| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൧൮. അട്ഠാരസമവഗ്ഗോ
18. Aṭṭhārasamavaggo
(൧൮൫) ൯. ചക്ഖുനാ രൂപം പസ്സതീതികഥാ
(185) 9. Cakkhunā rūpaṃ passatītikathā
൮൨൬. ചക്ഖുനാ രൂപം പസ്സതീതി? ആമന്താ. രൂപേന രൂപം പസ്സതീതി? ന ഹേവം വത്തബ്ബേ…പേ॰… രൂപേന രൂപം പസ്സതീതി? ആമന്താ. രൂപേന രൂപം പടിവിജാനാതീതി? ന ഹേവം വത്തബ്ബേ…പേ॰… രൂപേന രൂപം പടിവിജാനാതീതി? ആമന്താ. രൂപം മനോവിഞ്ഞാണന്തി ? ന ഹേവം വത്തബ്ബേ…പേ॰… ചക്ഖുനാ രൂപം പസ്സതീതി? ആമന്താ. അത്ഥി ചക്ഖുസ്സ ആവട്ടനാ…പേ॰… പണിധീതി? ന ഹേവം വത്തബ്ബേ…പേ॰… നനു നത്ഥി ചക്ഖുസ്സ ആവട്ടനാ…പേ॰… പണിധീതി? ആമന്താ. ഹഞ്ചി നത്ഥി ചക്ഖുസ്സ ആവട്ടനാ…പേ॰… പണിധി, നോ ച വത രേ വത്തബ്ബേ – ‘‘ചക്ഖുനാ രൂപം പസ്സതീ’’തി.
826. Cakkhunā rūpaṃ passatīti? Āmantā. Rūpena rūpaṃ passatīti? Na hevaṃ vattabbe…pe… rūpena rūpaṃ passatīti? Āmantā. Rūpena rūpaṃ paṭivijānātīti? Na hevaṃ vattabbe…pe… rūpena rūpaṃ paṭivijānātīti? Āmantā. Rūpaṃ manoviññāṇanti ? Na hevaṃ vattabbe…pe… cakkhunā rūpaṃ passatīti? Āmantā. Atthi cakkhussa āvaṭṭanā…pe… paṇidhīti? Na hevaṃ vattabbe…pe… nanu natthi cakkhussa āvaṭṭanā…pe… paṇidhīti? Āmantā. Hañci natthi cakkhussa āvaṭṭanā…pe… paṇidhi, no ca vata re vattabbe – ‘‘cakkhunā rūpaṃ passatī’’ti.
സോതേന സദ്ദം സുണാതീതി…പേ॰… ഘാനേന ഗന്ധം ഘായതീതി…പേ॰… ജിവ്ഹായ രസം സായതീതി…പേ॰… കായേന ഫോട്ഠബ്ബം ഫുസതീതി? ആമന്താ. രൂപേന രൂപം ഫുസതീതി? ന ഹേവം വത്തബ്ബേ…പേ॰….
Sotena saddaṃ suṇātīti…pe… ghānena gandhaṃ ghāyatīti…pe… jivhāya rasaṃ sāyatīti…pe… kāyena phoṭṭhabbaṃ phusatīti? Āmantā. Rūpena rūpaṃ phusatīti? Na hevaṃ vattabbe…pe….
രൂപേന രൂപം ഫുസതീതി? ആമന്താ. രൂപേന രൂപം പടിവിജാനാതീതി? ന ഹേവം വത്തബ്ബേ…പേ॰… രൂപേന രൂപം പടിവിജാനാതീതി? ആമന്താ. രൂപം മനോവിഞ്ഞാണന്തി? ന ഹേവം വത്തബ്ബേ …പേ॰… കായേന ഫോട്ഠബ്ബം ഫുസതീതി? ആമന്താ. അത്ഥി കായസ്സ ആവട്ടനാ…പേ॰… പണിധീതി? ന ഹേവം വത്തബ്ബേ…പേ॰… നനു നത്ഥി കായസ്സ ആവട്ടനാ…പേ॰… പണിധീതി? ആമന്താ. ഹഞ്ചി നത്ഥി കായസ്സ ആവട്ടനാ…പേ॰… പണിധി, നോ ച വത രേ വത്തബ്ബേ – ‘‘കായേന ഫോട്ഠബ്ബം ഫുസതീ’’തി…പേ॰….
Rūpena rūpaṃ phusatīti? Āmantā. Rūpena rūpaṃ paṭivijānātīti? Na hevaṃ vattabbe…pe… rūpena rūpaṃ paṭivijānātīti? Āmantā. Rūpaṃ manoviññāṇanti? Na hevaṃ vattabbe …pe… kāyena phoṭṭhabbaṃ phusatīti? Āmantā. Atthi kāyassa āvaṭṭanā…pe… paṇidhīti? Na hevaṃ vattabbe…pe… nanu natthi kāyassa āvaṭṭanā…pe… paṇidhīti? Āmantā. Hañci natthi kāyassa āvaṭṭanā…pe… paṇidhi, no ca vata re vattabbe – ‘‘kāyena phoṭṭhabbaṃ phusatī’’ti…pe….
൮൨൭. ന വത്തബ്ബം – ‘‘ചക്ഖുനാ രൂപം പസ്സതീ’’തി…പേ॰… ‘‘കായേന ഫോട്ഠബ്ബം ഫുസതീ’’തി? ആമന്താ. നനു വുത്തം ഭഗവതാ – ‘‘ഇധ, ഭിക്ഖവേ, ഭിക്ഖു ചക്ഖുനാ രൂപം പസ്സതി…പേ॰… കായേന ഫോട്ഠബ്ബം ഫുസതീ’’തി 1! അത്ഥേവ സുത്തന്തോതി? ആമന്താ. തേന ഹി ചക്ഖുനാ രൂപം പസ്സതി…പേ॰… കായേന ഫോട്ഠബ്ബം ഫുസതീതി.
827. Na vattabbaṃ – ‘‘cakkhunā rūpaṃ passatī’’ti…pe… ‘‘kāyena phoṭṭhabbaṃ phusatī’’ti? Āmantā. Nanu vuttaṃ bhagavatā – ‘‘idha, bhikkhave, bhikkhu cakkhunā rūpaṃ passati…pe… kāyena phoṭṭhabbaṃ phusatī’’ti 2! Attheva suttantoti? Āmantā. Tena hi cakkhunā rūpaṃ passati…pe… kāyena phoṭṭhabbaṃ phusatīti.
ചക്ഖുനാ രൂപം പസ്സതീതികഥാ നിട്ഠിതാ.
Cakkhunā rūpaṃ passatītikathā niṭṭhitā.
അട്ഠാരസമവഗ്ഗോ.
Aṭṭhārasamavaggo.
തസ്സുദ്ദാനം –
Tassuddānaṃ –
ബുദ്ധോ ഭഗവാ മനുസ്സലോകേ അട്ഠാസി, ബുദ്ധേന ഭഗവതാ ധമ്മോ ദേസിതോ, നത്ഥി ബുദ്ധസ്സ ഭഗവതോ കരുണാ, ബുദ്ധസ്സ ഭഗവതോ ഉച്ചാരപസ്സാവോ അതിവിയ അഞ്ഞേ ഗന്ധജാതേ അധിഗ്ഗണ്ഹാതി, ഏകേന അരിയമഗ്ഗേന ചത്താരി സാമഞ്ഞഫലാനി സച്ഛികരോതി, ഝാനാ ഝാനം സങ്കമതി, അത്ഥി ഝാനന്തരികാ, സമാപന്നോ സദ്ദം സുണാതി, ചക്ഖുനാ രൂപം പസ്സതി കായേന ഫോട്ഠബ്ബം ഫുസതി.
Buddho bhagavā manussaloke aṭṭhāsi, buddhena bhagavatā dhammo desito, natthi buddhassa bhagavato karuṇā, buddhassa bhagavato uccārapassāvo ativiya aññe gandhajāte adhiggaṇhāti, ekena ariyamaggena cattāri sāmaññaphalāni sacchikaroti, jhānā jhānaṃ saṅkamati, atthi jhānantarikā, samāpanno saddaṃ suṇāti, cakkhunā rūpaṃ passati kāyena phoṭṭhabbaṃ phusati.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൯. ചക്ഖുനാരൂപംപസ്സതീതികഥാവണ്ണനാ • 9. Cakkhunārūpaṃpassatītikathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൯. ചക്ഖുനാരൂപംപസ്സതീതികഥാവണ്ണനാ • 9. Cakkhunārūpaṃpassatītikathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൯. ചക്ഖുനാരൂപംപസ്സതീതികഥാവണ്ണനാ • 9. Cakkhunārūpaṃpassatītikathāvaṇṇanā
