| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. சக்கவத்திஸுத்தவண்ணனா
2. Cakkavattisuttavaṇṇanā
223. து³தியே ரஞ்ஞோ, பி⁴க்க²வே, சக்கவத்திஸ்ஸாதி எத்த² அத்தனோ ஸிரிஸம்பத்தியா ராஜதி, சதூஹி வா ஸங்க³ஹவத்தூ²ஹி லோகங் ரஞ்ஜேதீதி ராஜா, தஸ்ஸ ரஞ்ஞோ. ‘‘பவத்தது ப⁴வங் சக்கரதன’’ந்தி புஞ்ஞானுபா⁴வேன அப்³பு⁴க்³க³தாய வாசாய சோதெ³ந்தோ சக்கங் வத்தேதீதி சக்கவத்தீ, தஸ்ஸ சக்கவத்திஸ்ஸ. பாதுபா⁴வாதி பாதுபா⁴வேன. ஸத்தன்னந்தி க³ணனபரிச்சே²தோ³. ரதனானந்தி பரிச்சி²ன்னஅத்த²த³ஸ்ஸனங். வசனத்தோ² பனெத்த² ரதிஜனநட்டே²ன ரதனங். அபிச –
223. Dutiye rañño, bhikkhave, cakkavattissāti ettha attano sirisampattiyā rājati, catūhi vā saṅgahavatthūhi lokaṃ rañjetīti rājā, tassa rañño. ‘‘Pavattatu bhavaṃ cakkaratana’’nti puññānubhāvena abbhuggatāya vācāya codento cakkaṃ vattetīti cakkavattī, tassa cakkavattissa. Pātubhāvāti pātubhāvena. Sattannanti gaṇanaparicchedo. Ratanānanti paricchinnaatthadassanaṃ. Vacanattho panettha ratijananaṭṭhena ratanaṃ. Apica –
‘‘சித்தீகதங் மஹக்³க⁴ஞ்ச, அதுலங் து³ல்லப⁴த³ஸ்ஸனங்;
‘‘Cittīkataṃ mahagghañca, atulaṃ dullabhadassanaṃ;
அனோமஸத்தபரிபோ⁴க³ங், ரதனங் தேன வுச்சதீ’’தி.
Anomasattaparibhogaṃ, ratanaṃ tena vuccatī’’ti.
சக்கரதனஸ்ஸ ச நிப்³ப³த்தகாலதோ பட்டா²ய அஞ்ஞங் தே³வட்டா²னங் நாம ந ஹோதி, ஸப்³பே³வ க³ந்த⁴புப்பா²தீ³ஹி தஸ்ஸேவ பூஜஞ்ச அபி⁴வாத³னாதீ³னி ச கரொந்தீதி சித்தீகதட்டே²ன ரதனங். சக்கரதனஸ்ஸ ச ‘‘எத்தகங் நாம த⁴னங் அக்³க⁴தீ’’தி அக்³கோ⁴ நத்தி², இதி மஹக்³க⁴ட்டே²னாபி ரதனங். சக்கரதனஞ்ச அஞ்ஞேஹி லோகே விஜ்ஜமானரதனேஹி அஸதி³ஸந்தி அதுலட்டே²ன ரதனங். யஸ்மா பன யஸ்மிங் கப்பே பு³த்³தா⁴ உப்பஜ்ஜந்தி , தஸ்மிங்யேவ சக்கவத்தினோ, பு³த்³தா⁴ ச கதா³சி கரஹசி உப்பஜ்ஜந்தி, தஸ்மா து³ல்லப⁴த³ஸ்ஸனட்டே²ன ரதனங். ததே³தங் ஜாதிரூபகுலஇஸ்ஸரியாதீ³ஹி அனோமஸ்ஸ உளாரஸத்தஸ்ஸேவ உப்பஜ்ஜதி, ந அஞ்ஞஸ்ஸாதி அனோமஸத்தபரிபோ⁴க³ட்டே²னாபி ரதனங். யதா² ச சக்கரதனங், ஏவங் ஸேஸானிபீதி. தேன வுத்தங் –
Cakkaratanassa ca nibbattakālato paṭṭhāya aññaṃ devaṭṭhānaṃ nāma na hoti, sabbeva gandhapupphādīhi tasseva pūjañca abhivādanādīni ca karontīti cittīkataṭṭhena ratanaṃ. Cakkaratanassa ca ‘‘ettakaṃ nāma dhanaṃ agghatī’’ti aggho natthi, iti mahagghaṭṭhenāpi ratanaṃ. Cakkaratanañca aññehi loke vijjamānaratanehi asadisanti atulaṭṭhena ratanaṃ. Yasmā pana yasmiṃ kappe buddhā uppajjanti , tasmiṃyeva cakkavattino, buddhā ca kadāci karahaci uppajjanti, tasmā dullabhadassanaṭṭhena ratanaṃ. Tadetaṃ jātirūpakulaissariyādīhi anomassa uḷārasattasseva uppajjati, na aññassāti anomasattaparibhogaṭṭhenāpi ratanaṃ. Yathā ca cakkaratanaṃ, evaṃ sesānipīti. Tena vuttaṃ –
‘‘சித்தீகதங் மஹக்³க⁴ஞ்ச, அதுலங் து³ல்லப⁴த³ஸ்ஸனங்;
‘‘Cittīkataṃ mahagghañca, atulaṃ dullabhadassanaṃ;
அனோமஸத்தபரிபோ⁴க³ங், ரதனங் தேன வுச்சதீ’’தி.
