| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
11. ஸோதாபத்திஸங்யுத்தங்
11. Sotāpattisaṃyuttaṃ
1. வேளுத்³வாரவக்³கோ³
1. Veḷudvāravaggo
1. சக்கவத்திராஜஸுத்தவண்ணனா
1. Cakkavattirājasuttavaṇṇanā
997. ஸோதாபத்திஸங்யுத்தஸ்ஸ பட²மே கிஞ்சாபீதி அனுக்³க³ஹக³ரஹணேஸு நிபாதோ. சதுன்னஞ்ஹி மஹாதீ³பானங் இஸ்ஸரியாதி⁴பச்சங் ரஜ்ஜங் அனுக்³க³ண்ஹந்தோ சதுன்னஞ்ச அபாயானங் அப்பஹீனபா⁴வங் க³ரஹந்தோ ஸத்தா² ‘‘கிஞ்சாபி, பி⁴க்க²வே, ராஜா சக்கவத்தீ’’திஆதி³மாஹ. தத்த² சதுன்னங் தீ³பானந்தி த்³விஸஹஸ்ஸதீ³பபரிவாரானங் சதுன்னங் மஹாதீ³பானங். இஸ்ஸரியாதி⁴பச்சந்தி இஸ்ஸரபா⁴வோ இஸ்ஸரியங், அதி⁴பதிபா⁴வோ ஆதி⁴பச்சங், இஸ்ஸரியங் ஆதி⁴பச்சங் ஏதஸ்மிங் ரஜ்ஜே, ந சே²த³னபே⁴த³னந்தி இஸ்ஸரியாதி⁴பச்சங். காரெத்வாதி ஏவரூபங் ரஜ்ஜங் பவத்தாபெத்வா. கிஞ்சாபி, பி⁴க்க²வே, அரியஸாவகோதி எத்த² அனுக்³க³ஹபஸங்ஸாஸு நிபாதோ. பிண்டி³யாலோபேன ஹி யாபனங் அனுக்³க³ஹந்தோ சதுன்னஞ்ச அபாயானங் பஹீனபா⁴வங் பஸங்ஸந்தோ ஸத்தா² ‘‘கிஞ்சாபி, பி⁴க்க²வே, அரியஸாவகோ’’திஆதி³மாஹ. தத்த² நந்தகானீதி அனந்தகானி. தேரஸஹத்தோ²பி ஹி வத்த²ஸாடகோ த³ஸச்சே²த³னதோ பட்டா²ய நந்தகந்தேவ ஸங்க²ங் க³ச்ச²தி.
997. Sotāpattisaṃyuttassa paṭhame kiñcāpīti anuggahagarahaṇesu nipāto. Catunnañhi mahādīpānaṃ issariyādhipaccaṃ rajjaṃ anuggaṇhanto catunnañca apāyānaṃ appahīnabhāvaṃ garahanto satthā ‘‘kiñcāpi, bhikkhave, rājā cakkavattī’’tiādimāha. Tattha catunnaṃ dīpānanti dvisahassadīpaparivārānaṃ catunnaṃ mahādīpānaṃ. Issariyādhipaccanti issarabhāvo issariyaṃ, adhipatibhāvo ādhipaccaṃ, issariyaṃ ādhipaccaṃ etasmiṃ rajje, na chedanabhedananti issariyādhipaccaṃ. Kāretvāti evarūpaṃ rajjaṃ pavattāpetvā. Kiñcāpi, bhikkhave, ariyasāvakoti ettha anuggahapasaṃsāsu nipāto. Piṇḍiyālopena hi yāpanaṃ anuggahanto catunnañca apāyānaṃ pahīnabhāvaṃ pasaṃsanto satthā ‘‘kiñcāpi, bhikkhave, ariyasāvako’’tiādimāha. Tattha nantakānīti anantakāni. Terasahatthopi hi vatthasāṭako dasacchedanato paṭṭhāya nantakanteva saṅkhaṃ gacchati.
அவேச்சப்பஸாதே³னாதி அசலப்பஸாதே³ன. ஸோ பனாயங் பஸாதோ³ கிங் ஏகோ, அனேகோதி? ஏகோவ, ஸோ மக்³கே³ன ஆக³தப்பஸாதோ³. யேஸு பன வத்தூ²ஸு அபுப்³ப³ங் அசரிமங் ருஹதி, தேஸங் வஸேன ‘‘பு³த்³தே⁴ அவேச்சப்பஸாதே³னா’’திஆதி³னா நயேன திதா⁴ வுத்தோ. யஸ்மா ச ஏகோ, தஸ்மாவ நின்னானாகரணோ ஹோதி. அரியஸாவகஸ்ஸ ஹி பு³த்³தே⁴யேவ பஸாதோ³ ச பேமஞ்ச கா³ரவஞ்ச மஹந்தங், ந த⁴ம்மே வா ஸங்கே⁴ வா, த⁴ம்மேயேவ வா மஹந்தங் , ந பு³த்³தே⁴ வா ஸங்கே⁴ வா, ஸங்கே⁴யேவ வா மஹந்தங், ந பு³த்³தே⁴ வா த⁴ம்மே வாதி ஏதங் நத்தி². இதிபி ஸோ ப⁴க³வாதிஆதீ³னி விஸுத்³தி⁴மக்³கே³ வித்தா²ரிதானேவ.
Aveccappasādenāti acalappasādena. So panāyaṃ pasādo kiṃ eko, anekoti? Ekova, so maggena āgatappasādo. Yesu pana vatthūsu apubbaṃ acarimaṃ ruhati, tesaṃ vasena ‘‘buddhe aveccappasādenā’’tiādinā nayena tidhā vutto. Yasmā ca eko, tasmāva ninnānākaraṇo hoti. Ariyasāvakassa hi buddheyeva pasādo ca pemañca gāravañca mahantaṃ, na dhamme vā saṅghe vā, dhammeyeva vā mahantaṃ , na buddhe vā saṅghe vā, saṅgheyeva vā mahantaṃ, na buddhe vā dhamme vāti etaṃ natthi. Itipi so bhagavātiādīni visuddhimagge vitthāritāneva.
அரியகந்தேஹீதி அரியானங் கந்தேஹி பியேஹி மனாபேஹி. பஞ்ச ஹி ஸீலானி ப⁴வந்தரக³தாபி அரியா ந கோபெந்தி, ஏவங் தேஸங் பியானி. தானி ஸந்தா⁴யேதங் வுத்தங். அக²ண்டே³ஹீதிஆதி³ ஸதி³ஸவஸேன வுத்தங். முக²வட்டியஞ்ஹி சி²ன்னேகதே³ஸா பாதி க²ண்டா³தி வுச்சதி, மஜ்ஜே² பி⁴ன்னா சி²த்³தா³தி, ஏகஸ்மிங் பதே³ஸே விஸபா⁴க³வண்ணா கா³வீ ஸப³லாதி, நானாபி³ந்து³சித்தா கம்மாஸாதி, ஏவமேவ படிபாடியா ஆதி³ம்ஹி வா அந்தே வா பி⁴ன்னங் ஸீலங் க²ண்ட³ங் நாம, மஜ்ஜே² பி⁴ன்னங் சி²த்³த³ங், யத்த² கத்த²சி த்³வின்னங் வா திண்ணங் வா படிபாடியா பி⁴ன்னத்தா ஸப³லங், ஏகந்தரங் பி⁴ன்னங் கம்மாஸங். தேஸங் தோ³ஸானங் அபா⁴வேன அக²ண்டா³தி³தா வேதி³தப்³பா³. பு⁴ஜிஸ்ஸேஹீதி பு⁴ஜிஸ்ஸபா⁴வகரேஹி. விஞ்ஞுப்பஸத்தே²ஹீதி பு³த்³தா⁴தீ³ஹி விஞ்ஞூஹி பஸங்ஸிதேஹி. அபராமட்டே²ஹீதி ‘‘இத³ங் நாம தயா கதங், இத³ங் வீதிக்கந்த’’ந்தி ஏவங் பராமஸிதுங் அஸக்குணெய்யேஹி. ஸமாதி⁴ஸங்வத்தனிகேஹீதி அப்பனாஸமாதி⁴ங் உபசாரஸமாதி⁴ங் வா ஸங்வத்தேதுங் ஸமத்தே²ஹி.
Ariyakantehīti ariyānaṃ kantehi piyehi manāpehi. Pañca hi sīlāni bhavantaragatāpi ariyā na kopenti, evaṃ tesaṃ piyāni. Tāni sandhāyetaṃ vuttaṃ. Akhaṇḍehītiādi sadisavasena vuttaṃ. Mukhavaṭṭiyañhi chinnekadesā pāti khaṇḍāti vuccati, majjhe bhinnā chiddāti, ekasmiṃ padese visabhāgavaṇṇā gāvī sabalāti, nānābinducittā kammāsāti, evameva paṭipāṭiyā ādimhi vā ante vā bhinnaṃ sīlaṃ khaṇḍaṃ nāma, majjhe bhinnaṃ chiddaṃ, yattha katthaci dvinnaṃ vā tiṇṇaṃ vā paṭipāṭiyā bhinnattā sabalaṃ, ekantaraṃ bhinnaṃ kammāsaṃ. Tesaṃ dosānaṃ abhāvena akhaṇḍāditā veditabbā. Bhujissehīti bhujissabhāvakarehi. Viññuppasatthehīti buddhādīhi viññūhi pasaṃsitehi. Aparāmaṭṭhehīti ‘‘idaṃ nāma tayā kataṃ, idaṃ vītikkanta’’nti evaṃ parāmasituṃ asakkuṇeyyehi. Samādhisaṃvattanikehīti appanāsamādhiṃ upacārasamādhiṃ vā saṃvattetuṃ samatthehi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. சக்கவத்திராஜஸுத்தங் • 1. Cakkavattirājasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. சக்கவத்திராஜஸுத்தவண்ணனா • 1. Cakkavattirājasuttavaṇṇanā
