| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[434] 8. жаггаваагаж̇аад̇агаван̣н̣анаа
[434] 8. Cakkavākajātakavaṇṇanā
гаасааяавад̇т̇зд̇и ид̣̇ам̣ сад̇т̇аа ж̇зд̇аванз вихаранд̇о згам̣ лолабхигкум̣ аараб̣бха гат̇зси. со гира лоло ахоси бажжаяалуд̣̇д̇хо, аажарияубаж̇жхааяавад̇д̇аад̣̇ийни чад̣д̣зд̇ваа баад̇ова саавад̇т̇им̣ бависид̇ваа висаакааяа г̇зхз анзгакаад̣̇анийяабариваарам̣ яааг̇ум̣ бивид̇ваа наанаг̇г̇арасасаалимам̣сод̣̇анам̣ бхун̃ж̇ид̇вааби д̇зна ад̇ид̇д̇о д̇ад̇о жуул̣аанаат̇абин̣д̣игасса махааанаат̇абин̣д̣игасса госаларан̃н̃од̇и д̇зсам̣ д̇зсам̣ нивзсанаани санд̇хааяа вижари. ат̇згад̣̇ивасам̣ д̇асса лолабхаавам̣ аараб̣бха д̇хаммасабхааяам̣ гат̇ам̣ самудтаабзсум̣. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з д̇ам̣ бхигкум̣ баггосаабзд̇ваа ‘‘сажжам̣ гира д̇вам̣ бхигку лоло’’д̇и бужчид̇ваа ‘‘сажжам̣, бханд̇з’’д̇и вуд̇д̇з ‘‘бхигку гасмаа лолоси, буб̣б̣зби д̇вам̣ лолабхаавзна б̣аараан̣асияам̣ хад̇т̇игун̣абаад̣̇ийни каад̣̇ид̇ваа вижаранд̇о д̇зхи ад̇ид̇д̇о д̇ад̇о нигкамид̇ваа г̇ан̇г̇аад̇ийрз вижаранд̇о химаванд̇ам̣ бавадто’’д̇и вад̇ваа ад̇ийд̇ам̣ аахари.
Kāsāyavattheti idaṃ satthā jetavane viharanto ekaṃ lolabhikkhuṃ ārabbha kathesi. So kira lolo ahosi paccayaluddho, ācariyupajjhāyavattādīni chaḍḍetvā pātova sāvatthiṃ pavisitvā visākhāya gehe anekakhādanīyaparivāraṃ yāguṃ pivitvā nānaggarasasālimaṃsodanaṃ bhuñjitvāpi tena atitto tato cūḷaanāthapiṇḍikassa mahāanāthapiṇḍikassa kosalaraññoti tesaṃ tesaṃ nivesanāni sandhāya vicari. Athekadivasaṃ tassa lolabhāvaṃ ārabbha dhammasabhāyaṃ kathaṃ samuṭṭhāpesuṃ. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte taṃ bhikkhuṃ pakkosāpetvā ‘‘saccaṃ kira tvaṃ bhikkhu lolo’’ti pucchitvā ‘‘saccaṃ, bhante’’ti vutte ‘‘bhikkhu kasmā lolosi, pubbepi tvaṃ lolabhāvena bārāṇasiyaṃ hatthikuṇapādīni khāditvā vicaranto tehi atitto tato nikkhamitvā gaṅgātīre vicaranto himavantaṃ pavaṭṭho’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з зго лолагааго б̣аараан̣асияам̣ хад̇т̇игун̣абаад̣̇ийни каад̣̇ид̇ваа вижаранд̇о д̇зхи ад̇ид̇д̇о ‘‘г̇ан̇г̇аагуулз мажчамад̇ам̣ каад̣̇иссаамий’’д̇и г̇анд̇ваа д̇ад̇т̇а мад̇амажчз каад̣̇анд̇о гад̇ибаахам̣ васид̇ваа химаванд̇ам̣ бависид̇ваа наанаапалаапалаани каад̣̇анд̇о б̣ахумажчагажчабам̣ маханд̇ам̣ бад̣̇умасарам̣ бад̇ваа д̇ад̇т̇а суван̣н̣аван̣н̣з д̣̇вз жаггаваагз сзваалам̣ каад̣̇ид̇ваа васанд̇з д̣̇исваа ‘‘имз ад̇ивияа ван̣н̣асамбаннаа собхаг̇г̇аббад̇д̇аа, имзсам̣ бхож̇анам̣ манаабам̣ бхависсад̇и, имзсам̣ бхож̇анам̣ бужчид̇ваа ахамби д̇ад̣̇зва бхун̃ж̇ид̇ваа суван̣н̣аван̣н̣о бхависсаамий’’д̇и жинд̇зд̇ваа д̇зсам̣ санд̇игам̣ г̇анд̇ваа бадисант̇аарам̣ гад̇ваа згасмим̣ саакабарияанд̇з нисийд̣̇ид̇ваа д̇зсам̣ басам̣санабадисам̣яуд̇д̇ам̣ гат̇ам̣ гат̇знд̇о батамам̣ г̇аат̇амааха –
Atīte bārāṇasiyaṃ brahmadatte rajjaṃ kārente eko lolakāko bārāṇasiyaṃ hatthikuṇapādīni khāditvā vicaranto tehi atitto ‘‘gaṅgākūle macchamataṃ khādissāmī’’ti gantvā tattha matamacche khādanto katipāhaṃ vasitvā himavantaṃ pavisitvā nānāphalāphalāni khādanto bahumacchakacchapaṃ mahantaṃ padumasaraṃ patvā tattha suvaṇṇavaṇṇe dve cakkavāke sevālaṃ khāditvā vasante disvā ‘‘ime ativiya vaṇṇasampannā sobhaggappattā, imesaṃ bhojanaṃ manāpaṃ bhavissati, imesaṃ bhojanaṃ pucchitvā ahampi tadeva bhuñjitvā suvaṇṇavaṇṇo bhavissāmī’’ti cintetvā tesaṃ santikaṃ gantvā paṭisanthāraṃ katvā ekasmiṃ sākhapariyante nisīditvā tesaṃ pasaṃsanapaṭisaṃyuttaṃ kathaṃ kathento paṭhamaṃ gāthamāha –
69.
69.
‘‘гаасааяавад̇т̇з сагун̣з вад̣̇аами, д̣̇увз д̣̇увз нанд̣̇аманз жаранд̇з;
‘‘Kāsāyavatthe sakuṇe vadāmi, duve duve nandamane carante;
гам̣ ан̣д̣аж̇ам̣ ан̣д̣аж̇аа маанусзсу, ж̇аад̇им̣ басам̣санд̇и д̇ад̣̇ин̇гха б̣руут̇аа’’д̇и.
Kaṃ aṇḍajaṃ aṇḍajā mānusesu, jātiṃ pasaṃsanti tadiṅgha brūthā’’ti.
д̇ад̇т̇а гаасааяавад̇т̇зд̇и суван̣н̣аван̣н̣з гаасааяавад̇т̇з вияа. д̣̇увз д̣̇увзд̇и д̣̇вз д̣̇вз худ̇ваа. нанд̣̇аманзд̇и д̇удтажид̇д̇з. гам̣ ан̣д̣аж̇ам̣ ан̣д̣аж̇аа маанусзсу ж̇аад̇им̣ басам̣санд̇ийд̇и амбхо ан̣д̣аж̇аа д̇умхз мануссзсу басам̣санд̇аа гам̣ ан̣д̣аж̇ам̣ ж̇аад̇им̣ гад̇арам̣ наама ан̣д̣аж̇анд̇и вад̇ваа басам̣санд̇и, гам̣ сагун̣ам̣ наамаад̇и вад̇ваа д̇умхз мануссаанам̣ анд̇арз ван̣н̣знд̇ийд̇и ад̇т̇о. ‘‘гам̣ ан̣д̣аж̇ам̣ ан̣д̣аж̇амаанусзсуу’’д̇иби баато. д̇ассад̇т̇о – д̇умхз ан̣д̣аж̇зсу жа маанусзсу жа гад̇арам̣ ан̣д̣аж̇анд̇и вад̇ваа басам̣санд̇ийд̇и.
Tattha kāsāyavattheti suvaṇṇavaṇṇe kāsāyavatthe viya. Duve duveti dve dve hutvā. Nandamaneti tuṭṭhacitte. Kaṃ aṇḍajaṃ aṇḍajā mānusesu jātiṃ pasaṃsantīti ambho aṇḍajā tumhe manussesu pasaṃsantā kaṃ aṇḍajaṃ jātiṃ kataraṃ nāma aṇḍajanti vatvā pasaṃsanti, kaṃ sakuṇaṃ nāmāti vatvā tumhe manussānaṃ antare vaṇṇentīti attho. ‘‘Kaṃ aṇḍajaṃ aṇḍajamānusesū’’tipi pāṭho. Tassattho – tumhe aṇḍajesu ca mānusesu ca kataraṃ aṇḍajanti vatvā pasaṃsantīti.
д̇ам̣ суд̇ваа жаггавааго д̣̇уд̇ияам̣ г̇аат̇амааха –
Taṃ sutvā cakkavāko dutiyaṃ gāthamāha –
70.
70.
‘‘амхз мануссзсу мануссахим̣са, ануб̣б̣ад̇з жаггаваагз вад̣̇анд̇и;
‘‘Amhe manussesu manussahiṃsa, anubbate cakkavāke vadanti;
галяаан̣абхаавамхз д̣̇иж̇зсу саммад̇аа, абхируубаа вижараама ан̣н̣авз’’д̇и.
Kalyāṇabhāvamhe dijesu sammatā, abhirūpā vicarāma aṇṇave’’ti.
д̇ад̇т̇а мануссахим̣саад̇и гааго мануссз хим̣сад̇и вихзтзд̇и, д̇зна нам̣ звам̣ аалабад̇и. ануб̣б̣ад̇зд̇и ан̃н̃аман̃н̃ам̣ ануг̇ад̇з саммод̣̇амаанз вияасам̣ваасз. жаггаваагзд̇и жаггаваагаа наама саа ан̣д̣аж̇аж̇аад̇ийд̇и басам̣санд̇и ван̣н̣знд̇и гат̇знд̇и. д̣̇иж̇зсууд̇и яад̇д̇агаа багкино наама, д̇зсу маяам̣ ‘‘галяаан̣абхааваа’’д̇иби мануссзсу саммад̇аа. д̣̇уд̇ияз ад̇т̇авигаббз мануссзсу амхз ‘‘жаггаваагаа’’д̇иби вад̣̇анд̇и, д̣̇иж̇зсу бана маяам̣ ‘‘галяаан̣абхааваа’’д̇и саммад̇аа, ‘‘галяаан̣абхааваа’’д̇и но д̣̇иж̇аа вад̣̇анд̇ийд̇и ад̇т̇о. ан̣н̣авзд̇и имасмим̣ таанз саро ‘‘ан̣н̣аво’’д̇и вуд̇д̇о, имасмим̣ бад̣̇умасарз маяамзва д̣̇вз ж̇анаа барзсам̣ ахим̣санад̇о абхируубаа вижараамаад̇и ад̇т̇о. имиссааяа бана г̇аат̇ааяа жад̇уд̇т̇абад̣̇ам̣ ‘‘на гхаасахзд̇ууби гарома бааба’’нд̇и батанд̇и. д̇ассад̇т̇о – яасмаа маяам̣ гхаасахзд̇ууби баабам̣ на гарома, д̇асмаа ‘‘галяаан̣абхааваа’’д̇и амхз мануссзсу жа д̣̇иж̇зсу жа саммад̇аа.
Tattha manussahiṃsāti kāko manusse hiṃsati viheṭheti, tena naṃ evaṃ ālapati. Anubbateti aññamaññaṃ anugate sammodamāne viyasaṃvāse. Cakkavāketi cakkavākā nāma sā aṇḍajajātīti pasaṃsanti vaṇṇenti kathenti. Dijesūti yattakā pakkhino nāma, tesu mayaṃ ‘‘kalyāṇabhāvā’’tipi manussesu sammatā. Dutiye atthavikappe manussesu amhe ‘‘cakkavākā’’tipi vadanti, dijesu pana mayaṃ ‘‘kalyāṇabhāvā’’ti sammatā, ‘‘kalyāṇabhāvā’’ti no dijā vadantīti attho. Aṇṇaveti imasmiṃ ṭhāne saro ‘‘aṇṇavo’’ti vutto, imasmiṃ padumasare mayameva dve janā paresaṃ ahiṃsanato abhirūpā vicarāmāti attho. Imissāya pana gāthāya catutthapadaṃ ‘‘na ghāsahetūpi karoma pāpa’’nti paṭhanti. Tassattho – yasmā mayaṃ ghāsahetūpi pāpaṃ na karoma, tasmā ‘‘kalyāṇabhāvā’’ti amhe manussesu ca dijesu ca sammatā.
д̇ам̣ суд̇ваа гааго д̇ад̇ияам̣ г̇аат̇амааха –
Taṃ sutvā kāko tatiyaṃ gāthamāha –
71.
71.
‘‘гим̣ ан̣н̣авз гаани палаани бхун̃ж̇з, мам̣сам̣ гуд̇о каад̣̇ат̇а жаггаваагаа;
‘‘Kiṃ aṇṇave kāni phalāni bhuñje, maṃsaṃ kuto khādatha cakkavākā;
гим̣ бхож̇анам̣ бхун̃ж̇ат̇а во аномаа, б̣алан̃жа ван̣н̣о жа анаббаруубаа’’д̇и.
Kiṃ bhojanaṃ bhuñjatha vo anomā, balañca vaṇṇo ca anapparūpā’’ti.
д̇ад̇т̇а гинд̇и бужчаавасзна аалабанам̣, гим̣ бхо жаггаваагаад̇и вуд̇д̇ам̣ ход̇и. ан̣н̣авзд̇и имасмим̣ сарз. бхун̃ж̇зд̇и бхун̃ж̇ат̇а, гим̣ бхун̃ж̇ат̇аад̇и ад̇т̇о мам̣сам̣ гуд̇о каад̣̇ат̇аад̇и гад̇арабаан̣аанам̣ сарийрад̇о мам̣сам̣ каад̣̇ат̇а. бхун̃ж̇ат̇а вод̇и вогааро нибаад̇амад̇д̇ам̣, барабад̣̇зна ваасса самб̣анд̇хо ‘‘б̣алан̃жа ваа ван̣н̣о жа анаббаруубаа’’д̇и.
Tattha kinti pucchāvasena ālapanaṃ, kiṃ bho cakkavākāti vuttaṃ hoti. Aṇṇaveti imasmiṃ sare. Bhuñjeti bhuñjatha, kiṃ bhuñjathāti attho maṃsaṃ kuto khādathāti katarapāṇānaṃ sarīrato maṃsaṃ khādatha. Bhuñjatha voti vokāro nipātamattaṃ, parapadena vāssa sambandho ‘‘balañca vā vaṇṇo ca anapparūpā’’ti.
д̇ад̇о жаггавааго жад̇уд̇т̇ам̣ г̇аат̇амааха –
Tato cakkavāko catutthaṃ gāthamāha –
72.
72.
‘‘на ан̣н̣авз санд̇и палаани д̇хан̇га, мам̣сам̣ гуд̇о каад̣̇ид̇ум̣ жаггаваагз;
‘‘Na aṇṇave santi phalāni dhaṅka, maṃsaṃ kuto khādituṃ cakkavāke;
сзваалабхагкамха абаан̣абхож̇анаа, на гхаасахзд̇ууби гарома бааба’’нд̇и.
Sevālabhakkhamha apāṇabhojanā, na ghāsahetūpi karoma pāpa’’nti.
д̇ад̇т̇а жаггаваагзд̇и жаггаваагасса. абаан̣абхож̇анаад̇и баан̣агарахид̇ауд̣̇агабхож̇анаа. амхааган̃хи сзваалан̃жзва уд̣̇аган̃жа бхож̇ананд̇и д̣̇ассзд̇и. на гхаасахзд̇ууд̇и д̇умхаад̣̇исаа вияа маяам̣ гхаасахзд̇у баабам̣ на гаромаад̇и.
Tattha cakkavāketi cakkavākassa. Apāṇabhojanāti pāṇakarahitaudakabhojanā. Amhākañhi sevālañceva udakañca bhojananti dasseti. Na ghāsahetūti tumhādisā viya mayaṃ ghāsahetu pāpaṃ na karomāti.
д̇ад̇о гааго д̣̇вз г̇аат̇аа абхааси –
Tato kāko dve gāthā abhāsi –
73.
73.
‘‘на мз ид̣̇ам̣ ружжад̇и жаггаваага, асмим̣ бхавз бхож̇анасаннигаасо;
‘‘Na me idaṃ ruccati cakkavāka, asmiṃ bhave bhojanasannikāso;
ахоси буб̣б̣з д̇ад̇о мз ан̃н̃ат̇аа, ижжзва мз вимад̇и зд̇т̇а ж̇аад̇аа.
Ahosi pubbe tato me aññathā, icceva me vimati ettha jātā.
74.
74.
‘‘ахамби мам̣саани палаани бхун̃ж̇з, аннаани жа лон̣ияад̇злияаани;
‘‘Ahampi maṃsāni phalāni bhuñje, annāni ca loṇiyateliyāni;
расам̣ мануссзсу лабхаами бход̇д̇ум̣, суурова сан̇г̇аамамукам̣ виж̇зд̇ваа;
Rasaṃ manussesu labhāmi bhottuṃ, sūrova saṅgāmamukhaṃ vijetvā;
на жа мз д̇аад̣̇исо ван̣н̣о, жаггаваага яат̇аа д̇аваа’’д̇и.
Na ca me tādiso vaṇṇo, cakkavāka yathā tavā’’ti.
д̇ад̇т̇а ид̣̇анд̇и ид̣̇ам̣ д̇умхаагам̣ бхун̃ж̇анабхож̇анам̣ маяхам̣ на ружжад̇и. асмим̣ бхавз бхож̇анасаннигаасод̇и имасмим̣ бхавз бхож̇анасаннигаасо яам̣ имасмим̣ жаггаваагабхавз бхож̇анам̣, д̇вам̣ д̇зна саннигаасо д̇ам̣сад̣̇исо д̇ад̣̇ануруубо ахоси, ад̇ивияа басаннасарийросийд̇и ад̇т̇о. д̇ад̇о мз ан̃н̃ат̇аад̇и яам̣ маяхам̣ буб̣б̣з д̇умхз д̣̇исваава зд̇з зд̇т̇а наанаавид̇хаани палаани жзва мажчамам̣сан̃жа каад̣̇анд̇и, д̇зна звам̣ собхаг̇г̇аббад̇д̇аад̇и ахоси, ид̣̇аани мз д̇ад̇о ан̃н̃ат̇аа ход̇ийд̇и ад̇т̇о. ижжзва мзд̇и зд̇знзва мз гааран̣зна зд̇т̇а д̇умхаагам̣ сарийраван̣н̣з вимад̇и ж̇аад̇аа ‘‘гат̇ам̣ ну ко зд̇з зваруубам̣ луукабхож̇анам̣ бхун̃ж̇анд̇аа ван̣н̣аванд̇о ж̇аад̇аа’’д̇и. ахамбийд̇и ахан̃хи, аяамзва ваа баато . бхун̃ж̇зд̇и бхун̃ж̇аами. аннаани жаад̇и бхож̇анаани жа. лон̣ияад̇злияаанийд̇и лон̣ад̇злаяуд̇д̇аани. расанд̇и мануссзсу барибхог̇ам̣ бан̣ийд̇арасам̣. виж̇зд̇ваад̇и яат̇аа сууро вийраяод̇хо сан̇г̇аамамукам̣ виж̇зд̇ваа вилумбид̇ваа барибхун̃ж̇ад̇и, д̇ат̇аа вилумбид̇ваа барибхун̃ж̇аамийд̇и ад̇т̇о. яат̇аа д̇аваад̇и звам̣ бан̣ийд̇ам̣ бхож̇анам̣ бхун̃ж̇анд̇ассаби мама д̇аад̣̇исо ван̣н̣о над̇т̇и, яаад̣̇исо д̇ава ван̣н̣о, д̇зна д̇ава важанам̣ на сад̣̇д̣̇ахаамийд̇и д̣̇ийбзд̇и.
