| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. சக்கவத்திஸுத்தவண்ணனா
4. Cakkavattisuttavaṇṇanā
14. சதுத்தே² சதூஹி ஸங்க³ஹவத்தூ²ஹீதி தா³னபியவசனஅத்த²சரியாஸமானத்ததாஸங்கா²தேஹி சதூஹி ஸங்க³ஹகாரணேஹி. சக்கங் வத்தேதீதி ஆணாசக்கங் பவத்தேதி. சக்கந்தி வா இத⁴ ரதனசக்கங் வேதி³தப்³ப³ங். அயஞ்ஹி சக்கஸத்³தோ³ ஸம்பத்தியங், லக்க²ணே, ரத²ங்கே³, இரியாபதே², தா³னே, ரதனத⁴ம்மகு²ரசக்காதீ³ஸு ச தி³ஸ்ஸதி. ‘‘சத்தாரிமானி, பி⁴க்க²வே, சக்கானி, யேஹி ஸமன்னாக³தானங் தே³வமனுஸ்ஸான’’ந்திஆதீ³ஸு (அ॰ நி॰ 4.31) ஹி ஸம்பத்தியங் தி³ஸ்ஸதி. ‘‘பாத³தலேஸு சக்கானி ஜாதானீ’’தி (தீ³॰ நி॰ 2.35; 3.204) எத்த² லக்க²ணே. ‘‘சக்கங்வ வஹதோ பத³’’ந்தி (த⁴॰ ப॰ 1) எத்த² ரத²ங்கே³. ‘‘சதுசக்கங் நவத்³வார’’ந்தி (ஸங்॰ நி॰ 1.29) எத்த² இரியாபதே². ‘‘த³த³ங் பு⁴ஞ்ஜ மா ச பமாதோ³, சக்கங் வத்தய ஸப்³ப³பாணின’’ந்தி (ஜா॰ 1.7.149) எத்த² தா³னே. ‘‘தி³ப்³ப³ங் சக்கரதனங் பாதுரஹோஸீ’’தி (தீ³॰ நி॰ 2.243) எத்த² ரதனசக்கே. ‘‘மயா பவத்திதங் சக்க’’ந்தி (ஸு॰ நி॰ 562) எத்த² த⁴ம்மசக்கே. ‘‘இச்சா²ஹதஸ்ஸ போஸஸ்ஸ, சக்கங் ப⁴மதி மத்த²கே’’தி (ஜா॰ 1.5.103) எத்த² கு²ரசக்கே. ‘‘கு²ரபரியந்தேன சக்கேனா’’தி (தீ³॰ நி॰ 1.166) எத்த² பஹரணசக்கே. ‘‘அஸனிவிசக்க’’ந்தி (தீ³॰ நி॰ 3.61) எத்த² அஸனிமண்ட³லே. இத⁴ பனாயங் ரதனசக்கே த³ட்ட²ப்³போ³.
14. Catutthe catūhi saṅgahavatthūhīti dānapiyavacanaatthacariyāsamānattatāsaṅkhātehi catūhi saṅgahakāraṇehi. Cakkaṃ vattetīti āṇācakkaṃ pavatteti. Cakkanti vā idha ratanacakkaṃ veditabbaṃ. Ayañhi cakkasaddo sampattiyaṃ, lakkhaṇe, rathaṅge, iriyāpathe, dāne, ratanadhammakhuracakkādīsu ca dissati. ‘‘Cattārimāni, bhikkhave, cakkāni, yehi samannāgatānaṃ devamanussāna’’ntiādīsu (a. ni. 4.31) hi sampattiyaṃ dissati. ‘‘Pādatalesu cakkāni jātānī’’ti (dī. ni. 2.35; 3.204) ettha lakkhaṇe. ‘‘Cakkaṃva vahato pada’’nti (dha. pa. 1) ettha rathaṅge. ‘‘Catucakkaṃ navadvāra’’nti (saṃ. ni. 1.29) ettha iriyāpathe. ‘‘Dadaṃ bhuñja mā ca pamādo, cakkaṃ vattaya sabbapāṇina’’nti (jā. 1.7.149) ettha dāne. ‘‘Dibbaṃ cakkaratanaṃ pāturahosī’’ti (dī. ni. 2.243) ettha ratanacakke. ‘‘Mayā pavattitaṃ cakka’’nti (su. ni. 562) ettha dhammacakke. ‘‘Icchāhatassa posassa, cakkaṃ bhamati matthake’’ti (jā. 1.5.103) ettha khuracakke. ‘‘Khurapariyantena cakkenā’’ti (dī. ni. 1.166) ettha paharaṇacakke. ‘‘Asanivicakka’’nti (dī. ni. 3.61) ettha asanimaṇḍale. Idha panāyaṃ ratanacakke daṭṭhabbo.
கித்தாவதா பனாயங் சக்கவத்தீ நாம ஹோதி? ஏகங்கு³லத்³வங்கு³லமத்தம்பி சக்கரதனங் ஆகாஸங் அப்³பு⁴க்³க³ந்த்வா பவத்ததி. ஸப்³ப³சக்கவத்தீனஞ்ஹி நிஸின்னாஸனதோ உட்ட²ஹித்வா சக்கரதனஸமீபங் க³ந்த்வா ஹத்தி²ஸொண்ட³ஸதி³ஸபனாளிங் ஸுவண்ணபி⁴ங்கா³ரங் உக்கி²பித்வா உத³கேன அப்³பு⁴க்கிரித்வா ‘‘அபி⁴விஜினாது ப⁴வங் சக்கரதன’’ந்தி வசனஸமனந்தரமேவ வேஹாஸங் அப்³பு⁴க்³க³ந்த்வா சக்கரதனங் பவத்ததீதி. யஸ்ஸ பவத்திஸமகாலமேவ, ஸோ ராஜா சக்கவத்தீ நாம ஹோதி.
Kittāvatā panāyaṃ cakkavattī nāma hoti? Ekaṅguladvaṅgulamattampi cakkaratanaṃ ākāsaṃ abbhuggantvā pavattati. Sabbacakkavattīnañhi nisinnāsanato uṭṭhahitvā cakkaratanasamīpaṃ gantvā hatthisoṇḍasadisapanāḷiṃ suvaṇṇabhiṅgāraṃ ukkhipitvā udakena abbhukkiritvā ‘‘abhivijinātu bhavaṃ cakkaratana’’nti vacanasamanantarameva vehāsaṃ abbhuggantvā cakkaratanaṃ pavattatīti. Yassa pavattisamakālameva, so rājā cakkavattī nāma hoti.
த⁴ம்மோதி த³ஸகுஸலகம்மபத²த⁴ம்மோ, த³ஸவித⁴ங் வா சக்கவத்திவத்தங். த³ஸவிதே⁴ வா குஸலத⁴ம்மே அக³ரஹிதே வா ராஜத⁴ம்மே நியுத்தோதி த⁴ம்மிகோ. தேன ச த⁴ம்மேன ஸகலலோகங் ரஞ்ஜேதீதி த⁴ம்மராஜா. த⁴ம்மேன வா லத்³த⁴ரஜ்ஜத்தா த⁴ம்மராஜா. சக்கவத்தீஹி த⁴ம்மேன ஞாயேன ரஜ்ஜங் அதி⁴க³ச்ச²தி, ந அத⁴ம்மேன. த³ஸவிதே⁴ன சக்கவத்திவத்தேனாதி த³ஸப்பபே⁴தே³ன சக்கவத்தீனங் வத்தேன.
Dhammoti dasakusalakammapathadhammo, dasavidhaṃ vā cakkavattivattaṃ. Dasavidhe vā kusaladhamme agarahite vā rājadhamme niyuttoti dhammiko. Tena ca dhammena sakalalokaṃ rañjetīti dhammarājā. Dhammena vā laddharajjattā dhammarājā. Cakkavattīhi dhammena ñāyena rajjaṃ adhigacchati, na adhammena. Dasavidhena cakkavattivattenāti dasappabhedena cakkavattīnaṃ vattena.
கிங் பன தங் த³ஸவித⁴ங் சக்கவத்திவத்தந்தி? வுச்சதே –
Kiṃ pana taṃ dasavidhaṃ cakkavattivattanti? Vuccate –
‘‘கதமங் பன தங், தே³வ, அரியங் சக்கவத்திவத்தந்தி? தேன ஹி த்வங், தாத, த⁴ம்மங்யேவ நிஸ்ஸாய த⁴ம்மங் ஸக்கரொந்தோ த⁴ம்மங் க³ருங் கரொந்தோ த⁴ம்மங் மானெந்தோ த⁴ம்மங் பூஜெந்தோ த⁴ம்மங் அபசாயமானோ த⁴ம்மத்³த⁴ஜோ த⁴ம்மகேது த⁴ம்மாதி⁴பதெய்யோ த⁴ம்மிகங் ரக்கா²வரணகு³த்திங் ஸங்வித³ஹஸ்ஸு அந்தோஜனஸ்மிங் ப³லகாயஸ்மிங் க²த்தியேஸு அனுயந்தேஸு ப்³ராஹ்மணக³ஹபதிகேஸு நேக³மஜானபதே³ஸு ஸமணப்³ராஹ்மணேஸு மிக³பக்கீ²ஸு. மா ச தே, தாத, விஜிதே அத⁴ம்மகாரோ பவத்தித்த². யே ச தே, தாத, விஜிதே அத⁴னா அஸ்ஸு, தேஸஞ்ச த⁴னமனுப்பதெ³ய்யாஸி. யே ச தே, தாத, விஜிதே ஸமணப்³ராஹ்மணா மத³ப்பமாதா³ படிவிரதா க²ந்திஸோரச்சே நிவிட்டா² ஏகமத்தானங் த³மெந்தி, ஏகமத்தானங் ஸமெந்தி, ஏகமத்தானங் பரினிப்³பா³பெந்தி. தே காலேன காலங் உபஸங்கமித்வா பரிபுச்செ²ய்யாஸி பரிக்³க³ண்ஹெய்யாஸி – ‘கிங், ப⁴ந்தே, குஸலங் கிங் அகுஸலங், கிங் ஸாவஜ்ஜங் கிங் அனவஜ்ஜங், கிங் ஸேவிதப்³ப³ங் கிங் ந ஸேவிதப்³ப³ங், கிங் மே கரியமானங் தீ³க⁴ரத்தங் அஹிதாய து³க்கா²ய அஸ்ஸ, கிங் வா பன மே கரியமானங் தீ³க⁴ரத்தங் ஹிதாய ஸுகா²ய அஸ்ஸா’தி. தேஸங் ஸுத்வா யங் அகுஸலங், தங் அபி⁴னிவஜ்ஜெய்யாஸி, யங் குஸலங், தங் ஸமாதா³ய வத்தெய்யாஸி. இத³ங் கோ², தாத, தங் அரியங் சக்கவத்திவத்த’’ந்தி –
‘‘Katamaṃ pana taṃ, deva, ariyaṃ cakkavattivattanti? Tena hi tvaṃ, tāta, dhammaṃyeva nissāya dhammaṃ sakkaronto dhammaṃ garuṃ karonto dhammaṃ mānento dhammaṃ pūjento dhammaṃ apacāyamāno dhammaddhajo dhammaketu dhammādhipateyyo dhammikaṃ rakkhāvaraṇaguttiṃ saṃvidahassu antojanasmiṃ balakāyasmiṃ khattiyesu anuyantesu brāhmaṇagahapatikesu negamajānapadesu samaṇabrāhmaṇesu migapakkhīsu. Mā ca te, tāta, vijite adhammakāro pavattittha. Ye ca te, tāta, vijite adhanā assu, tesañca dhanamanuppadeyyāsi. Ye ca te, tāta, vijite samaṇabrāhmaṇā madappamādā paṭiviratā khantisoracce niviṭṭhā ekamattānaṃ damenti, ekamattānaṃ samenti, ekamattānaṃ parinibbāpenti. Te kālena kālaṃ upasaṅkamitvā paripuccheyyāsi pariggaṇheyyāsi – ‘kiṃ, bhante, kusalaṃ kiṃ akusalaṃ, kiṃ sāvajjaṃ kiṃ anavajjaṃ, kiṃ sevitabbaṃ kiṃ na sevitabbaṃ, kiṃ me kariyamānaṃ dīgharattaṃ ahitāya dukkhāya assa, kiṃ vā pana me kariyamānaṃ dīgharattaṃ hitāya sukhāya assā’ti. Tesaṃ sutvā yaṃ akusalaṃ, taṃ abhinivajjeyyāsi, yaṃ kusalaṃ, taṃ samādāya vatteyyāsi. Idaṃ kho, tāta, taṃ ariyaṃ cakkavattivatta’’nti –
ஏவங் சக்கவத்திஸுத்தே (தீ³॰ நி॰ 3.84) ஆக³தனயேன அந்தோஜனஸ்மிங் ப³லகாயே ஏகங், க²த்தியேஸு ஏகங், அனுயந்தேஸு ஏகங், ப்³ராஹ்மணக³ஹபதிகேஸு ஏகங், நேக³மஜானபதே³ஸு ஏகங், ஸமணப்³ராஹ்மணேஸு ஏகங், மிக³பக்கீ²ஸு ஏகங், அத⁴ம்மகாரப்படிக்கே²போ ஏகங், அத⁴னானங் த⁴னானுப்பதா³னங் ஏகங், ஸமணப்³ராஹ்மணே உபஸங்கமித்வா பஞ்ஹபுச்ச²னங் ஏகந்தி ஏவமேவங் தங் சக்கவத்திவத்தங் த³ஸவித⁴ங் ஹோதி. க³ஹபதிகே பன பக்கி²ஜாதே ச விஸுங் கத்வா க³ண்ஹந்தஸ்ஸ த்³வாத³ஸவித⁴ங் ஹோதி.
Evaṃ cakkavattisutte (dī. ni. 3.84) āgatanayena antojanasmiṃ balakāye ekaṃ, khattiyesu ekaṃ, anuyantesu ekaṃ, brāhmaṇagahapatikesu ekaṃ, negamajānapadesu ekaṃ, samaṇabrāhmaṇesu ekaṃ, migapakkhīsu ekaṃ, adhammakārappaṭikkhepo ekaṃ, adhanānaṃ dhanānuppadānaṃ ekaṃ, samaṇabrāhmaṇe upasaṅkamitvā pañhapucchanaṃ ekanti evamevaṃ taṃ cakkavattivattaṃ dasavidhaṃ hoti. Gahapatike pana pakkhijāte ca visuṃ katvā gaṇhantassa dvādasavidhaṃ hoti.
அஞ்ஞதா² வத்திதுங் அதெ³ந்தோ ஸோ த⁴ம்மோ அதி⁴ட்டா²னங் ஏதஸ்ஸாதி தத³தி⁴ட்டா²னங். தேன தத³தி⁴ட்டா²னேன சேதஸா. ஸக்கரொந்தோதி ஆத³ரகிரியாவஸேன கரொந்தோ. தேனாஹ ‘‘யதா²’’திஆதி³. க³ருங் கரொந்தோதி பாஸாணச்ச²த்தங் விய க³ருகரணவஸேன க³ருங் கரொந்தோ. தேனேவாஹ ‘‘தஸ்மிங் கா³ரவுப்பத்தியா’’தி. த⁴ம்மாதி⁴பதிபூ⁴தாக³தபா⁴வேனாதி இமினா யதா²வுத்தத⁴ம்மஸ்ஸ ஜெட்ட²கபா⁴வேன புரிமதரங் அத்தபா⁴வேஸு ஸக்கச்சங் ஸமுபசிதபா⁴வங் த³ஸ்ஸேதி. த⁴ம்மவஸேனேவ ச ஸப்³ப³கிரியானங் கரணேனாதி ஏதேன டா²னநிஸஜ்ஜாதீ³ஸு யதா²வுத்தத⁴ம்மனின்னபோணபப்³பா⁴ரபா⁴வங் த³ஸ்ஸேதி. அஸ்ஸாதி ரக்கா²வரணகு³த்தியா. பரங் ரக்க²ந்தோதி அஞ்ஞங் தி³ட்ட²த⁴ம்மிகாதி³அனத்த²தோ ரக்க²ந்தோ. தேனேவ பரரக்க²ஸாத⁴னேன க²ந்திஆதி³கு³ணேன அத்தானங் ததோ ஏவ ரக்க²தி. மெத்தசித்ததாதி மெத்தசித்ததாய. நிவாஸனபாருபனகே³ஹாதீ³னி ஸீதுண்ஹாதி³ப்படிபா³ஹனேன ஆவரணங்.
