| Library / Tipiṭaka / ཏིཔིཊཀ • Tipiṭaka / དཱིགྷནིཀཱཡ (ཊཱིཀཱ) • Dīghanikāya (ṭīkā) |
༣. ཙཀྐཝཏྟིསུཏྟཝཎྞནཱ
3. Cakkavattisuttavaṇṇanā
ཨཏྟདཱིཔསརཎཏཱཝཎྞནཱ
Attadīpasaraṇatāvaṇṇanā
༨༠. ཨུཏྟཱནཾ ཝུཙྩཏི པཱཀཊཾ, ཏཔྤཊིཀྑེཔེན ཨནུཏྟཱནཾ ཨཔཱཀཊཾ, པཊིཙྪནྣཾ, ཨཔཙུརཾ, དུཝིཉྙེཡྻཉྩ། ཨནུཏྟཱནཱནཾ པདཱནཾ ཝཎྞནཱ ཨནུཏྟཱནཔདཝཎྞནཱ། ཨུཏྟཱནཔདཝཎྞནཱཡ པཡོཛནཱབྷཱཝཏོ ཨནུཏྟཱནགྒཧཎཾ། ‘‘མཱཏུལཱ’’ཏི ཨིཏྠིལིངྒཝསེན ལདྡྷནཱམོ ཨེཀོ རུཀྑོ, ཏསྶཱ ཨཱསནྣཔྤདེསེ མཱཔིཏཏྟཱ ནགརམྤི ‘‘མཱཏུལཱ’’ ཏྭེཝ པཉྙཱཡིཏྠ། ཏེན ཝུཏྟཾ ‘‘མཱཏུལཱཡནྟི ཨེཝཾ ནཱམཀེ ནགརེ’’ཏི། ཨཝིདཱུརེཏི ཏསྶ ནགརསྶ ཨཝིདཱུརེ།
80.Uttānaṃ vuccati pākaṭaṃ, tappaṭikkhepena anuttānaṃ apākaṭaṃ, paṭicchannaṃ, apacuraṃ, duviññeyyañca. Anuttānānaṃ padānaṃ vaṇṇanā anuttānapadavaṇṇanā. Uttānapadavaṇṇanāya payojanābhāvato anuttānaggahaṇaṃ. ‘‘Mātulā’’ti itthiliṅgavasena laddhanāmo eko rukkho, tassā āsannappadese māpitattā nagarampi ‘‘mātulā’’ tveva paññāyittha. Tena vuttaṃ ‘‘mātulāyanti evaṃ nāmake nagare’’ti. Avidūreti tassa nagarassa avidūre.
ཀཱམཉྩེཏྠ སུཏྟེ ‘‘བྷཱུཏཔུབྦཾ, བྷིཀྑཝེ, རཱཛཱ དལ༹ྷནེམི ནཱམ ཨཧོསཱི’’ཏིཨཱདིནཱ ཨཏཱིཏཝཾསདཱིཔིཀཱ ཀཐཱ ཨཱདིཏོ པཊྛཱཡ ཨཱགཏཱ, ‘‘ཨཌྜྷཏེཡྻཝསྶསཏཱཡུཀཱནཾ མནུསྶཱནཾ ཝསྶསཏཱཡུཀཱ པུཏྟཱ བྷཝིསྶནྟཱི’’ཏིཨཱདིནཱ པན སཝིསེསཾ ཨནཱགཏཏྠཔཊིསཾཡུཏྟཱ ཀཐཱ ཨཱགཏཱཏི ཝུཏྟཾ ‘‘ཨནཱགཏཝཾསདཱིཔིཀཱཡ སུཏྟནྟཀཐཱཡཱ’’ཏི། ཨནཱགཏཏྠདཱིཔནཉྷི ཨཙྪརིཡཾ, ཏཏྠཱཔི ཨནཱགཏསྶ སམྨཱསམྦུདྡྷསྶ པཊིཔཏྟིཀིཏྟནཾ ཨཙྪརིཡཏམཾ། སམཱགམེནཱཏི སནྣིཔཱཏེན།
Kāmañcettha sutte ‘‘bhūtapubbaṃ, bhikkhave, rājā daḷhanemi nāma ahosī’’tiādinā atītavaṃsadīpikā kathā ādito paṭṭhāya āgatā, ‘‘aḍḍhateyyavassasatāyukānaṃ manussānaṃ vassasatāyukā puttā bhavissantī’’tiādinā pana savisesaṃ anāgatatthapaṭisaṃyuttā kathā āgatāti vuttaṃ ‘‘anāgatavaṃsadīpikāya suttantakathāyā’’ti. Anāgatatthadīpanañhi acchariyaṃ, tatthāpi anāgatassa sammāsambuddhassa paṭipattikittanaṃ acchariyatamaṃ. Samāgamenāti sannipātena.
‘‘བྷཏྟགྒཾ ཨམནཱཔ’’ནྟིཨཱདི ཀེཝལཾ ཏེསཾ པརིཝིཏཀྐམཏྟཾ། ཨམནཱཔནྟི ཨམནུཉྙཾ། བུདྡྷེསུ ཀཏོ ཨཔྤཀོཔི ཨཔརཱདྷོ ཨཔྤཀོ ཀཱརོ ཝིཡ གརུཏརཝིཔཱཀོཏི ཨཱཧ ‘‘བུདྡྷེཧི སདྡྷིཾ…པེ॰… སདིསཾ ཧོཏཱི’’ཏི། ཏཏྲཱཏི ཏསྨིཾ མཱཏུལནགརསྶ སམཱིཔེ, ཏསྶཾ ཝཱ པརིསཱཡཾ།
‘‘Bhattaggaṃ amanāpa’’ntiādi kevalaṃ tesaṃ parivitakkamattaṃ. Amanāpanti amanuññaṃ. Buddhesu kato appakopi aparādho appako kāro viya garutaravipākoti āha ‘‘buddhehi saddhiṃ…pe… sadisaṃ hotī’’ti. Tatrāti tasmiṃ mātulanagarassa samīpe, tassaṃ vā parisāyaṃ.
ཨཏྟདཱིཔཱཏི ཨེཏྠ ཀཱམཾ ཡོ པརོ ན ཧོཏི, སོ ཨཏྟཱཏི སསནྟཱནོ ‘‘ཨཏྟཱ’’ཏི ཝུཙྩཏི, ཧིཏསུཁེསིབྷཱཝེན པན ཨཏྟནིབྦིསེསཏྟཱ དྷམྨོ ཨིདྷ ‘‘ཨཏྟཱ’’ཏི ཨདྷིཔྤེཏོ། ཏེནཱཧ ‘‘ཨཏྟཱ ནཱམ ལོཀིཡལོཀུཏྟརོ དྷམྨོ’’ཏི། དྭིདྷཱ ཨཱཔོ གཏོ ཨེཏྠཱཏི དཱིཔོ, ཨོགྷེན ཨནཛ྄ཛྷོཏྠཏོ བྷཱུམིབྷཱགོ། ཨིདྷ པན ཀཱམོགྷཱདཱིཧི ཨནཛ྄ཛྷོཏྠརཎཱིཡཏྟཱ དཱིཔོ ཝིཡཱཏི དཱིཔོ, ཨཏྟཱ དཱིཔོ པཏིཊྛཱ ཨེཏེསནྟི ཨཏྟདཱིཔཱ། ཏེནཱཧ ‘‘ཨཏྟཱནཾ དཱིཔ’’ནྟིཨཱདི། དཱིཔབྷཱཝོ ཙེཏྠ པཊིསརཎཏཱཏི ཨཱཧ ‘‘ཨིདཾ ཏསྶེཝ ཝེཝཙན’’ནྟི། ཨཉྙསརཎཔཊིཀྑེཔཝཙནནྟི ཨཉྙསརཎབྷཱཝཔཊིཀྑེཔཝཙནཾ། ཨིདཉྷི ན ཨཉྙཾ སརཎཾ ཀཏྭཱ ཝིཧརཎསྶེཝ པཊིཀྑེཔཝཙནཾ, ཨཐ ཁོ ཨཉྙསྶ སརཎསབྷཱཝསྶེཝ པཊིཀྑེཔཝཙནཾ ཏཔྤཊིཀྑེཔེ ཙ ཏེན ཨིཏརསྶཱཔི པཊིཀྑེཔསིདྡྷིཏོ། ཏེནཱཧ ‘‘ན ཧཱི’’ཏིཨཱདི། ཨིདཱནི ཏམེཝཏྠཾ སུཏྟནྟརེན སཱདྷེཏུཾ ‘‘ཝུཏྟམྤི ཙེཏ’’ནྟིཨཱདི། ཡདི ཨེཏྠ པཱཀཏིཀོ ཨཏྟཱ ཨིཙྪིཏོ, ཀཐཾ ཏསྶ དཱིཔསརཎབྷཱཝོ, ཏསྨཱ ཨདྷིཔྤཱཡིཀོ ཨེཏྠ ཨཏྟཱ བྷཝེཡྻཱཏི པུཙྪཏི ‘‘ཀོ པནེཏྠ ཨཏྟཱ ནཱམཱ’’ཏི། ཨིཏརོ ཡཐཱདྷིཔྤེཏཾ ཨཏྟཱནཾ དསྶེནྟོ ‘‘ལོཀིཡལོཀུཏྟརོ དྷམྨོ’’ཏི། དུཏིཡཝཱརོཔི པཋམཝཱརསྶེཝ པརིཡཱཡབྷཱཝེན དེསིཏོཏི དསྶེཏུཾ ‘‘ཏེནཱཧཱ’’ཏིཨཱདི ཝུཏྟཾ།
Attadīpāti ettha kāmaṃ yo paro na hoti, so attāti sasantāno ‘‘attā’’ti vuccati, hitasukhesibhāvena pana attanibbisesattā dhammo idha ‘‘attā’’ti adhippeto. Tenāha ‘‘attā nāma lokiyalokuttaro dhammo’’ti. Dvidhā āpo gato etthāti dīpo, oghena anajjhotthato bhūmibhāgo. Idha pana kāmoghādīhi anajjhottharaṇīyattā dīpo viyāti dīpo, attā dīpo patiṭṭhā etesanti attadīpā. Tenāha ‘‘attānaṃ dīpa’’ntiādi. Dīpabhāvo cettha paṭisaraṇatāti āha ‘‘idaṃ tasseva vevacana’’nti. Aññasaraṇapaṭikkhepavacananti aññasaraṇabhāvapaṭikkhepavacanaṃ. Idañhi na aññaṃ saraṇaṃ katvā viharaṇasseva paṭikkhepavacanaṃ, atha kho aññassa saraṇasabhāvasseva paṭikkhepavacanaṃ tappaṭikkhepe ca tena itarassāpi paṭikkhepasiddhito. Tenāha ‘‘na hī’’tiādi. Idāni tamevatthaṃ suttantarena sādhetuṃ ‘‘vuttampi ceta’’ntiādi. Yadi ettha pākatiko attā icchito, kathaṃ tassa dīpasaraṇabhāvo, tasmā adhippāyiko ettha attā bhaveyyāti pucchati ‘‘ko panettha attā nāmā’’ti. Itaro yathādhippetaṃ attānaṃ dassento ‘‘lokiyalokuttaro dhammo’’ti. Dutiyavāropi paṭhamavārasseva pariyāyabhāvena desitoti dassetuṃ ‘‘tenāhā’’tiādi vuttaṃ.
གོཙརེཏི བྷིཀྑཱུནཾ གོཙརཊྛཱནབྷཱུཏེ། ཏེནཱཧ ‘‘ཙརིཏུཾ ཡུཏྟཊྛཱནེ’’ཏི། སཀེཏི ཀཐཾ པནཱཡཾ བྷིཀྑཱུནཾ སཀོཏི ཨཱཧ ‘‘པེཏྟིཀེ ཝིསཡེ’’ཏི། པིཏིཏོ སམྨཱསམྦུདྡྷཏོ ཨཱགཏཏྟཱ ‘‘ཨཡཾ ཏུམྷཱཀཾ གོཙརོ’’ཏི ཏེན ཨུདྡིཊྛཏྟཱ པེཏྟིཀེ ཝིསཡེཏི། ཙརནྟནྟི སཱམིཨཏྠེ ཨུཔཡོགཝཙནནྟི ཨཱཧ ‘‘ཨཡམེཝཏྠོ’’ཏི, ཙརནྟཱནནྟི ཙ ཨཏྠོ, ཏེནཱཡཾ ཝིབྷཏྟིཝིཔལླཱསེནཔི ཝཙནཝིཔལླཱསེནཔཱིཏི དསྶེཏི། ཀིལེསམཱརསྶ ཨོཏཱརཱལཱབྷེནེཝ ཨིཏརམཱརཱནམྤི ཨོཏཱརཱལཱབྷོ ཝེདིཏབྦོ། ཨཡཾ པནཏྠོཏི གོཙརེ ཙརཎཾ སནྡྷཱཡཱཧ, ཝཏྠུ པན བྱཏིརེཀམུཁེན ཨཱགཏཾ།
Gocareti bhikkhūnaṃ gocaraṭṭhānabhūte. Tenāha ‘‘carituṃ yuttaṭṭhāne’’ti. Saketi kathaṃ panāyaṃ bhikkhūnaṃ sakoti āha ‘‘pettike visaye’’ti. Pitito sammāsambuddhato āgatattā ‘‘ayaṃ tumhākaṃ gocaro’’ti tena uddiṭṭhattā pettike visayeti. Carantanti sāmiatthe upayogavacananti āha ‘‘ayamevattho’’ti, carantānanti ca attho, tenāyaṃ vibhattivipallāsenapi vacanavipallāsenapīti dasseti. Kilesamārassa otārālābheneva itaramārānampi otārālābho veditabbo. Ayaṃ panatthoti gocare caraṇaṃ sandhāyāha, vatthu pana byatirekamukhena āgataṃ.
སཀུཎེ ཧནྟཱིཏི སཀུཎགྒྷི, མཧཱསེནསཀུཎོ། ཨཛ྄ཛྷཔྤཏྟཱཏི ཨབྷིབྷཝནཝསེན པཏྟཱ ཨུཔགཏཱ། ན མྱཱཡནྟི མེ ཨཡཾ སཀུཎགྒྷི ནཱལཾ ཨབྷཝིསྶ། ནངྒལཀཊྛཀརཎནྟི ནངྒལེན ཀསིཏཔྤདེསོ། ལེཌྜུཊྛཱནནྟི ལེཌྜཱུནཾ ཨུཊྛཔིཏཊྛཱནཾ། སཀེ བལེཏི ཨཏྟནོ བལཧེཏུ། ཨཔཏྠདྡྷཱཏི ཨཝགཱལ༹ྷཏྠམྦྷཱ སཉྫཱཏཏྠམྦྷཱ། ཨསྶརམཱནཱཏི ཨཝ྄ཧཱཡནྟཱི།
Sakuṇe hantīti sakuṇagghi, mahāsenasakuṇo. Ajjhappattāti abhibhavanavasena pattā upagatā. Na myāyanti me ayaṃ sakuṇagghi nālaṃ abhavissa. Naṅgalakaṭṭhakaraṇanti naṅgalena kasitappadeso. Leḍḍuṭṭhānanti leḍḍūnaṃ uṭṭhapitaṭṭhānaṃ. Sake baleti attano balahetu. Apatthaddhāti avagāḷhatthambhā sañjātatthambhā. Assaramānāti avhāyantī.
མཧནྟཾ ལེཌྜུནྟི ནངྒལེན བྷིནྣཊྛཱནེ སུཀྑཏཱཡ ཏིཁིཎསིངྒཨཡོགྷནསདིསཾ མཧནྟཾ ལེཌྜུཾ། ཨབྷིརུཧིཏྭཱཏི ཏསྶ ཨདྷོབྷཱགེན ཨཏྟནཱ པཝིསིཏྭཱ ནིལཱིནཡོགྒཔྤདེསཾ སལླཀྑེཏྭཱ ཏསྶུཔརི ཙངྐམནྟོ ཨསྶརམཱནོ ཨཊྛཱསི། ‘‘ཨེཧི ཁོ’’ཏིཨཱདི ཏསྶ ཨསྶརམཱནཱཀཱརདསྶནཾ། སནྣཡ྄ཧཱཏི ཝཱཏགྒཧཎཝསེན ཨུབྷོ པཀྑེ སམཾ ཋཔེཏྭཱ། པཙྩུཔཱདཱིཏི པཱཝིསི། ཏཏྠེཝཱཏི ཡཏྠ པུབྦེ ལཱཔོ ཋིཏོ, ཏཏྠེཝ ལེཌྜུམྷི ། ཨུརནྟི ཨཏྟནོ ཨུརཔྤདེསཾ། པཙྩཏཱལེ༹སཱིཏི པཏི ཨཏཱལེ༹སི སཱརམྦྷཝསེན ཝེགེན གནྟྭཱ པཧརཎཏོ ཝིདྷཱརེནྟཱི པཏཱལེ༹སི། ཨཱརམྨཎནྟི པཙྩཡཾ། ‘‘ཨཝསར’’ནྟི ཀེཙི།
Mahantaṃ leḍḍunti naṅgalena bhinnaṭṭhāne sukkhatāya tikhiṇasiṅgaayoghanasadisaṃ mahantaṃ leḍḍuṃ. Abhiruhitvāti tassa adhobhāgena attanā pavisitvā nilīnayoggappadesaṃ sallakkhetvā tassupari caṅkamanto assaramāno aṭṭhāsi. ‘‘Ehi kho’’tiādi tassa assaramānākāradassanaṃ. Sannayhāti vātaggahaṇavasena ubho pakkhe samaṃ ṭhapetvā. Paccupādīti pāvisi. Tatthevāti yattha pubbe lāpo ṭhito, tattheva leḍḍumhi . Uranti attano urappadesaṃ. Paccatāḷesīti pati atāḷesi sārambhavasena vegena gantvā paharaṇato vidhārentī patāḷesi. Ārammaṇanti paccayaṃ. ‘‘Avasara’’nti keci.
‘‘ཀུསལཱན’’ནྟི ཨེཝཾ པཝཏྟཱཡ དེསནཱཡ ཀོ ཨནུསནྡྷི? ཡཐཱཨནུསནྡྷི ཨེཝ། ཨཱདིཏོ ཧི ‘‘ཨཏྟདཱིཔཱ, བྷིཀྑཝེ, ཝིཧརཐཱ’’ཏིཨཱདིནཱ (དཱི॰ ནི॰ ༣.༨༠) ཡེཝ ཨཏྟདྷམྨཔརིཡཱཡེན ལོཀིཡལོཀུཏྟརདྷམྨཱ གཧིཏཱ, ཏེ ཡེཝེཏྠ ཀུསལགྒཧཎེན གཧིཏཱཏི། ཨནཝཛྫལཀྑཎཱནནྟི ཨཝཛྫཔཊིཔཀྑསབྷཱཝཱནཾ། ‘‘ཨཝཛྫརཧིཏསབྷཱཝཱན’’ནྟི ཀེཙི། ཏཏྠ པུརིམེ ཨཏྠཝིཀཔྤེ ཝིཔཱཀདྷམྨདྷམྨཱ ཨེཝ གཧིཏཱ, དུཏིཡེ པན ཝིཔཱཀདྷམྨཱཔི། ཡདི ཨེཝཾ, ཀཐཾ ཏེསཾ སམཱདཱཡ ཝཏྟནནྟི? ན ཁོ པནེཏཾ ཨེཝཾ དཊྛབྦཾ ‘‘ཝིཔཱཀདྷམྨཱ སཱིལཱདི ཝིཡ སམཱདཱཡ ཝཏྟིཏབྦཱ’’ཏི། སམཱདཱནནྟི པན ཨཏྟནོ སནྟཱནེ སམྨཱ ཨཱདཱནཾ པཙྩཡཝསེན པཝཏྟི ཡེཝཱཏི དཊྛབྦཾ། ཝིཔཱཀདྷམྨཱ ཧི པཙྩཡཝིསེསེཧི སཏྟསནྟཱནེ སམྨདེཝ ཨཱཧིཏཱ ཨཱཡུཨཱདིསམྤཏྟིཝིསེསབྷཱུཏཱ ཨུཔརཱུཔརིཀུསལཝིསེསུཔྤཏྟིཡཱ ཨུཔནིསྶཡཱ ཧོནྟཱིཏི ཝདནྟི། པུཉྙཾ པཝཌྜྷཏཱིཏི ཨེཏྠ པུཉྙནྟི ཨུཏྟརཔདལོཔེནཱཡཾ ནིདྡེསོཏི ཨཱཧ ‘‘པུཉྙཕལཾ ཝཌྜྷཏཱི’’ཏི། པུཉྙཕལནྟི ཙ ཨེཀདེསསརཱུཔེཀསེསེན ཝུཏྟཾ ‘‘པུཉྙཉྩ པུཉྙཕལཉྩ པུཉྙཕལ’’ནྟི ཨཱཧ ‘‘ཨུཔརཱུཔརི པུཉྙམྤི པུཉྙཝིཔཱཀོཔི ཝེདིཏབྦོ’’ཏི།
‘‘Kusalāna’’nti evaṃ pavattāya desanāya ko anusandhi? Yathāanusandhi eva. Ādito hi ‘‘attadīpā, bhikkhave, viharathā’’tiādinā (dī. ni. 3.80) yeva attadhammapariyāyena lokiyalokuttaradhammā gahitā, te yevettha kusalaggahaṇena gahitāti. Anavajjalakkhaṇānanti avajjapaṭipakkhasabhāvānaṃ. ‘‘Avajjarahitasabhāvāna’’nti keci. Tattha purime atthavikappe vipākadhammadhammā eva gahitā, dutiye pana vipākadhammāpi. Yadi evaṃ, kathaṃ tesaṃ samādāya vattananti? Na kho panetaṃ evaṃ daṭṭhabbaṃ ‘‘vipākadhammā sīlādi viya samādāya vattitabbā’’ti. Samādānanti pana attano santāne sammā ādānaṃ paccayavasena pavatti yevāti daṭṭhabbaṃ. Vipākadhammā hi paccayavisesehi sattasantāne sammadeva āhitā āyuādisampattivisesabhūtā uparūparikusalavisesuppattiyā upanissayā hontīti vadanti. Puññaṃ pavaḍḍhatīti ettha puññanti uttarapadalopenāyaṃ niddesoti āha ‘‘puññaphalaṃ vaḍḍhatī’’ti. Puññaphalanti ca ekadesasarūpekasesena vuttaṃ ‘‘puññañca puññaphalañca puññaphala’’nti āha ‘‘uparūpari puññampi puññavipākopi veditabbo’’ti.
‘‘མཱཏཱཔིཏཱུན’’ནྟིཨཱདི ནིདསྶནམཏྟཾ, ཏསྨཱ ཨཉྙམྤི ཨེཝརཱུཔཾ ཧེཏཱུཔནིསྶཡཾ ཀུསལཾ དཊྛབྦཾ། སིནེཧཝསེནཱཏི ཨུཔནིསྶཡབྷཱུཏསྶ སིནེཧསྶ ཝསེན, ན སམྤཡུཏྟསྶ། ན ཧི སིནེཧསམྤཡུཏྟཾ ནཱམ ཀུསལཾ ཨཏྠི། མུདུམདྡཝཙིཏྟནྟི མེཏྟཱཝསེན ཨཏིཝིཡ མདྡཝནྟཾ ཙིཏྟཾ། ཡཐཱ མཏྠཀཔྤཏྟཾ ཝཊྚགཱམིཀུསལཾ དསྶེཏུཾ ‘‘མཱཏཱཔིཏཱུནཾ …པེ॰… མུདུམདྡཝཙིཏྟ’’ནྟི ཝུཏྟཾ, ཨེཝཾ མཏྠཀཔྤཏྟམེཝ ཝིཝཊྚགཱམིཀུསལཾ དསྶེཏུཾ ‘‘ཙཏྟཱརོ སཏི…པེ॰… བོདྷིཔཀྑིཡདྷམྨཱ’’ཏི ཝུཏྟཾ། ཏདཉྙེཔི པན དཱནསཱིལཱདིདྷམྨཱ ཝཊྚསྶ ཨུཔནིསྶཡབྷཱུཏཱ ཝཊྚགཱམིཀུསལཾ ཝིཝཊྚསྶ ཨུཔནིསྶཡབྷཱུཏཱ ཝིཝཊྚགཱམིཀུསལནྟི ཝེདིཏབྦཱ། པརིཡོསཱནནྟི ཕལཝིསེསཱཝཧཏཱཡ ཕལདཱཡ ཀོཊི སིཁཱཔྤཏྟི, དེཝལོཀེ ཙ པཝཏྟིསིརིཝིབྷཝོཏི པརིཡོསཱནཾ ‘‘མནུསྶལོཀེ’’ཏི ཝིསེསིཏཾ, མནུསྶལོཀཝསེནེཝ ཙཱཡཾ དེསནཱ ཨཱགཏཱཏི། མགྒཕལནིབྦཱནསམྤཏྟི པརིཡོསཱནནྟི ཡོཛནཱ། ཝིཝཊྚགཱམིཀུསལསྶ ཝིཔཱཀཾ སུཏྟཔརིཡོསཱནེ དསྶིསྶཏི ‘‘ཨཐ ཁོ, བྷིཀྑཝེ, སངྑོ ནཱམ རཱཛཱ’’ཏིཨཱདིནཱ (དཱི॰ ནི॰ ༣.༡༠༨)།
‘‘Mātāpitūna’’ntiādi nidassanamattaṃ, tasmā aññampi evarūpaṃ hetūpanissayaṃ kusalaṃ daṭṭhabbaṃ. Sinehavasenāti upanissayabhūtassa sinehassa vasena, na sampayuttassa. Na hi sinehasampayuttaṃ nāma kusalaṃ atthi. Mudumaddavacittanti mettāvasena ativiya maddavantaṃ cittaṃ. Yathā matthakappattaṃ vaṭṭagāmikusalaṃ dassetuṃ ‘‘mātāpitūnaṃ …pe… mudumaddavacitta’’nti vuttaṃ, evaṃ matthakappattameva vivaṭṭagāmikusalaṃ dassetuṃ ‘‘cattāro sati…pe… bodhipakkhiyadhammā’’ti vuttaṃ. Tadaññepi pana dānasīlādidhammā vaṭṭassa upanissayabhūtā vaṭṭagāmikusalaṃ vivaṭṭassa upanissayabhūtā vivaṭṭagāmikusalanti veditabbā. Pariyosānanti phalavisesāvahatāya phaladāya koṭi sikhāppatti, devaloke ca pavattisirivibhavoti pariyosānaṃ ‘‘manussaloke’’ti visesitaṃ, manussalokavaseneva cāyaṃ desanā āgatāti. Maggaphalanibbānasampatti pariyosānanti yojanā. Vivaṭṭagāmikusalassa vipākaṃ suttapariyosāne dassissati ‘‘atha kho, bhikkhave, saṅkho nāma rājā’’tiādinā (dī. ni. 3.108).
དལ༹ྷནེམིཙཀྐཝཏྟིརཱཛཀཐཱཝཎྞནཱ
Daḷhanemicakkavattirājakathāvaṇṇanā
༨༡. ཨིདྷཱཏི ཨིམསྨིཾ ‘‘ཀུསལཱནཾ, བྷིཀྑཝེ, དྷམྨཱན’’ནྟིཨཱདིནཱ (དཱི॰ ནི॰ ༣.༡༡༠) སུཏྟདེསནཱཡ ཨཱརདྡྷཊྛཱནེ ཝཊྚཝིཝཊྚགཱམིབྷཱཝེན སཱདྷཱརཎེ ཀུསལགྒཧཎེ། ཏཏྠ ཝཊྚགཱམིཀུསལཱནུསནྡྷིཝསེན ‘‘བྷཱུཏཔུབྦཾ བྷིཀྑཝེ’’ཏི དེསནཾ ཨཱརབྷི, ཨཱརབྷནྟོ ཙ དེསིཡམཱནམཏྟཾ ། དྷམྨཔཊིགྒཱཧཀཱནཾ བྷིཀྑཱུནཾ སངྑེཔཏོ ཨེཝཾ དཱིཔེཏྭཱ ཨཱརབྷཱིཏི དསྶེཏུཾ ‘‘བྷིཀྑཝེ’’ཏིཨཱདི ཝུཏྟཾ, པཋམཾ ཏཐཱ ཨདཱིཔེནྟོཔི བྷགཝཱ ཨཏྠཏོ དཱིཔེཏི ཝིཡཱཏི ཨདྷིཔྤཱཡོ།
81.Idhāti imasmiṃ ‘‘kusalānaṃ, bhikkhave, dhammāna’’ntiādinā (dī. ni. 3.110) suttadesanāya āraddhaṭṭhāne vaṭṭavivaṭṭagāmibhāvena sādhāraṇe kusalaggahaṇe. Tattha vaṭṭagāmikusalānusandhivasena ‘‘bhūtapubbaṃ bhikkhave’’ti desanaṃ ārabhi, ārabhanto ca desiyamānamattaṃ . Dhammapaṭiggāhakānaṃ bhikkhūnaṃ saṅkhepato evaṃ dīpetvā ārabhīti dassetuṃ ‘‘bhikkhave’’tiādi vuttaṃ, paṭhamaṃ tathā adīpentopi bhagavā atthato dīpeti viyāti adhippāyo.
༨༢. ཨཱིསཀམྤཱིཏི ཨཔྤམཏྟཀམྤི། ཨཝསཀྐིཏནྟི ཨོགཏབྷཊྛཾ། ནེམིཨབྷིམུཁནྟི ནེམིཔྤདེསསྶ སམྨུཁཱ། བནྡྷིཾསུ ཙཀྐརཏནསྶ ཨོསཀྐིཏཱནོསཀྐིཏབྷཱཝཾ ཛཱནིཏུཾ། ཏདེཏནྟི ཡཐཱཝུཏྟཊྛཱནཱ ཙཝནཾ། ཨཏིབལཝདོསེཏི རཉྙོ བལཝཏི ཨནཏྠེ ཨུཔཊྛིཏེ སཏི།
82.Īsakampīti appamattakampi. Avasakkitanti ogatabhaṭṭhaṃ. Nemiabhimukhanti nemippadesassa sammukhā. Bandhiṃsu cakkaratanassa osakkitānosakkitabhāvaṃ jānituṃ. Tadetanti yathāvuttaṭṭhānā cavanaṃ. Atibalavadoseti rañño balavati anatthe upaṭṭhite sati.
ཨཔྤམཏྟོཏི རཉྙོ ཨཱཎཱཡ པམཱདཾ ཨཀརོནྟོ།
Appamattoti rañño āṇāya pamādaṃ akaronto.
ཨེཀསམུདྡཔརིཡནྟམེཝཱཏི ཛམྦུདཱིཔམེཝ སནྡྷཱཡ ཝདཏི། སོ ཨུཏྟརཏོ ཨསྶཀཎྞཔབྦཏེན པརིཙྪིནྣཾ ཧུཏྭཱ ཨཏྟཱནཾ པརིཀྑིཔིཏྭཱ ཋིཏཨེཀསམུདྡཔརིཡནྟོ། པུཉྙིདྡྷིཝསེནཱཏི ཙཀྐཝཏྟིབྷཱཝཱཝཧཱཡ པུཉྙིདྡྷིཡཱ ཝསེན།
Ekasamuddapariyantamevāti jambudīpameva sandhāya vadati. So uttarato assakaṇṇapabbatena paricchinnaṃ hutvā attānaṃ parikkhipitvā ṭhitaekasamuddapariyanto. Puññiddhivasenāti cakkavattibhāvāvahāya puññiddhiyā vasena.
༨༣. ཨེཝཾ ཀཏྭཱཏི ཀཱསཱཡཱནི ཝཏྠཱནི ཨཙྪཱདེཏྭཱ། སུཀཏཾ ཀམྨནྟི དསཀུསལཀམྨཔཐམེཝ ཝདཏི།
83.Evaṃ katvāti kāsāyāni vatthāni acchādetvā. Sukataṃ kammanti dasakusalakammapathameva vadati.
‘‘དསཝིདྷཾ, དྭཱདསཝིདྷ’’ནྟི ཙ ཝུཏྟཝིབྷཱགོ པརཏོ ཨཱགམིསྶཏི། པཱུརེནྟེནེཝཱཏི པཱུརེཏྭཱ ཋིཏེནེཝ། ནིདྡོསེཏི ཙཀྐཝཏྟིཝཏྟསྶ པཊིཔཀྑབྷཱུཏཱནཾ དོསཱནཾ ཨཔགམནེ ནིདྡོསེ། ཙཀྐཝཏྟཱིནཾ ཝཏྟེཏི ཙཀྐཝཏྟིརཱཛཱུཧི ཝཏྟིཏབྦཝཏྟེ། བྷཱཝིནི བྷཱུཏེ ཝིཡ ཧི ཨུཔཙཱརོ ཡཐཱ ‘‘ཨགམཱ རཱཛགཧཾ བུདྡྷོ’’ཏི (སུ॰ ནི॰ ༤༡༠)། ཨདྷིགཏཙཀྐཝཏྟིབྷཱཝཱཔི ཧི ཏེ ཏཏྠ ཝཏྟནྟེཝཱཏི ཏཐཱ ཝུཏྟཾ།
‘‘Dasavidhaṃ, dvādasavidha’’nti ca vuttavibhāgo parato āgamissati. Pūrentenevāti pūretvā ṭhiteneva. Niddoseti cakkavattivattassa paṭipakkhabhūtānaṃ dosānaṃ apagamane niddose. Cakkavattīnaṃ vatteti cakkavattirājūhi vattitabbavatte. Bhāvini bhūte viya hi upacāro yathā ‘‘agamā rājagahaṃ buddho’’ti (su. ni. 410). Adhigatacakkavattibhāvāpi hi te tattha vattantevāti tathā vuttaṃ.
ཙཀྐཝཏྟིཨརིཡཝཏྟཝཎྞནཱ
Cakkavattiariyavattavaṇṇanā
༨༤. ཨཉྙཐཱ ཝཏྟིཏུཾ ཨདེནྟོ སོ དྷམྨོ ཨདྷིཊྛཱནཾ ཨེཏསྶཱཏི ཏདདྷིཊྛཱནཾ, ཏེན ཏདདྷིཊྛཱནེན ཙེཏསཱ། སཀྐརོནྟོཏི ཨཱདརཀིརིཡཱཝསེན ཀརོནྟོ། ཏེནཱཧ ‘‘ཡཐཱ’’ཏིཨཱདི། གརུཾ ཀརོནྟོཏི པཱསཱཎཙྪཏྟཾ ཝིཡ གརུཀརཎཝསེན གརུཾ ཀརོནྟོ། ཏེནེཝཱཧ ‘‘ཏསྨིཾ གཱརཝུཔྤཏྟིཡཱ’’ཏི། མཱནེནྟོཏི སམྦྷཱཝནཱཝསེན མནེན པིཡཱཡནྟོ། ཏེནཱཧ ‘‘ཏམེཝཱ’’ཏིཨཱདི། ཨེཝཾ པཱུཛཡཏོ ཨཔཙཱཡཏོ ཨེཝཉྩ ཡཐཱཝུཏྟསཀྐཱརཱདིསམྦྷཝོཏི ཏཾ དསྶེཏུཾ ‘‘ཏཾ ཨཔདིསིཏྭཱ’’ཏིཨཱདི ཝུཏྟཾ། ‘‘དྷམྨཱདྷིཔཏིབྷཱུཏོ ཨཱགཏབྷཱཝེནཱ’’ཏི ཨིམིནཱ ཡཐཱཝུཏྟདྷམྨསྶ ཛེཊྛཀབྷཱཝེན པུརིམཔུརིམཏརཨཏྟབྷཱཝེསུ སཀྐཙྩ སམུཔཙིཏབྷཱཝཾ དསྶེཏི། ‘‘དྷམྨཝསེནེཝ སབྦཀིརིཡཱནཾ ཀརཎེནཱ’’ཏི ཨེཏེན ཋཱནནིསཛྫཱདཱིསུ ཡཐཱཝུཏྟདྷམྨནིནྣཔོཎཔབྦྷཱརབྷཱཝཾ དསྶེཏི། ཨསྶཱཏི རཀྑཱཝརཎགུཏྟིཡཱ། པརཾ རཀྑནྟོ ཨཉྙཾ དིཊྛདྷམྨིཀཱདིཨནཏྠཏོ རཀྑནྟོ ཏེནེཝ པརཏྠསཱདྷནེན ཁནྟིཨཱདིགུཎེན ཨཏྟཱནཾ ཏཏོ ཨེཝ རཀྑཏི། མེཏྟཙིཏྟཏཱཏི མེཏྟཙིཏྟཏཱཡ། ནིཝཱསནཔཱརུཔནགེཧཱདཱིནཾ སཱིཏུཎྷཱདིཔཊིབཱཧནེན ཨཱཝརཎཾ། ཨནྟོ ཛནསྨིནྟི ཨབྦྷནྟརབྷཱུཏེ པུཏྟདཱརཱདིཛནེ།
84. Aññathā vattituṃ adento so dhammo adhiṭṭhānaṃ etassāti tadadhiṭṭhānaṃ, tena tadadhiṭṭhānena cetasā. Sakkarontoti ādarakiriyāvasena karonto. Tenāha ‘‘yathā’’tiādi. Garuṃ karontoti pāsāṇacchattaṃ viya garukaraṇavasena garuṃ karonto. Tenevāha ‘‘tasmiṃ gāravuppattiyā’’ti. Mānentoti sambhāvanāvasena manena piyāyanto. Tenāha ‘‘tamevā’’tiādi. Evaṃ pūjayato apacāyato evañca yathāvuttasakkārādisambhavoti taṃ dassetuṃ ‘‘taṃ apadisitvā’’tiādi vuttaṃ. ‘‘Dhammādhipatibhūto āgatabhāvenā’’ti iminā yathāvuttadhammassa jeṭṭhakabhāvena purimapurimataraattabhāvesu sakkacca samupacitabhāvaṃ dasseti. ‘‘Dhammavaseneva sabbakiriyānaṃ karaṇenā’’ti etena ṭhānanisajjādīsu yathāvuttadhammaninnapoṇapabbhārabhāvaṃ dasseti. Assāti rakkhāvaraṇaguttiyā. Paraṃ rakkhanto aññaṃ diṭṭhadhammikādianatthato rakkhanto teneva paratthasādhanena khantiādiguṇena attānaṃ tato eva rakkhati. Mettacittatāti mettacittatāya. Nivāsanapārupanagehādīnaṃ sītuṇhādipaṭibāhanena āvaraṇaṃ. Anto janasminti abbhantarabhūte puttadārādijane.
‘‘སཱིལསཾཝརེ པཏིཊྛཱཔེཧཱི’’ཏི ཨིམིནཱ རཀྑཾ དསྶེཏི, ‘‘ཝཏྠགནྡྷམཱལཱདཱིནི དེཧཱི’’ཏི ཨིམིནཱ ཨཱཝརཎཾ, ཨིཏརེན གུཏྟིཾ། བྷཏྟཝེཏནསམྤདཱནེནཔཱིཏི པི-སདྡེན སཱིལསཾཝརེ པཏིཊྛཱཔནཱདཱིནི སམྤིཎྜེཏི། ཨེསེཝ ནཡོ ཨིཏོ པརེསུཔི པི-སདྡགྒཧཎེསུ། ནིགམོ ནིཝཱསོ ཨེཏེསནྟི ནེགམཱ, ཨེཝཾ ཛཱནཔདཱཏི ཨཱཧ ‘‘ནིགམཝཱསིནོ’’ཏིཨཱདི།
‘‘Sīlasaṃvare patiṭṭhāpehī’’ti iminā rakkhaṃ dasseti, ‘‘vatthagandhamālādīni dehī’’ti iminā āvaraṇaṃ, itarena guttiṃ. Bhattavetanasampadānenapīti pi-saddena sīlasaṃvare patiṭṭhāpanādīni sampiṇḍeti. Eseva nayo ito paresupi pi-saddaggahaṇesu. Nigamo nivāso etesanti negamā, evaṃ jānapadāti āha ‘‘nigamavāsino’’tiādi.
ནཝཝིདྷཱ མཱནམདཱཏི ‘‘སེཡྻོཧམསྨཱི’’ཏིཨཱདི (སཾ॰ ནི॰ ༤.༡༠༨; དྷ॰ ས॰ ༡༡༢༡; ཝིབྷ॰ ༨༦༦; མཧཱནི॰ ༢༡, ༡༧༨) ནཡཔྤཝཏྟིཡཱ ནཝཝིདྷཱ མཱནསངྑཱཏཱ མདཱ། མཱནོ ཨེཝ ཧེཏྠ པམཛྫནཱཀཱརེན པཝཏྟིཡཱ མཱནམདོ། སོབྷནེ ཀཱཡིཀཝཱཙསིཀཀམྨེ རཏོཏི སཱུརཏོ ཨུ-ཀཱརསྶ དཱིགྷཾ ཀཏྭཱ, ཏསྶ བྷཱཝོ སོརཙྩཾ, ཀཱཡིཀཝཱཙསིཀོ ཨཝཱིཏིཀྐམོ, སབྦཾ ཝཱ ཀཱཡཝཙཱིསུཙརིཏཾ། སུཊྛུ ཨོརཏོཏི སོརཏོ, ཏསྶ བྷཱཝོ སོརཙྩཾ, ཡཐཱཝུཏྟམེཝ སུཙརིཏཾ། རཱགཱདཱིནནྟི རཱགདོསམོཧམཱནཱདཱིནཾ། དམནཱདཱིཧཱིཏི དམནསམནཔརིནིབྦཱཔནེཧི། ཨེཀམཏྟཱནནྟི ཨེཀཾ ཙིཏྟཾ, ཨེཀཙྩཾ ཨཏྟནོ ཙིཏྟནྟི ཨཏྠོ། རཱགཱདཱིནཉྷི པུབྦབྷཱགིཡཾ དམནཱདིཔཙྩེཀཾ ཨིཙྪིཏབྦཾ, ན མགྒཀྑཎེ ཝིཡ ཨེཀཛ྄ཛྷཾ པཊིསངྑཱནམུཁེན པཛཧནཏོ། ཨེཀམཏྟཱནནྟི ཝཱ ཝིཝེཀཝསེན ཨེཀཾ ཨེཀཱཀིནཾ ཨཏྟཱནཾ། ཀཱལེ ཀཱལེཏི ཏེསཾ སནྟིཀཾ ཨུཔསངྐམིཏབྦེ ཀཱལེ ཀཱལེ།
Navavidhā mānamadāti ‘‘seyyohamasmī’’tiādi (saṃ. ni. 4.108; dha. sa. 1121; vibha. 866; mahāni. 21, 178) nayappavattiyā navavidhā mānasaṅkhātā madā. Māno eva hettha pamajjanākārena pavattiyā mānamado. Sobhane kāyikavācasikakamme ratoti sūrato u-kārassa dīghaṃ katvā, tassa bhāvo soraccaṃ, kāyikavācasiko avītikkamo, sabbaṃ vā kāyavacīsucaritaṃ. Suṭṭhu oratoti sorato, tassa bhāvo soraccaṃ, yathāvuttameva sucaritaṃ. Rāgādīnanti rāgadosamohamānādīnaṃ. Damanādīhīti damanasamanaparinibbāpanehi. Ekamattānanti ekaṃ cittaṃ, ekaccaṃ attano cittanti attho. Rāgādīnañhi pubbabhāgiyaṃ damanādipaccekaṃ icchitabbaṃ, na maggakkhaṇe viya ekajjhaṃ paṭisaṅkhānamukhena pajahanato. Ekamattānanti vā vivekavasena ekaṃ ekākinaṃ attānaṃ. Kāle kāleti tesaṃ santikaṃ upasaṅkamitabbe kāle kāle.
ཨིདྷ ཋཏྭཱཏི ‘‘ཨིདཾ ཁོ, ཏཱཏ, ཏ’’ནྟི ཨེཝཾ ནིགམནཝསེན ཝུཏྟཊྛཱནེ ཋཏྭཱ། ཝཏྟནྟི ཨརིཡཙཀྐཝཏྟིཝཏྟཾ། སམཱནེཏབྦནྟི ‘‘དསཝིདྷཾ, དྭཱདསཝིདྷ’’ནྟི ཙ ཧེཊྛཱ ཝུཏྟགཎནཱཡ ཙ སམཱནཾ ཀཱཏབྦཾ ཨནཱུནཾ ཨནདྷིཀཾ ཀཏྭཱ དསྶེཏབྦཾ། ཨདྷམྨརཱགསྶཱཏི ཨཡུཏྟཊྛཱནེ རཱགསྶ། ཝིསམལོབྷསྶཱཏི ཡུཏྟཊྛཱནེཔི ཨཏིཝིཡ བལཝབྷཱཝེན པཝཏྟལོབྷསྶ།
Idha ṭhatvāti ‘‘idaṃ kho, tāta, ta’’nti evaṃ nigamanavasena vuttaṭṭhāne ṭhatvā. Vattanti ariyacakkavattivattaṃ. Samānetabbanti ‘‘dasavidhaṃ, dvādasavidha’’nti ca heṭṭhā vuttagaṇanāya ca samānaṃ kātabbaṃ anūnaṃ anadhikaṃ katvā dassetabbaṃ. Adhammarāgassāti ayuttaṭṭhāne rāgassa. Visamalobhassāti yuttaṭṭhānepi ativiya balavabhāvena pavattalobhassa.
ཙཀྐརཏནཔཱཏུབྷཱཝཝཎྞནཱ
Cakkaratanapātubhāvavaṇṇanā
༨༥. ཝཏྟམཱནསྶཱཏི པརིཔུཎྞེ ཙཀྐཝཏྟིཝཏྟེ ཝཏྟམཱནསྶ, ནོ ཨཔརིཔུཎྞེཏི ཨཱཧ ‘‘པཱུརེཏྭཱ ཝཏྟམཱནསྶཱ’’ཏི། ཀིཏྟཱཝཏཱ པནསྶ པཱརིཔཱུརཱི ཧོཏཱིཏི? ཏཏྠ ‘‘ཀཏཱདྷིཀཱརསྶ ཏཱཝ ཧེཊྛིམཔརིཙྪེདེན དྭཱདསཧིཔི སཾཝཙྪརེཧི པཱུརཏི, པཉྩཝཱིསཏིཡཱ, པཉྙཱསཱཡ ཝཱ སཾཝཙྪརེཧི། ཨཡཉྩ བྷེདོ དྷམྨཙྪནྡསྶཔི ཏིཀྑམཛ྄ཛྷམུདུཏཱཝསེན, ཨིཏརསྶ ཏཏོ བྷིཡྻོཔཱི’’ཏི ཝདནྟི།
85.Vattamānassāti paripuṇṇe cakkavattivatte vattamānassa, no aparipuṇṇeti āha ‘‘pūretvā vattamānassā’’ti. Kittāvatā panassa pāripūrī hotīti? Tattha ‘‘katādhikārassa tāva heṭṭhimaparicchedena dvādasahipi saṃvaccharehi pūrati, pañcavīsatiyā, paññāsāya vā saṃvaccharehi. Ayañca bhedo dhammacchandassapi tikkhamajjhamudutāvasena, itarassa tato bhiyyopī’’ti vadanti.
དུཏིཡཱདིཙཀྐཝཏྟིཀཐཱཝཎྞནཱ
Dutiyādicakkavattikathāvaṇṇanā
༩༠. ཨཏྟནོ མཏིཡཱཏི པརམྤརཱགཏཾ པུརཱཎཾ ཏནྟིཾ པཝེཎིཾ ལངྒྷིཏྭཱ ཨཏྟནོ ཨིཙྪིཏཱཀཱརེན། ཏེནཱཧ ‘‘པོརཱཎཀ’’ནྟིཨཱདི།
90.Attano matiyāti paramparāgataṃ purāṇaṃ tantiṃ paveṇiṃ laṅghitvā attano icchitākārena. Tenāha ‘‘porāṇaka’’ntiādi.
ན པབྦནྟཱིཏི སམིདྡྷིཡཱ ན པཱུརེནྟི, ཕཱིཏཱ ན ཧོནྟཱིཏི ཨཏྠོ། ཏེནཱཧ ‘‘ན ཝཌྜྷནྟཱི’’ཏི། ཏཐཱ ཙཱཧ ‘‘ཀཏྠཙི སུཉྙཱ ཧོནྟཱི’’ཏི། ཏཏྠ ཏཏྠ རཱཛཀིཙྩེ རཉྙཱ ཨམཱ སཧ ཝཏྟནྟཱིཏི ཨམཙྩཱ, ཡེཧི ཝིནཱ རཱཛཀིཙྩཾ ནཔྤཝཏྟཏི། པརམྤརཱགཏཱ ཧུཏྭཱ རཉྙོ པརིསཱཡ བྷཝཱཏི པཱརིསཛྫཱ། ཏེནཱཧ ‘‘པརིསཱཝཙརཱ’’ཏི། ཏསྨིཾ ཋཱནནྟརེ ཋཔིཏཱ ཧུཏྭཱ རཉྙོ ཨཱཡཾ, ཝཡཉྩ ཡཱཐཱཝཏོ གཎེནྟཱིཏི གཎཀཱ། ཛཱཏིཀུལསུཏཱཙཱརཱདིཝསེན པུཐུཏྟཾ གཏཏྟཱ མཧཏཱི མཏྟཱ ཨེཏེསནྟི མཧཱམཏྟཱ, ཏེ པན མཧཱནུབྷཱཝཱ ཨམཙྩཱ ཨེཝཱཏི ཨཱཧ ‘‘མཧཱཨམཙྩཱ’’ཏི། ཡེ རཉྙོ ཧཏྠཱནཱིཀཱདཱིསུ ཨཝཊྛིཏཱ, ཏེ ཨནཱིཀཊྛཱཏི ཨཱཧ ‘‘ཧཏྠིཨཱཙརིཡཱདཡོ’’ཏི ། མནྟཾ པཉྙཾ ཨསིཏཱ ཧུཏྭཱ ཛཱིཝནྟཱིཏི མནྟསྶཱཛཱིཝིནོ, མཏིསཛཱིཝཱཏི ཨཏྠོ, ཡེ ཏཏྠ ཏཏྠ རཱཛཀིཙྩེ ཨུཔདེསདཱཡིནོ། ཏེནཱཧ ‘‘མནྟཱ ཝུཙྩཏི པཉྙཱ’’ཏིཨཱདི།
Napabbantīti samiddhiyā na pūrenti, phītā na hontīti attho. Tenāha ‘‘na vaḍḍhantī’’ti. Tathā cāha ‘‘katthaci suññā hontī’’ti. Tattha tattha rājakicce raññā amā saha vattantīti amaccā, yehi vinā rājakiccaṃ nappavattati. Paramparāgatā hutvā rañño parisāya bhavāti pārisajjā. Tenāha ‘‘parisāvacarā’’ti. Tasmiṃ ṭhānantare ṭhapitā hutvā rañño āyaṃ, vayañca yāthāvato gaṇentīti gaṇakā. Jātikulasutācārādivasena puthuttaṃ gatattā mahatī mattā etesanti mahāmattā, te pana mahānubhāvā amaccā evāti āha ‘‘mahāamaccā’’ti. Ye rañño hatthānīkādīsu avaṭṭhitā, te anīkaṭṭhāti āha ‘‘hatthiācariyādayo’’ti . Mantaṃ paññaṃ asitā hutvā jīvantīti mantassājīvino, matisajīvāti attho, ye tattha tattha rājakicce upadesadāyino. Tenāha ‘‘mantā vuccati paññā’’tiādi.
ཨཱཡུཝཎྞཱདིཔརིཧཱནིཀཐཱཝཎྞནཱ
Āyuvaṇṇādiparihānikathāvaṇṇanā
༩༡. བལཝལོབྷཏྟཱཏི ‘‘ཨིམསྨིཾ ལོཀེ ཨིདཱནི དལིདྡམནུསྶཱ ནཱམ བཧཱུ, ཏེསཾ སབྦེསཾ དྷནེ ཨནུཔྤདིཡམཱནེ མཡ྄ཧཾ ཀོསསྶ པརིཀྑཡོ ཧོཏཱི’’ཏི ཨེཝཾ ཨུཔྤནྣབལཝལོབྷཏྟཱ། ཨུཔརཱུཔརིབྷཱུམཱིསཱུཏི ཚཀཱམསགྒསངྑཱཏཱསུ ཨུཔརཱུཔརིཀཱམབྷཱུམཱིསུ། ཀམྨསྶ ཕལཾ ཨགྒཾ ནཱམ, ཏཾ པནེཏྠ ཨུདྡྷགཱམཱིཏི ཨཱཧ ‘‘ཨུདྡྷཾ ཨགྒཾ ཨསྶཱ’’ཏི། སགྒེ ནིཡུཏྟཱ, སགྒཔྤཡོཛནཱཏི ཝཱ སོཝགྒིཀཱ། དསནྣཾ ཝིསེསཱནནྟི དིབྦཨཱཡུཝཎྞཡསསུཁཨཱདྷིཔཏེཡྻཱནཉྩེཝ དིབྦརཱུཔཱདཱིནཉྩ ཕལཝིསེསཱནཾ ། ཝཎྞགྒཧཎེན ཙེཏྠ སཀོ ཨཏྟབྷཱཝཝཎྞོ གཧིཏོ, རཱུཔགྒཧཎེན བཧིདྡྷཱ རཱུཔཱརམྨཎཾ།
91.Balavalobhattāti ‘‘imasmiṃ loke idāni daliddamanussā nāma bahū, tesaṃ sabbesaṃ dhane anuppadiyamāne mayhaṃ kosassa parikkhayo hotī’’ti evaṃ uppannabalavalobhattā. Uparūparibhūmīsūti chakāmasaggasaṅkhātāsu uparūparikāmabhūmīsu. Kammassa phalaṃ aggaṃ nāma, taṃ panettha uddhagāmīti āha ‘‘uddhaṃ aggaṃ assā’’ti. Sagge niyuttā, saggappayojanāti vā sovaggikā. Dasannaṃ visesānanti dibbaāyuvaṇṇayasasukhaādhipateyyānañceva dibbarūpādīnañca phalavisesānaṃ . Vaṇṇaggahaṇena cettha sako attabhāvavaṇṇo gahito, rūpaggahaṇena bahiddhā rūpārammaṇaṃ.
༩༢. སུཊྛུ ནིསིདྡྷནྟི ཡཐཱཡཾ ཨིམིནཱ ཨཏྟབྷཱཝེན ཨདིནྣཾ ཨཱདཱཏུཾ ན སཀྐོཏི, ཨེཝཾ སམྨདེཝ ཏཏོ ནིསེདྷིཏཾ ཀཏྭཱ། མཱུལཧཏནྟི ཛཱིཝིཏཱ ཝོརོཔནེན མཱུལེ ཨེཝ ཧཏཾ།
92.Suṭṭhunisiddhanti yathāyaṃ iminā attabhāvena adinnaṃ ādātuṃ na sakkoti, evaṃ sammadeva tato nisedhitaṃ katvā. Mūlahatanti jīvitā voropanena mūle eva hataṃ.
༩༦. རཱགཝསེན ཙརཎཾ ཙརིཏྟཾ, ཙརིཏྟམེཝ ཙཱརིཏྟཾ, མེཐུནནྟི ཨདྷིཔྤཱཡོ, ཏཾ པན ‘‘པརེསཾ དཱརེསཱུ’’ཏི ཝུཏྟཏྟཱ ‘‘མིཙྪཱཙཱར’’ནྟི ཨཱཧ།
96. Rāgavasena caraṇaṃ carittaṃ, carittameva cārittaṃ, methunanti adhippāyo, taṃ pana ‘‘paresaṃ dāresū’’ti vuttattā ‘‘micchācāra’’nti āha.
༡༠༠. པཙྩནཱིཀདིཊྛཱིཏི ‘‘ཨཏྠི དིནྣ’’ནྟིཨཱདིཀཱཡ (མ॰ ནི॰ ༡.༤༤༡; ༢.༩༤; ཝིབྷ॰ ༧༩༣) སམྨཱདིཊྛིཡཱ པཊིཔཀྑབྷཱུཏཱ དིཊྛི།
100.Paccanīkadiṭṭhīti ‘‘atthi dinna’’ntiādikāya (ma. ni. 1.441; 2.94; vibha. 793) sammādiṭṭhiyā paṭipakkhabhūtā diṭṭhi.
༡༠༡. མཱཏུཙྪཱདིཀཱ ཨུཔརི སཡམེཝ ཝཀྑཏི། ཨཏིབལཝལོབྷོཏི ཨཏིཝིཡ བལཝཱ བཧལཀིལེསོ, ཡེན ཨཀཱལེ, ཨདེསེ ཙ པཝཏྟཏི། མིཙྪཱདྷམྨོཏི མིཙྪཱ ཝིཔརཱིཏོ ཨཝིསབྷཱགཝཏྠུཀོ ལོབྷདྷམྨོ། ཏེནཱཧ ‘‘པུརིསཱན’’ནྟིཨཱདི།
101.Mātucchādikā upari sayameva vakkhati. Atibalavalobhoti ativiya balavā bahalakileso, yena akāle, adese ca pavattati. Micchādhammoti micchā viparīto avisabhāgavatthuko lobhadhammo. Tenāha ‘‘purisāna’’ntiādi.
ཏསྶ བྷཱཝོཏི ཡེན མེཏྟཱཀརུཎཱཔུབྦངྒམེན ཙིཏྟེན པུགྒལོ ‘‘མཏྟེཡྻོ’’ཏི ཝུཙྩཏི, སོ ཏསྶ ཡཐཱཝུཏྟཙིཏྟུཔྤཱདོ, ཏཾསམུཊྛཱནཱ ཙ ཀིརིཡཱ མཏྟེཡྻཏཱ། ཏེནཱཧ ‘‘མཱཏརི སམྨཱ པཊིཔཏྟིཡཱ ཨེཏཾ ནཱམ’’ནྟི ། ཡཱ སམྨཱ པཛྫིཏབྦེ སམྨཱ ཨཔྤཊིཔཏྟི, སོཔི དོསོ ཨགཱརཝཀིརིཡཱདིབྷཱཝཏོ། ཝིཔྤཊིཔཏྟིཡཾ པན ཝཏྟབྦམེཝ ནཏྠཱིཏི ཨཱཧ ‘‘ཏསྶཱ ཨབྷཱཝོ ཙེཝ ཏཔྤཊིཔཀྑཏཱ ཙ ཨམཏྟེཡྻཏཱ’’ཏི། ཀུལེ ཛེཊྛཱནནྟི ཨཏྟནོ ཀུལེ ཝུདྡྷཱནཾ མཧཱཔིཏུཙཱུལ༹པིཏུཛེཊྛཀབྷཱཏིཀཱདཱིནཾ།
Tassa bhāvoti yena mettākaruṇāpubbaṅgamena cittena puggalo ‘‘matteyyo’’ti vuccati, so tassa yathāvuttacittuppādo, taṃsamuṭṭhānā ca kiriyā matteyyatā. Tenāha ‘‘mātari sammā paṭipattiyā etaṃ nāma’’nti . Yā sammā pajjitabbe sammā appaṭipatti, sopi doso agāravakiriyādibhāvato. Vippaṭipattiyaṃ pana vattabbameva natthīti āha ‘‘tassā abhāvo ceva tappaṭipakkhatā ca amatteyyatā’’ti. Kule jeṭṭhānanti attano kule vuddhānaṃ mahāpitucūḷapitujeṭṭhakabhātikādīnaṃ.
དསཝསྶཱཡུཀསམཡཝཎྞནཱ
Dasavassāyukasamayavaṇṇanā
༡༠༣. ‘‘ཡ’’ནྟི ཨིམིནཱ སམཡོ ཨཱམཊྛོ, བྷུམྨཏྠེ ཙེཏཾ པཙྩཏྟཝཙནནྟི ཨཱཧ ‘‘ཡསྨིཾ སམཡེ’’ཏི། ཨལཾ པཏིནོཏི ཨལཾཔཏེཡྻཱ། ཏསྶཱ པརིཡཏྟཏཱ བྷརིཡཱབྷཱཝེནཱཏི ཨཱཧ ‘‘དཱཏུཾ ཡུཏྟཱ’’ཏི། ཨགྒརསཱནཱིཏི མདྷུརབྷཱཝེན, བྷེསཛྫབྷཱཝེན ཙ ཨགྒབྷཱུཏརསཱནི།
103.‘‘Ya’’nti iminā samayo āmaṭṭho, bhummatthe cetaṃ paccattavacananti āha ‘‘yasmiṃ samaye’’ti. Alaṃ patinoti alaṃpateyyā. Tassā pariyattatā bhariyābhāvenāti āha ‘‘dātuṃ yuttā’’ti. Aggarasānīti madhurabhāvena, bhesajjabhāvena ca aggabhūtarasāni.
དིཔྤིསྶནྟཱིཏི པཊིཔཀྑབྷཱཝེན སམུཛྫལིསྶནྟི། ཏེནཱཧ ‘‘ཀུསལནྟིཔི ན བྷཝིསྶཏཱི’’ཏི ། ཨཧོ པུརིསོཏི མཱཏཱདཱིསུཔི ཨཱིདིསོ, ཨཉྙེསཾ ཀེསཾ ཀིཾ ཝིསྶཛྫེསྶཏི, ཨཧོ ཏེཛཝཔུརིསོཏི།
Dippissantīti paṭipakkhabhāvena samujjalissanti. Tenāha ‘‘kusalantipi na bhavissatī’’ti . Aho purisoti mātādīsupi īdiso, aññesaṃ kesaṃ kiṃ vissajjessati, aho tejavapurisoti.
གེཧེ མཱཏུགཱམཾ ཝིཡཱཏི ཨཏྟནོ གེཧེ དཱསིབྷརིཡཱབྷཱུཏམཱཏུགཱམཾ ཝིཡ། མིསྶཱིབྷཱཝནྟི མཱཏཱདཱིསུ བྷརིཡཱཡ ཝིཡ ཙཱརིཏྟསངྐརཾ།
Gehe mātugāmaṃ viyāti attano gehe dāsibhariyābhūtamātugāmaṃ viya. Missībhāvanti mātādīsu bhariyāya viya cārittasaṅkaraṃ.
བལཝཀོཔོཏི ཧནྟུཀཱམཏཱཝསེན ཨུཔྤཏྟིཡཱ བལཝཀོཔོ། ཨཱགྷཱཏེཏཱིཏི ཨཱཧནཏི, ཨཏྟནོ ཀཀྑལ༹ཕརུསབྷཱཝེན ཙིཏྟཾ ཝིབཱདྷཏཱིཏི ཨཏྠོ། ནིསྶཡདཧནརསོ ཧི དོསོ། བྱཱཔཱདེཏཱིཏི ཝིནཱསེཏི, མནོཔདཱུསནཏོ མནསྶ པཀོཔནཏོ། ཏིབྦནྟི ཏིཀྑཾ, སཱ པནསྶ ཏིཀྑཏཱ སརཱིརེ ཨཝཧནྟེཔི སིནེཧཝཏྠུཾ ལངྒྷིཏྭཱཔི པཝཏྟིཡཱ ཝེདིཏབྦཱཏི ཨཱཧ ‘‘པིཡམཱནསྶཔཱི’’ཏིཨཱདི།
Balavakopoti hantukāmatāvasena uppattiyā balavakopo. Āghātetīti āhanati, attano kakkhaḷapharusabhāvena cittaṃ vibādhatīti attho. Nissayadahanaraso hi doso. Byāpādetīti vināseti, manopadūsanato manassa pakopanato. Tibbanti tikkhaṃ, sā panassa tikkhatā sarīre avahantepi sinehavatthuṃ laṅghitvāpi pavattiyā veditabbāti āha ‘‘piyamānassapī’’tiādi.
༡༠༤. ཀཔྤཝིནཱསོ ཀཔྤོ ཨུཏྟརཔདལོཔེན, ཨནྟརཱཝ ཀཔྤོ ཨནྟརཀཔྤོ། ཏཎྷཱདིབྷེདོ ཀཔྤོ ཨེཏསྶ ཨཏྠཱིཏི ཀཔྤོ, སཏྟལོཀོཏི ཨཱཧ ‘‘ཨནྟརཱཝ ལོཀཝིནཱསོ’’ཏི། སྭཱཡཾ ཨནྟརཀཔྤོ ཀཏིཝིདྷོ, ཀཐཉྩསྶ སམྦྷཝོ, ཀིཾ གཏིཀོཏི ཨནྟོགདྷཾ ཙོདནཾ སནྡྷཱཡཱཧ ‘‘ཨནྟརཀཔྤོ ཙ ནཱམཱ’’ཏིཨཱདི། ལོབྷུསྶདཱཡཱཏི ལོབྷཱདྷིཀཱཡ པཛཱཡ ཝཏྟམཱནཱཡ།
104. Kappavināso kappo uttarapadalopena, antarāva kappo antarakappo. Taṇhādibhedo kappo etassa atthīti kappo, sattalokoti āha ‘‘antarāva lokavināso’’ti. Svāyaṃ antarakappo katividho, kathañcassa sambhavo, kiṃ gatikoti antogadhaṃ codanaṃ sandhāyāha ‘‘antarakappo ca nāmā’’tiādi. Lobhussadāyāti lobhādhikāya pajāya vattamānāya.
ཨེཝཾ ཙིནྟཡིཾསཱུཏི པུབྦེ ཡཐཱནུསྶཝཱནུསྶརཎེན, ཨཏྟནོ ཙ ཨཱཡུཝིསེསསྶ ལབྷནཏོ། གུམྦལཏཱདཱིཧི གཧནཾ ཋཱནནྟི གུམྦལཏཱདཱིཧི སཉྪནྣཏཱཡ གཧནབྷཱུཏཾ ཋཱནཾ། རུཀྑེཧི གཧནནྟི རུཀྑེཧི ནིརནྟརནིཙིཏེཧི གཧནབྷཱུཏཾ ། ནདཱིཝིདུགྒནྟི ཚིནྣཏཊཱཧི ནདཱིཧི ཨོརཏོ, པཱརཏོ ཙ ཝིདུགྒཾ། ཏེནཱཧ ‘‘ནདཱིན’’ནྟིཨཱདི། པབྦཏེཧི ཝིསམཾ པབྦཏནྟརཾ། པབྦཏེསུ ཝཱ ཚིནྣཏཊེསུ དུརཱརོཧཾ ཝིསམཊྛཱནཾ། སབྷཱགེཏི ཛཱིཝནཝསེན སམཱནབྷཱགེ སདིསེ ཀརིསྶནྟི།
Evaṃ cintayiṃsūti pubbe yathānussavānussaraṇena, attano ca āyuvisesassa labhanato. Gumbalatādīhi gahanaṃ ṭhānanti gumbalatādīhi sañchannatāya gahanabhūtaṃ ṭhānaṃ. Rukkhehigahananti rukkhehi nirantaranicitehi gahanabhūtaṃ . Nadīvidugganti chinnataṭāhi nadīhi orato, pārato ca viduggaṃ. Tenāha ‘‘nadīna’’ntiādi. Pabbatehi visamaṃ pabbatantaraṃ. Pabbatesu vā chinnataṭesu durārohaṃ visamaṭṭhānaṃ. Sabhāgeti jīvanavasena samānabhāge sadise karissanti.
ཨཱཡུཝཎྞཱདིཝཌྜྷནཀཐཱཝཎྞནཱ
Āyuvaṇṇādivaḍḍhanakathāvaṇṇanā
༡༠༥. ཨཱཡཏནྟི ཝཱ དཱིགྷཾ ཙིརཀཱལིཀཾ། མརཎཝསེན ཧི ཉཱཏིཀྑཡོ ཨཱཡཏོ ཨཔུནརཱཝཏྟནཏོ, ན རཱཛབྷཡཱདིནཱ ཨུཀྐམནཝསེན པུནརཱཝཏྟིཡཱཔི ཏསྶ ལབྦྷནཏོ། ཨོསཀྐེཡྻཱམཱཏི ཨོརམེཡྻཱམ། ཝིརམཎམྤི ཨཏྠཏོ པཛཧནམེཝ པརིཙྩཛནབྷཱཝཏོཏི ཨཱཧ ‘‘པཛཧེཡྻཱམཱཏི ཨཏྠོ’’ཏི། སཱིལགབྦྷེ ཝཌྜྷིཏཏྟཱཏི མཱཏུ, པིཏུ ཙ སཱིལཝནྟཏཱཡ ཏདཝཡཝབྷཱུཏེ གབྦྷེ ཝཌྜྷི ‘‘སཱིལགབྦྷེ ཝཌྜྷིཏཱ’’ཏི ཝུཏྟཱ, ཨེཏེན ཨུཏུཨཱཧཱརསྶ ཝིཡ ཏདཉྙསྶཱཔི བཱཧིརསྶ པཙྩཡསྶ ཝསེན སཏྟསནྟཱནསྶ ཝིསེསཱདྷཱནཾ ཧོཏཱིཏི དསྶེཏི། ཡཾ པནེཏྠ ཝཏྟབྦཾ, ཏཾ བྲཧྨཛཱལཊཱིཀཱཡཾ (དཱི॰ ནི॰ ཊཱི॰ ༡.༧) ཝུཏྟམེཝ། ཁེཏྟཝིསུདྡྷིཡཱཏི ཨདྷིཊྛཱནབྷཱུཏཝཏྠུཝིསུདྡྷིཡཱ། ནནུ ཙ ཏཾ ཝིསེསཱདྷཱནཾ ཛཱཡམཱནཾ རཱུཔསནྟཏིཡཱ ཨེཝ བྷཝེཡྻཱཏི? སཙྩམེཏཾ, རཱུཔསནྟཏིཡཱ པན ཏཐཱ ཨཱཧིཏཝིསེསཱཡ ཨརཱུཔསནྟཏིཔི ལདྡྷཱུཔཀཱརཱ ཨེཝ ཧོཏི ཏཔྤཊིབདྡྷཝུཏྟིབྷཱཝཏོ། ཡཐཱ ཀབལཱི༹ཀཱརཱཧཱརེན ཨུཔཏྠམྦྷིཏེ རཱུཔཀཱཡེ སབྦོཔི ཨཏྟབྷཱཝོ ཨནུགྒཧིཏོ ཨེཝ ནཱམ ཧོཏི, ཡཐཱ པན རཉྙོ ཙཀྐཝཏྟིནོ པུཉྙཝིསེསཾ ཨུཔནིསྶཱཡ ཏསྶ ཨིཏྠིརཏནཱདཱིནཾ ཨནཉྙསཱདྷཱརཎཱ ཏེ ཏེ ཝིསེསཱ སམྦྷཝནྟི ཏབྦྷཱཝེ བྷཱཝཏོ, ཏདབྷཱཝེ ཙ ཨབྷཱཝཏོ, ཨེཝམེཝ ཏསྨིཾ ཀཱལེ མཱཏཱཔིཏཱུནཾ ཡཐཱཝུཏྟཔུཉྙཝིསེསཾ ཨུཔནིསྶཱཡ ཏེསཾ པུཏྟཱནཾ ཛཱཡམཱནཱནཾ དཱིགྷཱཡུཀཏཱ ཁེཏྟཝིསུདྡྷིཡཱཝ ཧོཏཱིཏི ཝེདིཏབྦཱ སཾཝེགདྷམྨཚནྡཱདིསམུཔབྲཱུཧིཏཱཡ ཏདཱ ཏེསཾ ཀུསལཙེཏནཱཡ ཏཐཱ ཨུལཱ༹རབྷཱཝེན སམུཔྤཛྫནཏོ། ཨེཏྠཱཏི ཨིམསྨིཾ མནུསྶལོཀེ, ཏཏྠཱཏི ཡཐཱཝུཏྟཾ ཀུསལདྷམྨཾ སམཱདཱཡ ཝཏྟམཱནེ སཏྟནིཀཱཡེ། ཏཏྠེཝཱཏི ཏསྨིཾཡེཝ སཏྟནིཀཱཡེ། ‘‘ཨཏྟནོཝ སཱིལསམྤཏྟིཡཱ’’ཏི ཝུཏྟཾ སསནྟཏིཔརིཡཱཔནྣསྶ དྷམྨསྶ ཏཏྠ ཝིསེསཔྤཙྩཡབྷཱཝཏོ། ཁེཏྟཝིསུདྡྷིཔི པན ཨིདྷཱཔི པཊིཀྑིཔིཏུཾ ན སཀྐཱ།
105.Āyatanti vā dīghaṃ cirakālikaṃ. Maraṇavasena hi ñātikkhayo āyato apunarāvattanato, na rājabhayādinā ukkamanavasena punarāvattiyāpi tassa labbhanato. Osakkeyyāmāti orameyyāma. Viramaṇampi atthato pajahanameva pariccajanabhāvatoti āha ‘‘pajaheyyāmāti attho’’ti. Sīlagabbhe vaḍḍhitattāti mātu, pitu ca sīlavantatāya tadavayavabhūte gabbhe vaḍḍhi ‘‘sīlagabbhe vaḍḍhitā’’ti vuttā, etena utuāhārassa viya tadaññassāpi bāhirassa paccayassa vasena sattasantānassa visesādhānaṃ hotīti dasseti. Yaṃ panettha vattabbaṃ, taṃ brahmajālaṭīkāyaṃ (dī. ni. ṭī. 1.7) vuttameva. Khettavisuddhiyāti adhiṭṭhānabhūtavatthuvisuddhiyā. Nanu ca taṃ visesādhānaṃ jāyamānaṃ rūpasantatiyā eva bhaveyyāti? Saccametaṃ, rūpasantatiyā pana tathā āhitavisesāya arūpasantatipi laddhūpakārā eva hoti tappaṭibaddhavuttibhāvato. Yathā kabaḷīkārāhārena upatthambhite rūpakāye sabbopi attabhāvo anuggahito eva nāma hoti, yathā pana rañño cakkavattino puññavisesaṃ upanissāya tassa itthiratanādīnaṃ anaññasādhāraṇā te te visesā sambhavanti tabbhāve bhāvato, tadabhāve ca abhāvato, evameva tasmiṃ kāle mātāpitūnaṃ yathāvuttapuññavisesaṃ upanissāya tesaṃ puttānaṃ jāyamānānaṃ dīghāyukatā khettavisuddhiyāva hotīti veditabbā saṃvegadhammachandādisamupabrūhitāya tadā tesaṃ kusalacetanāya tathā uḷārabhāvena samuppajjanato. Etthāti imasmiṃ manussaloke, tatthāti yathāvuttaṃ kusaladhammaṃ samādāya vattamāne sattanikāye. Tatthevāti tasmiṃyeva sattanikāye. ‘‘Attanova sīlasampattiyā’’ti vuttaṃ sasantatipariyāpannassa dhammassa tattha visesappaccayabhāvato. Khettavisuddhipi pana idhāpi paṭikkhipituṃ na sakkā.
ཀོཊྛཱསཱཏི ཙཏྟཱརཱིསཝསྶཱཡུཀཱཏིཨཱདཡོ ཨསཱིཏིཝསྶསཧསྶཱཡུཀཔརིཡོསཱནཱ ཨེཀཱདས ཀོཊྛཱསཱ། ཨདིནྣཱདཱནཱདཱིཧཱིཏི ཨཱདི-སདྡེན ཀུལེ ཛེཊྛཱཔཙཱཡིཀཱཔརིཡོསཱནཱནཾ དསནྣཾ པཱཔཀོཊྛཱསཱནཾ གཧཎཾ།
Koṭṭhāsāti cattārīsavassāyukātiādayo asītivassasahassāyukapariyosānā ekādasa koṭṭhāsā. Adinnādānādīhīti ādi-saddena kule jeṭṭhāpacāyikāpariyosānānaṃ dasannaṃ pāpakoṭṭhāsānaṃ gahaṇaṃ.
སངྑརཱཛཨུཔྤཏྟིཝཎྞནཱ
Saṅkharājauppattivaṇṇanā
༡༠༦. ཨེཝཾ ཨུཔྤཛྫནཀཏཎྷཱཏི ཨེཝཾ ཝཙཱིབྷེདཾ པཱཔནཝསེན པཝཏྟཱ བྷུཉྫིཏུཀཱམཏཱ། ཨནསནནྟི ཀཱཡིཀཀིརིཡཱཨསམཏྠཏཱཧེཏུབྷཱུཏོ སརཱིརསངྐོཙོ། ཏེནཱཧ ‘‘ཨཝིཔྥཱརིཀབྷཱཝོ’’ཏིཨཱདི། གྷནནིཝཱསཏནྟི གཱམནིགམརཱཛདྷཱནཱིནཾ གྷནནིཝིཊྛཏཾ ཨཉྙམཉྙསྶ ནཱཏིདཱུརཝཏྟིཏཾ། ནིརནྟརཔཱུརིཏོཏི ནིརནྟརཾ ཝིཡ པུཎྞོ ཏཏྲུཔགཱནཾ སཏྟཱནཾ བཧུབྷཱཝཏོ།
106.Evaṃ uppajjanakataṇhāti evaṃ vacībhedaṃ pāpanavasena pavattā bhuñjitukāmatā. Anasananti kāyikakiriyāasamatthatāhetubhūto sarīrasaṅkoco. Tenāha ‘‘avipphārikabhāvo’’tiādi. Ghananivāsatanti gāmanigamarājadhānīnaṃ ghananiviṭṭhataṃ aññamaññassa nātidūravattitaṃ. Nirantarapūritoti nirantaraṃ viya puṇṇo tatrupagānaṃ sattānaṃ bahubhāvato.
མེཏྟེཡྻབུདྡྷུཔྤཱདཝཎྞནཱ
Metteyyabuddhuppādavaṇṇanā
༡༠༧. ཀིཉྩཱཔི པུབྦེ ཝཌྜྷམཱནཀཝསེན དེསནཱ ཨཱགཏཾ, ཨིདཾ པན ན ཝཌྜྷམཱནཀཝསེན ཝུཏྟཾ། ཀསྨཱཏི ཙེ ཨཱཧ ‘‘ན ཧཱི’’ཏིཨཱདི། སཏྟཱནཾ ཝཌྜྷམཱནཱཡུཀཀཱལེ བུདྡྷཱ ན ནིབྦཏྟནྟི སཾསཱརེ སཾཝེགསྶ དུབྦིབྷཱཝནཱིཡཏྟཱ ། ཏཏོ ཝསྶསཏསཧསྶཏོ ཨོརམེཝ བུདྡྷུཔྤཱདཀཱལོ།
107. Kiñcāpi pubbe vaḍḍhamānakavasena desanā āgataṃ, idaṃ pana na vaḍḍhamānakavasena vuttaṃ. Kasmāti ce āha ‘‘na hī’’tiādi. Sattānaṃ vaḍḍhamānāyukakāle buddhā na nibbattanti saṃsāre saṃvegassa dubbibhāvanīyattā . Tato vassasatasahassato orameva buddhuppādakālo.
༡༠༨. སམུསྶིཏཊྛེན ཡཱུཔོ ཝིཡཱཏི ཡཱུཔོ, ཡཱུཔནྟི ཨེཏྠ སཏྟཱ ཨནེཀབྷཱུམིཀཱུཊཱགཱརོཝརཀཱདིཝནྟཏཱཡཱཏི ཡཱུཔོ, པཱསཱདོ། རཉྙོ ཧེཏུབྷཱུཏེནཱཏི ཧེཏུཨཏྠེ ཀརཎཝཙནནྟིདསྶེཏིཨུསྶཱཧསམྤཏྟིཨཱདིནཱ། མཧཏཱ རཱཛཱནུབྷཱཝེན, མཧཏཱ ཙ ཀིཏྟིསདྡེན སམནྣཱགཏཏྟཱ ཙཏཱུཧི སངྒཧཝཏྠཱུཧི མཧཱཛནསྶ རཉྫནཏོ མཧཱཔནཱདོ ནཱམ རཱཛཱ ཛཱཏོ། ཛཱཏཀེཏི མཧཱཔནཱདཛཱཏཀེ (ཛཱ॰ ༡.༣.༤༠ མཧཱཔནཱདཛཱཏཀེ)།
108. Samussitaṭṭhena yūpo viyāti yūpo, yūpanti ettha sattā anekabhūmikūṭāgārovarakādivantatāyāti yūpo, pāsādo. Rañño hetubhūtenāti hetuatthe karaṇavacanantidassetiussāhasampattiādinā. Mahatā rājānubhāvena, mahatā ca kittisaddena samannāgatattā catūhi saṅgahavatthūhi mahājanassa rañjanato mahāpanādo nāma rājā jāto. Jātaketi mahāpanādajātake (jā. 1.3.40 mahāpanādajātake).
པནཱདོ ནཱམ སོ རཱཛཱཏི ‘‘ཨཏཱིཏེ པནཱདོ ནཱམ སོ རཱཛཱ ཨསྶོསཱི’’ཏི ཨཏྟབྷཱཝནྟརཏཱཡ ཨཏྟཱནཾ པརཾ ཝིཡ ནིདྡིསཏི། ཨཱཡསྨཱ ཧི བྷདྡཛིཏྠེརོ ཨཏྟནཱ ཨཛ྄ཛྷཱཝུཏྠཔུབྦཾ སུཝཎྞཔཱསཱདཾ དསྶེཏྭཱ ཨེཝམཱཧ། ཡསྶ ཡཱུཔོ སུཝཎྞཡོཏི ཡསྶ རཉྙོ ཨཡཾ ཡཱུཔོ པཱསཱདོ སུཝཎྞཡོ སུཝཎྞམཡོ། ཏིརིཡཾ སོལ༹སུབྦེདྷོཏི ཝིཏྠཱརཏོ སོལ༹སསརཔཱཏཔྤམཱཎོ, སོ པན ཨཌྜྷཡོཛནཔྤམཱཎོ ཧོཏི། ཨུབྦྷམཱཧུ སཧསྶདྷཱཏི ཨུབྦྷཾ ཨུཙྩབྷཱཝཾ ཨསྶ པཱསཱདསྶ སཧསྶདྷཱ སཧསྶཀཎྜཔྤམཱཎཾ ཨཱཧུ, སོ པན ཡོཛནཏོ པཉྩཝཱིསཏིཡོཛནཔྤམཱཎོ ཧོཏི། ཀེཙི པནེཏྠ གཱཐཱསུཁཏྠཾ ‘‘ཨཱཧཱུ’’ཏི དཱིགྷཾ ཀཏཾ, ཨཧུ ཨཧོསཱིཏི ཨཏྠཾ ཝདནྟི།
Panādo nāma so rājāti ‘‘atīte panādo nāma so rājā assosī’’ti attabhāvantaratāya attānaṃ paraṃ viya niddisati. Āyasmā hi bhaddajitthero attanā ajjhāvutthapubbaṃ suvaṇṇapāsādaṃ dassetvā evamāha. Yassa yūpo suvaṇṇayoti yassa rañño ayaṃ yūpo pāsādo suvaṇṇayo suvaṇṇamayo. Tiriyaṃ soḷasubbedhoti vitthārato soḷasasarapātappamāṇo, so pana aḍḍhayojanappamāṇo hoti. Ubbhamāhusahassadhāti ubbhaṃ uccabhāvaṃ assa pāsādassa sahassadhā sahassakaṇḍappamāṇaṃ āhu, so pana yojanato pañcavīsatiyojanappamāṇo hoti. Keci panettha gāthāsukhatthaṃ ‘‘āhū’’ti dīghaṃ kataṃ, ahu ahosīti atthaṃ vadanti.