Tattha idanti idaṃ tumhākaṃ bhuñjanabhojanaṃ mayhaṃ na ruccati. Asmiṃ bhave bhojanasannikāsoti imasmiṃ bhave bhojanasannikāso yaṃ imasmiṃ cakkavākabhave bhojanaṃ, tvaṃ tena sannikāso taṃsadiso tadanurūpo ahosi, ativiya pasannasarīrosīti attho. Tato me aññathāti yaṃ mayhaṃ pubbe tumhe disvāva ete ettha nānāvidhāni phalāni ceva macchamaṃsañca khādanti, tena evaṃ sobhaggappattāti ahosi, idāni me tato aññathā hotīti attho. Icceva meti eteneva me kāraṇena ettha tumhākaṃ sarīravaṇṇe vimati jātā ‘‘kathaṃ nu kho ete evarūpaṃ lūkhabhojanaṃ bhuñjantā vaṇṇavanto jātā’’ti. Ahampīti ahañhi, ayameva vā pāṭho . Bhuñjeti bhuñjāmi. Annāni cāti bhojanāni ca. Loṇiyateliyānīti loṇatelayuttāni. Rasanti manussesu paribhogaṃ paṇītarasaṃ. Vijetvāti yathā sūro vīrayodho saṅgāmamukhaṃ vijetvā vilumpitvā paribhuñjati, tathā vilumpitvā paribhuñjāmīti attho. Yathā tavāti evaṃ paṇītaṃ bhojanaṃ bhuñjantassapi mama tādiso vaṇṇo natthi, yādiso tava vaṇṇo, tena tava vacanaṃ na saddahāmīti dīpeti.
ат̇асса ван̣н̣асамбад̇д̇ияаа абхаавагааран̣ам̣ ад̇д̇ано жа бхаавагааран̣ам̣ гат̇знд̇о жаггавааго сзсаг̇аат̇аа абхааси –
Athassa vaṇṇasampattiyā abhāvakāraṇaṃ attano ca bhāvakāraṇaṃ kathento cakkavāko sesagāthā abhāsi –
75.
75.
‘‘асуд̣̇д̇хабхагкоси кан̣аанубаад̇ий, гижчзна д̇з лаб̣бхад̇и аннабаанам̣;
‘‘Asuddhabhakkhosi khaṇānupātī, kicchena te labbhati annapānaṃ;
на д̇уссасий ругкапалзхи д̇хан̇га, мам̣саани ваа яаани сусаанамаж̇жхз.
Na tussasī rukkhaphalehi dhaṅka, maṃsāni vā yāni susānamajjhe.
76.
76.
‘‘яо саахасзна ад̇хиг̇амма бхог̇з, барибхун̃ж̇ад̇и д̇хан̇га кан̣аанубаад̇ий;
‘‘Yo sāhasena adhigamma bhoge, paribhuñjati dhaṅka khaṇānupātī;
д̇ад̇о убаггосад̇и нам̣ сабхааво, убаггудто ван̣н̣аб̣алам̣ ж̇ахаад̇и.
Tato upakkosati naṃ sabhāvo, upakkuṭṭho vaṇṇabalaṃ jahāti.
77.
77.
‘‘аббамби жз ниб̣б̣уд̇им̣ бхун̃ж̇ад̇ий яад̣̇и, асаахасзна абаруубагхаад̇ий;
‘‘Appampi ce nibbutiṃ bhuñjatī yadi, asāhasena aparūpaghātī;
б̣алан̃жа ван̣н̣о жа д̇ад̣̇асса ход̇и, на хи саб̣б̣о аахаарамаязна ван̣н̣о’’д̇и.
Balañca vaṇṇo ca tadassa hoti, na hi sabbo āhāramayena vaṇṇo’’ti.
