| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၁. သောတာပတ္တိသံယုတ္တံ
11. Sotāpattisaṃyuttaṃ
၁. ဝေဠုဒ္ဝာရဝဂ္ဂော
1. Veḷudvāravaggo
၁. စက္ကဝတ္တိရာဇသုတ္တဝဏ္ဏနာ
1. Cakkavattirājasuttavaṇṇanā
၉၉၇. အနုဂ္ဂဟဂရဟဏေသု နိပာတောတိ အနုဂ္ဂဏ္ဟနဂရဟတ္ထဇောတကော နိပာတော။ ကိမေတ္ထ အနုဂ္ဂဏ္ဟာတိ, ကိံ ဝာ ဂရဟတီတိ အာဟ ‘‘စတုန္န’’န္တိအာဒိ။ တတ္ထ အနုဂ္ဂဏ္ဟန္တော အနုစ္ဆဝိကံ ကတ္ဝာ ဂဏ္ဟန္တော။ ဂရဟန္တော နိန္ဒန္တော။ ဣသ္သရသီလော ဣသ္သရော, တသ္သ ဘာဝော ဣသ္သရိယံ, ပဘုတာ။ အဓီနံ ပတိ အဓိပတိ, တသ္သ ဘာဝော အာဓိပစ္စံ, သာမိဘာဝောတိ အာဟ – ‘‘ဣသ္သရိယာဓိပစ္စ’’န္တိအာဒိ။ အနန္တကာနီတိ အန္တရဟိတာနိ။
997.Anuggahagarahaṇesunipātoti anuggaṇhanagarahatthajotako nipāto. Kimettha anuggaṇhāti, kiṃ vā garahatīti āha ‘‘catunna’’ntiādi. Tattha anuggaṇhanto anucchavikaṃ katvā gaṇhanto. Garahanto nindanto. Issarasīlo issaro, tassa bhāvo issariyaṃ, pabhutā. Adhīnaṃ pati adhipati, tassa bhāvo ādhipaccaṃ, sāmibhāvoti āha – ‘‘issariyādhipacca’’ntiādi. Anantakānīti antarahitāni.
အဝေစ္စပ္ပသာဒေနာတိ ဝတ္ထုတ္တယသ္သ ဂုဏေ ယာထာဝတော အဝေစ္စ ပဝိသိတ္ဝာ ပသာဒော။ သော ပန ကေနစိ စလနရဟိတောတိ အာဟ ‘‘အစလပ္ပသာဒေနာ’’တိ။ မဂ္ဂေနာတိ အရိယမဂ္ဂေန။ အာဂတပ္ပသာဒော တသ္သ အဓိဂမေန လဒ္ဓပ္ပသာဒော။ အပုဗ္ဗံ အစရိမန္တိ ဧကဇ္ဈံ။ အရိယသာဝကာနဉ္ဟိ အရိယမဂ္ဂော ဥပ္ပဇ္ဇန္တောဝ တီသု ဝတ္ထူသု အဝေစ္စပ္ပသာဒံ အာဝဟန္တော ဧဝ ဥပ္ပဇ္ဇတိ။ တေသန္တိ ဝိသယဘူတာနံ တိဏ္ဏံ ဝတ္ထူနံ ဝသေန တိဓာ ဝုတ္တော။ ယသ္မာ စ အတ္ထတော ဧကော, တသ္မာဝ နိန္နာနာကရဏော ဟောတိ ပဝတ္တဋ္ဌာနဘေဒေ သတိပိ။ အရိယသာဝကသ္သ ဟီတိအာဒိနာ နယေန တမတ္ထံ ဝိဝရတိ။ ပသာဒော ဩကပ္ပနာ။ ပေမံ ဘတ္တိ။ ဂာရဝံ ဂရုကရဏံ။ မဟန္တံ ဥဠာရံ။ ဧတံ ဝိဘာဂေန နတ္ထိ သဗ္ဗတ္ထ သမာနတ္တာ။
Aveccappasādenāti vatthuttayassa guṇe yāthāvato avecca pavisitvā pasādo. So pana kenaci calanarahitoti āha ‘‘acalappasādenā’’ti. Maggenāti ariyamaggena. Āgatappasādo tassa adhigamena laddhappasādo. Apubbaṃ acarimanti ekajjhaṃ. Ariyasāvakānañhi ariyamaggo uppajjantova tīsu vatthūsu aveccappasādaṃ āvahanto eva uppajjati. Tesanti visayabhūtānaṃ tiṇṇaṃ vatthūnaṃ vasena tidhā vutto. Yasmā ca atthato eko, tasmāva ninnānākaraṇo hoti pavattaṭṭhānabhede satipi. Ariyasāvakassa hītiādinā nayena tamatthaṃ vivarati. Pasādo okappanā. Pemaṃ bhatti. Gāravaṃ garukaraṇaṃ. Mahantaṃ uḷāraṃ. Etaṃ vibhāgena natthi sabbattha samānattā.
ဧဝန္တိ ဘဝန္တရေပိ အကောပနီယတာယ။ သဒိသဝသေနာတိ အညေဟိ အခဏ္ဍာဒီဟိ သဒိသဝသေန။ တေနာဟ ‘‘မုခဝဋ္ဋိ ယဉ္ဟိ ဆိန္နေ’’တိအာဒိ။ ခဏ္ဍာ ဧတိသ္သာ အတ္ထီတိ ခဏ္ဍာ။ ဧသ နယော သေသေသုပိ။ ပာတိမောက္ခေ အာဂတာနုက္ကမေန သီလသ္သ အာဒိမဇ္ဈဝိဘာဂော ဝေဒိတဗ္ဗော။ ဒ္ဝိန္နံ ဝာ တိဏ္ဏံ ဝာတိ သီလကောဋ္ဌာသာနံ။ ဧကန္တရံ ဘိန္နန္တိ အဘိန္နေန ဧကန္တရံ ဟုတ္ဝာ ဘိန္နံ။ တေသံ ခဏ္ဍာဒီနံ။ ‘‘ဘုဇိသ္သေဟီ’’တိ ဥတ္တရပဒလောပေန နိဒ္ဒေသောတိ အာဟ ‘‘ဘုဇိသ္သဘာဝကရေဟီ’’တိ။ ဣဒံ ဝီတိက္ကန္တန္တိ ဣဒမ္ပိ သီလံ ဝီတိက္ကန္တံ။ ‘‘အယံ သီလသ္သ ဝီတိက္ကမော’’တိ ဧဝံ ပရာမသိတုံ အသက္ကုဏေယ္ယေဟိ။
Evanti bhavantarepi akopanīyatāya. Sadisavasenāti aññehi akhaṇḍādīhi sadisavasena. Tenāha ‘‘mukhavaṭṭi yañhi chinne’’tiādi. Khaṇḍā etissā atthīti khaṇḍā. Esa nayo sesesupi. Pātimokkhe āgatānukkamena sīlassa ādimajjhavibhāgo veditabbo. Dvinnaṃ vā tiṇṇaṃ vāti sīlakoṭṭhāsānaṃ. Ekantaraṃ bhinnanti abhinnena ekantaraṃ hutvā bhinnaṃ. Tesaṃ khaṇḍādīnaṃ. ‘‘Bhujissehī’’ti uttarapadalopena niddesoti āha ‘‘bhujissabhāvakarehī’’ti. Idaṃvītikkantanti idampi sīlaṃ vītikkantaṃ. ‘‘Ayaṃ sīlassa vītikkamo’’ti evaṃ parāmasituṃ asakkuṇeyyehi.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. စက္ကဝတ္တိရာဇသုတ္တံ • 1. Cakkavattirājasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. စက္ကဝတ္တိရာဇသုတ္တဝဏ္ဏနာ • 1. Cakkavattirājasuttavaṇṇanā
