| Library / Tipiṭaka / திபிடக • Tipiṭaka / தீ³க⁴னிகாய • Dīghanikāya |
3. சக்கவத்திஸுத்தங்
3. Cakkavattisuttaṃ
அத்ததீ³பஸரணதா
Attadīpasaraṇatā
80. ஏவங் மே ஸுதங் – ஏகங் ஸமயங் ப⁴க³வா மக³தே⁴ஸு விஹரதி மாதுலாயங். தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த்³த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச – ‘‘அத்ததீ³பா, பி⁴க்க²வே, விஹரத² அத்தஸரணா அனஞ்ஞஸரணா, த⁴ம்மதீ³பா த⁴ம்மஸரணா அனஞ்ஞஸரணா. கத²ஞ்ச பன, பி⁴க்க²வே, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ, த⁴ம்மதீ³போ த⁴ம்மஸரணோ அனஞ்ஞஸரணோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங். வேத³னாஸு வேத³னானுபஸ்ஸீ…பே॰… சித்தே சித்தானுபஸ்ஸீ…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங். ஏவங் கோ², பி⁴க்க²வே, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ, த⁴ம்மதீ³போ த⁴ம்மஸரணோ அனஞ்ஞஸரணோ.
80. Evaṃ me sutaṃ – ekaṃ samayaṃ bhagavā magadhesu viharati mātulāyaṃ. Tatra kho bhagavā bhikkhū āmantesi – ‘‘bhikkhavo’’ti. ‘‘Bhaddante’’ti te bhikkhū bhagavato paccassosuṃ. Bhagavā etadavoca – ‘‘attadīpā, bhikkhave, viharatha attasaraṇā anaññasaraṇā, dhammadīpā dhammasaraṇā anaññasaraṇā. Kathañca pana, bhikkhave, bhikkhu attadīpo viharati attasaraṇo anaññasaraṇo, dhammadīpo dhammasaraṇo anaññasaraṇo? Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ. Vedanāsu vedanānupassī…pe… citte cittānupassī…pe… dhammesu dhammānupassī viharati ātāpī sampajāno satimā vineyya loke abhijjhādomanassaṃ. Evaṃ kho, bhikkhave, bhikkhu attadīpo viharati attasaraṇo anaññasaraṇo, dhammadīpo dhammasaraṇo anaññasaraṇo.
‘‘கோ³சரே, பி⁴க்க²வே, சரத² ஸகே பெத்திகே விஸயே. கோ³சரே, பி⁴க்க²வே, சரதங் ஸகே பெத்திகே விஸயே ந லச்ச²தி மாரோ ஓதாரங், ந லச்ச²தி மாரோ ஆரம்மணங் 1. குஸலானங், பி⁴க்க²வே, த⁴ம்மானங் ஸமாதா³னஹேது ஏவமித³ங் புஞ்ஞங் பவட்³ட⁴தி.
‘‘Gocare, bhikkhave, caratha sake pettike visaye. Gocare, bhikkhave, carataṃ sake pettike visaye na lacchati māro otāraṃ, na lacchati māro ārammaṇaṃ 2. Kusalānaṃ, bhikkhave, dhammānaṃ samādānahetu evamidaṃ puññaṃ pavaḍḍhati.
த³ள்ஹனேமிசக்கவத்திராஜா
Daḷhanemicakkavattirājā
81. ‘‘பூ⁴தபுப்³ப³ங் , பி⁴க்க²வே, ராஜா த³ள்ஹனேமி நாம அஹோஸி சக்கவத்தீ 3 த⁴ம்மிகோ த⁴ம்மராஜா சாதுரந்தோ விஜிதாவீ ஜனபத³த்தா²வரியப்பத்தோ ஸத்தரதனஸமன்னாக³தோ. தஸ்ஸிமானி ஸத்த ரதனானி அஹேஸுங் ஸெய்யதி²த³ங் – சக்கரதனங்உ ஹத்தி²ரதனங் அஸ்ஸரதனங் மணிரதனங் இத்தி²ரதனங் க³ஹபதிரதனங் பரிணாயகரதனமேவ ஸத்தமங். பரோஸஹஸ்ஸங் கோ² பனஸ்ஸ புத்தா அஹேஸுங் ஸூரா வீரங்க³ரூபா பரஸேனப்பமத்³த³னா. ஸோ இமங் பத²விங் ஸாக³ரபரியந்தங் அத³ண்டே³ன அஸத்தே²ன த⁴ம்மேன 4 அபி⁴விஜிய அஜ்ஜா²வஸி.
81. ‘‘Bhūtapubbaṃ , bhikkhave, rājā daḷhanemi nāma ahosi cakkavattī 5 dhammiko dhammarājā cāturanto vijitāvī janapadatthāvariyappatto sattaratanasamannāgato. Tassimāni satta ratanāni ahesuṃ seyyathidaṃ – cakkaratanaṃu hatthiratanaṃ assaratanaṃ maṇiratanaṃ itthiratanaṃ gahapatiratanaṃ pariṇāyakaratanameva sattamaṃ. Parosahassaṃ kho panassa puttā ahesuṃ sūrā vīraṅgarūpā parasenappamaddanā. So imaṃ pathaviṃ sāgarapariyantaṃ adaṇḍena asatthena dhammena 6 abhivijiya ajjhāvasi.
82. ‘‘அத² கோ², பி⁴க்க²வே, ராஜா த³ள்ஹனேமி ப³ஹுன்னங் வஸ்ஸானங் ப³ஹுன்னங் வஸ்ஸஸதானங் ப³ஹுன்னங் வஸ்ஸஸஹஸ்ஸானங் அச்சயேன அஞ்ஞதரங் புரிஸங் ஆமந்தேஸி – ‘யதா³ த்வங், அம்போ⁴ புரிஸ, பஸ்ஸெய்யாஸி தி³ப்³ப³ங் சக்கரதனங் ஓஸக்கிதங் டா²னா சுதங், அத² மே ஆரோசெய்யாஸீ’தி. ‘ஏவங், தே³வா’தி கோ², பி⁴க்க²வே, ஸோ புரிஸோ ரஞ்ஞோ த³ள்ஹனேமிஸ்ஸ பச்சஸ்ஸோஸி. அத்³த³ஸா கோ², பி⁴க்க²வே, ஸோ புரிஸோ ப³ஹுன்னங் வஸ்ஸானங் ப³ஹுன்னங் வஸ்ஸஸதானங் ப³ஹுன்னங் வஸ்ஸஸஹஸ்ஸானங் அச்சயேன தி³ப்³ப³ங் சக்கரதனங் ஓஸக்கிதங் டா²னா சுதங், தி³ஸ்வான யேன ராஜா த³ள்ஹனேமி தேனுபஸங்கமி; உபஸங்கமித்வா ராஜானங் த³ள்ஹனேமிங் ஏதத³வோச – ‘யக்³கே⁴, தே³வ, ஜானெய்யாஸி, தி³ப்³ப³ங் தே சக்கரதனங் ஓஸக்கிதங் டா²னா சுத’ந்தி. அத² கோ², பி⁴க்க²வே, ராஜா த³ள்ஹனேமி ஜெட்ட²புத்தங் குமாரங் ஆமந்தாபெத்வா 7 ஏதத³வோச – ‘தி³ப்³ப³ங் கிர மே, தாத குமார, சக்கரதனங் ஓஸக்கிதங் டா²னா சுதங். ஸுதங் கோ² பன மேதங் – யஸ்ஸ ரஞ்ஞோ சக்கவத்திஸ்ஸ தி³ப்³ப³ங் சக்கரதனங் ஓஸக்கதி டா²னா சவதி, ந தா³னி தேன ரஞ்ஞா சிரங் ஜீவிதப்³ப³ங் ஹோதீதி. பு⁴த்தா கோ² பன மே மானுஸகா காமா, ஸமயோ தா³னி மே தி³ப்³பே³ காமே பரியேஸிதுங். ஏஹி த்வங், தாத குமார, இமங் ஸமுத்³த³பரியந்தங் பத²விங் படிபஜ்ஜ. அஹங் பன கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிஸ்ஸாமீ’தி.
82. ‘‘Atha kho, bhikkhave, rājā daḷhanemi bahunnaṃ vassānaṃ bahunnaṃ vassasatānaṃ bahunnaṃ vassasahassānaṃ accayena aññataraṃ purisaṃ āmantesi – ‘yadā tvaṃ, ambho purisa, passeyyāsi dibbaṃ cakkaratanaṃ osakkitaṃ ṭhānā cutaṃ, atha me āroceyyāsī’ti. ‘Evaṃ, devā’ti kho, bhikkhave, so puriso rañño daḷhanemissa paccassosi. Addasā kho, bhikkhave, so puriso bahunnaṃ vassānaṃ bahunnaṃ vassasatānaṃ bahunnaṃ vassasahassānaṃ accayena dibbaṃ cakkaratanaṃ osakkitaṃ ṭhānā cutaṃ, disvāna yena rājā daḷhanemi tenupasaṅkami; upasaṅkamitvā rājānaṃ daḷhanemiṃ etadavoca – ‘yagghe, deva, jāneyyāsi, dibbaṃ te cakkaratanaṃ osakkitaṃ ṭhānā cuta’nti. Atha kho, bhikkhave, rājā daḷhanemi jeṭṭhaputtaṃ kumāraṃ āmantāpetvā 8 etadavoca – ‘dibbaṃ kira me, tāta kumāra, cakkaratanaṃ osakkitaṃ ṭhānā cutaṃ. Sutaṃ kho pana metaṃ – yassa rañño cakkavattissa dibbaṃ cakkaratanaṃ osakkati ṭhānā cavati, na dāni tena raññā ciraṃ jīvitabbaṃ hotīti. Bhuttā kho pana me mānusakā kāmā, samayo dāni me dibbe kāme pariyesituṃ. Ehi tvaṃ, tāta kumāra, imaṃ samuddapariyantaṃ pathaviṃ paṭipajja. Ahaṃ pana kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajissāmī’ti.
83. ‘‘அத² கோ², பி⁴க்க²வே, ராஜா த³ள்ஹனேமி ஜெட்ட²புத்தங் குமாரங் ஸாது⁴கங் ரஜ்ஜே ஸமனுஸாஸித்வா கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜி. ஸத்தாஹபப்³ப³ஜிதே கோ² பன, பி⁴க்க²வே, ராஜிஸிம்ஹி தி³ப்³ப³ங் சக்கரதனங் அந்தரதா⁴யி.
83. ‘‘Atha kho, bhikkhave, rājā daḷhanemi jeṭṭhaputtaṃ kumāraṃ sādhukaṃ rajje samanusāsitvā kesamassuṃ ohāretvā kāsāyāni vatthāni acchādetvā agārasmā anagāriyaṃ pabbaji. Sattāhapabbajite kho pana, bhikkhave, rājisimhi dibbaṃ cakkaratanaṃ antaradhāyi.
‘‘அத² கோ², பி⁴க்க²வே, அஞ்ஞதரோ புரிஸோ யேன ராஜா க²த்தியோ முத்³தா⁴பி⁴ஸித்தோ 9 தேனுபஸங்கமி; உபஸங்கமித்வா ராஜானங் க²த்தியங் முத்³தா⁴பி⁴ஸித்தங் ஏதத³வோச – ‘யக்³கே⁴, தே³வ, ஜானெய்யாஸி, தி³ப்³ப³ங் சக்கரதனங் அந்தரஹித’ந்தி. அத² கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ தி³ப்³பே³ சக்கரதனே அந்தரஹிதே அனத்தமனோ அஹோஸி, அனத்தமனதஞ்ச படிஸங்வேதே³ஸி. ஸோ யேன ராஜிஸி தேனுபஸங்கமி; உபஸங்கமித்வா ராஜிஸிங் ஏதத³வோச – ‘யக்³கே⁴, தே³வ, ஜானெய்யாஸி, தி³ப்³ப³ங் சக்கரதனங் அந்தரஹித’ந்தி. ஏவங் வுத்தே, பி⁴க்க²வே, ராஜிஸி ராஜானங் க²த்தியங் முத்³தா⁴பி⁴ஸித்தங் ஏதத³வோச – ‘மா கோ² த்வங், தாத, தி³ப்³பே³ சக்கரதனே அந்தரஹிதே அனத்தமனோ அஹோஸி, மா அனத்தமனதஞ்ச படிஸங்வேதே³ஸி, ந ஹி தே, தாத, தி³ப்³ப³ங் சக்கரதனங் பெத்திகங் தா³யஜ்ஜங். இங்க⁴ த்வங், தாத, அரியே சக்கவத்திவத்தே வத்தாஹி. டா²னங் கோ² பனேதங் விஜ்ஜதி, யங் தே அரியே சக்கவத்திவத்தே வத்தமானஸ்ஸ தத³ஹுபோஸதே² பன்னரஸே ஸீஸங்ன்ஹாதஸ்ஸ 10 உபோஸதி²கஸ்ஸ உபரிபாஸாத³வரக³தஸ்ஸ தி³ப்³ப³ங் சக்கரதனங் பாதுப⁴விஸ்ஸதி ஸஹஸ்ஸாரங் ஸனேமிகங் ஸனாபி⁴கங் ஸப்³பா³காரபரிபூர’ந்தி.
‘‘Atha kho, bhikkhave, aññataro puriso yena rājā khattiyo muddhābhisitto 11 tenupasaṅkami; upasaṅkamitvā rājānaṃ khattiyaṃ muddhābhisittaṃ etadavoca – ‘yagghe, deva, jāneyyāsi, dibbaṃ cakkaratanaṃ antarahita’nti. Atha kho, bhikkhave, rājā khattiyo muddhābhisitto dibbe cakkaratane antarahite anattamano ahosi, anattamanatañca paṭisaṃvedesi. So yena rājisi tenupasaṅkami; upasaṅkamitvā rājisiṃ etadavoca – ‘yagghe, deva, jāneyyāsi, dibbaṃ cakkaratanaṃ antarahita’nti. Evaṃ vutte, bhikkhave, rājisi rājānaṃ khattiyaṃ muddhābhisittaṃ etadavoca – ‘mā kho tvaṃ, tāta, dibbe cakkaratane antarahite anattamano ahosi, mā anattamanatañca paṭisaṃvedesi, na hi te, tāta, dibbaṃ cakkaratanaṃ pettikaṃ dāyajjaṃ. Iṅgha tvaṃ, tāta, ariye cakkavattivatte vattāhi. Ṭhānaṃ kho panetaṃ vijjati, yaṃ te ariye cakkavattivatte vattamānassa tadahuposathe pannarase sīsaṃnhātassa 12 uposathikassa uparipāsādavaragatassa dibbaṃ cakkaratanaṃ pātubhavissati sahassāraṃ sanemikaṃ sanābhikaṃ sabbākāraparipūra’nti.
