| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
2. சக்கவாகங்க³பஞ்ஹோ
2. Cakkavākaṅgapañho
2. ‘‘ப⁴ந்தே நாக³ஸேன, ‘சக்கவாகஸ்ஸ தீணி அங்கா³னி க³ஹேதப்³பா³னீ’தி யங் வதே³ஸி, கதமானி தானி தீணி அங்கா³னி க³ஹேதப்³பா³னீதி’’? ‘‘யதா², மஹாராஜ, சக்கவாகோ யாவ ஜீவிதபரியாதா³னா து³தியிகங் ந விஜஹதி, ஏவமேவ கோ², மஹாராஜ, யோகி³னா யோகா³வசரேன யாவ ஜீவிதபரியாதா³னா யோனிஸோ மனஸிகாரோ ந விஜஹிதப்³போ³. இத³ங், மஹாராஜ, சக்கவாகஸ்ஸ பட²மங் அங்க³ங் க³ஹேதப்³ப³ங்.
2. ‘‘Bhante nāgasena, ‘cakkavākassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānīti’’? ‘‘Yathā, mahārāja, cakkavāko yāva jīvitapariyādānā dutiyikaṃ na vijahati, evameva kho, mahārāja, yoginā yogāvacarena yāva jīvitapariyādānā yoniso manasikāro na vijahitabbo. Idaṃ, mahārāja, cakkavākassa paṭhamaṃ aṅgaṃ gahetabbaṃ.
‘‘புன சபரங், மஹாராஜ, சக்கவாகோ ஸேவாலபணகப⁴க்கோ², தேன ச ஸந்துட்டி²ங் ஆபஜ்ஜதி, தாய ச ஸந்துட்டி²யா ப³லேன ச வண்ணேன ச ந பரிஹாயதி, ஏவமேவ கோ², மஹாராஜ, யோகி³னா யோகா³வசரேன யதா²லாப⁴ஸந்தோஸோ கரணீயோ, யதா²லாப⁴ஸந்துட்டோ² கோ², மஹாராஜ, யோகீ³ யோகா³வசரோ ந பரிஹாயதி ஸீலேன, ந பரிஹாயதி ஸமாதி⁴னா, ந பரிஹாயதி பஞ்ஞாய, ந பரிஹாயதி விமுத்தியா, ந பரிஹாயதி விமுத்திஞாணத³ஸ்ஸனேன, ந பரிஹாயதி ஸப்³பே³ஹி குஸலேஹி த⁴ம்மேஹி. இத³ங், மஹாராஜ, சக்கவாகஸ்ஸ து³தியங் அங்க³ங் க³ஹேதப்³ப³ங்.
‘‘Puna caparaṃ, mahārāja, cakkavāko sevālapaṇakabhakkho, tena ca santuṭṭhiṃ āpajjati, tāya ca santuṭṭhiyā balena ca vaṇṇena ca na parihāyati, evameva kho, mahārāja, yoginā yogāvacarena yathālābhasantoso karaṇīyo, yathālābhasantuṭṭho kho, mahārāja, yogī yogāvacaro na parihāyati sīlena, na parihāyati samādhinā, na parihāyati paññāya, na parihāyati vimuttiyā, na parihāyati vimuttiñāṇadassanena, na parihāyati sabbehi kusalehi dhammehi. Idaṃ, mahārāja, cakkavākassa dutiyaṃ aṅgaṃ gahetabbaṃ.
‘‘புன சபரங், மஹாராஜ, சக்கவாகோ பாணே ந விஹேட²யதி, ஏவமேவ கோ², மஹாராஜ, யோகி³னா யோகா³வசரேன நிஹிதத³ண்டே³ன நிஹிதஸத்தே²ன லஜ்ஜினா த³யாபன்னேன ஸப்³ப³பாணபூ⁴தஹிதானுகம்பினா ப⁴விதப்³ப³ங். இத³ங், மஹாராஜ, சக்கவாகஸ்ஸ ததியங் அங்க³ங் க³ஹேதப்³ப³ங். பா⁴ஸதம்பேதங், மஹாராஜ, ப⁴க³வதா தே³வாதிதே³வேன சக்கவாகஜாதகே –
‘‘Puna caparaṃ, mahārāja, cakkavāko pāṇe na viheṭhayati, evameva kho, mahārāja, yoginā yogāvacarena nihitadaṇḍena nihitasatthena lajjinā dayāpannena sabbapāṇabhūtahitānukampinā bhavitabbaṃ. Idaṃ, mahārāja, cakkavākassa tatiyaṃ aṅgaṃ gahetabbaṃ. Bhāsatampetaṃ, mahārāja, bhagavatā devātidevena cakkavākajātake –
‘‘‘யோ ந ஹந்தி ந கா⁴தேதி, ந ஜினாதி ந ஜாபயே;
‘‘‘Yo na hanti na ghāteti, na jināti na jāpaye;
மெத்தங்ஸோ 1 ஸப்³ப³பூ⁴தேஸு, வேரங் தஸ்ஸ ந கேனசீ’’’தி.
Mettaṃso 2 sabbabhūtesu, veraṃ tassa na kenacī’’’ti.
சக்கவாகங்க³பஞ்ஹோ து³தியோ.
Cakkavākaṅgapañho dutiyo.
Footnotes:
