១-៨. ចក្ខុសុត្តាទិវណ្ណនា

1-8. Cakkhusuttādivaṇṇanā

១៨៨-១៩៥. ឯកវិហារីតិ ចតូសុបិ ឥរិយាបថេសុ ឯកាកី ហុត្វា វិហរន្តោ។ វិវេកដ្ឋោតិ វិវិត្តដ្ឋោ, តេនាហ ‘‘និស្សទ្ទោ’’តិ។ សតិយា អវិប្បវសន្តោតិ សតិយា អវិប្បវាសេន ឋិតោ, សព្ពទា អវិជហនវសេន បវត្តោ។ អាតាបីតិ វីរិយសម្បន្នោតិ សព្ពសោ កិលេសានំ អាតាបនបរិតាបនវសេន បវត្តវីរិយសមង្គីភូតោ។ បហិតត្តោតិ តស្មិំ វិសេសាធិគមេ បេសិតចិត្តោ, តត្ថ និន្នោ តប្បព្ភារោតិ អត្ថោ។ ហុត្វា អភាវាការេនាតិ ឧប្បត្តិតោ បុព្ពេ អវិជ្ជមានោ បច្ចយសមវាយេន ហុត្វា ឧប្បជ្ជិត្វា ភង្គុបរមសង្ខាតេន អភាវាការេន។ អនិច្ចន្តិ និច្ចធុវតាភាវតោ។ ឧប្បាទវយវន្តតាយាតិ ខណេ ខណេ ឧប្បជ្ជិត្វា និរុជ្ឈនតោ។ តាវកាលិកតាយាតិ តង្ខណិកតាយ។ វិបរិណាមកោដិយាតិ វិបរិណាមវន្តតាយ។ ចក្ខុញ្ហិ ឧបាទាយ វិការាបជ្ជនេន វិបរិណមន្តំ វិនាសំ បដិបីឡំ បាបុណាតិ។ និច្ចបដិក្ខេបតោតិ និច្ចតាយ បដិក្ខិបិតព្ពតោ លេសមត្តស្សបិ អនុបលព្ភនតោ។ ទុក្ខមនដ្ឋេនាតិ និរន្តរទុក្ខតាយ ទុក្ខេន ខមិតព្ពតោ។ ទុក្ខវត្ថុកដ្ឋេនាតិ នានប្បការទុក្ខាធិដ្ឋានតោ។ សតតសម្បីឡនដ្ឋេនាតិ អភិណ្ហតាបសភាវតោ។ សុខបដិក្ខេបេនាតិ សុខភាវស្ស បដិក្ខិបិតព្ពតោ។ តណ្ហាគាហោ មមំការភាវតោ។ មានគាហោ អហំការភាវតោ។ ទិដ្ឋិគាហោ ‘‘អត្តា មេ’’តិ វិបល្លាសភាវតោ។ វិរាគវសេនាតិ វិរាគគ្គហណេន។ តថា វិមុត្តិវសេនាតិ វិមុត្តិគ្គហណេន។

188-195.Ekavihārīti catūsupi iriyāpathesu ekākī hutvā viharanto. Vivekaṭṭhoti vivittaṭṭho, tenāha ‘‘nissaddo’’ti. Satiyā avippavasantoti satiyā avippavāsena ṭhito, sabbadā avijahanavasena pavatto. Ātāpīti vīriyasampannoti sabbaso kilesānaṃ ātāpanaparitāpanavasena pavattavīriyasamaṅgībhūto. Pahitattoti tasmiṃ visesādhigame pesitacitto, tattha ninno tappabbhāroti attho. Hutvā abhāvākārenāti uppattito pubbe avijjamāno paccayasamavāyena hutvā uppajjitvā bhaṅguparamasaṅkhātena abhāvākārena. Aniccanti niccadhuvatābhāvato. Uppādavayavantatāyāti khaṇe khaṇe uppajjitvā nirujjhanato. Tāvakālikatāyāti taṅkhaṇikatāya. Vipariṇāmakoṭiyāti vipariṇāmavantatāya. Cakkhuñhi upādāya vikārāpajjanena vipariṇamantaṃ vināsaṃ paṭipīḷaṃ pāpuṇāti. Niccapaṭikkhepatoti niccatāya paṭikkhipitabbato lesamattassapi anupalabbhanato. Dukkhamanaṭṭhenāti nirantaradukkhatāya dukkhena khamitabbato. Dukkhavatthukaṭṭhenāti nānappakāradukkhādhiṭṭhānato. Satatasampīḷanaṭṭhenāti abhiṇhatāpasabhāvato. Sukhapaṭikkhepenāti sukhabhāvassa paṭikkhipitabbato. Taṇhāgāho mamaṃkārabhāvato. Mānagāho ahaṃkārabhāvato. Diṭṭhigāho ‘‘attā me’’ti vipallāsabhāvato. Virāgavasenāti virāgaggahaṇena. Tathā vimuttivasenāti vimuttiggahaṇena.

បសាទាវ គហិតា ទ្វារភាវប្បត្តស្ស អធិប្បេតត្តា។ សម្មសនចារចិត្តំ ទ្វារភូតមនោតិ អធិប្បាយោ។

Pasādāva gahitā dvārabhāvappattassa adhippetattā. Sammasanacāracittaṃ dvārabhūtamanoti adhippāyo.

ឆដ្ឋេ អារម្មណេ តេភូមកធម្មា សម្មសនចារស្ស អធិប្បេតត្តា។ យថា បឋមសុត្តេ បញ្ច បសាទា គហិតា, ន សសម្ភារចក្ខុអាទយោ, ឯវំ តតិយសុត្តេ ន បសាទវត្ថុកចិត្តមេវ គហិតំ។ ន តំសម្បយុត្តា ធម្មា។ ឯវញ្ហិ អវធារណំ សាត្ថកំ ហោតិ អញ្ញថា តេន អបនេតព្ពស្ស អភាវតោ។ សព្ពត្ថាតិ សព្ពេសុ ចតុត្ថសុត្តាទីសុ។ ជវនប្បត្តាតិ ជវនចិត្តសំយុត្តា។

Chaṭṭhe ārammaṇe tebhūmakadhammā sammasanacārassa adhippetattā. Yathā paṭhamasutte pañca pasādā gahitā, na sasambhāracakkhuādayo, evaṃ tatiyasutte na pasādavatthukacittameva gahitaṃ. Na taṃsampayuttā dhammā. Evañhi avadhāraṇaṃ sātthakaṃ hoti aññathā tena apanetabbassa abhāvato. Sabbatthāti sabbesu catutthasuttādīsu. Javanappattāti javanacittasaṃyuttā.

ចក្ខុសុត្តាទិវណ្ណនា និដ្ឋិតា។

Cakkhusuttādivaṇṇanā niṭṭhitā.

Next: ៩. ធាតុសុត្តវណ្ណនា • 9. Dhātusuttavaṇṇanā

អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១-៨. ចក្ខុសុត្តាទិវណ្ណនា • 1-8. Cakkhusuttādivaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact