| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. சக்கவத்திஸுத்தவண்ணனா
4. Cakkavattisuttavaṇṇanā
14. சதுத்தே² சதூஹி ஸங்க³ஹவத்தூ²ஹி ஜனங் ரஞ்ஜேதீதி ராஜா. சக்கங் வத்தேதீதி சக்கவத்தீ. வத்திதங் வா அனேன சக்கந்தி சக்கவத்தீ. த⁴ம்மோ அஸ்ஸ அத்தீ²தி த⁴ம்மிகோ. த⁴ம்மேனேவ த³ஸவிதே⁴ன சக்கவத்திவத்தேன ராஜா ஜாதோதி த⁴ம்மராஜா. ஸோபி ந அராஜகந்தி ஸோபி அஞ்ஞங் நிஸ்ஸயராஜானங் அலபி⁴த்வா சக்கங் நாம வத்தேதுங் ந ஸக்கோதீதி அத்தோ². இதி ஸத்தா² தே³ஸனங் பட்ட²பெத்வா யதா²னுஸந்தி⁴ங் அபாபெத்வாவ துண்ஹீ அஹோஸி. கஸ்மா? அனுஸந்தி⁴குஸலா உட்ட²ஹித்வா அனுஸந்தி⁴ங் புச்சி²ஸ்ஸந்தி, ப³ஹூ ஹி இமஸ்மிங் டா²னே ததா²ரூபா பி⁴க்கூ², அதா²ஹங் தேஹி புட்டோ² தே³ஸனங் வட்³டெ⁴ஸ்ஸாமீதி. அதே²கோ அனுஸந்தி⁴குஸலோ பி⁴க்கு² ப⁴க³வந்தங் புச்ச²ந்தோ கோ பன, ப⁴ந்தேதிஆதி³மாஹ. ப⁴க³வாபிஸ்ஸ ப்³யாகரொந்தோ த⁴ம்மோ பி⁴க்கூ²திஆதி³மாஹ.
14. Catutthe catūhi saṅgahavatthūhi janaṃ rañjetīti rājā. Cakkaṃ vattetīti cakkavattī. Vattitaṃ vā anena cakkanti cakkavattī. Dhammo assa atthīti dhammiko. Dhammeneva dasavidhena cakkavattivattena rājā jātoti dhammarājā. Sopi na arājakanti sopi aññaṃ nissayarājānaṃ alabhitvā cakkaṃ nāma vattetuṃ na sakkotīti attho. Iti satthā desanaṃ paṭṭhapetvā yathānusandhiṃ apāpetvāva tuṇhī ahosi. Kasmā? Anusandhikusalā uṭṭhahitvā anusandhiṃ pucchissanti, bahū hi imasmiṃ ṭhāne tathārūpā bhikkhū, athāhaṃ tehi puṭṭho desanaṃ vaḍḍhessāmīti. Atheko anusandhikusalo bhikkhu bhagavantaṃ pucchanto ko pana, bhantetiādimāha. Bhagavāpissa byākaronto dhammo bhikkhūtiādimāha.
