| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
१०. चक्कवत्तिअच्छरियसुत्तवण्णना
10. Cakkavattiacchariyasuttavaṇṇanā
१३०. दसमे खत्तियपरिसाति अभिसित्ता अनभिसित्ता च खत्तिया । ते हि किर ‘‘राजा चक्कवत्ती नाम अभिरूपो पासादिको होति, आकासेन विचरन्तो रज्जं अनुसासति, धम्मिको धम्मराजा’’ति तस्स गुणकथं सुत्वा सवनेन दस्सनम्हि समेन्ते अत्तमना होन्ति। भासतीति ‘‘कथं, ताता, राजधम्मं पूरेथ, पवेणिं रक्खथा’’ति पटिसन्थारं करोति। ब्राह्मणेसु पन ‘‘कथञ्च, आचरिया, मन्ते वाचेथ, अन्तेवासिका मन्ते गण्हन्ति, दक्खिणं वा वत्थानि वा सीलं वा लभथा’’ति एवं पटिसन्थारं करोति। गहपतीसु ‘‘कथं, ताता, न वो राजकुलतो दण्डेन वा बन्धनेन वा पीळा अत्थि, सम्मा देवो धारं अनुप्पवेच्छति, सस्सानि सम्पज्जन्ती’’ति एवं पटिसन्थारं करोति। समणेसु ‘‘कथं, भन्ते, कच्चि पब्बजितपरिक्खारा सुलभा, समणधम्मे नप्पमज्जथा’’ति एवं पटिसन्थारं करोतीति।
130. Dasame khattiyaparisāti abhisittā anabhisittā ca khattiyā . Te hi kira ‘‘rājā cakkavattī nāma abhirūpo pāsādiko hoti, ākāsena vicaranto rajjaṃ anusāsati, dhammiko dhammarājā’’ti tassa guṇakathaṃ sutvā savanena dassanamhi samente attamanā honti. Bhāsatīti ‘‘kathaṃ, tātā, rājadhammaṃ pūretha, paveṇiṃ rakkhathā’’ti paṭisanthāraṃ karoti. Brāhmaṇesu pana ‘‘kathañca, ācariyā, mante vācetha, antevāsikā mante gaṇhanti, dakkhiṇaṃ vā vatthāni vā sīlaṃ vā labhathā’’ti evaṃ paṭisanthāraṃ karoti. Gahapatīsu ‘‘kathaṃ, tātā, na vo rājakulato daṇḍena vā bandhanena vā pīḷā atthi, sammā devo dhāraṃ anuppavecchati, sassāni sampajjantī’’ti evaṃ paṭisanthāraṃ karoti. Samaṇesu ‘‘kathaṃ, bhante, kacci pabbajitaparikkhārā sulabhā, samaṇadhamme nappamajjathā’’ti evaṃ paṭisanthāraṃ karotīti.
भयवग्गो ततियो।
Bhayavaggo tatiyo.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / १०. चक्कवत्तिअच्छरियसुत्तं • 10. Cakkavattiacchariyasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ९-१०. आनन्दअच्छरियसुत्तादिवण्णना • 9-10. Ānandaacchariyasuttādivaṇṇanā
