| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
6. ඡට්‌ඨවග්‌ගො
6. Chaṭṭhavaggo
(61) 9. චක්‌ඛුන්‌ද්‍රියං සනිදස්‌සනන්‌තිආදිකථා
(61) 9. Cakkhundriyaṃ sanidassanantiādikathā
467. චක්‌ඛුන්‌ද්‍රියං සනිදස්‌සනන්‌ති? ආමන්‌තා. රූපං රූපායතනං රූපධාතු…පෙ.… චක්‌ඛුස්‌ස ආපාථං ආගච්‌ඡතීති? න හෙවං වත්‌තබ්‌බෙ…පෙ.….
467. Cakkhundriyaṃ sanidassananti? Āmantā. Rūpaṃ rūpāyatanaṃ rūpadhātu…pe… cakkhussa āpāthaṃ āgacchatīti? Na hevaṃ vattabbe…pe….
චක්‌ඛුන්‌ද්‍රියං සනිදස්‌සනන්‌ති? ආමන්‌තා. චක්‌ඛුඤ්‌ච පටිච්‌ච චක්‌ඛුන්‌ද්‍රියඤ්‌ච උප්‌පජ්‌ජති චක්‌ඛුවිඤ්‌ඤාණන්‌ති? න හෙවං වත්‌තබ්‌බෙ…පෙ.….
Cakkhundriyaṃ sanidassananti? Āmantā. Cakkhuñca paṭicca cakkhundriyañca uppajjati cakkhuviññāṇanti? Na hevaṃ vattabbe…pe….
චක්‌ඛුඤ්‌ච පටිච්‌ච චක්‌ඛුන්‌ද්‍රියඤ්‌ච උප්‌පජ්‌ජති චක්‌ඛුවිඤ්‌ඤාණන්‌ති? ආමන්‌තා. ‘‘චක්‌ඛුඤ්‌ච පටිච්‌ච චක්‌ඛුන්‌ද්‍රියඤ්‌ච උප්‌පජ්‌ජති චක්‌ඛුවිඤ්‌ඤාණ’’න්‌ති – අත්‌ථෙව සුත්‌තන්‌තොති? නත්‌ථි. ‘‘චක්‌ඛුඤ්‌ච පටිච්‌ච රූපෙ ච උප්‌පජ්‌ජති චක්‌ඛුවිඤ්‌ඤාණ’’න්‌ති – අත්‌ථෙව සුත්‌තන්‌තොති? ආමන්‌තා. හඤ්‌චි ‘‘චක්‌ඛුඤ්‌ච පටිච්‌ච රූපෙ ච උප්‌පජ්‌ජති චක්‌ඛුවිඤ්‌ඤාණ’’න්‌ති – අත්‌ථෙව සුත්‌තන්‌තො, නො ච වත රෙ වත්‌තබ්‌බෙ – ‘‘චක්‌ඛුඤ්‌ච පටිච්‌ච චක්‌ඛුන්‌ද්‍රියඤ්‌ච උප්‌පජ්‌ජති චක්‌ඛුවිඤ්‌ඤාණ’’න්‌ති.
Cakkhuñca paṭicca cakkhundriyañca uppajjati cakkhuviññāṇanti? Āmantā. ‘‘Cakkhuñca paṭicca cakkhundriyañca uppajjati cakkhuviññāṇa’’nti – attheva suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca cakkhundriyañca uppajjati cakkhuviññāṇa’’nti.
468. න වත්‌තබ්‌බං – ‘‘පඤ්‌චින්‌ද්‍රියානි සනිදස්‌සනානී’’ති? ආමන්‌තා. නනු පස්‌සති චක්‌ඛුං සොතං ඝානං ජිව්‌හං කායන්‌ති? ආමන්‌තා. හඤ්‌චි පස්‌සති චක්‌ඛුං සොතං ඝානං ජිව්‌හං කායං, තෙන වත රෙ වත්‌තබ්‌බෙ – ‘‘පඤ්‌චින්‌ද්‍රියානි සනිදස්‌සනානී’’ති…පෙ.….
468. Na vattabbaṃ – ‘‘pañcindriyāni sanidassanānī’’ti? Āmantā. Nanu passati cakkhuṃ sotaṃ ghānaṃ jivhaṃ kāyanti? Āmantā. Hañci passati cakkhuṃ sotaṃ ghānaṃ jivhaṃ kāyaṃ, tena vata re vattabbe – ‘‘pañcindriyāni sanidassanānī’’ti…pe….
චක්‌ඛුන්‌ද්‍රියං සනිදස්‌සනන්‌තිආදිකථා නිට්‌ඨිතා.
Cakkhundriyaṃ sanidassanantiādikathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 10. පථවීධාතුසනිදස්‌සනාතිආදිකථාවණ්‌ණනා • 10. Pathavīdhātusanidassanātiādikathāvaṇṇanā
