| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៧. រាហុលសំយុត្តំ
7. Rāhulasaṃyuttaṃ
១. បឋមវគ្គោ
1. Paṭhamavaggo
១-៨. ចក្ខុសុត្តាទិវណ្ណនា
1-8. Cakkhusuttādivaṇṇanā
១៨៨-១៩៥. រាហុលសំយុត្តស្ស បឋមេ ឯកោតិ ចតូសុ ឥរិយាបថេសុ ឯកវិហារី។ វូបកដ្ឋោតិ វិវេកដ្ឋោ និស្សទ្ទោ។ អប្បមត្តោតិ សតិយា អវិប្បវសន្តោ។ អាតាបីតិ វីរិយសម្បន្នោ។ បហិតត្តោ វិហរេយ្យន្តិ វិសេសាធិគមត្ថាយ បេសិតត្តោ ហុត្វា វិហរេយ្យំ។ អនិច្ចន្តិ ហុត្វា អភាវាការេន អនិច្ចំ។ អថ វា ឧប្បាទវយវន្តតាយ តាវកាលិកតាយ វិបរិណាមកោដិយា និច្ចបដិក្ខេបតោតិ ឥមេហិបិ ការណេហិ អនិច្ចំ។ ទុក្ខន្តិ ចតូហិ ការណេហិ ទុក្ខំ ទុក្ខមនដ្ឋេន ទុក្ខវត្ថុកដ្ឋេន សតតសម្បីឡនដ្ឋេន សុខបដិក្ខេបេនាតិ។ កល្លន្តិ យុត្តំ។ ឯតំ មមាតិ តណ្ហាគាហោ។ ឯសោហមស្មីតិ មានគាហោ។ ឯសោ មេ អត្តាតិ ទិដ្ឋិគាហោ។ តណ្ហាគាហោ ចេត្ថ អដ្ឋសតតណ្ហាវិចរិតវសេន, មានគាហោ នវវិធមានវសេន, ទិដ្ឋិគាហោ ទ្វាសដ្ឋិទិដ្ឋិវសេន វេទិតព្ពោ។ និព្ពិន្ទំ វិរជ្ជតីតិ ឯត្ថ វិរាគវសេន ចត្តារោ មគ្គា កថិតា, វិរាគា វិមុច្ចតីតិ ឯត្ថ វិមុត្តិវសេន ចត្តារិ សាមញ្ញផលានិ។
188-195. Rāhulasaṃyuttassa paṭhame ekoti catūsu iriyāpathesu ekavihārī. Vūpakaṭṭhoti vivekaṭṭho nissaddo. Appamattoti satiyā avippavasanto. Ātāpīti vīriyasampanno. Pahitatto vihareyyanti visesādhigamatthāya pesitatto hutvā vihareyyaṃ. Aniccanti hutvā abhāvākārena aniccaṃ. Atha vā uppādavayavantatāya tāvakālikatāya vipariṇāmakoṭiyā niccapaṭikkhepatoti imehipi kāraṇehi aniccaṃ. Dukkhanti catūhi kāraṇehi dukkhaṃ dukkhamanaṭṭhena dukkhavatthukaṭṭhena satatasampīḷanaṭṭhena sukhapaṭikkhepenāti. Kallanti yuttaṃ. Etaṃ mamāti taṇhāgāho. Esohamasmīti mānagāho. Eso me attāti diṭṭhigāho. Taṇhāgāho cettha aṭṭhasatataṇhāvicaritavasena, mānagāho navavidhamānavasena, diṭṭhigāho dvāsaṭṭhidiṭṭhivasena veditabbo. Nibbindaṃ virajjatīti ettha virāgavasena cattāro maggā kathitā, virāgā vimuccatīti ettha vimuttivasena cattāri sāmaññaphalāni.
ឯត្ថ ច បញ្ចសុ ទ្វារេសុ បសាទាវ គហិតា, មនោតិ ឥមិនា តេភូមកំ សម្មសនចារចិត្តំ។ ទុតិយេ បញ្ចសុ ទ្វារេសុ អារម្មណមេវ។ តតិយេ បញ្ចសុ ទ្វារេសុ បសាទវត្ថុកចិត្តមេវ, មនោវិញ្ញាណេន តេភូមកំ សម្មសនចារចិត្តំ គហិតំ។ ឯវំ សព្ពត្ថ នយោ នេតព្ពោ។ ឆដ្ឋេ តេភូមកធម្មា។ អដ្ឋមេ បន តណ្ហាតិ តស្មិំ តស្មិំ ទ្វារេ ជវនប្បត្តាវ លព្ភតិ។ បឋមាទីនិ។
Ettha ca pañcasu dvāresu pasādāva gahitā, manoti iminā tebhūmakaṃ sammasanacāracittaṃ. Dutiye pañcasu dvāresu ārammaṇameva. Tatiye pañcasu dvāresu pasādavatthukacittameva, manoviññāṇena tebhūmakaṃ sammasanacāracittaṃ gahitaṃ. Evaṃ sabbattha nayo netabbo. Chaṭṭhe tebhūmakadhammā. Aṭṭhame pana taṇhāti tasmiṃ tasmiṃ dvāre javanappattāva labbhati. Paṭhamādīni.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya
១. ចក្ខុសុត្តំ • 1. Cakkhusuttaṃ
២. រូបសុត្តំ • 2. Rūpasuttaṃ
៣. វិញ្ញាណសុត្តំ • 3. Viññāṇasuttaṃ
៤. សម្ផស្សសុត្តំ • 4. Samphassasuttaṃ
៥. វេទនាសុត្តំ • 5. Vedanāsuttaṃ
៦. សញ្ញាសុត្តំ • 6. Saññāsuttaṃ
៧. សញ្ចេតនាសុត្តំ • 7. Sañcetanāsuttaṃ
៨. តណ្ហាសុត្តំ • 8. Taṇhāsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១-៨. ចក្ខុសុត្តាទិវណ្ណនា • 1-8. Cakkhusuttādivaṇṇanā