Anomasattaparibhogaṃ, ratanaṃ tena vuccatī’’ti.
பாதுபா⁴வோ ஹோதீதி நிப்³ப³த்தி ஹோதி. தத்ராயங் யோஜனா – சக்கவத்திஸ்ஸ பாதுபா⁴வா ஸத்தன்னங் ரதனானங் பாதுபா⁴வோதி அயுத்தங். உப்பன்னஞ்ஹி சக்கங் வத்தெத்வா ஸோ சக்கவத்தீ நாம ஹோதீதி நாயுத்தங். கஸ்மா? சக்கவத்தனநியமாபெக்க²தாய. யோ ஹி நியமேன சக்கங் வத்தெஸ்ஸதி, ஸோ படிஸந்தி⁴தோ பபு⁴தி ‘‘சக்கவத்தி பாதுபூ⁴தோ’’தி வத்தப்³ப³தங் ஆபஜ்ஜதி. லத்³த⁴னாமஸ்ஸ ச புரிஸஸ்ஸ மூலுப்பத்திவசனதோபி யுத்தமேவேதங். யோ ஹி ஏஸ சக்கவத்தீதி லத்³த⁴னாமோ ஸத்தவிஸேஸோ, தஸ்ஸ படிஸந்தி⁴ஸங்கா²தோ பாதுபா⁴வோதி அயமெத்த² அத்தோ². தஸ்ஸ ஹி பாதுபா⁴வா ரதனானி பாதுப⁴வந்தி. பாதுபூ⁴தேஹி பன தேஹி ஸத்³தி⁴ங் பரிபக்கே புஞ்ஞஸம்பா⁴ரே ஸோ ஸங்யுஜ்ஜதி, ததா³ லோகஸ்ஸ தேஸு பாதுபா⁴வசித்தங் உப்பஜ்ஜதி. ப³ஹுலவசனதோ சாபி யுத்தமேவேதங். யதா³ ஹி லோகஸ்ஸ தேஸு பாதுபா⁴வஸஞ்ஞா உப்பஜ்ஜதி, ததா³ ஏகமேவ பட²மங், பச்சா² இதரானி ச² பாதுப⁴வந்தீதி ப³ஹுலவசனதோ சாபி ஏதங் யுத்தங். பாதுபா⁴வஸ்ஸ ச அத்த²பே⁴த³தோபி யுத்தமேவேதங். ந கேவலஞ்ஹி பாதுபூ⁴தமேவ பாதுபா⁴வோ, பாதுபா⁴வயதீதி பாதுபா⁴வோ. அயங் பாதுபா⁴வஸ்ஸ அத்த²பே⁴தோ³. யஸ்மா யோ ஸோ புஞ்ஞஸம்பா⁴ரோ ராஜானங் சக்கவத்திங் படிஸந்தி⁴வஸேன பாதுபா⁴வயதி, தஸ்மா ரஞ்ஞோ சக்கவத்திஸ்ஸ பாதுபா⁴வா. ந கேவலஞ்ஹி சக்கவத்தியேவ, இமானி பன ஸத்த ரதனானிபி பாதுப⁴வந்தீதி அயமெத்த² அத்தோ². யதே²வ ஹி ஸோ புஞ்ஞஸம்பா⁴ரோ ரஞ்ஞோ ஜனகஹேது, ஏவங் ரதனானம்பி பரியாயேன உபனிஸ்ஸயஹேதூதி யுத்தமேவேதங் ‘‘ரஞ்ஞோ, பி⁴க்க²வே, சக்கவத்திஸ்ஸ பாதுபா⁴வா ஸத்தன்னங் ரதனானங் பாதுபா⁴வோ ஹோதீ’’தி.
Pātubhāvo hotīti nibbatti hoti. Tatrāyaṃ yojanā – cakkavattissa pātubhāvā sattannaṃ ratanānaṃ pātubhāvoti ayuttaṃ. Uppannañhi cakkaṃ vattetvā so cakkavattī nāma hotīti nāyuttaṃ. Kasmā? Cakkavattananiyamāpekkhatāya. Yo hi niyamena cakkaṃ vattessati, so paṭisandhito pabhuti ‘‘cakkavatti pātubhūto’’ti vattabbataṃ āpajjati. Laddhanāmassa ca purisassa mūluppattivacanatopi yuttamevetaṃ. Yo hi esa cakkavattīti laddhanāmo sattaviseso, tassa paṭisandhisaṅkhāto pātubhāvoti ayamettha attho. Tassa hi pātubhāvā ratanāni pātubhavanti. Pātubhūtehi pana tehi saddhiṃ paripakke puññasambhāre so saṃyujjati, tadā lokassa tesu pātubhāvacittaṃ uppajjati. Bahulavacanato cāpi yuttamevetaṃ. Yadā hi lokassa tesu pātubhāvasaññā uppajjati, tadā ekameva paṭhamaṃ, pacchā itarāni cha pātubhavantīti bahulavacanato cāpi etaṃ yuttaṃ. Pātubhāvassa ca atthabhedatopi yuttamevetaṃ. Na kevalañhi pātubhūtameva pātubhāvo, pātubhāvayatīti pātubhāvo. Ayaṃ pātubhāvassa atthabhedo. Yasmā yo so puññasambhāro rājānaṃ cakkavattiṃ paṭisandhivasena pātubhāvayati, tasmā rañño cakkavattissa pātubhāvā. Na kevalañhi cakkavattiyeva, imāni pana satta ratanānipi pātubhavantīti ayamettha attho. Yatheva hi so puññasambhāro rañño janakahetu, evaṃ ratanānampi pariyāyena upanissayahetūti yuttamevetaṃ ‘‘rañño, bhikkhave, cakkavattissa pātubhāvā sattannaṃ ratanānaṃ pātubhāvo hotī’’ti.
இதா³னி தேஸங் ரதனானங் ஸரூபவஸேன த³ஸ்ஸனத்த²ங் கதமேஸங் ஸத்தன்னங் சக்கரதனஸ்ஸாதிஆதி³மாஹ. தத்த² சக்கரதனஸ்ஸாதிஆதீ³ஸு அயங் ஸங்கே²பாதி⁴ப்பாயோ – த்³விஸஹஸ்ஸதீ³பபரிவாரானங் சதுன்னங் மஹாதீ³பானங் ஸிரிவிப⁴வங் க³ஹெத்வா தா³துங் ஸமத்த²ஸ்ஸ சக்கரதனஸ்ஸ பாதுபா⁴வோ ஹோதி, ததா² புரேப⁴த்தமேவ ஸாக³ரபரியந்தங் பத²விங் அனுபரியாயனஸமத்த²ஸ்ஸ வேஹாஸங்க³மஸ்ஸ ஹத்தி²ரதனஸ்ஸ, தாதி³ஸஸ்ஸேவ அஸ்ஸரதனஸ்ஸ, சதுரங்க³ஸமன்னாக³தேபி அந்த⁴காரே யோஜனப்பமாணங் அந்த⁴காரங் வித⁴மித்வா ஆலோகத³ஸ்ஸனஸமத்த²ஸ்ஸ மணிரதனஸ்ஸ, ச²ப்³பி³த⁴ங் தோ³ஸங் விவஜ்ஜெத்வா மனாபசாரினோ இத்தி²ரதனஸ்ஸ, யோஜனப்பமாணே பதே³ஸே அந்தோபத²விக³தானங் நிதீ⁴னங் த³ஸ்ஸனஸமத்த²ஸ்ஸ க³ஹபதிரதனஸ்ஸ, அக்³க³மஹேஸியா குச்சி²ம்ஹி நிப்³ப³த்தித்வா ஸகலரஜ்ஜானுஸாஸனஸமத்த²ஸ்ஸ ஜெட்ட²புத்தஸங்கா²தஸ்ஸ பரிணாயகரதனஸ்ஸ ச பாதுபா⁴வோ ஹோதீதி . அயமெத்த² ஸங்கே²போ. வித்தா²ரதோ பன தேஸங் சக்கரதனாதீ³னங் பாதுபா⁴வவிதா⁴னங் மஹாஸுத³ஸ்ஸனாதீ³ஸு ஸுத்தேஸு ஆக³தமேவ. அத்தோ²பிஸ்ஸ தேஸங் வண்ணனாய ஸங்வண்ணிதோயேவ.
