| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
2. චක්‌කවාකඞ්‌ගපඤ්‌හො
2. Cakkavākaṅgapañho
2. ‘‘භන්‌තෙ නාගසෙන, ‘චක්‌කවාකස්‌ස තීණි අඞ්‌ගානි ගහෙතබ්‌බානී’ති යං වදෙසි, කතමානි තානි තීණි අඞ්‌ගානි ගහෙතබ්‌බානීති’’? ‘‘යථා, මහාරාජ, චක්‌කවාකො යාව ජීවිතපරියාදානා දුතියිකං න විජහති, එවමෙව ඛො, මහාරාජ, යොගිනා යොගාවචරෙන යාව ජීවිතපරියාදානා යොනිසො මනසිකාරො න විජහිතබ්‌බො. ඉදං, මහාරාජ, චක්‌කවාකස්‌ස පඨමං අඞ්‌ගං ගහෙතබ්‌බං.
2. ‘‘Bhante nāgasena, ‘cakkavākassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānīti’’? ‘‘Yathā, mahārāja, cakkavāko yāva jīvitapariyādānā dutiyikaṃ na vijahati, evameva kho, mahārāja, yoginā yogāvacarena yāva jīvitapariyādānā yoniso manasikāro na vijahitabbo. Idaṃ, mahārāja, cakkavākassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, චක්‌කවාකො සෙවාලපණකභක්‌ඛො, තෙන ච සන්‌තුට්‌ඨිං ආපජ්‌ජති, තාය ච සන්‌තුට්‌ඨියා බලෙන ච වණ්‌ණෙන ච න පරිහායති, එවමෙව ඛො, මහාරාජ, යොගිනා යොගාවචරෙන යථාලාභසන්‌තොසො කරණීයො, යථාලාභසන්‌තුට්‌ඨො ඛො, මහාරාජ, යොගී යොගාවචරො න පරිහායති සීලෙන, න පරිහායති සමාධිනා, න පරිහායති පඤ්‌ඤාය, න පරිහායති විමුත්‌තියා, න පරිහායති විමුත්‌තිඤාණදස්‌සනෙන, න පරිහායති සබ්‌බෙහි කුසලෙහි ධම්‌මෙහි. ඉදං, මහාරාජ, චක්‌කවාකස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, cakkavāko sevālapaṇakabhakkho, tena ca santuṭṭhiṃ āpajjati, tāya ca santuṭṭhiyā balena ca vaṇṇena ca na parihāyati, evameva kho, mahārāja, yoginā yogāvacarena yathālābhasantoso karaṇīyo, yathālābhasantuṭṭho kho, mahārāja, yogī yogāvacaro na parihāyati sīlena, na parihāyati samādhinā, na parihāyati paññāya, na parihāyati vimuttiyā, na parihāyati vimuttiñāṇadassanena, na parihāyati sabbehi kusalehi dhammehi. Idaṃ, mahārāja, cakkavākassa dutiyaṃ aṅgaṃ gahetabbaṃ.
‘‘පුන චපරං, මහාරාජ, චක්‌කවාකො පාණෙ න විහෙඨයති, එවමෙව ඛො, මහාරාජ, යොගිනා යොගාවචරෙන නිහිතදණ්‌ඩෙන නිහිතසත්‌ථෙන ලජ්‌ජිනා දයාපන්‌නෙන සබ්‌බපාණභූතහිතානුකම්‌පිනා භවිතබ්‌බං. ඉදං, මහාරාජ, චක්‌කවාකස්‌ස තතියං අඞ්‌ගං ගහෙතබ්‌බං. භාසතම්‌පෙතං, මහාරාජ, භගවතා දෙවාතිදෙවෙන චක්‌කවාකජාතකෙ –
‘‘Puna caparaṃ, mahārāja, cakkavāko pāṇe na viheṭhayati, evameva kho, mahārāja, yoginā yogāvacarena nihitadaṇḍena nihitasatthena lajjinā dayāpannena sabbapāṇabhūtahitānukampinā bhavitabbaṃ. Idaṃ, mahārāja, cakkavākassa tatiyaṃ aṅgaṃ gahetabbaṃ. Bhāsatampetaṃ, mahārāja, bhagavatā devātidevena cakkavākajātake –
‘‘‘යො න හන්‌ති න ඝාතෙති, න ජිනාති න ජාපයෙ;
‘‘‘Yo na hanti na ghāteti, na jināti na jāpaye;
මෙත්‌තංසො 1 සබ්‌බභූතෙසු, වෙරං තස්‌ස න කෙනචී’’’ති.
Mettaṃso 2 sabbabhūtesu, veraṃ tassa na kenacī’’’ti.
චක්‌කවාකඞ්‌ගපඤ්‌හො දුතියො.
Cakkavākaṅgapañho dutiyo.
Footnotes:
