিসো ঠপনং। সদ্ধাদীসু নিৰেসনন্তি আহ ‘‘সচে’’তিআদি। ইদমেৰ চেত্থ পমাণন্তি ইদমেৰ পুব্বেকতপুঞ্ঞতাসঙ্খাতং সম্পত্তিচক্কং এৰ এতেসু সম্পত্তিচক্কেসু পমাণভূতং ইতরেসং কারণভাৰতো । তেনাহ ‘‘যেন হী’’তিআদি। সো এৰ চ কতপুঞ্ঞো পুগ্গলো অত্তানং সম্মা ঠপেতি অকতপুঞ্ঞস্স তদভাৰতো।
31. Catutthassa paṭhame cattāri cakkānīti ettha cakkaṃ nāma dārucakkaṃ, ratanacakkaṃ, dhammacakkaṃ, iriyāpathacakkaṃ, sampatticakkanti pañcavidhaṃ. Tattha ‘‘yaṃ panidaṃ, samma, rathakāracakkaṃ chahi māsehi niṭṭhitaṃ chārattūnehī’’ti (a. ni. 3.15) idaṃ dārucakkaṃ. ‘‘Pitarā pavattitaṃ cakkaṃ anuvattetī’’ti (saṃ. ni. 1.215) idaṃ ratanacakkaṃ. ‘‘Mayā pavattitaṃ cakka’’nti (su. ni. 562; bu. vaṃ. 27.17; jā. 1.1.104; 1.5.100, 103) idaṃ dhammacakkaṃ. ‘‘Catucakkaṃ navadvāra’’nti (saṃ. ni. 1.29, 109) idaṃ iriyāpathacakkaṃ. ‘‘Cattārimāni, bhikkhave, cakkāni yehi samannāgatānaṃ devamanussānaṃ catucakkaṃ pavattatī’’ti (a. ni. 4.31) idaṃ sampatticakkaṃ. Idhāpi etadeva adhippetanti āha ‘‘cattāri sampatticakkāni vattantī’’ti. Anucchavike deseti puññakiriyāya sammāpaṭipattiyā anurūpadese. Sevanaṃ kālena kālaṃ upasaṅkamanaṃ. Bhajanaṃ bhattivasena payirupāsanaṃ. Attano sammā ṭhapananti attano cittasantānassa yoniso ṭhapanaṃ. Saddhādīsu nivesananti āha ‘‘sace’’tiādi. Idameva cettha pamāṇanti idameva pubbekatapuññatāsaṅkhātaṃ sampatticakkaṃ eva etesu sampatticakkesu pamāṇabhūtaṃ itaresaṃ kāraṇabhāvato . Tenāha ‘‘yena hī’’tiādi. So eva ca katapuñño puggalo attānaṃ sammā ṭhapeti akatapuññassa tadabhāvato.
চক্কসুত্তৰণ্ণনা নিট্ঠিতা।
Cakkasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. চক্কসুত্তং • 1. Cakkasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১. চক্কসুত্তৰণ্ণনা • 1. Cakkasuttavaṇṇanā