Idāni tesaṃ ratanānaṃ sarūpavasena dassanatthaṃ katamesaṃ sattannaṃ cakkaratanassātiādimāha. Tattha cakkaratanassātiādīsu ayaṃ saṅkhepādhippāyo – dvisahassadīpaparivārānaṃ catunnaṃ mahādīpānaṃ sirivibhavaṃ gahetvā dātuṃ samatthassa cakkaratanassa pātubhāvo hoti, tathā purebhattameva sāgarapariyantaṃ pathaviṃ anupariyāyanasamatthassa vehāsaṅgamassa hatthiratanassa, tādisasseva assaratanassa, caturaṅgasamannāgatepi andhakāre yojanappamāṇaṃ andhakāraṃ vidhamitvā ālokadassanasamatthassa maṇiratanassa, chabbidhaṃ dosaṃ vivajjetvā manāpacārino itthiratanassa, yojanappamāṇe padese antopathavigatānaṃ nidhīnaṃ dassanasamatthassa gahapatiratanassa, aggamahesiyā kucchimhi nibbattitvā sakalarajjānusāsanasamatthassa jeṭṭhaputtasaṅkhātassa pariṇāyakaratanassa ca pātubhāvo hotīti . Ayamettha saṅkhepo. Vitthārato pana tesaṃ cakkaratanādīnaṃ pātubhāvavidhānaṃ mahāsudassanādīsu suttesu āgatameva. Atthopissa tesaṃ vaṇṇanāya saṃvaṇṇitoyeva.
ஸதிஸம்பொ³ஜ்ஜ²ங்க³ரதனஸ்ஸாதிஆதீ³ஸு ஸரிக்க²கதா ஏவங் வேதி³தப்³பா³ – யதே²வ ஹி சக்கவத்தினோ சக்கரதனங் ஸப்³ப³ரதனானங் புரேசரங், ஏவங் ஸதிஸம்பொ³ஜ்ஜ²ங்க³ரதனங் ஸப்³பே³ஸங் சதுபூ⁴மகத⁴ம்மானங் புரேசரந்தி, புரேசரணட்டே²ன சக்கவத்திரஞ்ஞோ சக்கரதனஸதி³ஸங் ஹோதி. சக்கவத்தினோ ச ரதனேஸு மஹாகாயூபபன்னங் அச்சுக்³க³தங் விபுலங் மஹந்தங் ஹத்தி²ரதனங், இத³ம்பி த⁴ம்மவிசயஸம்பொ³ஜ்ஜ²ங்க³ரதனங் மஹந்தங் த⁴ம்மகாயூபபன்னங் அச்சுக்³க³தங் விபுலங் மஹந்தந்தி ஹத்தி²ரதனஸதி³ஸங் ஹோதி. சக்கவத்தினோ அஸ்ஸரதனங் ஸீக⁴ங் லஹு ஜவங், இத³ம்பி வீரியஸம்பொ³ஜ்ஜ²ங்க³ரதனங் ஸீக⁴ங் லஹு ஜவந்தி இமாய ஸீக⁴லஹுஜவதாய அஸ்ஸரதனஸதி³ஸங் ஹோதி. சக்கவத்தினோ மணிரதனங் அந்த⁴காரங் வித⁴மதி, ஆலோகங் த³ஸ்ஸேதி, இத³ம்பி பீதிஸம்பொ³ஜ்ஜ²ங்க³ரதனங் தாய ஏகந்தகுஸலத்தா கிலேஸந்த⁴காரங் வித⁴மதி, ஸஹஜாதபச்சயாதி³வஸேன ஞாணாலோகங் த³ஸ்ஸேதீதி இமினா அந்த⁴காரவித⁴மனஆலோகத³ஸ்ஸனபா⁴வேன மணிரதனஸதி³ஸங் ஹோதி.