சக்கவத்திஅரியவத்தங்
Cakkavattiariyavattaṃ
84. ‘‘‘கதமங் பன தங், தே³வ, அரியங் சக்கவத்திவத்த’ந்தி ? ‘தேன ஹி த்வங், தாத, த⁴ம்மங்யேவ நிஸ்ஸாய த⁴ம்மங் ஸக்கரொந்தோ த⁴ம்மங் க³ருங் கரொந்தோ 13 த⁴ம்மங் மானெந்தோ த⁴ம்மங் பூஜெந்தோ த⁴ம்மங் அபசாயமானோ த⁴ம்மத்³த⁴ஜோ த⁴ம்மகேது த⁴ம்மாதி⁴பதெய்யோ த⁴ம்மிகங் ரக்கா²வரணகு³த்திங் ஸங்வித³ஹஸ்ஸு அந்தோஜனஸ்மிங் ப³லகாயஸ்மிங் க²த்தியேஸு அனுயந்தேஸு 14 ப்³ராஹ்மணக³ஹபதிகேஸு நேக³மஜானபதே³ஸு ஸமணப்³ராஹ்மணேஸு மிக³பக்கீ²ஸு. மா ச தே, தாத, விஜிதே அத⁴ம்மகாரோ பவத்தித்த². யே ச தே, தாத, விஜிதே அத⁴னா அஸ்ஸு, தேஸஞ்ச த⁴னமனுப்பதெ³ய்யாஸி 15. யே ச தே, தாத, விஜிதே ஸமணப்³ராஹ்மணா மத³ப்பமாதா³ படிவிரதா க²ந்திஸோரச்சே நிவிட்டா² ஏகமத்தானங் த³மெந்தி, ஏகமத்தானங் ஸமெந்தி, ஏகமத்தானங் பரினிப்³பா³பெந்தி, தே காலேன காலங் உபஸங்கமித்வா பரிபுச்செ²ய்யாஸி பரிக்³க³ண்ஹெய்யாஸி – ‘‘கிங், ப⁴ந்தே, குஸலங், கிங் அகுஸலங், கிங் ஸாவஜ்ஜங், கிங் அனவஜ்ஜங், கிங் ஸேவிதப்³ப³ங், கிங் ந ஸேவிதப்³ப³ங், கிங் மே கரீயமானங் தீ³க⁴ரத்தங் அஹிதாய து³க்கா²ய அஸ்ஸ, கிங் வா பன மே கரீயமானங் தீ³க⁴ரத்தங் ஹிதாய ஸுகா²ய அஸ்ஸா’’தி? தேஸங் ஸுத்வா யங் அகுஸலங் தங் அபி⁴னிவஜ்ஜெய்யாஸி, யங் குஸலங் தங் ஸமாதா³ய வத்தெய்யாஸி. இத³ங் கோ², தாத, தங் அரியங் சக்கவத்திவத்த’ந்தி.
84. ‘‘‘Katamaṃ pana taṃ, deva, ariyaṃ cakkavattivatta’nti ? ‘Tena hi tvaṃ, tāta, dhammaṃyeva nissāya dhammaṃ sakkaronto dhammaṃ garuṃ karonto 16 dhammaṃ mānento dhammaṃ pūjento dhammaṃ apacāyamāno dhammaddhajo dhammaketu dhammādhipateyyo dhammikaṃ rakkhāvaraṇaguttiṃ saṃvidahassu antojanasmiṃ balakāyasmiṃ khattiyesu anuyantesu 17 brāhmaṇagahapatikesu negamajānapadesu samaṇabrāhmaṇesu migapakkhīsu. Mā ca te, tāta, vijite adhammakāro pavattittha. Ye ca te, tāta, vijite adhanā assu, tesañca dhanamanuppadeyyāsi 18. Ye ca te, tāta, vijite samaṇabrāhmaṇā madappamādā paṭiviratā khantisoracce niviṭṭhā ekamattānaṃ damenti, ekamattānaṃ samenti, ekamattānaṃ parinibbāpenti, te kālena kālaṃ upasaṅkamitvā paripuccheyyāsi pariggaṇheyyāsi – ‘‘kiṃ, bhante, kusalaṃ, kiṃ akusalaṃ, kiṃ sāvajjaṃ, kiṃ anavajjaṃ, kiṃ sevitabbaṃ, kiṃ na sevitabbaṃ, kiṃ me karīyamānaṃ dīgharattaṃ ahitāya dukkhāya assa, kiṃ vā pana me karīyamānaṃ dīgharattaṃ hitāya sukhāya assā’’ti? Tesaṃ sutvā yaṃ akusalaṃ taṃ abhinivajjeyyāsi, yaṃ kusalaṃ taṃ samādāya vatteyyāsi. Idaṃ kho, tāta, taṃ ariyaṃ cakkavattivatta’nti.
சக்கரதனபாதுபா⁴வோ
Cakkaratanapātubhāvo
85. ‘‘‘ஏவங், தே³வா’தி கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ ராஜிஸிஸ்ஸ படிஸ்ஸுத்வா அரியே சக்கவத்திவத்தே 19 வத்தி. தஸ்ஸ அரியே சக்கவத்திவத்தே வத்தமானஸ்ஸ தத³ஹுபோஸதே² பன்னரஸே ஸீஸங்ன்ஹாதஸ்ஸ உபோஸதி²கஸ்ஸ உபரிபாஸாத³வரக³தஸ்ஸ தி³ப்³ப³ங் சக்கரதனங் பாதுரஹோஸி ஸஹஸ்ஸாரங் ஸனேமிகங் ஸனாபி⁴கங் ஸப்³பா³காரபரிபூரங். தி³ஸ்வான ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ ஏதத³ஹோஸி – ‘ஸுதங் கோ² பன மேதங் – யஸ்ஸ ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ தத³ஹுபோஸதே² பன்னரஸே ஸீஸங்ன்ஹாதஸ்ஸ உபோஸதி²கஸ்ஸ உபரிபாஸாத³வரக³தஸ்ஸ தி³ப்³ப³ங் சக்கரதனங் பாதுப⁴வதி ஸஹஸ்ஸாரங் ஸனேமிகங் ஸனாபி⁴கங் ஸப்³பா³காரபரிபூரங் , ஸோ ஹோதி ராஜா சக்கவத்தீ’தி. அஸ்ஸங் நு கோ² அஹங் ராஜா சக்கவத்தீதி.
85. ‘‘‘Evaṃ, devā’ti kho, bhikkhave, rājā khattiyo muddhābhisitto rājisissa paṭissutvā ariye cakkavattivatte 20 vatti. Tassa ariye cakkavattivatte vattamānassa tadahuposathe pannarase sīsaṃnhātassa uposathikassa uparipāsādavaragatassa dibbaṃ cakkaratanaṃ pāturahosi sahassāraṃ sanemikaṃ sanābhikaṃ sabbākāraparipūraṃ. Disvāna rañño khattiyassa muddhābhisittassa etadahosi – ‘sutaṃ kho pana metaṃ – yassa rañño khattiyassa muddhābhisittassa tadahuposathe pannarase sīsaṃnhātassa uposathikassa uparipāsādavaragatassa dibbaṃ cakkaratanaṃ pātubhavati sahassāraṃ sanemikaṃ sanābhikaṃ sabbākāraparipūraṃ , so hoti rājā cakkavattī’ti. Assaṃ nu kho ahaṃ rājā cakkavattīti.
‘‘அத² கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ உட்டா²யாஸனா ஏகங்ஸங் உதராஸங்க³ங் கரித்வா வாமேன ஹத்தே²ன பி⁴ங்காரங் க³ஹெத்வா த³க்கி²ணேன ஹத்தே²ன சக்கரதனங் அப்³பு⁴க்கிரி – ‘பவத்தது ப⁴வங் சக்கரதனங், அபி⁴விஜினாது ப⁴வங் சக்கரதன’ந்தி.
‘‘Atha kho, bhikkhave, rājā khattiyo muddhābhisitto uṭṭhāyāsanā ekaṃsaṃ utarāsaṅgaṃ karitvā vāmena hatthena bhiṅkāraṃ gahetvā dakkhiṇena hatthena cakkaratanaṃ abbhukkiri – ‘pavattatu bhavaṃ cakkaratanaṃ, abhivijinātu bhavaṃ cakkaratana’nti.
‘‘அத² கோ² தங், பி⁴க்க²வே, சக்கரதனங் புரத்தி²மங் தி³ஸங் பவத்தி, அன்வதே³வ ராஜா சக்கவத்தீ ஸத்³தி⁴ங் சதுரங்கி³னியா ஸேனாய. யஸ்மிங் கோ² பன, பி⁴க்க²வே, பதே³ஸே சக்கரதனங் பதிட்டா²ஸி, தத்த² ராஜா சக்கவத்தீ வாஸங் உபக³ச்சி² ஸத்³தி⁴ங் சதுரங்கி³னியா ஸேனாய. யே கோ² பன, பி⁴க்க²வே, புரத்தி²மாய தி³ஸாய படிராஜானோ, தே ராஜானங் சக்கவத்திங் உபஸங்கமித்வா ஏவமாஹங்ஸு – ‘ஏஹி கோ², மஹாராஜ, ஸ்வாக³தங் தே 21 மஹாராஜ, ஸகங் தே, மஹாராஜ, அனுஸாஸ, மஹாராஜா’தி. ராஜா சக்கவத்தீ ஏவமாஹ – ‘பாணோ ந ஹந்தப்³போ³, அதி³ன்னங் நாதா³தப்³ப³ங், காமேஸுமிச்சா² ந சரிதப்³பா³, முஸா ந பா⁴ஸிதப்³பா³, மஜ்ஜங் ந பாதப்³ப³ங், யதா²பு⁴த்தஞ்ச பு⁴ஞ்ஜதா²’தி. யே கோ² பன, பி⁴க்க²வே, புரத்தி²மாய தி³ஸாய படிராஜானோ, தே ரஞ்ஞோ சக்கவத்திஸ்ஸ அனுயந்தா 22 அஹேஸுங்.
‘‘Atha kho taṃ, bhikkhave, cakkaratanaṃ puratthimaṃ disaṃ pavatti, anvadeva rājā cakkavattī saddhiṃ caturaṅginiyā senāya. Yasmiṃ kho pana, bhikkhave, padese cakkaratanaṃ patiṭṭhāsi, tattha rājā cakkavattī vāsaṃ upagacchi saddhiṃ caturaṅginiyā senāya. Ye kho pana, bhikkhave, puratthimāya disāya paṭirājāno, te rājānaṃ cakkavattiṃ upasaṅkamitvā evamāhaṃsu – ‘ehi kho, mahārāja, svāgataṃ te 23 mahārāja, sakaṃ te, mahārāja, anusāsa, mahārājā’ti. Rājā cakkavattī evamāha – ‘pāṇo na hantabbo, adinnaṃ nādātabbaṃ, kāmesumicchā na caritabbā, musā na bhāsitabbā, majjaṃ na pātabbaṃ, yathābhuttañca bhuñjathā’ti. Ye kho pana, bhikkhave, puratthimāya disāya paṭirājāno, te rañño cakkavattissa anuyantā 24 ahesuṃ.
86. ‘‘அத² கோ² தங், பி⁴க்க²வே, சக்கரதனங் புரத்தி²மங் ஸமுத்³த³ங் அஜ்ஜோ²கா³ஹெத்வா 25 பச்சுத்தரித்வா த³க்கி²ணங் தி³ஸங் பவத்தி…பே॰… த³க்கி²ணங் ஸமுத்³த³ங் அஜ்ஜோ²கா³ஹெத்வா பச்சுத்தரித்வா பச்சி²மங் தி³ஸங் பவத்தி, அன்வதே³வ ராஜா சக்கவத்தீ ஸத்³தி⁴ங் சதுரங்கி³னியா ஸேனாய. யஸ்மிங் கோ² பன, பி⁴க்க²வே, பதே³ஸே சக்கரதனங் பதிட்டா²ஸி, தத்த² ராஜா சக்கவத்தீ வாஸங் உபக³ச்சி² ஸத்³தி⁴ங் சதுரங்கி³னியா ஸேனாய. யே கோ² பன, பி⁴க்க²வே, பச்சி²மாய தி³ஸாய படிராஜானோ, தே ராஜானங் சக்கவத்திங் உபஸங்கமித்வா ஏவமாஹங்ஸு – ‘ஏஹி கோ², மஹாராஜ, ஸ்வாக³தங் தே, மஹாராஜ, ஸகங் தே, மஹாராஜ, அனுஸாஸ, மஹாராஜா’தி. ராஜா சக்கவத்தீ ஏவமாஹ – ‘பாணோ ந ஹந்தப்³போ³, அதி³ன்னங் நாதா³தப்³ப³ங், காமேஸுமிச்சா² ந சரிதப்³பா³, முஸா ந பா⁴ஸிதப்³பா³, மஜ்ஜங் ந பாதப்³ப³ங், யதா²பு⁴த்தஞ்ச பு⁴ஞ்ஜதா²’தி. யே கோ² பன, பி⁴க்க²வே, பச்சி²மாய தி³ஸாய படிராஜானோ, தே ரஞ்ஞோ சக்கவத்திஸ்ஸ அனுயந்தா அஹேஸுங்.
86. ‘‘Atha kho taṃ, bhikkhave, cakkaratanaṃ puratthimaṃ samuddaṃ ajjhogāhetvā 26 paccuttaritvā dakkhiṇaṃ disaṃ pavatti…pe… dakkhiṇaṃ samuddaṃ ajjhogāhetvā paccuttaritvā pacchimaṃ disaṃ pavatti, anvadeva rājā cakkavattī saddhiṃ caturaṅginiyā senāya. Yasmiṃ kho pana, bhikkhave, padese cakkaratanaṃ patiṭṭhāsi, tattha rājā cakkavattī vāsaṃ upagacchi saddhiṃ caturaṅginiyā senāya. Ye kho pana, bhikkhave, pacchimāya disāya paṭirājāno, te rājānaṃ cakkavattiṃ upasaṅkamitvā evamāhaṃsu – ‘ehi kho, mahārāja, svāgataṃ te, mahārāja, sakaṃ te, mahārāja, anusāsa, mahārājā’ti. Rājā cakkavattī evamāha – ‘pāṇo na hantabbo, adinnaṃ nādātabbaṃ, kāmesumicchā na caritabbā, musā na bhāsitabbā, majjaṃ na pātabbaṃ, yathābhuttañca bhuñjathā’ti. Ye kho pana, bhikkhave, pacchimāya disāya paṭirājāno, te rañño cakkavattissa anuyantā ahesuṃ.
87. ‘‘அத² கோ² தங், பி⁴க்க²வே, சக்கரதனங் பச்சி²மங் ஸமுத்³த³ங் அஜ்ஜோ²கா³ஹெத்வா பச்சுத்தரித்வா உத்தரங் தி³ஸங் பவத்தி, அன்வதே³வ ராஜா சக்கவத்தீ ஸத்³தி⁴ங் சதுரங்கி³னியா ஸேனாய. யஸ்மிங் கோ² பன, பி⁴க்க²வே, பதே³ஸே சக்கரதனங் பதிட்டா²ஸி, தத்த² ராஜா சக்கவத்தீ வாஸங் உபக³ச்சி² ஸத்³தி⁴ங் சதுரங்கி³னியா ஸேனாய. யே கோ² பன, பி⁴க்க²வே, உத்தராய தி³ஸாய படிராஜானோ, தே ராஜானங் சக்கவத்திங் உபஸங்கமித்வா ஏவமாஹங்ஸு – ‘ஏஹி கோ², மஹாராஜ, ஸ்வாக³தங் தே, மஹாராஜ , ஸகங் தே, மஹாராஜ, அனுஸாஸ, மஹாராஜா’தி. ராஜா சக்கவத்தீ ஏவமாஹ – ‘பாணோ ந ஹந்தப்³போ³, அதி³ன்னங் நாதா³தப்³ப³ங், காமேஸுமிச்சா² ந சரிதப்³பா³, முஸா ந பா⁴ஸிதப்³பா³, மஜ்ஜங் ந பாதப்³ப³ங், யதா²பு⁴த்தஞ்ச பு⁴ஞ்ஜதா²’தி. யே கோ² பன, பி⁴க்க²வே, உத்தராய தி³ஸாய படிராஜானோ, தே ரஞ்ஞோ சக்கவத்திஸ்ஸ அனுயந்தா அஹேஸுங்.
87. ‘‘Atha kho taṃ, bhikkhave, cakkaratanaṃ pacchimaṃ samuddaṃ ajjhogāhetvā paccuttaritvā uttaraṃ disaṃ pavatti, anvadeva rājā cakkavattī saddhiṃ caturaṅginiyā senāya. Yasmiṃ kho pana, bhikkhave, padese cakkaratanaṃ patiṭṭhāsi, tattha rājā cakkavattī vāsaṃ upagacchi saddhiṃ caturaṅginiyā senāya. Ye kho pana, bhikkhave, uttarāya disāya paṭirājāno, te rājānaṃ cakkavattiṃ upasaṅkamitvā evamāhaṃsu – ‘ehi kho, mahārāja, svāgataṃ te, mahārāja , sakaṃ te, mahārāja, anusāsa, mahārājā’ti. Rājā cakkavattī evamāha – ‘pāṇo na hantabbo, adinnaṃ nādātabbaṃ, kāmesumicchā na caritabbā, musā na bhāsitabbā, majjaṃ na pātabbaṃ, yathābhuttañca bhuñjathā’ti. Ye kho pana, bhikkhave, uttarāya disāya paṭirājāno, te rañño cakkavattissa anuyantā ahesuṃ.
‘‘அத² கோ² தங், பி⁴க்க²வே, சக்கரதனங் ஸமுத்³த³பரியந்தங் பத²விங் அபி⁴விஜினித்வா தமேவ ராஜதா⁴னிங் பச்சாக³ந்த்வா ரஞ்ஞோ சக்கவத்திஸ்ஸ அந்தேபுரத்³வாரே அத்த²கரணபமுகே² 27 அக்கா²ஹதங் மஞ்ஞே அட்டா²ஸி ரஞ்ஞோ சக்கவத்திஸ்ஸ அந்தேபுரங் உபஸோப⁴யமானங்.
‘‘Atha kho taṃ, bhikkhave, cakkaratanaṃ samuddapariyantaṃ pathaviṃ abhivijinitvā tameva rājadhāniṃ paccāgantvā rañño cakkavattissa antepuradvāre atthakaraṇapamukhe 28 akkhāhataṃ maññe aṭṭhāsi rañño cakkavattissa antepuraṃ upasobhayamānaṃ.
து³தியாதி³சக்கவத்திகதா²
Dutiyādicakkavattikathā
88. ‘‘து³தியோபி கோ², பி⁴க்க²வே, ராஜா சக்கவத்தீ…பே॰… ததியோபி கோ², பி⁴க்க²வே, ராஜா சக்கவத்தீ… சதுத்தோ²பி கோ², பி⁴க்க²வே, ராஜா சக்கவத்தீ… பஞ்சமோபி கோ², பி⁴க்க²வே, ராஜா சக்கவத்தீ… ச²ட்டோ²பி கோ², பி⁴க்க²வே, ராஜா சக்கவத்தீ… ஸத்தமோபி கோ², பி⁴க்க²வே, ராஜா சக்கவத்தீ ப³ஹுன்னங் வஸ்ஸானங் ப³ஹுன்னங் வஸ்ஸஸதானங் ப³ஹுன்னங் வஸ்ஸஸஹஸ்ஸானங் அச்சயேன அஞ்ஞதரங் புரிஸங் ஆமந்தேஸி – ‘யதா³ த்வங், அம்போ⁴ புரிஸ, பஸ்ஸெய்யாஸி தி³ப்³ப³ங் சக்கரதனங் ஓஸக்கிதங் டா²னா சுதங், அத² மே ஆரோசெய்யாஸீ’தி. ‘ஏவங், தே³வா’தி கோ², பி⁴க்க²வே, ஸோ புரிஸோ ரஞ்ஞோ சக்கவத்திஸ்ஸ பச்சஸ்ஸோஸி. அத்³த³ஸா கோ² , பி⁴க்க²வே, ஸோ புரிஸோ ப³ஹுன்னங் வஸ்ஸானங் ப³ஹுன்னங் வஸ்ஸஸதானங் ப³ஹுன்னங் வஸ்ஸஸஹஸ்ஸானங் அச்சயேன தி³ப்³ப³ங் சக்கரதனங் ஓஸக்கிதங் டா²னா சுதங். தி³ஸ்வான யேன ராஜா சக்கவத்தீ தேனுபஸங்கமி; உபஸங்கமித்வா ராஜானங் சக்கவத்திங் ஏதத³வோச – ‘யக்³கே⁴ , தே³வ, ஜானெய்யாஸி, தி³ப்³ப³ங் தே சக்கரதனங் ஓஸக்கிதங் டா²னா சுத’ந்தி?
88. ‘‘Dutiyopi kho, bhikkhave, rājā cakkavattī…pe… tatiyopi kho, bhikkhave, rājā cakkavattī… catutthopi kho, bhikkhave, rājā cakkavattī… pañcamopi kho, bhikkhave, rājā cakkavattī… chaṭṭhopi kho, bhikkhave, rājā cakkavattī… sattamopi kho, bhikkhave, rājā cakkavattī bahunnaṃ vassānaṃ bahunnaṃ vassasatānaṃ bahunnaṃ vassasahassānaṃ accayena aññataraṃ purisaṃ āmantesi – ‘yadā tvaṃ, ambho purisa, passeyyāsi dibbaṃ cakkaratanaṃ osakkitaṃ ṭhānā cutaṃ, atha me āroceyyāsī’ti. ‘Evaṃ, devā’ti kho, bhikkhave, so puriso rañño cakkavattissa paccassosi. Addasā kho , bhikkhave, so puriso bahunnaṃ vassānaṃ bahunnaṃ vassasatānaṃ bahunnaṃ vassasahassānaṃ accayena dibbaṃ cakkaratanaṃ osakkitaṃ ṭhānā cutaṃ. Disvāna yena rājā cakkavattī tenupasaṅkami; upasaṅkamitvā rājānaṃ cakkavattiṃ etadavoca – ‘yagghe , deva, jāneyyāsi, dibbaṃ te cakkaratanaṃ osakkitaṃ ṭhānā cuta’nti?
89. ‘‘அத² கோ², பி⁴க்க²வே, ராஜா சக்கவத்தீ ஜெட்ட²புத்தங் குமாரங் ஆமந்தாபெத்வா ஏதத³வோச – ‘தி³ப்³ப³ங் கிர மே, தாத குமார, சக்கரதனங் ஓஸக்கிதங், டா²னா சுதங், ஸுதங் கோ² பன மேதங் – யஸ்ஸ ரஞ்ஞோ சக்கவத்திஸ்ஸ தி³ப்³ப³ங் சக்கரதனங் ஓஸக்கதி, டா²னா சவதி, ந தா³னி தேன ரஞ்ஞா சிரங் ஜீவிதப்³ப³ங் ஹோதீதி. பு⁴த்தா கோ² பன மே மானுஸகா காமா, ஸமயோ தா³னி மே தி³ப்³பே³ காமே பரியேஸிதுங், ஏஹி த்வங், தாத குமார, இமங் ஸமுத்³த³பரியந்தங் பத²விங் படிபஜ்ஜ . அஹங் பன கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிஸ்ஸாமீ’தி.
89. ‘‘Atha kho, bhikkhave, rājā cakkavattī jeṭṭhaputtaṃ kumāraṃ āmantāpetvā etadavoca – ‘dibbaṃ kira me, tāta kumāra, cakkaratanaṃ osakkitaṃ, ṭhānā cutaṃ, sutaṃ kho pana metaṃ – yassa rañño cakkavattissa dibbaṃ cakkaratanaṃ osakkati, ṭhānā cavati, na dāni tena raññā ciraṃ jīvitabbaṃ hotīti. Bhuttā kho pana me mānusakā kāmā, samayo dāni me dibbe kāme pariyesituṃ, ehi tvaṃ, tāta kumāra, imaṃ samuddapariyantaṃ pathaviṃ paṭipajja . Ahaṃ pana kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajissāmī’ti.
‘‘அத² கோ², பி⁴க்க²வே, ராஜா சக்கவத்தீ ஜெட்ட²புத்தங் குமாரங் ஸாது⁴கங் ரஜ்ஜே ஸமனுஸாஸித்வா கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜி. ஸத்தாஹபப்³ப³ஜிதே கோ² பன, பி⁴க்க²வே, ராஜிஸிம்ஹி தி³ப்³ப³ங் சக்கரதனங் அந்தரதா⁴யி.
‘‘Atha kho, bhikkhave, rājā cakkavattī jeṭṭhaputtaṃ kumāraṃ sādhukaṃ rajje samanusāsitvā kesamassuṃ ohāretvā kāsāyāni vatthāni acchādetvā agārasmā anagāriyaṃ pabbaji. Sattāhapabbajite kho pana, bhikkhave, rājisimhi dibbaṃ cakkaratanaṃ antaradhāyi.
90. ‘‘அத² கோ², பி⁴க்க²வே, அஞ்ஞதரோ புரிஸோ யேன ராஜா க²த்தியோ முத்³தா⁴பி⁴ஸித்தோ தேனுபஸங்கமி; உபஸங்கமித்வா ராஜானங் க²த்தியங் முத்³தா⁴பி⁴ஸித்தங் ஏதத³வோச – ‘யக்³கே⁴, தே³வ, ஜானெய்யாஸி, தி³ப்³ப³ங் சக்கரதனங் அந்தரஹித’ந்தி? அத² கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ தி³ப்³பே³ சக்கரதனே அந்தரஹிதே அனத்தமனோ அஹோஸி. அனத்தமனதஞ்ச படிஸங்வேதே³ஸி; நோ ச கோ² ராஜிஸிங் உபஸங்கமித்வா அரியங் சக்கவத்திவத்தங் புச்சி². ஸோ ஸமதேனேவ ஸுத³ங் ஜனபத³ங் பஸாஸதி. தஸ்ஸ ஸமதேன ஜனபத³ங் பஸாஸதோ புப்³பே³னாபரங் ஜனபதா³ ந பப்³ப³ந்தி, யதா² தங் புப்³ப³கானங் ராஜூனங் அரியே சக்கவத்திவத்தே வத்தமானானங்.
90. ‘‘Atha kho, bhikkhave, aññataro puriso yena rājā khattiyo muddhābhisitto tenupasaṅkami; upasaṅkamitvā rājānaṃ khattiyaṃ muddhābhisittaṃ etadavoca – ‘yagghe, deva, jāneyyāsi, dibbaṃ cakkaratanaṃ antarahita’nti? Atha kho, bhikkhave, rājā khattiyo muddhābhisitto dibbe cakkaratane antarahite anattamano ahosi. Anattamanatañca paṭisaṃvedesi; no ca kho rājisiṃ upasaṅkamitvā ariyaṃ cakkavattivattaṃ pucchi. So samateneva sudaṃ janapadaṃ pasāsati. Tassa samatena janapadaṃ pasāsato pubbenāparaṃ janapadā na pabbanti, yathā taṃ pubbakānaṃ rājūnaṃ ariye cakkavattivatte vattamānānaṃ.
‘‘அத² கோ², பி⁴க்க²வே, அமச்சா பாரிஸஜ்ஜா க³ணகமஹாமத்தா அனீகட்டா² தோ³வாரிகா மந்தஸ்ஸாஜீவினோ ஸன்னிபதித்வா ராஜானங் க²த்தியங் முத்³தா⁴பி⁴ஸித்தங் ஏதத³வோசுங் – ‘ந கோ² தே, தே³வ, ஸமதேன (ஸுத³ங்) ஜனபத³ங் பஸாஸதோ புப்³பே³னாபரங் ஜனபதா³ பப்³ப³ந்தி, யதா² தங் புப்³ப³கானங் ராஜூனங் அரியே சக்கவத்திவத்தே வத்தமானானங். ஸங்விஜ்ஜந்தி கோ² தே, தே³வ, விஜிதே அமச்சா பாரிஸஜ்ஜா க³ணகமஹாமத்தா அனீகட்டா² தோ³வாரிகா மந்தஸ்ஸாஜீவினோ மயஞ்சேவ அஞ்ஞே ச 29 யே மயங் அரியங் சக்கவத்திவத்தங் தா⁴ரேம. இங்க⁴ த்வங், தே³வ, அம்ஹே அரியங் சக்கவத்திவத்தங் புச்ச². தஸ்ஸ தே மயங் அரியங் சக்கவத்திவத்தங் புட்டா² ப்³யாகரிஸ்ஸாமா’தி.
‘‘Atha kho, bhikkhave, amaccā pārisajjā gaṇakamahāmattā anīkaṭṭhā dovārikā mantassājīvino sannipatitvā rājānaṃ khattiyaṃ muddhābhisittaṃ etadavocuṃ – ‘na kho te, deva, samatena (sudaṃ) janapadaṃ pasāsato pubbenāparaṃ janapadā pabbanti, yathā taṃ pubbakānaṃ rājūnaṃ ariye cakkavattivatte vattamānānaṃ. Saṃvijjanti kho te, deva, vijite amaccā pārisajjā gaṇakamahāmattā anīkaṭṭhā dovārikā mantassājīvino mayañceva aññe ca 30 ye mayaṃ ariyaṃ cakkavattivattaṃ dhārema. Iṅgha tvaṃ, deva, amhe ariyaṃ cakkavattivattaṃ puccha. Tassa te mayaṃ ariyaṃ cakkavattivattaṃ puṭṭhā byākarissāmā’ti.
ஆயுவண்ணாதி³பரியானிகதா²
Āyuvaṇṇādipariyānikathā
91. ‘‘அத² கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ அமச்சே பாரிஸஜ்ஜே க³ணகமஹாமத்தே அனீகட்டே² தோ³வாரிகே மந்தஸ்ஸாஜீவினோ ஸன்னிபாதெத்வா அரியங் சக்கவத்திவத்தங் புச்சி². தஸ்ஸ தே அரியங் சக்கவத்திவத்தங் புட்டா² ப்³யாகரிங்ஸு. தேஸங் ஸுத்வா த⁴ம்மிகஞ்ஹி கோ² ரக்கா²வரணகு³த்திங் ஸங்வித³ஹி, நோ ச கோ² அத⁴னானங் த⁴னமனுப்பதா³ஸி. அத⁴னானங் த⁴னே அனநுப்பதி³யமானே தா³லித்³தி³யங் வேபுல்லமக³மாஸி. தா³லித்³தி³யே வேபுல்லங் க³தே அஞ்ஞதரோ புரிஸோ பரேஸங் அதி³ன்னங் தெ²ய்யஸங்கா²தங் ஆதி³யி. தமேனங் அக்³க³ஹேஸுங். க³ஹெத்வா ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ த³ஸ்ஸேஸுங் – ‘அயங், தே³வ, புரிஸோ பரேஸங் அதி³ன்னங் தெ²ய்யஸங்கா²தங் ஆதி³யீ’தி. ஏவங் வுத்தே, பி⁴க்க²வே, ராஜா க²த்தியோ முத்³தா⁴பி⁴ஸித்தோ தங் புரிஸங் ஏதத³வோச – ‘ஸச்சங் கிர த்வங், அம்போ⁴ புரிஸ, பரேஸங் அதி³ன்னங் தெ²ய்யஸங்கா²தங் ஆதி³யீ’தி 31? ‘ஸச்சங், தே³வா’தி. ‘கிங் காரணா’தி? ‘ந ஹி, தே³வ, ஜீவாமீ’தி. அத² கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ தஸ்ஸ புரிஸஸ்ஸ த⁴னமனுப்பதா³ஸி – ‘இமினா த்வங், அம்போ⁴ புரிஸ, த⁴னேன அத்தனா ச ஜீவாஹி, மாதாபிதரோ ச போஸேஹி, புத்ததா³ரஞ்ச போஸேஹி, கம்மந்தே ச பயோஜேஹி, ஸமணப்³ராஹ்மணேஸு 32 உத்³த⁴க்³கி³கங் த³க்கி²ணங் பதிட்டா²பேஹி ஸோவக்³கி³கங் ஸுக²விபாகங் ஸக்³க³ஸங்வத்தனிக’ந்தி. ‘ஏவங், தே³வா’தி கோ², பி⁴க்க²வே, ஸோ புரிஸோ ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ பச்சஸ்ஸோஸி.
91. ‘‘Atha kho, bhikkhave, rājā khattiyo muddhābhisitto amacce pārisajje gaṇakamahāmatte anīkaṭṭhe dovārike mantassājīvino sannipātetvā ariyaṃ cakkavattivattaṃ pucchi. Tassa te ariyaṃ cakkavattivattaṃ puṭṭhā byākariṃsu. Tesaṃ sutvā dhammikañhi kho rakkhāvaraṇaguttiṃ saṃvidahi, no ca kho adhanānaṃ dhanamanuppadāsi. Adhanānaṃ dhane ananuppadiyamāne dāliddiyaṃ vepullamagamāsi. Dāliddiye vepullaṃ gate aññataro puriso paresaṃ adinnaṃ theyyasaṅkhātaṃ ādiyi. Tamenaṃ aggahesuṃ. Gahetvā rañño khattiyassa muddhābhisittassa dassesuṃ – ‘ayaṃ, deva, puriso paresaṃ adinnaṃ theyyasaṅkhātaṃ ādiyī’ti. Evaṃ vutte, bhikkhave, rājā khattiyo muddhābhisitto taṃ purisaṃ etadavoca – ‘saccaṃ kira tvaṃ, ambho purisa, paresaṃ adinnaṃ theyyasaṅkhātaṃ ādiyī’ti 33? ‘Saccaṃ, devā’ti. ‘Kiṃ kāraṇā’ti? ‘Na hi, deva, jīvāmī’ti. Atha kho, bhikkhave, rājā khattiyo muddhābhisitto tassa purisassa dhanamanuppadāsi – ‘iminā tvaṃ, ambho purisa, dhanena attanā ca jīvāhi, mātāpitaro ca posehi, puttadārañca posehi, kammante ca payojehi, samaṇabrāhmaṇesu 34 uddhaggikaṃ dakkhiṇaṃ patiṭṭhāpehi sovaggikaṃ sukhavipākaṃ saggasaṃvattanika’nti. ‘Evaṃ, devā’ti kho, bhikkhave, so puriso rañño khattiyassa muddhābhisittassa paccassosi.
‘‘அஞ்ஞதரோபி கோ², பி⁴க்க²வே, புரிஸோ பரேஸங் அதி³ன்னங் தெ²ய்யஸங்கா²தங் ஆதி³யி. தமேனங் அக்³க³ஹேஸுங். க³ஹெத்வா ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ த³ஸ்ஸேஸுங் – ‘அயங், தே³வ, புரிஸோ பரேஸங் அதி³ன்னங் தெ²ய்யஸங்கா²தங் ஆதி³யீ’தி. ஏவங் வுத்தே, பி⁴க்க²வே, ராஜா க²த்தியோ முத்³தா⁴பி⁴ஸித்தோ தங் புரிஸங் ஏதத³வோச – ‘ஸச்சங் கிர த்வங், அம்போ⁴ புரிஸ, பரேஸங் அதி³ன்னங் தெ²ய்யஸங்கா²தங் ஆதி³யீ’தி? ‘ஸச்சங், தே³வா’தி. ‘கிங் காரணா’தி? ‘ந ஹி, தே³வ, ஜீவாமீ’தி. அத² கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ தஸ்ஸ புரிஸஸ்ஸ த⁴னமனுப்பதா³ஸி – ‘இமினா த்வங், அம்போ⁴ புரிஸ, த⁴னேன அத்தனா ச ஜீவாஹி, மாதாபிதரோ ச போஸேஹி, புத்ததா³ரஞ்ச போஸேஹி, கம்மந்தே ச பயோஜேஹி, ஸமணப்³ராஹ்மணேஸு உத்³த⁴க்³கி³கங் த³க்கி²ணங் பதிட்டா²பேஹி ஸோவக்³கி³கங் ஸுக²விபாகங் ஸக்³க³ஸங்வத்தனிக’ந்தி. ‘ஏவங், தே³வா’தி கோ², பி⁴க்க²வே, ஸோ புரிஸோ ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ பச்சஸ்ஸோஸி .
‘‘Aññataropi kho, bhikkhave, puriso paresaṃ adinnaṃ theyyasaṅkhātaṃ ādiyi. Tamenaṃ aggahesuṃ. Gahetvā rañño khattiyassa muddhābhisittassa dassesuṃ – ‘ayaṃ, deva, puriso paresaṃ adinnaṃ theyyasaṅkhātaṃ ādiyī’ti. Evaṃ vutte, bhikkhave, rājā khattiyo muddhābhisitto taṃ purisaṃ etadavoca – ‘saccaṃ kira tvaṃ, ambho purisa, paresaṃ adinnaṃ theyyasaṅkhātaṃ ādiyī’ti? ‘Saccaṃ, devā’ti. ‘Kiṃ kāraṇā’ti? ‘Na hi, deva, jīvāmī’ti. Atha kho, bhikkhave, rājā khattiyo muddhābhisitto tassa purisassa dhanamanuppadāsi – ‘iminā tvaṃ, ambho purisa, dhanena attanā ca jīvāhi, mātāpitaro ca posehi, puttadārañca posehi, kammante ca payojehi, samaṇabrāhmaṇesu uddhaggikaṃ dakkhiṇaṃ patiṭṭhāpehi sovaggikaṃ sukhavipākaṃ saggasaṃvattanika’nti. ‘Evaṃ, devā’ti kho, bhikkhave, so puriso rañño khattiyassa muddhābhisittassa paccassosi .
92. ‘‘அஸ்ஸோஸுங் கோ², பி⁴க்க²வே, மனுஸ்ஸா – ‘யே கிர, போ⁴, பரேஸங் அதி³ன்னங் தெ²ய்யஸங்கா²தங் ஆதி³யந்தி, தேஸங் ராஜா த⁴னமனுப்பதே³தீ’தி. ஸுத்வான தேஸங் ஏதத³ஹோஸி – ‘யங்னூன மயம்பி பரேஸங் அதி³ன்னங் தெ²ய்யஸங்கா²தங் ஆதி³யெய்யாமா’தி. அத² கோ², பி⁴க்க²வே, அஞ்ஞதரோ புரிஸோ பரேஸங் அதி³ன்னங் தெ²ய்யஸங்கா²தங் ஆதி³யி. தமேனங் அக்³க³ஹேஸுங். க³ஹெத்வா ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ த³ஸ்ஸேஸுங் – ‘அயங், தே³வ, புரிஸோ பரேஸங் அதி³ன்னங் தெ²ய்யஸங்கா²தங் ஆதி³யீ’தி. ஏவங் வுத்தே, பி⁴க்க²வே, ராஜா க²த்தியோ முத்³தா⁴பி⁴ஸித்தோ தங் புரிஸங் ஏதத³வோச – ‘ஸச்சங் கிர த்வங், அம்போ⁴ புரிஸ, பரேஸங் அதி³ன்னங் தெ²ய்யஸங்கா²தங் ஆதி³யீ’தி? ‘ஸச்சங், தே³வா’தி. ‘கிங் காரணா’தி? ‘ந ஹி, தே³வ, ஜீவாமீ’தி. அத² கோ², பி⁴க்க²வே, ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ ஏதத³ஹோஸி – ‘ஸசே கோ² அஹங் யோ யோ பரேஸங் அதி³ன்னங் தெ²ய்யஸங்கா²தங் ஆதி³யிஸ்ஸதி, தஸ்ஸ தஸ்ஸ த⁴னமனுப்பத³ஸ்ஸாமி, ஏவமித³ங் அதி³ன்னாதா³னங் பவட்³டி⁴ஸ்ஸதி. யங்னூனாஹங் இமங் புரிஸங் ஸுனிஸேத⁴ங் நிஸேதெ⁴ய்யங், மூலக⁴ச்சங் 35 கரெய்யங், ஸீஸமஸ்ஸ சி²ந்தெ³ய்ய’ந்தி. அத² கோ², பி⁴க்க²வே, ராஜா க²த்தியோ முத்³தா⁴பி⁴ஸித்தோ புரிஸே ஆணாபேஸி – ‘தேன ஹி, ப⁴ணே, இமங் புரிஸங் த³ள்ஹாய ரஜ்ஜுயா பச்சா²பா³ஹங் 36 கா³ள்ஹப³ந்த⁴னங் ப³ந்தி⁴த்வா கு²ரமுண்ட³ங் கரித்வா க²ரஸ்ஸரேன பணவேன ரதி²காய ரதி²கங் ஸிங்கா⁴டகேன ஸிங்கா⁴டகங் பரினெத்வா த³க்கி²ணேன த்³வாரேன நிக்க²மித்வா த³க்கி²ணதோ நக³ரஸ்ஸ ஸுனிஸேத⁴ங் நிஸேதே⁴த², மூலக⁴ச்சங் கரோத², ஸீஸமஸ்ஸ சி²ந்த³தா²’தி. ‘ஏவங், தே³வா’தி கோ², பி⁴க்க²வே, தே புரிஸா ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ படிஸ்ஸுத்வா தங் புரிஸங் த³ள்ஹாய ரஜ்ஜுயா பச்சா²பா³ஹங் கா³ள்ஹப³ந்த⁴னங் ப³ந்தி⁴த்வா கு²ரமுண்ட³ங் கரித்வா க²ரஸ்ஸரேன பணவேன ரதி²காய ரதி²கங் ஸிங்கா⁴டகேன ஸிங்கா⁴டகங் பரினெத்வா த³க்கி²ணேன த்³வாரேன நிக்க²மித்வா த³க்கி²ணதோ நக³ரஸ்ஸ ஸுனிஸேத⁴ங் நிஸேதே⁴ஸுங், மூலக⁴ச்சங் அகங்ஸு, ஸீஸமஸ்ஸ சி²ந்தி³ங்ஸு.
92. ‘‘Assosuṃ kho, bhikkhave, manussā – ‘ye kira, bho, paresaṃ adinnaṃ theyyasaṅkhātaṃ ādiyanti, tesaṃ rājā dhanamanuppadetī’ti. Sutvāna tesaṃ etadahosi – ‘yaṃnūna mayampi paresaṃ adinnaṃ theyyasaṅkhātaṃ ādiyeyyāmā’ti. Atha kho, bhikkhave, aññataro puriso paresaṃ adinnaṃ theyyasaṅkhātaṃ ādiyi. Tamenaṃ aggahesuṃ. Gahetvā rañño khattiyassa muddhābhisittassa dassesuṃ – ‘ayaṃ, deva, puriso paresaṃ adinnaṃ theyyasaṅkhātaṃ ādiyī’ti. Evaṃ vutte, bhikkhave, rājā khattiyo muddhābhisitto taṃ purisaṃ etadavoca – ‘saccaṃ kira tvaṃ, ambho purisa, paresaṃ adinnaṃ theyyasaṅkhātaṃ ādiyī’ti? ‘Saccaṃ, devā’ti. ‘Kiṃ kāraṇā’ti? ‘Na hi, deva, jīvāmī’ti. Atha kho, bhikkhave, rañño khattiyassa muddhābhisittassa etadahosi – ‘sace kho ahaṃ yo yo paresaṃ adinnaṃ theyyasaṅkhātaṃ ādiyissati, tassa tassa dhanamanuppadassāmi, evamidaṃ adinnādānaṃ pavaḍḍhissati. Yaṃnūnāhaṃ imaṃ purisaṃ sunisedhaṃ nisedheyyaṃ, mūlaghaccaṃ 37 kareyyaṃ, sīsamassa chindeyya’nti. Atha kho, bhikkhave, rājā khattiyo muddhābhisitto purise āṇāpesi – ‘tena hi, bhaṇe, imaṃ purisaṃ daḷhāya rajjuyā pacchābāhaṃ 38 gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinetvā dakkhiṇena dvārena nikkhamitvā dakkhiṇato nagarassa sunisedhaṃ nisedhetha, mūlaghaccaṃ karotha, sīsamassa chindathā’ti. ‘Evaṃ, devā’ti kho, bhikkhave, te purisā rañño khattiyassa muddhābhisittassa paṭissutvā taṃ purisaṃ daḷhāya rajjuyā pacchābāhaṃ gāḷhabandhanaṃ bandhitvā khuramuṇḍaṃ karitvā kharassarena paṇavena rathikāya rathikaṃ siṅghāṭakena siṅghāṭakaṃ parinetvā dakkhiṇena dvārena nikkhamitvā dakkhiṇato nagarassa sunisedhaṃ nisedhesuṃ, mūlaghaccaṃ akaṃsu, sīsamassa chindiṃsu.
93. ‘‘அஸ்ஸோஸுங் கோ², பி⁴க்க²வே, மனுஸ்ஸா – ‘யே கிர, போ⁴, பரேஸங் அதி³ன்னங் தெ²ய்யஸங்கா²தங் ஆதி³யந்தி, தே ராஜா ஸுனிஸேத⁴ங் நிஸேதே⁴தி, மூலக⁴ச்சங் கரோதி, ஸீஸானி தேஸங் சி²ந்த³தீ’தி. ஸுத்வான தேஸங் ஏதத³ஹோஸி – ‘யங்னூன மயம்பி திண்ஹானி ஸத்தா²னி காராபெஸ்ஸாம 39, திண்ஹானி ஸத்தா²னி காராபெத்வா யேஸங் அதி³ன்னங் தெ²ய்யஸங்கா²தங் ஆதி³யிஸ்ஸாம, தே ஸுனிஸேத⁴ங் நிஸேதெ⁴ஸ்ஸாம, மூலக⁴ச்சங் கரிஸ்ஸாம, ஸீஸானி தேஸங் சி²ந்தி³ஸ்ஸாமா’தி. தே திண்ஹானி ஸத்தா²னி காராபேஸுங், திண்ஹானி ஸத்தா²னி காராபெத்வா கா³மகா⁴தம்பி உபக்கமிங்ஸு காதுங், நிக³மகா⁴தம்பி உபக்கமிங்ஸு காதுங், நக³ரகா⁴தம்பி உபக்கமிங்ஸு காதுங், பந்த²து³ஹனம்பி 40 உபக்கமிங்ஸு காதுங். யேஸங் தே அதி³ன்னங் தெ²ய்யஸங்கா²தங் ஆதி³யந்தி, தே ஸுனிஸேத⁴ங் நிஸேதெ⁴ந்தி, மூலக⁴ச்சங் கரொந்தி, ஸீஸானி தேஸங் சி²ந்த³ந்தி.