སཧསྶཀཎྜོཏི སཧསྶབྷཱུམིཀོ, ‘‘སཧསྶཁཎྜོ’’ ཏིཔི པཱཋོ, སོ ཨེཝ ཨཏྠོ། སཏགེཎྜཱུཏི ཨནེཀསཏནིཡཱུཧཀོ། དྷཛཱལཱུཏི ཏཏྠ ཏཏྠ ནིཡཱུཧསིཁརཱདཱིསུ པཏིཊྛཔིཏེཧི སཏྟིདྷཛཝཱིརངྒདྷཛཱདཱིཧི དྷཛེཧི སམྤནྣོ། ཧརིཏཱམཡོཏི ཙཱམཱིཀརསུཝཎྞམཡོ། ཀེཙི པན ཧརིཏཱམཡོཏི ‘‘ཧརིཏམཎིཔརིཀྑཊོ’’ཏི ཝདནྟི། གནྡྷབྦཱཏི ནཊཱ། ཚསཧསྶཱནི སཏྟདྷཱཏི ཚམཏྟཱནི གནྡྷབྦསཧསྶཱནི སཏྟདྷཱ ཏསྶ པཱསཱདསྶ སཏྟསུ ཋཱནེསུ རཉྙོ ཨབྷིརམཱཔནཏྠཾ ནཙྩིཾསཱུཏི ཨཏྠོ། ཏེ ཨེཝཾ ནཙྩནྟཱཔི ཀིར རཱཛཱནཾ ཧཱསེཏུཾ ནཱསཀྑིཾསུ། ཨཐ སཀྐོ དེཝརཱཛཱ དེཝནཊཾ པེསེཏྭཱ སམཛྫཾ ཀཱརེསི, ཏདཱ རཱཛཱ ཧསཱིཏི།
Sahassakaṇḍoti sahassabhūmiko, ‘‘sahassakhaṇḍo’’ tipi pāṭho, so eva attho. Satageṇḍūti anekasataniyūhako. Dhajālūti tattha tattha niyūhasikharādīsu patiṭṭhapitehi sattidhajavīraṅgadhajādīhi dhajehi sampanno. Haritāmayoti cāmīkarasuvaṇṇamayo. Keci pana haritāmayoti ‘‘haritamaṇiparikkhaṭo’’ti vadanti. Gandhabbāti naṭā. Chasahassāni sattadhāti chamattāni gandhabbasahassāni sattadhā tassa pāsādassa sattasu ṭhānesu rañño abhiramāpanatthaṃ nacciṃsūti attho. Te evaṃ naccantāpi kira rājānaṃ hāsetuṃ nāsakkhiṃsu. Atha sakko devarājā devanaṭaṃ pesetvā samajjaṃ kāresi, tadā rājā hasīti.
ཀོཊིགཱམོ ནཱམ མཱཔིཏོ། ཝཏྠཱུཏི བྷདྡཛིཏྠེརསྶ ཝཏྠུ། ཏཾ ཐེརགཱཐཱཝཎྞནཱཡཾ (ཐེརགཱ॰ ཨཊྛ॰ བྷདྡཛིཏྠེརགཱཐཱཝཎྞནཱཡ) ཝིཏྠཱརཏོ ཨཱགཏམེཝ། ཨིཏརསྶཱཏི ནལ༹ཀཱརདེཝཔུཏྟསྶ། ཨཱནུབྷཱཝཱཏི པུཉྙཱནུབྷཱཝནིམིཏྟཾ།
Koṭigāmo nāma māpito. Vatthūti bhaddajittherassa vatthu. Taṃ theragāthāvaṇṇanāyaṃ (theragā. aṭṭha. bhaddajittheragāthāvaṇṇanāya) vitthārato āgatameva. Itarassāti naḷakāradevaputtassa. Ānubhāvāti puññānubhāvanimittaṃ.
དཱནཝསེན དཏྭཱཏི ཏཾ པཱསཱདཾ ཨཏྟནོ པརིགྒཧབྷཱཝཝིཡོཛནེན དཱནམུཁེ ནིཡོཛེཏྭཱ། ཝིསྶཛྫེཏྭཱཏི ཙིཏྟེནེཝ པརིཙྩཛནཝསེན དཏྭཱ པུན དཀྑིཎེཡྻཱནཾ སནྟཀབྷཱཝཀརཎེན ནིརཔེཀྑཔརིཙྩཱགཝསེན ཝིསྶཛྫེཏྭཱ། ཨེཏྟཀེནཱཏི ‘‘བྷཱུཏཔུབྦཾ བྷིཀྑཝེ’’ཏི ཨཱདིཾ ཀཏྭཱ ཡཱཝ ‘‘པབྦཛིསྶཏཱི’’ཏི པདཾ ཨེཏྟཀེན དེསནཱམགྒེན།
Dānavasena datvāti taṃ pāsādaṃ attano pariggahabhāvaviyojanena dānamukhe niyojetvā. Vissajjetvāti citteneva pariccajanavasena datvā puna dakkhiṇeyyānaṃ santakabhāvakaraṇena nirapekkhapariccāgavasena vissajjetvā. Ettakenāti ‘‘bhūtapubbaṃ bhikkhave’’ti ādiṃ katvā yāva ‘‘pabbajissatī’’ti padaṃ ettakena desanāmaggena.
བྷིཀྑུནོ ཨཱཡུཝཎྞཱདིཝཌྜྷནཀཐཱཝཎྞནཱ
Bhikkhuno āyuvaṇṇādivaḍḍhanakathāvaṇṇanā
༡༡༠. ཨིདཾ བྷིཀྑུནོ ཨཱཡུསྨིནྟི ཨཱཡུསྨིཾ སཱདྷེཏབྦེ ཨིདཾ བྷིཀྑུནོ ཨིཙྪིཏབྦཾ ཙིརཛཱིཝིཏཱཡ ཧེཏུབྷཱཝཏོཏི། ཏེནཱཧ ‘‘ཨིདཾ ཨཱཡུཀཱརཎ’’ནྟི།
110.Idaṃbhikkhuno āyusminti āyusmiṃ sādhetabbe idaṃ bhikkhuno icchitabbaṃ cirajīvitāya hetubhāvatoti. Tenāha ‘‘idaṃ āyukāraṇa’’nti.
སམྤནྣསཱིལསྶ ཨཝིཔྤཊིསཱརཔཱམོཛྫཔཱིཏིཔསྶདྡྷིསུཁསམཱདྷིཡཐཱབྷཱུཏཉཱཎཱདིསམྦྷཝཏོ ཏཾསམུཊྛཱནཔཎཱིཏརཱུཔེཧི ཀཱཡསྶ ཕུཊཏྟཱ སརཱིརེ ཝཎྞདྷཱཏུ ཝིཔྤསནྣཱ ཧོཏི, ཀལྱཱཎོ ཙ ཀིཏྟིསདྡོ ཨབྦྷུགྒཙྪཏཱིཏི ཨཱཧ ‘‘སཱིལཝཏོ ཧཱི’’ཏིཨཱདི།
Sampannasīlassa avippaṭisārapāmojjapītipassaddhisukhasamādhiyathābhūtañāṇādisambhavato taṃsamuṭṭhānapaṇītarūpehi kāyassa phuṭattā sarīre vaṇṇadhātu vippasannā hoti, kalyāṇo ca kittisaddo abbhuggacchatīti āha ‘‘sīlavato hī’’tiādi.
ཝིཝེཀཛཾ པཱིཏིསུཁཱདཱིཏི ཨཱདི-སདྡེན སམཱདྷིཛཾ པཱིཏིསུཁཾ, ཨཔཱིཏིཛཾ ཀཱཡསུཁཾ, སཏིཔཱརིསུདྡྷིཛཾ ཨུཔེཀྑཱསུཁཉྩ སངྒཎྷཱཏི།
Vivekajaṃ pītisukhādīti ādi-saddena samādhijaṃ pītisukhaṃ, apītijaṃ kāyasukhaṃ, satipārisuddhijaṃ upekkhāsukhañca saṅgaṇhāti.
ཨཔྤཊིཀྐཱུལཏཱཝཧོཏི ཨཔྤམཱཎཱནཾ སཏྟཱནཾ, ཨཏྟནོ ཙ ཏེསུ ཨཔྤཊིཀྐཱུལབྷཱཝཏོ། ཧིཏཱུཔསཾཧཱརཱདིཝསེན པཝཏྟིཡཱ སབྦདིསཱསུ ཕརཎཨཔྤམཱཎཝསེན སབྦདིསཱསུ ཝིཔྥཱརིཀཏཱ།
Appaṭikkūlatāvahoti appamāṇānaṃ sattānaṃ, attano ca tesu appaṭikkūlabhāvato. Hitūpasaṃhārādivasena pavattiyā sabbadisāsu pharaṇaappamāṇavasena sabbadisāsu vipphārikatā.
‘‘ཨརཧཏྟཕལསངྑཱཏཾ བལ’’ནྟི ཝུཏྟཾ ཏསྶ ཨཀུཔྤདྷམྨཏཱཡ ཀེནཙི ཨནབྷིབྷཝནཱིཡབྷཱཝཏོ།
‘‘Arahattaphalasaṅkhātaṃ bala’’nti vuttaṃ tassa akuppadhammatāya kenaci anabhibhavanīyabhāvato.
‘‘ལོཀེ’’ཏི ཨིདཾ ཡཐཱ ‘‘ཨེཀབལམྤཱི’’ཏི ཨིམིནཱ སམྦནྡྷཱིཡཏི, ཨེཝཾ ‘‘དུཔྤསཧཾ དུརབྷིསམྦྷཝ’’ནྟི ཨིམེཧིཔི སམྦནྡྷིཏབྦཾ། ལོཀཔརིཡཱཔནྣེཧེཝ ཧི དྷམྨེཧི ཏེསཾ བལསྶ དུཔྤསཧཏཱ, དུརབྷིསམྦྷཝཏཱ, ན ལོཀུཏྟརེཧཱིཏི། ཨེཏྠེཝཱཏི ཨེཏསྨིཾ ཨརཧཏྟཕལེ ཨེཝ, ཏདཏྠནྟི ཨཏྠོ།
‘‘Loke’’ti idaṃ yathā ‘‘ekabalampī’’ti iminā sambandhīyati, evaṃ ‘‘duppasahaṃ durabhisambhava’’nti imehipi sambandhitabbaṃ. Lokapariyāpanneheva hi dhammehi tesaṃ balassa duppasahatā, durabhisambhavatā, na lokuttarehīti. Etthevāti etasmiṃ arahattaphale eva, tadatthanti attho.
ལོཀུཏྟརཔུཉྙམྤཱིཏི ལོཀུཏྟརཔུཉྙམྤི པུཉྙཕལམྤི། ཡཱཝ ཨཱསཝཀྑཡཱ པཝཌྜྷཏི ཝིཝཊྚགཱམིཀུསལདྷམྨཱནཾ སམཱདཱནཧེཏཱུཏི ཡོཛནཱ། ཨམཏཔཱནཾ པིཝིཾསུ ཧེཊྛིམམགྒཕལསམདྷིགམཝསེནཱཏི ཨདྷིཔྤཱཡོ།
Lokuttarapuññampīti lokuttarapuññampi puññaphalampi. Yāva āsavakkhayā pavaḍḍhati vivaṭṭagāmikusaladhammānaṃ samādānahetūti yojanā. Amatapānaṃ piviṃsu heṭṭhimamaggaphalasamadhigamavasenāti adhippāyo.
ཙཀྐཝཏྟིསུཏྟཝཎྞནཱཡ ལཱིནཏྠཔྤཀཱསནཱ།
Cakkavattisuttavaṇṇanāya līnatthappakāsanā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༣. ཙཀྐཝཏྟིསུཏྟཾ • 3. Cakkavattisuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) / ༣. ཙཀྐཝཏྟིསུཏྟཝཎྞནཱ • 3. Cakkavattisuttavaṇṇanā