Satisambojjhaṅgaratanassātiādīsu sarikkhakatā evaṃ veditabbā – yatheva hi cakkavattino cakkaratanaṃ sabbaratanānaṃ purecaraṃ, evaṃ satisambojjhaṅgaratanaṃ sabbesaṃ catubhūmakadhammānaṃ purecaranti, purecaraṇaṭṭhena cakkavattirañño cakkaratanasadisaṃ hoti. Cakkavattino ca ratanesu mahākāyūpapannaṃ accuggataṃ vipulaṃ mahantaṃ hatthiratanaṃ, idampi dhammavicayasambojjhaṅgaratanaṃ mahantaṃ dhammakāyūpapannaṃ accuggataṃ vipulaṃ mahantanti hatthiratanasadisaṃ hoti. Cakkavattino assaratanaṃ sīghaṃ lahu javaṃ, idampi vīriyasambojjhaṅgaratanaṃ sīghaṃ lahu javanti imāya sīghalahujavatāya assaratanasadisaṃ hoti. Cakkavattino maṇiratanaṃ andhakāraṃ vidhamati, ālokaṃ dasseti, idampi pītisambojjhaṅgaratanaṃ tāya ekantakusalattā kilesandhakāraṃ vidhamati, sahajātapaccayādivasena ñāṇālokaṃ dassetīti iminā andhakāravidhamanaālokadassanabhāvena maṇiratanasadisaṃ hoti.
சக்கவத்தினோ இத்தி²ரதனங் காயசித்தத³ரத²ங் படிபஸ்ஸம்பே⁴தி, பரிளாஹங் வூபஸமேதி. இத³ம்பி பஸ்ஸத்³தி⁴ஸம்பொ³ஜ்ஜ²ங்க³ரதனங் காயசித்தத³ரத²ங் படிபஸ்ஸம்பே⁴தி, பரிளாஹங் வூபஸமேதீதி இத்தி²ரதனஸதி³ஸங் ஹோதி. சக்கவத்தினோ க³ஹபதிரதனங் இச்சி²திச்சி²தக்க²ணே த⁴னதா³னேன விக்கே²பங் பச்சி²ந்தி³த்வா சித்தங் ஏகக்³க³ங் கரோதி, இத³ம்பி ஸமாதி⁴ஸம்பொ³ஜ்ஜ²ங்க³ரதனங் யதி²ச்சி²தாதி³வஸேன அப்பனங் ஸம்பாதே³தி, விக்கே²பங் பச்சி²ந்தி³த்வா சித்தங் ஏகக்³க³ங் கரோதீதி க³ஹபதிரதனஸதி³ஸங் ஹோதி. சக்கவத்தினோ ச பரிணாயகரதனங் ஸப்³ப³த்த²கிச்சஸம்பாத³னேன அப்பொஸ்ஸுக்கதங் கரோதி. இத³ம்பி உபெக்கா²ஸம்பொ³ஜ்ஜ²ங்க³ரதனங் சித்துப்பாத³ங் லீனுத்³த⁴ச்சதோ மோசெத்வா பயோக³மஜ்ஜ²த்தே ட²பயமானங் அப்பொஸ்ஸுக்கதங் கரோதீதி பரிணாயகரதனஸதி³ஸங் ஹோதி. இதி இமஸ்மிங் ஸுத்தே சதுபூ⁴மகோ ஸப்³ப³ஸங்கா³ஹிகத⁴ம்மபரிச்சே²தோ³ கதி²தோதி வேதி³தப்³போ³.
Cakkavattino itthiratanaṃ kāyacittadarathaṃ paṭipassambheti, pariḷāhaṃ vūpasameti. Idampi passaddhisambojjhaṅgaratanaṃ kāyacittadarathaṃ paṭipassambheti, pariḷāhaṃ vūpasametīti itthiratanasadisaṃ hoti. Cakkavattino gahapatiratanaṃ icchiticchitakkhaṇe dhanadānena vikkhepaṃ pacchinditvā cittaṃ ekaggaṃ karoti, idampi samādhisambojjhaṅgaratanaṃ yathicchitādivasena appanaṃ sampādeti, vikkhepaṃ pacchinditvā cittaṃ ekaggaṃ karotīti gahapatiratanasadisaṃ hoti. Cakkavattino ca pariṇāyakaratanaṃ sabbatthakiccasampādanena appossukkataṃ karoti. Idampi upekkhāsambojjhaṅgaratanaṃ cittuppādaṃ līnuddhaccato mocetvā payogamajjhatte ṭhapayamānaṃ appossukkataṃ karotīti pariṇāyakaratanasadisaṃ hoti. Iti imasmiṃ sutte catubhūmako sabbasaṅgāhikadhammaparicchedo kathitoti veditabbo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. சக்கவத்திஸுத்தங் • 2. Cakkavattisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. சக்கவத்திஸுத்தவண்ணனா • 2. Cakkavattisuttavaṇṇanā
