| Library / Tipiṭaka / ติปิฎก • Tipiṭaka / สํยุตฺตนิกาย (อฎฺฐกถา) • Saṃyuttanikāya (aṭṭhakathā) |
๗. ราหุลสํยุตฺตํ
7. Rāhulasaṃyuttaṃ
๑. ปฐมวโคฺค
1. Paṭhamavaggo
๑-๘. จกฺขุสุตฺตาทิวณฺณนา
1-8. Cakkhusuttādivaṇṇanā
๑๘๘-๑๙๕. ราหุลสํยุตฺตสฺส ปฐเม เอโกติ จตูสุ อิริยาปเถสุ เอกวิหารีฯ วูปกโฎฺฐติ วิเวกโฎฺฐ นิสฺสโทฺทฯ อปฺปมโตฺตติ สติยา อวิปฺปวสโนฺตฯ อาตาปีติ วีริยสมฺปโนฺนฯ ปหิตโตฺต วิหเรยฺยนฺติ วิเสสาธิคมตฺถาย เปสิตโตฺต หุตฺวา วิหเรยฺยํฯ อนิจฺจนฺติ หุตฺวา อภาวากาเรน อนิจฺจํฯ อถ วา อุปฺปาทวยวนฺตตาย ตาวกาลิกตาย วิปริณามโกฎิยา นิจฺจปฎิเกฺขปโตติ อิเมหิปิ การเณหิ อนิจฺจํฯ ทุกฺขนฺติ จตูหิ การเณหิ ทุกฺขํ ทุกฺขมนเฎฺฐน ทุกฺขวตฺถุกเฎฺฐน สตตสมฺปีฬนเฎฺฐน สุขปฎิเกฺขเปนาติฯ กลฺลนฺติ ยุตฺตํฯ เอตํ มมาติ ตณฺหาคาโหฯ เอโสหมสฺมีติ มานคาโหฯ เอโส เม อตฺตาติ ทิฎฺฐิคาโหฯ ตณฺหาคาโห เจตฺถ อฎฺฐสตตณฺหาวิจริตวเสน, มานคาโห นววิธมานวเสน, ทิฎฺฐิคาโห ทฺวาสฎฺฐิทิฎฺฐิวเสน เวทิตโพฺพฯ นิพฺพินฺทํ วิรชฺชตีติ เอตฺถ วิราควเสน จตฺตาโร มคฺคา กถิตา, วิราคา วิมุจฺจตีติ เอตฺถ วิมุตฺติวเสน จตฺตาริ สามญฺญผลานิฯ
188-195. Rāhulasaṃyuttassa paṭhame ekoti catūsu iriyāpathesu ekavihārī. Vūpakaṭṭhoti vivekaṭṭho nissaddo. Appamattoti satiyā avippavasanto. Ātāpīti vīriyasampanno. Pahitatto vihareyyanti visesādhigamatthāya pesitatto hutvā vihareyyaṃ. Aniccanti hutvā abhāvākārena aniccaṃ. Atha vā uppādavayavantatāya tāvakālikatāya vipariṇāmakoṭiyā niccapaṭikkhepatoti imehipi kāraṇehi aniccaṃ. Dukkhanti catūhi kāraṇehi dukkhaṃ dukkhamanaṭṭhena dukkhavatthukaṭṭhena satatasampīḷanaṭṭhena sukhapaṭikkhepenāti. Kallanti yuttaṃ. Etaṃ mamāti taṇhāgāho. Esohamasmīti mānagāho. Eso me attāti diṭṭhigāho. Taṇhāgāho cettha aṭṭhasatataṇhāvicaritavasena, mānagāho navavidhamānavasena, diṭṭhigāho dvāsaṭṭhidiṭṭhivasena veditabbo. Nibbindaṃ virajjatīti ettha virāgavasena cattāro maggā kathitā, virāgā vimuccatīti ettha vimuttivasena cattāri sāmaññaphalāni.
เอตฺถ จ ปญฺจสุ ทฺวาเรสุ ปสาทาว คหิตา, มโนติ อิมินา เตภูมกํ สมฺมสนจารจิตฺตํฯ ทุติเย ปญฺจสุ ทฺวาเรสุ อารมฺมณเมวฯ ตติเย ปญฺจสุ ทฺวาเรสุ ปสาทวตฺถุกจิตฺตเมว, มโนวิญฺญาเณน เตภูมกํ สมฺมสนจารจิตฺตํ คหิตํฯ เอวํ สพฺพตฺถ นโย เนตโพฺพฯ ฉเฎฺฐ เตภูมกธมฺมาฯ อฎฺฐเม ปน ตณฺหาติ ตสฺมิํ ตสฺมิํ ทฺวาเร ชวนปฺปตฺตาว ลพฺภติฯ ปฐมาทีนิฯ
Ettha ca pañcasu dvāresu pasādāva gahitā, manoti iminā tebhūmakaṃ sammasanacāracittaṃ. Dutiye pañcasu dvāresu ārammaṇameva. Tatiye pañcasu dvāresu pasādavatthukacittameva, manoviññāṇena tebhūmakaṃ sammasanacāracittaṃ gahitaṃ. Evaṃ sabbattha nayo netabbo. Chaṭṭhe tebhūmakadhammā. Aṭṭhame pana taṇhāti tasmiṃ tasmiṃ dvāre javanappattāva labbhati. Paṭhamādīni.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya
๑. จกฺขุสุตฺตํ • 1. Cakkhusuttaṃ
๒. รูปสุตฺตํ • 2. Rūpasuttaṃ
๓. วิญฺญาณสุตฺตํ • 3. Viññāṇasuttaṃ
๔. สมฺผสฺสสุตฺตํ • 4. Samphassasuttaṃ
๕. เวทนาสุตฺตํ • 5. Vedanāsuttaṃ
๖. สญฺญาสุตฺตํ • 6. Saññāsuttaṃ
๗. สเญฺจตนาสุตฺตํ • 7. Sañcetanāsuttaṃ
๘. ตณฺหาสุตฺตํ • 8. Taṇhāsuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๑-๘. จกฺขุสุตฺตาทิวณฺณนา • 1-8. Cakkhusuttādivaṇṇanā