93. ‘‘Assosuṃ kho, bhikkhave, manussā – ‘ye kira, bho, paresaṃ adinnaṃ theyyasaṅkhātaṃ ādiyanti, te rājā sunisedhaṃ nisedheti, mūlaghaccaṃ karoti, sīsāni tesaṃ chindatī’ti. Sutvāna tesaṃ etadahosi – ‘yaṃnūna mayampi tiṇhāni satthāni kārāpessāma 41, tiṇhāni satthāni kārāpetvā yesaṃ adinnaṃ theyyasaṅkhātaṃ ādiyissāma, te sunisedhaṃ nisedhessāma, mūlaghaccaṃ karissāma, sīsāni tesaṃ chindissāmā’ti. Te tiṇhāni satthāni kārāpesuṃ, tiṇhāni satthāni kārāpetvā gāmaghātampi upakkamiṃsu kātuṃ, nigamaghātampi upakkamiṃsu kātuṃ, nagaraghātampi upakkamiṃsu kātuṃ, panthaduhanampi 42 upakkamiṃsu kātuṃ. Yesaṃ te adinnaṃ theyyasaṅkhātaṃ ādiyanti, te sunisedhaṃ nisedhenti, mūlaghaccaṃ karonti, sīsāni tesaṃ chindanti.
94. ‘‘இதி கோ², பி⁴க்க²வே, அத⁴னானங் த⁴னே அனநுப்பதி³யமானே தா³லித்³தி³யங் வேபுல்லமக³மாஸி, தா³லித்³தி³யே வேபுல்லங் க³தே அதி³ன்னாதா³னங் வேபுல்லமக³மாஸி, அதி³ன்னாதா³னே வேபுல்லங் க³தே ஸத்த²ங் வேபுல்லமக³மாஸி, ஸத்தே² வேபுல்லங் க³தே பாணாதிபாதோ வேபுல்லமக³மாஸி, பாணாதிபாதே வேபுல்லங் க³தே தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங் அஸீதிவஸ்ஸஸஹஸ்ஸாயுகானங் மனுஸ்ஸானங் சத்தாரீஸவஸ்ஸஸஹஸ்ஸாயுகா புத்தா அஹேஸுங்.
94. ‘‘Iti kho, bhikkhave, adhanānaṃ dhane ananuppadiyamāne dāliddiyaṃ vepullamagamāsi, dāliddiye vepullaṃ gate adinnādānaṃ vepullamagamāsi, adinnādāne vepullaṃ gate satthaṃ vepullamagamāsi, satthe vepullaṃ gate pāṇātipāto vepullamagamāsi, pāṇātipāte vepullaṃ gate tesaṃ sattānaṃ āyupi parihāyi, vaṇṇopi parihāyi. Tesaṃ āyunāpi parihāyamānānaṃ vaṇṇenapi parihāyamānānaṃ asītivassasahassāyukānaṃ manussānaṃ cattārīsavassasahassāyukā puttā ahesuṃ.
‘‘சத்தாரீஸவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு அஞ்ஞதரோ புரிஸோ பரேஸங் அதி³ன்னங் தெ²ய்யஸங்கா²தங் ஆதி³யி. தமேனங் அக்³க³ஹேஸுங். க³ஹெத்வா ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ த³ஸ்ஸேஸுங் – ‘அயங், தே³வ, புரிஸோ பரேஸங் அதி³ன்னங் தெ²ய்யஸங்கா²தங் ஆதி³யீ’தி. ஏவங் வுத்தே, பி⁴க்க²வே, ராஜா க²த்தியோ முத்³தா⁴பி⁴ஸித்தோ தங் புரிஸங் ஏதத³வோச – ‘ஸச்சங் கிர த்வங், அம்போ⁴ புரிஸ, பரேஸங் அதி³ன்னங் தெ²ய்யஸங்கா²தங் ஆதி³யீ’தி? ‘ந ஹி, தே³வா’தி ஸம்பஜானமுஸா அபா⁴ஸி.
‘‘Cattārīsavassasahassāyukesu, bhikkhave, manussesu aññataro puriso paresaṃ adinnaṃ theyyasaṅkhātaṃ ādiyi. Tamenaṃ aggahesuṃ. Gahetvā rañño khattiyassa muddhābhisittassa dassesuṃ – ‘ayaṃ, deva, puriso paresaṃ adinnaṃ theyyasaṅkhātaṃ ādiyī’ti. Evaṃ vutte, bhikkhave, rājā khattiyo muddhābhisitto taṃ purisaṃ etadavoca – ‘saccaṃ kira tvaṃ, ambho purisa, paresaṃ adinnaṃ theyyasaṅkhātaṃ ādiyī’ti? ‘Na hi, devā’ti sampajānamusā abhāsi.
95. ‘‘இதி கோ², பி⁴க்க²வே, அத⁴னானங் த⁴னே அனநுப்பதி³யமானே தா³லித்³தி³யங் வேபுல்லமக³மாஸி. தா³லித்³தி³யே வேபுல்லங் க³தே அதி³ன்னாதா³னங் வேபுல்லமக³மாஸி, அதி³ன்னாதா³னே வேபுல்லங் க³தே ஸத்த²ங் வேபுல்லமக³மாஸி. ஸத்தே² வேபுல்லங் க³தே பாணாதிபாதோ வேபுல்லமக³மாஸி, பாணாதிபாதே வேபுல்லங் க³தே முஸாவாதோ³ வேபுல்லமக³மாஸி , முஸாவாதே³ வேபுல்லங் க³தே தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங் சத்தாரீஸவஸ்ஸஸஹஸ்ஸாயுகானங் மனுஸ்ஸானங் வீஸதிவஸ்ஸஸஹஸ்ஸாயுகா புத்தா அஹேஸுங்.
95. ‘‘Iti kho, bhikkhave, adhanānaṃ dhane ananuppadiyamāne dāliddiyaṃ vepullamagamāsi. Dāliddiye vepullaṃ gate adinnādānaṃ vepullamagamāsi, adinnādāne vepullaṃ gate satthaṃ vepullamagamāsi. Satthe vepullaṃ gate pāṇātipāto vepullamagamāsi, pāṇātipāte vepullaṃ gate musāvādo vepullamagamāsi , musāvāde vepullaṃ gate tesaṃ sattānaṃ āyupi parihāyi, vaṇṇopi parihāyi. Tesaṃ āyunāpi parihāyamānānaṃ vaṇṇenapi parihāyamānānaṃ cattārīsavassasahassāyukānaṃ manussānaṃ vīsativassasahassāyukā puttā ahesuṃ.
‘‘வீஸதிவஸ்ஸஸஹஸ்ஸாயுகேஸு , பி⁴க்க²வே, மனுஸ்ஸேஸு அஞ்ஞதரோ புரிஸோ பரேஸங் அதி³ன்னங் தெ²ய்யஸங்கா²தங் ஆதி³யி. தமேனங் அஞ்ஞதரோ புரிஸோ ரஞ்ஞோ க²த்தியஸ்ஸ முத்³தா⁴பி⁴ஸித்தஸ்ஸ ஆரோசேஸி – ‘இத்த²ன்னாமோ, தே³வ, புரிஸோ பரேஸங் அதி³ன்னங் தெ²ய்யஸங்கா²தங் ஆதி³யீ’தி பேஸுஞ்ஞமகாஸி.
‘‘Vīsativassasahassāyukesu , bhikkhave, manussesu aññataro puriso paresaṃ adinnaṃ theyyasaṅkhātaṃ ādiyi. Tamenaṃ aññataro puriso rañño khattiyassa muddhābhisittassa ārocesi – ‘itthannāmo, deva, puriso paresaṃ adinnaṃ theyyasaṅkhātaṃ ādiyī’ti pesuññamakāsi.
96. ‘‘இதி கோ², பி⁴க்க²வே, அத⁴னானங் த⁴னே அனநுப்பதி³யமானே தா³லித்³தி³யங் வேபுல்லமக³மாஸி. தா³லித்³தி³யே வேபுல்லங் க³தே அதி³ன்னாதா³னங் வேபுல்லமக³மாஸி, அதி³ன்னாதா³னே வேபுல்லங் க³தே ஸத்த²ங் வேபுல்லமக³மாஸி, ஸத்தே² வேபுல்லங் க³தே பாணாதிபாதோ வேபுல்லமக³மாஸி, பாணாதிபாதே வேபுல்லங் க³தே முஸாவாதோ³ வேபுல்லமக³மாஸி, முஸாவாதே³ வேபுல்லங் க³தே பிஸுணா வாசா வேபுல்லமக³மாஸி, பிஸுணாய வாசாய வேபுல்லங் க³தாய தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங் வீஸதிவஸ்ஸஸஹஸ்ஸாயுகானங் மனுஸ்ஸானங் த³ஸவஸ்ஸஸஹஸ்ஸாயுகா புத்தா அஹேஸுங்.
96. ‘‘Iti kho, bhikkhave, adhanānaṃ dhane ananuppadiyamāne dāliddiyaṃ vepullamagamāsi. Dāliddiye vepullaṃ gate adinnādānaṃ vepullamagamāsi, adinnādāne vepullaṃ gate satthaṃ vepullamagamāsi, satthe vepullaṃ gate pāṇātipāto vepullamagamāsi, pāṇātipāte vepullaṃ gate musāvādo vepullamagamāsi, musāvāde vepullaṃ gate pisuṇā vācā vepullamagamāsi, pisuṇāya vācāya vepullaṃ gatāya tesaṃ sattānaṃ āyupi parihāyi, vaṇṇopi parihāyi. Tesaṃ āyunāpi parihāyamānānaṃ vaṇṇenapi parihāyamānānaṃ vīsativassasahassāyukānaṃ manussānaṃ dasavassasahassāyukā puttā ahesuṃ.
‘‘த³ஸவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு ஏகித³ங் ஸத்தா வண்ணவந்தோ ஹொந்தி, ஏகித³ங் ஸத்தா து³ப்³ப³ண்ணா. தத்த² யே தே ஸத்தா து³ப்³ப³ண்ணா, தே வண்ணவந்தே ஸத்தே அபி⁴ஜ்ஜா²யந்தா பரேஸங் தா³ரேஸு சாரித்தங் ஆபஜ்ஜிங்ஸு.
‘‘Dasavassasahassāyukesu, bhikkhave, manussesu ekidaṃ sattā vaṇṇavanto honti, ekidaṃ sattā dubbaṇṇā. Tattha ye te sattā dubbaṇṇā, te vaṇṇavante satte abhijjhāyantā paresaṃ dāresu cārittaṃ āpajjiṃsu.
97. ‘‘இதி கோ², பி⁴க்க²வே, அத⁴னானங் த⁴னே அனநுப்பதி³யமானே தா³லித்³தி³யங் வேபுல்லமக³மாஸி. தா³லித்³தி³யே வேபுல்லங் க³தே…பே॰… காமேஸுமிச்சா²சாரோ வேபுல்லமக³மாஸி, காமேஸுமிச்சா²சாரே வேபுல்லங் க³தே தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங் த³ஸவஸ்ஸஸஹஸ்ஸாயுகானங் மனுஸ்ஸானங் பஞ்சவஸ்ஸஸஹஸ்ஸாயுகா புத்தா அஹேஸுங்.
97. ‘‘Iti kho, bhikkhave, adhanānaṃ dhane ananuppadiyamāne dāliddiyaṃ vepullamagamāsi. Dāliddiye vepullaṃ gate…pe… kāmesumicchācāro vepullamagamāsi, kāmesumicchācāre vepullaṃ gate tesaṃ sattānaṃ āyupi parihāyi, vaṇṇopi parihāyi. Tesaṃ āyunāpi parihāyamānānaṃ vaṇṇenapi parihāyamānānaṃ dasavassasahassāyukānaṃ manussānaṃ pañcavassasahassāyukā puttā ahesuṃ.
98. ‘‘பஞ்சவஸ்ஸஸஹஸ்ஸாயுகேஸு, பி⁴க்க²வே , மனுஸ்ஸேஸு த்³வே த⁴ம்மா வேபுல்லமக³மங்ஸு – ப²ருஸாவாசா ஸம்ப²ப்பலாபோ ச. த்³வீஸு த⁴ம்மேஸு வேபுல்லங் க³தேஸு தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங் பஞ்சவஸ்ஸஸஹஸ்ஸாயுகானங் மனுஸ்ஸானங் அப்பேகச்சே அட்³ட⁴தெய்யவஸ்ஸஸஹஸ்ஸாயுகா, அப்பேகச்சே த்³வேவஸ்ஸஸஹஸ்ஸாயுகா புத்தா அஹேஸுங்.
98. ‘‘Pañcavassasahassāyukesu, bhikkhave , manussesu dve dhammā vepullamagamaṃsu – pharusāvācā samphappalāpo ca. Dvīsu dhammesu vepullaṃ gatesu tesaṃ sattānaṃ āyupi parihāyi, vaṇṇopi parihāyi. Tesaṃ āyunāpi parihāyamānānaṃ vaṇṇenapi parihāyamānānaṃ pañcavassasahassāyukānaṃ manussānaṃ appekacce aḍḍhateyyavassasahassāyukā, appekacce dvevassasahassāyukā puttā ahesuṃ.
99. ‘‘அட்³ட⁴தெய்யவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு அபி⁴ஜ்ஜா²ப்³யாபாதா³ வேபுல்லமக³மங்ஸு. அபி⁴ஜ்ஜா²ப்³யாபாதே³ஸு வேபுல்லங் க³தேஸு தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங் அட்³ட⁴தெய்யவஸ்ஸஸஹஸ்ஸாயுகானங் மனுஸ்ஸானங் வஸ்ஸஸஹஸ்ஸாயுகா புத்தா அஹேஸுங்.
99. ‘‘Aḍḍhateyyavassasahassāyukesu, bhikkhave, manussesu abhijjhābyāpādā vepullamagamaṃsu. Abhijjhābyāpādesu vepullaṃ gatesu tesaṃ sattānaṃ āyupi parihāyi, vaṇṇopi parihāyi. Tesaṃ āyunāpi parihāyamānānaṃ vaṇṇenapi parihāyamānānaṃ aḍḍhateyyavassasahassāyukānaṃ manussānaṃ vassasahassāyukā puttā ahesuṃ.
100. ‘‘வஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு மிச்சா²தி³ட்டி² வேபுல்லமக³மாஸி. மிச்சா²தி³ட்டி²யா வேபுல்லங் க³தாய தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங் வஸ்ஸஸஹஸ்ஸாயுகானங் மனுஸ்ஸானங் பஞ்சவஸ்ஸஸதாயுகா புத்தா அஹேஸுங்.
100. ‘‘Vassasahassāyukesu, bhikkhave, manussesu micchādiṭṭhi vepullamagamāsi. Micchādiṭṭhiyā vepullaṃ gatāya tesaṃ sattānaṃ āyupi parihāyi, vaṇṇopi parihāyi. Tesaṃ āyunāpi parihāyamānānaṃ vaṇṇenapi parihāyamānānaṃ vassasahassāyukānaṃ manussānaṃ pañcavassasatāyukā puttā ahesuṃ.
101. ‘‘பஞ்சவஸ்ஸஸதாயுகேஸு, பி⁴க்க²வே, மனுஸ்ஸேஸு தயோ த⁴ம்மா வேபுல்லமக³மங்ஸு. அத⁴ம்மராகோ³ விஸமலோபோ⁴ மிச்சா²த⁴ம்மோ. தீஸு த⁴ம்மேஸு வேபுல்லங் க³தேஸு தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங் பஞ்சவஸ்ஸஸதாயுகானங் மனுஸ்ஸானங் அப்பேகச்சே அட்³ட⁴தெய்யவஸ்ஸஸதாயுகா, அப்பேகச்சே த்³வேவஸ்ஸஸதாயுகா புத்தா அஹேஸுங்.
101. ‘‘Pañcavassasatāyukesu, bhikkhave, manussesu tayo dhammā vepullamagamaṃsu. Adhammarāgo visamalobho micchādhammo. Tīsu dhammesu vepullaṃ gatesu tesaṃ sattānaṃ āyupi parihāyi, vaṇṇopi parihāyi. Tesaṃ āyunāpi parihāyamānānaṃ vaṇṇenapi parihāyamānānaṃ pañcavassasatāyukānaṃ manussānaṃ appekacce aḍḍhateyyavassasatāyukā, appekacce dvevassasatāyukā puttā ahesuṃ.
‘‘அட்³ட⁴தெய்யவஸ்ஸஸதாயுகேஸு, பி⁴க்க²வே , மனுஸ்ஸேஸு இமே த⁴ம்மா வேபுல்லமக³மங்ஸு. அமத்தெய்யதா அபெத்தெய்யதா அஸாமஞ்ஞதா அப்³ரஹ்மஞ்ஞதா ந குலே ஜெட்டா²பசாயிதா.
‘‘Aḍḍhateyyavassasatāyukesu, bhikkhave , manussesu ime dhammā vepullamagamaṃsu. Amatteyyatā apetteyyatā asāmaññatā abrahmaññatā na kule jeṭṭhāpacāyitā.
102. ‘‘இதி கோ², பி⁴க்க²வே, அத⁴னானங் த⁴னே அனநுப்பதி³யமானே தா³லித்³தி³யங் வேபுல்லமக³மாஸி. தா³லித்³தி³யே வேபுல்லங் க³தே அதி³ன்னாதா³னங் வேபுல்லமக³மாஸி. அதி³ன்னாதா³னே வேபுல்லங் க³தே ஸத்த²ங் வேபுல்லமக³மாஸி. ஸத்தே² வேபுல்லங் க³தே பாணாதிபாதோ வேபுல்லமக³மாஸி. பாணாதிபாதே வேபுல்லங் க³தே முஸாவாதோ³ வேபுல்லமக³மாஸி. முஸாவாதே³ வேபுல்லங் க³தே பிஸுணா வாசா வேபுல்லமக³மாஸி. பிஸுணாய வாசாய வேபுல்லங் க³தாய காமேஸுமிச்சா²சாரோ வேபுல்லமக³மாஸி. காமேஸுமிச்சா²சாரே வேபுல்லங் க³தே த்³வே த⁴ம்மா வேபுல்லமக³மங்ஸு, ப²ருஸா வாசா ஸம்ப²ப்பலாபோ ச. த்³வீஸு த⁴ம்மேஸு வேபுல்லங் க³தேஸு அபி⁴ஜ்ஜா²ப்³யாபாதா³ வேபுல்லமக³மங்ஸு. அபி⁴ஜ்ஜா²ப்³யாபாதே³ஸு வேபுல்லங் க³தேஸு மிச்சா²தி³ட்டி² வேபுல்லமக³மாஸி. மிச்சா²தி³ட்டி²யா வேபுல்லங் க³தாய தயோ த⁴ம்மா வேபுல்லமக³மங்ஸு, அத⁴ம்மராகோ³ விஸமலோபோ⁴ மிச்சா²த⁴ம்மோ. தீஸு த⁴ம்மேஸு வேபுல்லங் க³தேஸு இமே த⁴ம்மா வேபுல்லமக³மங்ஸு, அமத்தெய்யதா அபெத்தெய்யதா அஸாமஞ்ஞதா அப்³ரஹ்மஞ்ஞதா ந குலே ஜெட்டா²பசாயிதா. இமேஸு த⁴ம்மேஸு வேபுல்லங் க³தேஸு தேஸங் ஸத்தானங் ஆயுபி பரிஹாயி, வண்ணோபி பரிஹாயி. தேஸங் ஆயுனாபி பரிஹாயமானானங் வண்ணேனபி பரிஹாயமானானங் அட்³ட⁴தெய்யவஸ்ஸஸதாயுகானங் மனுஸ்ஸானங் வஸ்ஸஸதாயுகா புத்தா அஹேஸுங்.
102. ‘‘Iti kho, bhikkhave, adhanānaṃ dhane ananuppadiyamāne dāliddiyaṃ vepullamagamāsi. Dāliddiye vepullaṃ gate adinnādānaṃ vepullamagamāsi. Adinnādāne vepullaṃ gate satthaṃ vepullamagamāsi. Satthe vepullaṃ gate pāṇātipāto vepullamagamāsi. Pāṇātipāte vepullaṃ gate musāvādo vepullamagamāsi. Musāvāde vepullaṃ gate pisuṇā vācā vepullamagamāsi. Pisuṇāya vācāya vepullaṃ gatāya kāmesumicchācāro vepullamagamāsi. Kāmesumicchācāre vepullaṃ gate dve dhammā vepullamagamaṃsu, pharusā vācā samphappalāpo ca. Dvīsu dhammesu vepullaṃ gatesu abhijjhābyāpādā vepullamagamaṃsu. Abhijjhābyāpādesu vepullaṃ gatesu micchādiṭṭhi vepullamagamāsi. Micchādiṭṭhiyā vepullaṃ gatāya tayo dhammā vepullamagamaṃsu, adhammarāgo visamalobho micchādhammo. Tīsu dhammesu vepullaṃ gatesu ime dhammā vepullamagamaṃsu, amatteyyatā apetteyyatā asāmaññatā abrahmaññatā na kule jeṭṭhāpacāyitā. Imesu dhammesu vepullaṃ gatesu tesaṃ sattānaṃ āyupi parihāyi, vaṇṇopi parihāyi. Tesaṃ āyunāpi parihāyamānānaṃ vaṇṇenapi parihāyamānānaṃ aḍḍhateyyavassasatāyukānaṃ manussānaṃ vassasatāyukā puttā ahesuṃ.
த³ஸவஸ்ஸாயுகஸமயோ
Dasavassāyukasamayo
103. ‘‘ப⁴விஸ்ஸதி , பி⁴க்க²வே, ஸோ ஸமயோ, யங் இமேஸங் மனுஸ்ஸானங் த³ஸவஸ்ஸாயுகா புத்தா ப⁴விஸ்ஸந்தி. த³ஸவஸ்ஸாயுகேஸு, பி⁴க்க²வே, மனுஸ்ஸேஸு பஞ்சவஸ்ஸிகா 43 குமாரிகா அலங்பதெய்யா ப⁴விஸ்ஸந்தி. த³ஸவஸ்ஸாயுகேஸு, பி⁴க்க²வே, மனுஸ்ஸேஸு இமானி ரஸானி அந்தரதா⁴யிஸ்ஸந்தி, ஸெய்யதி²த³ங், ஸப்பி நவனீதங் தேலங் மது⁴ பா²ணிதங் லோணங். த³ஸவஸ்ஸாயுகேஸு, பி⁴க்க²வே, மனுஸ்ஸேஸு குத்³ரூஸகோ அக்³க³ங் போ⁴ஜனானங் 44 ப⁴விஸ்ஸதி. ஸெய்யதா²பி, பி⁴க்க²வே, ஏதரஹி ஸாலிமங்ஸோத³னோ அக்³க³ங் போ⁴ஜனானங்; ஏவமேவ கோ², பி⁴க்க²வே, த³ஸவஸ்ஸாயுகேஸு மனுஸ்ஸேஸு குத்³ரூஸகோ அக்³க³ங் போ⁴ஜனானங் ப⁴விஸ்ஸதி.
103. ‘‘Bhavissati , bhikkhave, so samayo, yaṃ imesaṃ manussānaṃ dasavassāyukā puttā bhavissanti. Dasavassāyukesu, bhikkhave, manussesu pañcavassikā 45 kumārikā alaṃpateyyā bhavissanti. Dasavassāyukesu, bhikkhave, manussesu imāni rasāni antaradhāyissanti, seyyathidaṃ, sappi navanītaṃ telaṃ madhu phāṇitaṃ loṇaṃ. Dasavassāyukesu, bhikkhave, manussesu kudrūsako aggaṃ bhojanānaṃ 46 bhavissati. Seyyathāpi, bhikkhave, etarahi sālimaṃsodano aggaṃ bhojanānaṃ; evameva kho, bhikkhave, dasavassāyukesu manussesu kudrūsako aggaṃ bhojanānaṃ bhavissati.
‘‘த³ஸவஸ்ஸாயுகேஸு, பி⁴க்க²வே, மனுஸ்ஸேஸு த³ஸ குஸலகம்மபதா² ஸப்³பே³ன ஸப்³ப³ங் அந்தரதா⁴யிஸ்ஸந்தி, த³ஸ அகுஸலகம்மபதா² அதிப்³யாதி³ப்பிஸ்ஸந்தி 47. த³ஸவஸ்ஸாயுகேஸு , பி⁴க்க²வே, மனுஸ்ஸேஸு குஸலந்திபி ந ப⁴விஸ்ஸதி, குதோ பன குஸலஸ்ஸ காரகோ. த³ஸவஸ்ஸாயுகேஸு, பி⁴க்க²வே, மனுஸ்ஸேஸு யே தே ப⁴விஸ்ஸந்தி அமத்தெய்யா அபெத்தெய்யா அஸாமஞ்ஞா அப்³ரஹ்மஞ்ஞா ந குலே ஜெட்டா²பசாயினோ, தே புஜ்ஜா ச ப⁴விஸ்ஸந்தி பாஸங்ஸா ச. ஸெய்யதா²பி, பி⁴க்க²வே, ஏதரஹி மத்தெய்யா பெத்தெய்யா ஸாமஞ்ஞா ப்³ரஹ்மஞ்ஞா குலே ஜெட்டா²பசாயினோ புஜ்ஜா ச பாஸங்ஸா ச; ஏவமேவ கோ², பி⁴க்க²வே, த³ஸவஸ்ஸாயுகேஸு மனுஸ்ஸேஸு யே தே ப⁴விஸ்ஸந்தி அமத்தெய்யா அபெத்தெய்யா அஸாமஞ்ஞா அப்³ரஹ்மஞ்ஞா ந குலே ஜெட்டா²பசாயினோ, தே புஜ்ஜா ச ப⁴விஸ்ஸந்தி பாஸங்ஸா ச.
‘‘Dasavassāyukesu, bhikkhave, manussesu dasa kusalakammapathā sabbena sabbaṃ antaradhāyissanti, dasa akusalakammapathā atibyādippissanti 48. Dasavassāyukesu , bhikkhave, manussesu kusalantipi na bhavissati, kuto pana kusalassa kārako. Dasavassāyukesu, bhikkhave, manussesu ye te bhavissanti amatteyyā apetteyyā asāmaññā abrahmaññā na kule jeṭṭhāpacāyino, te pujjā ca bhavissanti pāsaṃsā ca. Seyyathāpi, bhikkhave, etarahi matteyyā petteyyā sāmaññā brahmaññā kule jeṭṭhāpacāyino pujjā ca pāsaṃsā ca; evameva kho, bhikkhave, dasavassāyukesu manussesu ye te bhavissanti amatteyyā apetteyyā asāmaññā abrahmaññā na kule jeṭṭhāpacāyino, te pujjā ca bhavissanti pāsaṃsā ca.
‘‘த³ஸவஸ்ஸாயுகேஸு , பி⁴க்க²வே, மனுஸ்ஸேஸு ந ப⁴விஸ்ஸதி மாதாதி வா மாதுச்சா²தி வா மாதுலானீதி வா ஆசரியப⁴ரியாதி வா க³ரூனங் தா³ராதி வா. ஸம்பே⁴த³ங் லோகோ க³மிஸ்ஸதி யதா² அஜேளகா குக்குடஸூகரா ஸோணஸிங்கா³லா 49.
‘‘Dasavassāyukesu , bhikkhave, manussesu na bhavissati mātāti vā mātucchāti vā mātulānīti vā ācariyabhariyāti vā garūnaṃ dārāti vā. Sambhedaṃ loko gamissati yathā ajeḷakā kukkuṭasūkarā soṇasiṅgālā 50.
‘‘த³ஸவஸ்ஸாயுகேஸு, பி⁴க்க²வே, மனுஸ்ஸேஸு தேஸங் ஸத்தானங் அஞ்ஞமஞ்ஞம்ஹி திப்³போ³ ஆகா⁴தோ பச்சுபட்டி²தோ ப⁴விஸ்ஸதி திப்³போ³ ப்³யாபாதோ³ திப்³போ³ மனோபதோ³ஸோ திப்³ப³ங் வத⁴கசித்தங். மாதுபி புத்தம்ஹி புத்தஸ்ஸபி மாதரி; பிதுபி புத்தம்ஹி புத்தஸ்ஸபி பிதரி; பா⁴துபி ப⁴கி³னியா ப⁴கி³னியாபி பா⁴தரி திப்³போ³ ஆகா⁴தோ பச்சுபட்டி²தோ ப⁴விஸ்ஸதி திப்³போ³ ப்³யாபாதோ³ திப்³போ³ மனோபதோ³ஸோ திப்³ப³ங் வத⁴கசித்தங். ஸெய்யதா²பி, பி⁴க்க²வே, மாக³விகஸ்ஸ மிக³ங் தி³ஸ்வா திப்³போ³ ஆகா⁴தோ பச்சுபட்டி²தோ ஹோதி திப்³போ³ ப்³யாபாதோ³ திப்³போ³ மனோபதோ³ஸோ திப்³ப³ங் வத⁴கசித்தங்; ஏவமேவ கோ², பி⁴க்க²வே, த³ஸவஸ்ஸாயுகேஸு மனுஸ்ஸேஸு தேஸங் ஸத்தானங் அஞ்ஞமஞ்ஞம்ஹி திப்³போ³ ஆகா⁴தோ பச்சுபட்டி²தோ ப⁴விஸ்ஸதி திப்³போ³ ப்³யாபாதோ³ திப்³போ³ மனோபதோ³ஸோ திப்³ப³ங் வத⁴கசித்தங். மாதுபி புத்தம்ஹி புத்தஸ்ஸபி மாதரி; பிதுபி புத்தம்ஹி புத்தஸ்ஸபி பிதரி; பா⁴துபி ப⁴கி³னியா ப⁴கி³னியாபி பா⁴தரி திப்³போ³ ஆகா⁴தோ பச்சுபட்டி²தோ ப⁴விஸ்ஸதி திப்³போ³ ப்³யாபாதோ³ திப்³போ³ மனோபதோ³ஸோ திப்³ப³ங் வத⁴கசித்தங்.
‘‘Dasavassāyukesu, bhikkhave, manussesu tesaṃ sattānaṃ aññamaññamhi tibbo āghāto paccupaṭṭhito bhavissati tibbo byāpādo tibbo manopadoso tibbaṃ vadhakacittaṃ. Mātupi puttamhi puttassapi mātari; pitupi puttamhi puttassapi pitari; bhātupi bhaginiyā bhaginiyāpi bhātari tibbo āghāto paccupaṭṭhito bhavissati tibbo byāpādo tibbo manopadoso tibbaṃ vadhakacittaṃ. Seyyathāpi, bhikkhave, māgavikassa migaṃ disvā tibbo āghāto paccupaṭṭhito hoti tibbo byāpādo tibbo manopadoso tibbaṃ vadhakacittaṃ; evameva kho, bhikkhave, dasavassāyukesu manussesu tesaṃ sattānaṃ aññamaññamhi tibbo āghāto paccupaṭṭhito bhavissati tibbo byāpādo tibbo manopadoso tibbaṃ vadhakacittaṃ. Mātupi puttamhi puttassapi mātari; pitupi puttamhi puttassapi pitari; bhātupi bhaginiyā bhaginiyāpi bhātari tibbo āghāto paccupaṭṭhito bhavissati tibbo byāpādo tibbo manopadoso tibbaṃ vadhakacittaṃ.