Aññathā vattituṃ adento so dhammo adhiṭṭhānaṃ etassāti tadadhiṭṭhānaṃ. Tena tadadhiṭṭhānena cetasā. Sakkarontoti ādarakiriyāvasena karonto. Tenāha ‘‘yathā’’tiādi. Garuṃ karontoti pāsāṇacchattaṃ viya garukaraṇavasena garuṃ karonto. Tenevāha ‘‘tasmiṃ gāravuppattiyā’’ti. Dhammādhipatibhūtāgatabhāvenāti iminā yathāvuttadhammassa jeṭṭhakabhāvena purimataraṃ attabhāvesu sakkaccaṃ samupacitabhāvaṃ dasseti. Dhammavaseneva ca sabbakiriyānaṃ karaṇenāti etena ṭhānanisajjādīsu yathāvuttadhammaninnapoṇapabbhārabhāvaṃ dasseti. Assāti rakkhāvaraṇaguttiyā. Paraṃ rakkhantoti aññaṃ diṭṭhadhammikādianatthato rakkhanto. Teneva pararakkhasādhanena khantiādiguṇena attānaṃ tato eva rakkhati. Mettacittatāti mettacittatāya. Nivāsanapārupanagehādīni sītuṇhādippaṭibāhanena āvaraṇaṃ.
அந்தோஜனஸ்மிந்தி அப்³ப⁴ந்தரபூ⁴தே புத்ததா³ராதி³ஜனே. ஸீலஸங்வரே பதிட்டா²பெந்தோதி இமினா ரக்க²ங் த³ஸ்ஸேதி. வத்த²க³ந்த⁴மாலாதீ³னி சஸ்ஸ த³த³மானோதி இமினா ஆவரணங், இதரேன கு³த்திங். ஸம்பதா³னேனபீதி பி-ஸத்³தே³ன ஸீலஸங்வரேஸு பதிட்டா²பனாதீ³னங் ஸம்பிண்டே³தி. ஏஸ நயோ பரேஸுபி பி-ஸத்³த³க்³க³ஹணே. நிக³மோ நிவாஸோ ஏதேஸந்தி நேக³மா. ஏவங் ஜானபதா³தி ஆஹ ‘‘ததா² நிக³மவாஸினோ’’திஆதி³னா.
Antojanasminti abbhantarabhūte puttadārādijane. Sīlasaṃvare patiṭṭhāpentoti iminā rakkhaṃ dasseti. Vatthagandhamālādīni cassa dadamānoti iminā āvaraṇaṃ, itarena guttiṃ. Sampadānenapīti pi-saddena sīlasaṃvaresu patiṭṭhāpanādīnaṃ sampiṇḍeti. Esa nayo paresupi pi-saddaggahaṇe. Nigamo nivāso etesanti negamā. Evaṃ jānapadāti āha ‘‘tathā nigamavāsino’’tiādinā.
ரக்கா²வரணகு³த்தியா காயகம்மாதீ³ஸு ஸங்வித³ஹனங் ட²பனங் நாம தது³பதே³ஸோயேவாதி வுத்தங் ‘‘கதெ²த்வா’’தி. ஏதேஸூதி பாளியங் வுத்தேஸு ஸமணாதீ³ஸு. படிவத்தேதுங் ந ஸக்கா கீ²ணானங் கிலேஸானங் புன அனுப்பஜ்ஜனதோ. ஸேஸமெத்த² ஸுவிஞ்ஞெய்யமேவ.
Rakkhāvaraṇaguttiyā kāyakammādīsu saṃvidahanaṃ ṭhapanaṃ nāma tadupadesoyevāti vuttaṃ ‘‘kathetvā’’ti. Etesūti pāḷiyaṃ vuttesu samaṇādīsu. Paṭivattetuṃ na sakkā khīṇānaṃ kilesānaṃ puna anuppajjanato. Sesamettha suviññeyyameva.
சக்கவத்திஸுத்தவண்ணனா நிட்டி²தா.
Cakkavattisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. சக்கவத்திஸுத்தங் • 4. Cakkavattisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. சக்கவத்திஸுத்தவண்ணனா • 4. Cakkavattisuttavaṇṇanā