д̇ад̇т̇а асуд̣̇д̇хабхагкосийд̇и д̇вам̣ т̇знзд̇ваа ван̃жзд̇ваа бхагканад̇о асуд̣̇д̇хабхагко аси. кан̣аанубаад̇ийд̇и бамаад̣̇агкан̣з анубад̇анасийло. гижчзна д̇зд̇и д̇аяаа д̣̇угкзна аннабаанам̣ лаб̣бхад̇и. мам̣саани ваа яаанийд̇и яаани ваа сусаанамаж̇жхз мам̣саани, д̇зхи на д̇уссаси. д̇ад̇од̇и бажчаа. убаггосад̇и нам̣ сабхаавод̇и ад̇д̇аава д̇ам̣ буг̇г̇алам̣ г̇арахи. убаггудтод̇и ад̇д̇анааби барзхиби убаггудто г̇арахид̇о виббадисаарид̇ааяа ван̣н̣ан̃жа б̣алан̃жа ж̇ахааси. ниб̣б̣уд̇им̣ бхун̃ж̇ад̇ий яад̣̇ийд̇и яад̣̇и бана барам̣ авихзтзд̇ваа аббагамби д̇хаммалад̣̇д̇хам̣ ниб̣б̣уд̇ибхож̇анам̣ бхун̃ж̇ад̇и. д̇ад̣̇асса ход̇ийд̇и д̇ад̣̇аа асса бан̣д̣ид̇асса сарийрз б̣алан̃жа ван̣н̣о жа ход̇и. аахаарамаязнаад̇и наанаббагаарзна аахаарзнзва. ид̣̇ам̣ вуд̇д̇ам̣ ход̇и – бхо гаага, ван̣н̣о наамзса жад̇усамудтаано, со на аахаарамад̇д̇знзва ход̇и, уд̇ужид̇д̇агаммзхиби ход̇иязваад̇и.
Tattha asuddhabhakkhosīti tvaṃ thenetvā vañcetvā bhakkhanato asuddhabhakkho asi. Khaṇānupātīti pamādakkhaṇe anupatanasīlo. Kicchenateti tayā dukkhena annapānaṃ labbhati. Maṃsāni vā yānīti yāni vā susānamajjhe maṃsāni, tehi na tussasi. Tatoti pacchā. Upakkosati naṃ sabhāvoti attāva taṃ puggalaṃ garahi. Upakkuṭṭhoti attanāpi parehipi upakkuṭṭho garahito vippaṭisāritāya vaṇṇañca balañca jahāsi. Nibbutiṃ bhuñjatī yadīti yadi pana paraṃ aviheṭhetvā appakampi dhammaladdhaṃ nibbutibhojanaṃ bhuñjati. Tadassa hotīti tadā assa paṇḍitassa sarīre balañca vaṇṇo ca hoti. Āhāramayenāti nānappakārena āhāreneva. Idaṃ vuttaṃ hoti – bho kāka, vaṇṇo nāmesa catusamuṭṭhāno, so na āhāramatteneva hoti, utucittakammehipi hotiyevāti.
звам̣ жаггавааго анзгабарияааязна гаагам̣ г̇арахи. гааго харааяид̇ваа ‘‘на маяхам̣ д̇ава ван̣н̣зна ад̇т̇о, гаа гаа’’д̇и вассанд̇о балааяи.
Evaṃ cakkavāko anekapariyāyena kākaṃ garahi. Kāko harāyitvā ‘‘na mayhaṃ tava vaṇṇena attho, kā kā’’ti vassanto palāyi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз лолабхигку анааг̇аамипалз бад̇идтахи. д̇ад̣̇аа гааго лолабхигку ахоси, жаггаваагий раахуламаад̇аа, жаггавааго бана ахамзва ахосинд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne lolabhikkhu anāgāmiphale patiṭṭhahi. Tadā kāko lolabhikkhu ahosi, cakkavākī rāhulamātā, cakkavāko pana ahameva ahosinti.
жаггаваагаж̇аад̇агаван̣н̣анаа адтамаа.
Cakkavākajātakavaṇṇanā aṭṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 434. жаггаваагаж̇аад̇агам̣ • 434. Cakkavākajātakaṃ