தத்த² த⁴ம்மோதி த³ஸகுஸலகம்மபத²த⁴ம்மோ. த⁴ம்மந்தி தமேவ வுத்தப்பகாரங் த⁴ம்மங். நிஸ்ஸாயாதி தத³தி⁴ட்டா²னேன சேதஸா தமேவ நிஸ்ஸயங் கத்வா. த⁴ம்மங் ஸக்கரொந்தோதி யதா² கதோ ஸோ த⁴ம்மோ ஸுட்டு² கதோ ஹோதி, ஏவமேதங் கரொந்தோ. த⁴ம்மங் க³ருங் கரொந்தோதி தஸ்மிங் கா³ரவுப்பத்தியா தங் க³ருகரொந்தோ. த⁴ம்மங் அபசாயமானோதி தஸ்ஸேவ த⁴ம்மஸ்ஸ அஞ்ஜலிகரணாதீ³ஹி நீசவுத்திதங் கரொந்தோ. த⁴ம்மத்³த⁴ஜோ த⁴ம்மகேதூதி தங் த⁴ம்மங் த⁴ஜமிவ புரக்க²த்வா கேதுமிவ உக்கி²பித்வா பவத்தியா த⁴ம்மத்³த⁴ஜோ த⁴ம்மகேது ச ஹுத்வாதி அத்தோ². த⁴ம்மாதி⁴பதெய்யோதி த⁴ம்மாதி⁴பதிபூ⁴தாக³தபா⁴வேன த⁴ம்மவஸேனேவ ச ஸப்³ப³கிரியானங் கரணேன த⁴ம்மாதி⁴பதெய்யோ ஹுத்வா. த⁴ம்மிகங் ரக்கா²வரணகு³த்திங் ஸங்வித³ஹதீதி த⁴ம்மோ அஸ்ஸா அத்தீ²தி த⁴ம்மிகா, ரக்கா² ச ஆவரணஞ்ச கு³த்தி ச ரக்கா²வரணகு³த்தி. தத்த² ‘‘பரங் ரக்க²ந்தோ அத்தானங் ரக்க²தீ’’தி வசனதோ க²ந்திஆத³யோ ரக்கா². வுத்தஞ்ஹேதங் – ‘‘கத²ஞ்ச, பி⁴க்க²வே, பரங் ரக்க²ந்தோ அத்தானங் ரக்க²தி. க²ந்தியா அவிஹிங்ஸாய மெத்தசித்ததாய அனுத்³த³யாயா’’தி (ஸங்॰ நி॰ 5.385). நிவாஸனபாருபனகே³ஹாதீ³னி ஆவரணங். சோராதி³உபத்³த³வனிவாரணத்த²ங் கோ³பாயனா கு³த்தி. தங் ஸப்³ப³ம்பி ஸுட்டு² வித³ஹதி பவத்தேதி ட²பேதீதி அத்தோ².
Tattha dhammoti dasakusalakammapathadhammo. Dhammanti tameva vuttappakāraṃ dhammaṃ. Nissāyāti tadadhiṭṭhānena cetasā tameva nissayaṃ katvā. Dhammaṃ sakkarontoti yathā kato so dhammo suṭṭhu kato hoti, evametaṃ karonto. Dhammaṃ garuṃ karontoti tasmiṃ gāravuppattiyā taṃ garukaronto. Dhammaṃ apacāyamānoti tasseva dhammassa añjalikaraṇādīhi nīcavuttitaṃ karonto. Dhammaddhajo dhammaketūti taṃ dhammaṃ dhajamiva purakkhatvā ketumiva ukkhipitvā pavattiyā dhammaddhajo dhammaketu ca hutvāti attho. Dhammādhipateyyoti dhammādhipatibhūtāgatabhāvena dhammavaseneva ca sabbakiriyānaṃ karaṇena dhammādhipateyyo hutvā. Dhammikaṃ rakkhāvaraṇaguttiṃ saṃvidahatīti dhammo assā atthīti dhammikā, rakkhā ca āvaraṇañca gutti ca rakkhāvaraṇagutti. Tattha ‘‘paraṃ rakkhanto attānaṃ rakkhatī’’ti vacanato khantiādayo rakkhā. Vuttañhetaṃ – ‘‘kathañca, bhikkhave, paraṃ rakkhanto attānaṃ rakkhati. Khantiyā avihiṃsāya mettacittatāya anuddayāyā’’ti (saṃ. ni. 5.385). Nivāsanapārupanagehādīni āvaraṇaṃ. Corādiupaddavanivāraṇatthaṃ gopāyanā gutti. Taṃ sabbampi suṭṭhu vidahati pavatteti ṭhapetīti attho.
இதா³னி யத்த² ஸா ஸங்வித³ஹிதப்³பா³, தங் த³ஸ்ஸெந்தோ அந்தோஜனஸ்மிந்திஆதி³மாஹ. தத்ராயங் ஸங்கே²பத்தோ² – அந்தோஜனஸங்கா²தங் புத்ததா³ரங் ஸீலஸங்வரே பதிட்டா²பெந்தோ வத்த²க³ந்த⁴மாலாதீ³னி சஸ்ஸ த³த³மானோ ஸப்³போ³பத்³த³வே சஸ்ஸ நிவாரயமானோ த⁴ம்மிகங் ரக்கா²வரணகு³த்திங் ஸங்வித³ஹதி நாம. க²த்தியாதீ³ஸுபி ஏஸேவ நயோ. அயங் பன விஸேஸோ – அபி⁴ஸித்தக²த்தியா ப⁴த்³ரஅஸ்ஸாஜானீயாதி³ரதனஸம்பதா³னேனபி உபக³ண்ஹிதப்³பா³, அனுயந்தா க²த்தியா தேஸங் அனுரூபயானவாஹனஸம்பதா³னேனபி பரிதோஸேதப்³பா³, ப³லகாயோ காலங் அனதிக்கமெத்வா ப⁴த்தவேதனஸம்பதா³னேனபி அனுக்³க³ஹேதப்³போ³, ப்³ராஹ்மணா அன்னபானவத்தா²தி³னா தெ³ய்யத⁴ம்மேன, க³ஹபதிகா ப⁴த்தபீ³ஜனங்க³லப³லிப³த்³தா³தி³ஸம்பதா³னேன, ததா² நிக³மவாஸினோ நேக³மா ஜனபத³வாஸினோ ச ஜானபதா³. ஸமிதபாபபா³ஹிதபாபா பன ஸமணப்³ராஹ்மணா ஸமணபரிக்கா²ரஸம்பதா³னேன ஸக்காதப்³பா³, மிக³பக்கி²னோ அப⁴யதா³னேன ஸமஸ்ஸாஸேதப்³பா³.
Idāni yattha sā saṃvidahitabbā, taṃ dassento antojanasmintiādimāha. Tatrāyaṃ saṅkhepattho – antojanasaṅkhātaṃ puttadāraṃ sīlasaṃvare patiṭṭhāpento vatthagandhamālādīni cassa dadamāno sabbopaddave cassa nivārayamāno dhammikaṃ rakkhāvaraṇaguttiṃ saṃvidahati nāma. Khattiyādīsupi eseva nayo. Ayaṃ pana viseso – abhisittakhattiyā bhadraassājānīyādiratanasampadānenapi upagaṇhitabbā, anuyantā khattiyā tesaṃ anurūpayānavāhanasampadānenapi paritosetabbā, balakāyo kālaṃ anatikkametvā bhattavetanasampadānenapi anuggahetabbo, brāhmaṇā annapānavatthādinā deyyadhammena, gahapatikā bhattabījanaṅgalabalibaddādisampadānena, tathā nigamavāsino negamā janapadavāsino ca jānapadā. Samitapāpabāhitapāpā pana samaṇabrāhmaṇā samaṇaparikkhārasampadānena sakkātabbā, migapakkhino abhayadānena samassāsetabbā.
த⁴ம்மேனேவ சக்கங் வத்தேதீதி த³ஸகுஸலகம்மபத²த⁴ம்மேனேவ சக்கங் பவத்தேதி. தங் ஹோதி சக்கங் அப்படிவத்தியந்தி தங் தேன ஏவங் பவத்திதங் ஆணாசக்கங் அப்படிவத்தியங் ஹோதி. கேனசி மனுஸ்ஸபூ⁴தேனாதி தே³வதா நாம அத்தனா இச்சி²திச்சி²தமேவ கரொந்தி, தஸ்மா தா அக்³க³ண்ஹித்வா ‘‘மனுஸ்ஸபூ⁴தேனா’’தி வுத்தங். பச்சத்தி²கேனாதி படிஅத்தி²கேன, படிஸத்துனாதி அத்தோ². த⁴ம்மிகோதி சக்கவத்தீ த³ஸகுஸலகம்மபத²வஸேன த⁴ம்மிகோ, ததா²க³தோ பன நவலோகுத்தரத⁴ம்மவஸேன. த⁴ம்மராஜாதி நவஹி லோகுத்தரத⁴ம்மேஹி மஹாஜனங் ரஞ்ஜேதீதி த⁴ம்மராஜா. த⁴ம்மங்யேவாதி நவலோகுத்தரத⁴ம்மமேவ நிஸ்ஸாய தமேவ ஸக்கரொந்தோ தங் க³ருகரொந்தோ தங் அபசாயமானோ. ஸோவஸ்ஸ த⁴ம்மோ அப்³பு⁴க்³க³தட்டே²ன த⁴ஜோதி த⁴ம்மத்³த⁴ஜோ. ஸோவஸ்ஸ கேதூதி த⁴ம்மகேது. தமேவ அதி⁴பதிங் ஜெட்ட²கங் கத்வா விஹரதீதி த⁴ம்மாதி⁴பதெய்யோ. த⁴ம்மிகங் ரக்கா²வரணகு³த்திந்தி லோகியலோகுத்தரத⁴ம்மதா³யிகரக்க²ஞ்ச ஆவரணஞ்ச கு³த்திஞ்ச. ஸங்வித³ஹதீதி ட²பேதி பஞ்ஞபேதி. ஏவரூபந்தி திவித⁴ங் காயது³ச்சரிதங் ந ஸேவிதப்³ப³ங், ஸுசரிதங் ஸேவிதப்³ப³ந்தி ஏவங் ஸப்³ப³த்த² அத்தோ² வேதி³தப்³போ³. ஸங்வித³ஹித்வாதி ட²பெத்வா கதெ²த்வா. த⁴ம்மேனேவ அனுத்தரங் த⁴ம்மசக்கங் பவத்தேதீதி நவலோகுத்தரத⁴ம்மேனேவ அஸதி³ஸங் த⁴ம்மசக்கங் பவத்தேதி. தங் ஹோதி சக்கங் அப்படிவத்தியந்தி தங் ஏவங் பவத்திதங் த⁴ம்மசக்கங் ஏதேஸு ஸமணாதீ³ஸு ஏகேனபி படிவத்தேதுங் படிபா³ஹிதுங் ந ஸக்கா. ஸேஸங் ஸப்³ப³த்த² உத்தானமேவாதி.
Dhammeneva cakkaṃ vattetīti dasakusalakammapathadhammeneva cakkaṃ pavatteti. Taṃ hoti cakkaṃ appaṭivattiyanti taṃ tena evaṃ pavattitaṃ āṇācakkaṃ appaṭivattiyaṃ hoti. Kenacimanussabhūtenāti devatā nāma attanā icchiticchitameva karonti, tasmā tā aggaṇhitvā ‘‘manussabhūtenā’’ti vuttaṃ. Paccatthikenāti paṭiatthikena, paṭisattunāti attho. Dhammikoti cakkavattī dasakusalakammapathavasena dhammiko, tathāgato pana navalokuttaradhammavasena. Dhammarājāti navahi lokuttaradhammehi mahājanaṃ rañjetīti dhammarājā. Dhammaṃyevāti navalokuttaradhammameva nissāya tameva sakkaronto taṃ garukaronto taṃ apacāyamāno. Sovassa dhammo abbhuggataṭṭhena dhajoti dhammaddhajo. Sovassa ketūti dhammaketu. Tameva adhipatiṃ jeṭṭhakaṃ katvā viharatīti dhammādhipateyyo. Dhammikaṃ rakkhāvaraṇaguttinti lokiyalokuttaradhammadāyikarakkhañca āvaraṇañca guttiñca. Saṃvidahatīti ṭhapeti paññapeti. Evarūpanti tividhaṃ kāyaduccaritaṃ na sevitabbaṃ, sucaritaṃ sevitabbanti evaṃ sabbattha attho veditabbo. Saṃvidahitvāti ṭhapetvā kathetvā. Dhammeneva anuttaraṃ dhammacakkaṃ pavattetīti navalokuttaradhammeneva asadisaṃ dhammacakkaṃ pavatteti. Taṃ hoti cakkaṃ appaṭivattiyanti taṃ evaṃ pavattitaṃ dhammacakkaṃ etesu samaṇādīsu ekenapi paṭivattetuṃ paṭibāhituṃ na sakkā. Sesaṃ sabbattha uttānamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. சக்கவத்திஸுத்தங் • 4. Cakkavattisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. சக்கவத்திஸுத்தவண்ணனா • 4. Cakkavattisuttavaṇṇanā
