| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৭. রাহুলসংযুত্তং
7. Rāhulasaṃyuttaṃ
১. পঠমৰগ্গো
1. Paṭhamavaggo
১-৮. চক্খুসুত্তাদিৰণ্ণনা
1-8. Cakkhusuttādivaṇṇanā
১৮৮-১৯৫. একৰিহারীতি চতূসুপি ইরিযাপথেসু একাকী হুত্ৰা ৰিহরন্তো। ৰিৰেকট্ঠোতি ৰিৰিত্তট্ঠো, তেনাহ ‘‘নিস্সদ্দো’’তি। সতিযা অৰিপ্পৰসন্তোতি সতিযা অৰিপ্পৰাসেন ঠিতো, সব্বদা অৰিজহনৰসেন পৰত্তো। আতাপীতি ৰীরিযসম্পন্নোতি সব্বসো কিলেসানং আতাপনপরিতাপনৰসেন পৰত্তৰীরিযসমঙ্গীভূতো। পহিতত্তোতি তস্মিং ৰিসেসাধিগমে পেসিতচিত্তো, তত্থ নিন্নো তপ্পব্ভারোতি অত্থো। হুত্ৰা অভাৰাকারেনাতি উপ্পত্তিতো পুব্বে অৰিজ্জমানো পচ্চযসমৰাযেন হুত্ৰা উপ্পজ্জিত্ৰা ভঙ্গুপরমসঙ্খাতেন অভাৰাকারেন। অনিচ্চন্তি নিচ্চধুৰতাভাৰতো। উপ্পাদৰযৰন্ততাযাতি খণে খণে উপ্পজ্জিত্ৰা নিরুজ্ঝনতো। তাৰকালিকতাযাতি তঙ্খণিকতায। ৰিপরিণামকোটিযাতি ৰিপরিণামৰন্ততায। চক্খুঞ্হি উপাদায ৰিকারাপজ্জনেন ৰিপরিণমন্তং ৰিনাসং পটিপীল়ং পাপুণাতি। নিচ্চপটিক্খেপতোতি নিচ্চতায পটিক্খিপিতব্বতো লেসমত্তস্সপি অনুপলব্ভনতো। দুক্খমনট্ঠেনাতি নিরন্তরদুক্খতায দুক্খেন খমিতব্বতো। দুক্খৰত্থুকট্ঠেনাতি নানপ্পকারদুক্খাধিট্ঠানতো। সততসম্পীল়নট্ঠেনাতি অভিণ্হতাপসভাৰতো। সুখপটিক্খেপেনাতি সুখভাৰস্স পটিক্খিপিতব্বতো। তণ্হাগাহো মমংকারভাৰতো। মানগাহো অহংকারভাৰতো। দিট্ঠিগাহো ‘‘অত্তা মে’’তি ৰিপল্লাসভাৰতো। ৰিরাগৰসেনাতি ৰিরাগগ্গহণেন। তথা ৰিমুত্তিৰসেনাতি ৰিমুত্তিগ্গহণেন।
188-195.Ekavihārīti catūsupi iriyāpathesu ekākī hutvā viharanto. Vivekaṭṭhoti vivittaṭṭho, tenāha ‘‘nissaddo’’ti. Satiyā avippavasantoti satiyā avippavāsena ṭhito, sabbadā avijahanavasena pavatto. Ātāpīti vīriyasampannoti sabbaso kilesānaṃ ātāpanaparitāpanavasena pavattavīriyasamaṅgībhūto. Pahitattoti tasmiṃ visesādhigame pesitacitto, tattha ninno tappabbhāroti attho. Hutvā abhāvākārenāti uppattito pubbe avijjamāno paccayasamavāyena hutvā uppajjitvā bhaṅguparamasaṅkhātena abhāvākārena. Aniccanti niccadhuvatābhāvato. Uppādavayavantatāyāti khaṇe khaṇe uppajjitvā nirujjhanato. Tāvakālikatāyāti taṅkhaṇikatāya. Vipariṇāmakoṭiyāti vipariṇāmavantatāya. Cakkhuñhi upādāya vikārāpajjanena vipariṇamantaṃ vināsaṃ paṭipīḷaṃ pāpuṇāti. Niccapaṭikkhepatoti niccatāya paṭikkhipitabbato lesamattassapi anupalabbhanato. Dukkhamanaṭṭhenāti nirantaradukkhatāya dukkhena khamitabbato. Dukkhavatthukaṭṭhenāti nānappakāradukkhādhiṭṭhānato. Satatasampīḷanaṭṭhenāti abhiṇhatāpasabhāvato. Sukhapaṭikkhepenāti sukhabhāvassa paṭikkhipitabbato. Taṇhāgāho mamaṃkārabhāvato. Mānagāho ahaṃkārabhāvato. Diṭṭhigāho ‘‘attā me’’ti vipallāsabhāvato. Virāgavasenāti virāgaggahaṇena. Tathā vimuttivasenāti vimuttiggahaṇena.
পসাদাৰ গহিতা দ্ৰারভাৰপ্পত্তস্স অধিপ্পেতত্তা। সম্মসনচারচিত্তং দ্ৰারভূতমনোতি অধিপ্পাযো।
Pasādāva gahitā dvārabhāvappattassa adhippetattā. Sammasanacāracittaṃ dvārabhūtamanoti adhippāyo.
ছট্ঠে আরম্মণে তেভূমকধম্মা সম্মসনচারস্স অধিপ্পেতত্তা। যথা পঠমসুত্তে পঞ্চ পসাদা গহিতা, ন সসম্ভারচক্খুআদযো, এৰং ততিযসুত্তে ন পসাদৰত্থুকচিত্তমেৰ গহিতং। ন তংসম্পযুত্তা ধম্মা। এৰঞ্হি অৰধারণং সাত্থকং হোতি অঞ্ঞথা তেন অপনেতব্বস্স অভাৰতো। সব্বত্থাতি সব্বেসু চতুত্থসুত্তাদীসু। জৰনপ্পত্তাতি জৰনচিত্তসংযুত্তা।
Chaṭṭhe ārammaṇe tebhūmakadhammā sammasanacārassa adhippetattā. Yathā paṭhamasutte pañca pasādā gahitā, na sasambhāracakkhuādayo, evaṃ tatiyasutte na pasādavatthukacittameva gahitaṃ. Na taṃsampayuttā dhammā. Evañhi avadhāraṇaṃ sātthakaṃ hoti aññathā tena apanetabbassa abhāvato. Sabbatthāti sabbesu catutthasuttādīsu. Javanappattāti javanacittasaṃyuttā.
চক্খুসুত্তাদিৰণ্ণনা নিট্ঠিতা।
Cakkhusuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
১. চক্খুসুত্তং • 1. Cakkhusuttaṃ
২. রূপসুত্তং • 2. Rūpasuttaṃ
৩. ৰিঞ্ঞাণসুত্তং • 3. Viññāṇasuttaṃ
৪. সম্ফস্সসুত্তং • 4. Samphassasuttaṃ
৫. ৰেদনাসুত্তং • 5. Vedanāsuttaṃ
৬. সঞ্ঞাসুত্তং • 6. Saññāsuttaṃ
৭. সঞ্চেতনাসুত্তং • 7. Sañcetanāsuttaṃ
৮. তণ্হাসুত্তং • 8. Taṇhāsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১-৮. চক্খুসুত্তাদিৰণ্ণনা • 1-8. Cakkhusuttādivaṇṇanā