104. ‘‘த³ஸவஸ்ஸாயுகேஸு, பி⁴க்க²வே, மனுஸ்ஸேஸு ஸத்தாஹங் ஸத்த²ந்தரகப்போ ப⁴விஸ்ஸதி. தே அஞ்ஞமஞ்ஞம்ஹி மிக³ஸஞ்ஞங் படிலபி⁴ஸ்ஸந்தி. தேஸங் திண்ஹானி ஸத்தா²னி ஹத்தே²ஸு பாதுப⁴விஸ்ஸந்தி. தே திண்ஹேன ஸத்தே²ன ‘ஏஸ மிகோ³ ஏஸ மிகோ³’தி அஞ்ஞமஞ்ஞங் ஜீவிதா வோரோபெஸ்ஸந்தி.
104. ‘‘Dasavassāyukesu, bhikkhave, manussesu sattāhaṃ satthantarakappo bhavissati. Te aññamaññamhi migasaññaṃ paṭilabhissanti. Tesaṃ tiṇhāni satthāni hatthesu pātubhavissanti. Te tiṇhena satthena ‘esa migo esa migo’ti aññamaññaṃ jīvitā voropessanti.
‘‘அத² கோ² தேஸங், பி⁴க்க²வே, ஸத்தானங் ஏகச்சானங் ஏவங் ப⁴விஸ்ஸதி – ‘மா ச மயங் கஞ்சி 51, மா ச அம்ஹே கோசி, யங்னூன மயங் திணக³ஹனங் வா வனக³ஹனங் வா ருக்க²க³ஹனங் வா நதீ³விது³க்³க³ங் வா பப்³ப³தவிஸமங் வா பவிஸித்வா வனமூலப²லாஹாரா யாபெய்யாமா’தி. தே திணக³ஹனங் வா வனக³ஹனங் வா ருக்க²க³ஹனங் வா நதீ³விது³க்³க³ங் வா பப்³ப³தவிஸமங் வா 52 பவிஸித்வா ஸத்தாஹங் வனமூலப²லாஹாரா யாபெஸ்ஸந்தி. தே தஸ்ஸ ஸத்தாஹஸ்ஸ அச்சயேன திணக³ஹனா வனக³ஹனா ருக்க²க³ஹனா நதீ³விது³க்³கா³ பப்³ப³தவிஸமா நிக்க²மித்வா அஞ்ஞமஞ்ஞங் ஆலிங்கி³த்வா ஸபா⁴கா³யிஸ்ஸந்தி ஸமஸ்ஸாஸிஸ்ஸந்தி – ‘தி³ட்டா², போ⁴, ஸத்தா ஜீவஸி, தி³ட்டா², போ⁴, ஸத்தா ஜீவஸீ’தி.
‘‘Atha kho tesaṃ, bhikkhave, sattānaṃ ekaccānaṃ evaṃ bhavissati – ‘mā ca mayaṃ kañci 53, mā ca amhe koci, yaṃnūna mayaṃ tiṇagahanaṃ vā vanagahanaṃ vā rukkhagahanaṃ vā nadīviduggaṃ vā pabbatavisamaṃ vā pavisitvā vanamūlaphalāhārā yāpeyyāmā’ti. Te tiṇagahanaṃ vā vanagahanaṃ vā rukkhagahanaṃ vā nadīviduggaṃ vā pabbatavisamaṃ vā 54 pavisitvā sattāhaṃ vanamūlaphalāhārā yāpessanti. Te tassa sattāhassa accayena tiṇagahanā vanagahanā rukkhagahanā nadīviduggā pabbatavisamā nikkhamitvā aññamaññaṃ āliṅgitvā sabhāgāyissanti samassāsissanti – ‘diṭṭhā, bho, sattā jīvasi, diṭṭhā, bho, sattā jīvasī’ti.
ஆயுவண்ணாதி³வட்³ட⁴னகதா²
Āyuvaṇṇādivaḍḍhanakathā
105. ‘‘அத² கோ² தேஸங், பி⁴க்க²வே, ஸத்தானங் ஏவங் ப⁴விஸ்ஸதி – ‘மயங் கோ² அகுஸலானங் த⁴ம்மானங் ஸமாதா³னஹேது ஏவரூபங் ஆயதங் ஞாதிக்க²யங் பத்தா. யங்னூன மயங் குஸலங் கரெய்யாம. கிங் குஸலங் கரெய்யாம? யங்னூன மயங் பாணாதிபாதா விரமெய்யாம, இத³ங் குஸலங் த⁴ம்மங் ஸமாதா³ய வத்தெய்யாமா’தி. தே பாணாதிபாதா விரமிஸ்ஸந்தி, இத³ங் குஸலங் த⁴ம்மங் ஸமாதா³ய வத்திஸ்ஸந்தி. தே குஸலானங் த⁴ம்மானங் ஸமாதா³னஹேது ஆயுனாபி வட்³டி⁴ஸ்ஸந்தி, வண்ணேனபி வட்³டி⁴ஸ்ஸந்தி . தேஸங் ஆயுனாபி வட்³ட⁴மானானங் வண்ணேனபி வட்³ட⁴மானானங் த³ஸவஸ்ஸாயுகானங் மனுஸ்ஸானங் வீஸதிவஸ்ஸாயுகா புத்தா ப⁴விஸ்ஸந்தி.
105. ‘‘Atha kho tesaṃ, bhikkhave, sattānaṃ evaṃ bhavissati – ‘mayaṃ kho akusalānaṃ dhammānaṃ samādānahetu evarūpaṃ āyataṃ ñātikkhayaṃ pattā. Yaṃnūna mayaṃ kusalaṃ kareyyāma. Kiṃ kusalaṃ kareyyāma? Yaṃnūna mayaṃ pāṇātipātā virameyyāma, idaṃ kusalaṃ dhammaṃ samādāya vatteyyāmā’ti. Te pāṇātipātā viramissanti, idaṃ kusalaṃ dhammaṃ samādāya vattissanti. Te kusalānaṃ dhammānaṃ samādānahetu āyunāpi vaḍḍhissanti, vaṇṇenapi vaḍḍhissanti . Tesaṃ āyunāpi vaḍḍhamānānaṃ vaṇṇenapi vaḍḍhamānānaṃ dasavassāyukānaṃ manussānaṃ vīsativassāyukā puttā bhavissanti.
‘‘அத² கோ² தேஸங், பி⁴க்க²வே, ஸத்தானங் ஏவங் ப⁴விஸ்ஸதி – ‘மயங் கோ² குஸலானங் த⁴ம்மானங் ஸமாதா³னஹேது ஆயுனாபி வட்³டா⁴ம, வண்ணேனபி வட்³டா⁴ம. யங்னூன மயங் பி⁴ய்யோஸோமத்தாய குஸலங் கரெய்யாம. கிங் குஸலங் கரெய்யாம? யங்னூன மயங் அதி³ன்னாதா³னா விரமெய்யாம… காமேஸுமிச்சா²சாரா விரமெய்யாம… முஸாவாதா³ விரமெய்யாம… பிஸுணாய வாசாய விரமெய்யாம… ப²ருஸாய வாசாய விரமெய்யாம… ஸம்ப²ப்பலாபா விரமெய்யாம… அபி⁴ஜ்ஜ²ங் பஜஹெய்யாம… ப்³யாபாத³ங் பஜஹெய்யாம… மிச்சா²தி³ட்டி²ங் பஜஹெய்யாம… தயோ த⁴ம்மே பஜஹெய்யாம – அத⁴ம்மராக³ங் விஸமலோப⁴ங் மிச்சா²த⁴ம்மங்… யங்னூன மயங் மத்தெய்யா அஸ்ஸாம பெத்தெய்யா ஸாமஞ்ஞா ப்³ரஹ்மஞ்ஞா குலே ஜெட்டா²பசாயினோ, இத³ங் குஸலங் த⁴ம்மங் ஸமாதா³ய வத்தெய்யாமா’தி. தே மத்தெய்யா ப⁴விஸ்ஸந்தி பெத்தெய்யா ஸாமஞ்ஞா ப்³ரஹ்மஞ்ஞா குலே ஜெட்டா²பசாயினோ, இத³ங் குஸலங் த⁴ம்மங் ஸமாதா³ய வத்திஸ்ஸந்தி.
‘‘Atha kho tesaṃ, bhikkhave, sattānaṃ evaṃ bhavissati – ‘mayaṃ kho kusalānaṃ dhammānaṃ samādānahetu āyunāpi vaḍḍhāma, vaṇṇenapi vaḍḍhāma. Yaṃnūna mayaṃ bhiyyosomattāya kusalaṃ kareyyāma. Kiṃ kusalaṃ kareyyāma? Yaṃnūna mayaṃ adinnādānā virameyyāma… kāmesumicchācārā virameyyāma… musāvādā virameyyāma… pisuṇāya vācāya virameyyāma… pharusāya vācāya virameyyāma… samphappalāpā virameyyāma… abhijjhaṃ pajaheyyāma… byāpādaṃ pajaheyyāma… micchādiṭṭhiṃ pajaheyyāma… tayo dhamme pajaheyyāma – adhammarāgaṃ visamalobhaṃ micchādhammaṃ… yaṃnūna mayaṃ matteyyā assāma petteyyā sāmaññā brahmaññā kule jeṭṭhāpacāyino, idaṃ kusalaṃ dhammaṃ samādāya vatteyyāmā’ti. Te matteyyā bhavissanti petteyyā sāmaññā brahmaññā kule jeṭṭhāpacāyino, idaṃ kusalaṃ dhammaṃ samādāya vattissanti.
‘‘தே குஸலானங் த⁴ம்மானங் ஸமாதா³னஹேது ஆயுனாபி வட்³டி⁴ஸ்ஸந்தி, வண்ணேனபி வட்³டி⁴ஸ்ஸந்தி. தேஸங் ஆயுனாபி வட்³ட⁴மானானங் வண்ணேனபி வட்³ட⁴மானானங் வீஸதிவஸ்ஸாயுகானங் மனுஸ்ஸானங் சத்தாரீஸவஸ்ஸாயுகா புத்தா ப⁴விஸ்ஸந்தி… சத்தாரீஸவஸ்ஸாயுகானங் மனுஸ்ஸானங் அஸீதிவஸ்ஸாயுகா புத்தா ப⁴விஸ்ஸந்தி… அஸீதிவஸ்ஸாயுகானங் மனுஸ்ஸானங் ஸட்டி²வஸ்ஸஸதாயுகா புத்தா ப⁴விஸ்ஸந்தி… ஸட்டி²வஸ்ஸஸதாயுகானங் மனுஸ்ஸானங் வீஸதிதிவஸ்ஸஸதாயுகா புத்தா ப⁴விஸ்ஸந்தி… வீஸதிதிவஸ்ஸஸதாயுகானங் மனுஸ்ஸானங் சத்தாரீஸச²ப்³ப³ஸ்ஸஸதாயுகா புத்தா ப⁴விஸ்ஸந்தி. சத்தாரீஸச²ப்³ப³ஸ்ஸஸதாயுகானங் மனுஸ்ஸானங் த்³வேவஸ்ஸஸஹஸ்ஸாயுகா புத்தா ப⁴விஸ்ஸந்தி… த்³வேவஸ்ஸஸஹஸ்ஸாயுகானங் மனுஸ்ஸானங் சத்தாரிவஸ்ஸஸஹஸ்ஸாயுகா புத்தா ப⁴விஸ்ஸந்தி… சத்தாரிவஸ்ஸஸஹஸ்ஸாயுகானங் மனுஸ்ஸானங் அட்ட²வஸ்ஸஸஹஸ்ஸாயுகா புத்தா ப⁴விஸ்ஸந்தி… அட்ட²வஸ்ஸஸஹஸ்ஸாயுகானங் மனுஸ்ஸானங் வீஸதிவஸ்ஸஸஹஸ்ஸாயுகா புத்தா ப⁴விஸ்ஸந்தி… வீஸதிவஸ்ஸஸஹஸ்ஸாயுகானங் மனுஸ்ஸானங் சத்தாரீஸவஸ்ஸஸஹஸ்ஸாயுகா புத்தா ப⁴விஸ்ஸந்தி… சத்தாரீஸவஸ்ஸஸஹஸ்ஸாயுகானங் மனுஸ்ஸானங் அஸீதிவஸ்ஸஸஹஸ்ஸாயுகா புத்தா ப⁴விஸ்ஸந்தி… அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு பஞ்சவஸ்ஸஸதிகா குமாரிகா அலங்பதெய்யா ப⁴விஸ்ஸந்தி.
‘‘Te kusalānaṃ dhammānaṃ samādānahetu āyunāpi vaḍḍhissanti, vaṇṇenapi vaḍḍhissanti. Tesaṃ āyunāpi vaḍḍhamānānaṃ vaṇṇenapi vaḍḍhamānānaṃ vīsativassāyukānaṃ manussānaṃ cattārīsavassāyukā puttā bhavissanti… cattārīsavassāyukānaṃ manussānaṃ asītivassāyukā puttā bhavissanti… asītivassāyukānaṃ manussānaṃ saṭṭhivassasatāyukā puttā bhavissanti… saṭṭhivassasatāyukānaṃ manussānaṃ vīsatitivassasatāyukā puttā bhavissanti… vīsatitivassasatāyukānaṃ manussānaṃ cattārīsachabbassasatāyukā puttā bhavissanti. Cattārīsachabbassasatāyukānaṃ manussānaṃ dvevassasahassāyukā puttā bhavissanti… dvevassasahassāyukānaṃ manussānaṃ cattārivassasahassāyukā puttā bhavissanti… cattārivassasahassāyukānaṃ manussānaṃ aṭṭhavassasahassāyukā puttā bhavissanti… aṭṭhavassasahassāyukānaṃ manussānaṃ vīsativassasahassāyukā puttā bhavissanti… vīsativassasahassāyukānaṃ manussānaṃ cattārīsavassasahassāyukā puttā bhavissanti… cattārīsavassasahassāyukānaṃ manussānaṃ asītivassasahassāyukā puttā bhavissanti… asītivassasahassāyukesu, bhikkhave, manussesu pañcavassasatikā kumārikā alaṃpateyyā bhavissanti.
ஸங்க²ராஜஉப்பத்தி
Saṅkharājauppatti
106. ‘‘அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு தயோ ஆபா³தா⁴ ப⁴விஸ்ஸந்தி, இச்சா², அனஸனங், ஜரா. அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு அயங் ஜம்பு³தீ³போ இத்³தோ⁴ சேவ ப⁴விஸ்ஸதி பீ²தோ ச, குக்குடஸம்பாதிகா கா³மனிக³மராஜதா⁴னியோ 55. அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு அயங் ஜம்பு³தீ³போ அவீசி மஞ்ஞே பு²டோ ப⁴விஸ்ஸதி மனுஸ்ஸேஹி, ஸெய்யதா²பி நளவனங் வா ஸரவனங் 56 வா. அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு அயங் பா³ராணஸீ கேதுமதீ நாம ராஜதா⁴னீ ப⁴விஸ்ஸதி இத்³தா⁴ சேவ பீ²தா ச ப³ஹுஜனா ச ஆகிண்ணமனுஸ்ஸா ச ஸுபி⁴க்கா² ச. அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு இமஸ்மிங் ஜம்பு³தீ³பே சதுராஸீதினக³ரஸஹஸ்ஸானி ப⁴விஸ்ஸந்தி கேதுமதீராஜதா⁴னீபமுகா²னி. அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு கேதுமதியா ராஜதா⁴னியா ஸங்கோ² நாம ராஜா உப்பஜ்ஜிஸ்ஸதி சக்கவத்தீ த⁴ம்மிகோ த⁴ம்மராஜா சாதுரந்தோ விஜிதாவீ ஜனபத³த்தா²வரியப்பத்தோ ஸத்தரதனஸமன்னாக³தோ. தஸ்ஸிமானி ஸத்த ரதனானி ப⁴விஸ்ஸந்தி, ஸெய்யதி²த³ங், சக்கரதனங் ஹத்தி²ரதனங் அஸ்ஸரதனங் மணிரதனங் இத்தி²ரதனங் க³ஹபதிரதனங் பரிணாயகரதனமேவ ஸத்தமங். பரோஸஹஸ்ஸங் கோ² பனஸ்ஸ புத்தா ப⁴விஸ்ஸந்தி ஸூரா வீரங்க³ரூபா பரஸேனப்பமத்³த³னா. ஸோ இமங் பத²விங் ஸாக³ரபரியந்தங் அத³ண்டே³ன அஸத்தே²ன த⁴ம்மேன அபி⁴விஜிய அஜ்ஜா²வஸிஸ்ஸதி.
106. ‘‘Asītivassasahassāyukesu, bhikkhave, manussesu tayo ābādhā bhavissanti, icchā, anasanaṃ, jarā. Asītivassasahassāyukesu, bhikkhave, manussesu ayaṃ jambudīpo iddho ceva bhavissati phīto ca, kukkuṭasampātikā gāmanigamarājadhāniyo 57. Asītivassasahassāyukesu, bhikkhave, manussesu ayaṃ jambudīpo avīci maññe phuṭo bhavissati manussehi, seyyathāpi naḷavanaṃ vā saravanaṃ 58 vā. Asītivassasahassāyukesu, bhikkhave, manussesu ayaṃ bārāṇasī ketumatī nāma rājadhānī bhavissati iddhā ceva phītā ca bahujanā ca ākiṇṇamanussā ca subhikkhā ca. Asītivassasahassāyukesu, bhikkhave, manussesu imasmiṃ jambudīpe caturāsītinagarasahassāni bhavissanti ketumatīrājadhānīpamukhāni. Asītivassasahassāyukesu, bhikkhave, manussesu ketumatiyā rājadhāniyā saṅkho nāma rājā uppajjissati cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato. Tassimāni satta ratanāni bhavissanti, seyyathidaṃ, cakkaratanaṃ hatthiratanaṃ assaratanaṃ maṇiratanaṃ itthiratanaṃ gahapatiratanaṃ pariṇāyakaratanameva sattamaṃ. Parosahassaṃ kho panassa puttā bhavissanti sūrā vīraṅgarūpā parasenappamaddanā. So imaṃ pathaviṃ sāgarapariyantaṃ adaṇḍena asatthena dhammena abhivijiya ajjhāvasissati.
மெத்தெய்யபு³த்³து⁴ப்பாதோ³
Metteyyabuddhuppādo
107. ‘‘அஸீதிவஸ்ஸஸஹஸ்ஸாயுகேஸு, பி⁴க்க²வே, மனுஸ்ஸேஸு மெத்தெய்யோ நாம ப⁴க³வா லோகே உப்பஜ்ஜிஸ்ஸதி அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா. ஸெய்யதா²பாஹமேதரஹி லோகே உப்பன்னோ அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா. ஸோ இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதெ³ஸ்ஸதி, ஸெய்யதா²பாஹமேதரஹி இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³மி. ஸோ த⁴ம்மங் தே³ஸெஸ்ஸதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸெஸ்ஸதி; ஸெய்யதா²பாஹமேதரஹி த⁴ம்மங் தே³ஸேமி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேமி. ஸோ அனேகஸஹஸ்ஸங் 59 பி⁴க்கு²ஸங்க⁴ங் பரிஹரிஸ்ஸதி, ஸெய்யதா²பாஹமேதரஹி அனேகஸதங் பி⁴க்கு²ஸங்க⁴ங் பரிஹராமி.
107. ‘‘Asītivassasahassāyukesu, bhikkhave, manussesu metteyyo nāma bhagavā loke uppajjissati arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā. Seyyathāpāhametarahi loke uppanno arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā. So imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedessati, seyyathāpāhametarahi imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedemi. So dhammaṃ desessati ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsessati; seyyathāpāhametarahi dhammaṃ desemi ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsemi. So anekasahassaṃ 60 bhikkhusaṃghaṃ pariharissati, seyyathāpāhametarahi anekasataṃ bhikkhusaṃghaṃ pariharāmi.
108. ‘‘அத² கோ², பி⁴க்க²வே, ஸங்கோ² நாம ராஜா யோ ஸோ யூபோ ரஞ்ஞா மஹாபனாதே³ன காராபிதோ. தங் யூபங் உஸ்ஸாபெத்வா அஜ்ஜா²வஸித்வா தங் த³த்வா விஸ்ஸஜ்ஜித்வா ஸமணப்³ராஹ்மணகபணத்³தி⁴கவணிப்³ப³கயாசகானங் தா³னங் த³த்வா மெத்தெய்யஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ ஸந்திகே கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிஸ்ஸதி. ஸோ ஏவங் பப்³ப³ஜிதோ ஸமானோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியங் பப்³ப³ஜந்தி, தத³னுத்தரங் ப்³ரஹ்மசரியபரியோஸானங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதி.
108. ‘‘Atha kho, bhikkhave, saṅkho nāma rājā yo so yūpo raññā mahāpanādena kārāpito. Taṃ yūpaṃ ussāpetvā ajjhāvasitvā taṃ datvā vissajjitvā samaṇabrāhmaṇakapaṇaddhikavaṇibbakayācakānaṃ dānaṃ datvā metteyyassa bhagavato arahato sammāsambuddhassa santike kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajissati. So evaṃ pabbajito samāno eko vūpakaṭṭho appamatto ātāpī pahitatto viharanto nacirasseva yassatthāya kulaputtā sammadeva agārasmā anagāriyaṃ pabbajanti, tadanuttaraṃ brahmacariyapariyosānaṃ diṭṭheva dhamme sayaṃ abhiññā sacchikatvā upasampajja viharissati.
109. ‘‘அத்ததீ³பா, பி⁴க்க²வே, விஹரத² அத்தஸரணா அனஞ்ஞஸரணா, த⁴ம்மதீ³பா த⁴ம்மஸரணா அனஞ்ஞஸரணா. கத²ஞ்ச, பி⁴க்க²வே, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ த⁴ம்மதீ³போ த⁴ம்மஸரணோ அனஞ்ஞஸரணோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங். வேத³னாஸு வேத³னானுபஸ்ஸீ…பே॰… சித்தே சித்தானுபஸ்ஸீ…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங். ஏவங் கோ², பி⁴க்க²வே, பி⁴க்கு² அத்ததீ³போ விஹரதி அத்தஸரணோ அனஞ்ஞஸரணோ த⁴ம்மதீ³போ த⁴ம்மஸரணோ அனஞ்ஞஸரணோ.
109. ‘‘Attadīpā, bhikkhave, viharatha attasaraṇā anaññasaraṇā, dhammadīpā dhammasaraṇā anaññasaraṇā. Kathañca, bhikkhave, bhikkhu attadīpo viharati attasaraṇo anaññasaraṇo dhammadīpo dhammasaraṇo anaññasaraṇo? Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ. Vedanāsu vedanānupassī…pe… citte cittānupassī…pe… dhammesu dhammānupassī viharati ātāpī sampajāno satimā vineyya loke abhijjhādomanassaṃ. Evaṃ kho, bhikkhave, bhikkhu attadīpo viharati attasaraṇo anaññasaraṇo dhammadīpo dhammasaraṇo anaññasaraṇo.
பி⁴க்கு²னோஆயுவண்ணாதி³வட்³ட⁴னகதா²
Bhikkhunoāyuvaṇṇādivaḍḍhanakathā
110. ‘‘கோ³சரே, பி⁴க்க²வே, சரத² ஸகே பெத்திகே விஸயே. கோ³சரே, பி⁴க்க²வே, சரந்தா ஸகே பெத்திகே விஸயே ஆயுனாபி வட்³டி⁴ஸ்ஸத², வண்ணேனபி வட்³டி⁴ஸ்ஸத², ஸுகே²னபி வட்³டி⁴ஸ்ஸத², போ⁴கே³னபி வட்³டி⁴ஸ்ஸத², ப³லேனபி வட்³டி⁴ஸ்ஸத².
110. ‘‘Gocare, bhikkhave, caratha sake pettike visaye. Gocare, bhikkhave, carantā sake pettike visaye āyunāpi vaḍḍhissatha, vaṇṇenapi vaḍḍhissatha, sukhenapi vaḍḍhissatha, bhogenapi vaḍḍhissatha, balenapi vaḍḍhissatha.
‘‘கிஞ்ச , பி⁴க்க²வே, பி⁴க்கு²னோ ஆயுஸ்மிங்? இத⁴, பி⁴க்க²வே, பி⁴க்கு² ச²ந்த³ஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி, வீரியஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி, சித்தஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி, வீமங்ஸாஸமாதி⁴பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி. ஸோ இமேஸங் சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா ஆகங்க²மானோ கப்பங் வா திட்டெ²ய்ய கப்பாவஸேஸங் வா. இத³ங் கோ², பி⁴க்க²வே, பி⁴க்கு²னோ ஆயுஸ்மிங்.
‘‘Kiñca , bhikkhave, bhikkhuno āyusmiṃ? Idha, bhikkhave, bhikkhu chandasamādhipadhānasaṅkhārasamannāgataṃ iddhipādaṃ bhāveti, vīriyasamādhipadhānasaṅkhārasamannāgataṃ iddhipādaṃ bhāveti, cittasamādhipadhānasaṅkhārasamannāgataṃ iddhipādaṃ bhāveti, vīmaṃsāsamādhipadhānasaṅkhārasamannāgataṃ iddhipādaṃ bhāveti. So imesaṃ catunnaṃ iddhipādānaṃ bhāvitattā bahulīkatattā ākaṅkhamāno kappaṃ vā tiṭṭheyya kappāvasesaṃ vā. Idaṃ kho, bhikkhave, bhikkhuno āyusmiṃ.
‘‘கிஞ்ச, பி⁴க்க²வே, பி⁴க்கு²னோ வண்ணஸ்மிங்? இத⁴, பி⁴க்க²வே, பி⁴க்கு² ஸீலவா ஹோதி, பாதிமொக்க²ஸங்வரஸங்வுதோ விஹரதி ஆசாரகோ³சரஸம்பன்னோ, அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு. இத³ங் கோ², பி⁴க்க²வே, பி⁴க்கு²னோ வண்ணஸ்மிங்.
‘‘Kiñca, bhikkhave, bhikkhuno vaṇṇasmiṃ? Idha, bhikkhave, bhikkhu sīlavā hoti, pātimokkhasaṃvarasaṃvuto viharati ācāragocarasampanno, aṇumattesu vajjesu bhayadassāvī, samādāya sikkhati sikkhāpadesu. Idaṃ kho, bhikkhave, bhikkhuno vaṇṇasmiṃ.
‘‘கிஞ்ச, பி⁴க்க²வே, பி⁴க்கு²னோ ஸுக²ஸ்மிங்? இத⁴, பி⁴க்க²வே, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி. விதக்கவிசாரானங் வூபஸமா…பே॰… து³தியங் ஜா²னங்…பே॰… ததியங் ஜா²னங்…பே॰… சதுத்த²ங் ஜா²னங் உபஸம்பஜ்ஜ விஹரதி. இத³ங் கோ², பி⁴க்க²வே, பி⁴க்கு²னோ, ஸுக²ஸ்மிங்.
‘‘Kiñca, bhikkhave, bhikkhuno sukhasmiṃ? Idha, bhikkhave, bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati. Vitakkavicārānaṃ vūpasamā…pe… dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ upasampajja viharati. Idaṃ kho, bhikkhave, bhikkhuno, sukhasmiṃ.
‘‘கிஞ்ச, பி⁴க்க²வே, பி⁴க்கு²னோ போ⁴க³ஸ்மிங்? இத⁴, பி⁴க்க²வே, பி⁴க்கு² மெத்தாஸஹக³தேன சேதஸா ஏகங் தி³ஸங் ப²ரித்வா விஹரதி ததா² து³தியங். ததா² ததியங். ததா² சதுத்த²ங். இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் மெத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. கருணாஸஹக³தேன சேதஸா…பே॰… முதி³தாஸஹக³தேன சேதஸா…பே॰… உபெக்கா²ஸஹக³தேன சேதஸா ஏகங் தி³ஸங் ப²ரித்வா விஹரதி. ததா² து³தியங். ததா² ததியங். ததா² சதுத்த²ங். இதி உத்³த⁴மதோ⁴ திரியங் ஸப்³ப³தி⁴ ஸப்³ப³த்ததாய ஸப்³பா³வந்தங் லோகங் உபெக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. இத³ங் கோ², பி⁴க்க²வே, பி⁴க்கு²னோ போ⁴க³ஸ்மிங்.
‘‘Kiñca, bhikkhave, bhikkhuno bhogasmiṃ? Idha, bhikkhave, bhikkhu mettāsahagatena cetasā ekaṃ disaṃ pharitvā viharati tathā dutiyaṃ. Tathā tatiyaṃ. Tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena pharitvā viharati. Karuṇāsahagatena cetasā…pe… muditāsahagatena cetasā…pe… upekkhāsahagatena cetasā ekaṃ disaṃ pharitvā viharati. Tathā dutiyaṃ. Tathā tatiyaṃ. Tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjena pharitvā viharati. Idaṃ kho, bhikkhave, bhikkhuno bhogasmiṃ.
‘‘கிஞ்ச , பி⁴க்க²வே, பி⁴க்கு²னோ ப³லஸ்மிங்? இத⁴, பி⁴க்க²வே, பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. இத³ங் கோ², பி⁴க்க²வே, பி⁴க்கு²னோ ப³லஸ்மிங்.
‘‘Kiñca , bhikkhave, bhikkhuno balasmiṃ? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idaṃ kho, bhikkhave, bhikkhuno balasmiṃ.
‘‘நாஹங், பி⁴க்க²வே, அஞ்ஞங் ஏகப³லம்பி ஸமனுபஸ்ஸாமி யங் ஏவங் து³ப்பஸஹங், யத²யித³ங், பி⁴க்க²வே, மாரப³லங். குஸலானங் , பி⁴க்க²வே, த⁴ம்மானங் ஸமாதா³னஹேது ஏவமித³ங் புஞ்ஞங் பவட்³ட⁴தீ’’தி. இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி.
‘‘Nāhaṃ, bhikkhave, aññaṃ ekabalampi samanupassāmi yaṃ evaṃ duppasahaṃ, yathayidaṃ, bhikkhave, mārabalaṃ. Kusalānaṃ , bhikkhave, dhammānaṃ samādānahetu evamidaṃ puññaṃ pavaḍḍhatī’’ti. Idamavoca bhagavā. Attamanā te bhikkhū bhagavato bhāsitaṃ abhinandunti.
சக்கவத்திஸுத்தங் நிட்டி²தங் ததியங்.
Cakkavattisuttaṃ niṭṭhitaṃ tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / தீ³க⁴ நிகாய (அட்ட²கதா²) • Dīgha nikāya (aṭṭhakathā) / 3. சக்கவத்திஸுத்தவண்ணனா • 3. Cakkavattisuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 3. சக்கவத்திஸுத்தவண்ணனா • 3. Cakkavattisuttavaṇṇanā
