೧-೮. ಚಕ್ಖುಸುತ್ತಾದಿವಣ್ಣನಾ

1-8. Cakkhusuttādivaṇṇanā

೧೮೮-೧೯೫. ರಾಹುಲಸಂಯುತ್ತಸ್ಸ ಪಠಮೇ ಏಕೋತಿ ಚತೂಸು ಇರಿಯಾಪಥೇಸು ಏಕವಿಹಾರೀ। ವೂಪಕಟ್ಠೋತಿ ವಿವೇಕಟ್ಠೋ ನಿಸ್ಸದ್ದೋ। ಅಪ್ಪಮತ್ತೋತಿ ಸತಿಯಾ ಅವಿಪ್ಪವಸನ್ತೋ। ಆತಾಪೀತಿ ವೀರಿಯಸಮ್ಪನ್ನೋ। ಪಹಿತತ್ತೋ ವಿಹರೇಯ್ಯನ್ತಿ ವಿಸೇಸಾಧಿಗಮತ್ಥಾಯ ಪೇಸಿತತ್ತೋ ಹುತ್ವಾ ವಿಹರೇಯ್ಯಂ। ಅನಿಚ್ಚನ್ತಿ ಹುತ್ವಾ ಅಭಾವಾಕಾರೇನ ಅನಿಚ್ಚಂ। ಅಥ ವಾ ಉಪ್ಪಾದವಯವನ್ತತಾಯ ತಾವಕಾಲಿಕತಾಯ ವಿಪರಿಣಾಮಕೋಟಿಯಾ ನಿಚ್ಚಪಟಿಕ್ಖೇಪತೋತಿ ಇಮೇಹಿಪಿ ಕಾರಣೇಹಿ ಅನಿಚ್ಚಂ। ದುಕ್ಖನ್ತಿ ಚತೂಹಿ ಕಾರಣೇಹಿ ದುಕ್ಖಂ ದುಕ್ಖಮನಟ್ಠೇನ ದುಕ್ಖವತ್ಥುಕಟ್ಠೇನ ಸತತಸಮ್ಪೀಳನಟ್ಠೇನ ಸುಖಪಟಿಕ್ಖೇಪೇನಾತಿ। ಕಲ್ಲನ್ತಿ ಯುತ್ತಂ। ಏತಂ ಮಮಾತಿ ತಣ್ಹಾಗಾಹೋ। ಏಸೋಹಮಸ್ಮೀತಿ ಮಾನಗಾಹೋ। ಏಸೋ ಮೇ ಅತ್ತಾತಿ ದಿಟ್ಠಿಗಾಹೋ। ತಣ್ಹಾಗಾಹೋ ಚೇತ್ಥ ಅಟ್ಠಸತತಣ್ಹಾವಿಚರಿತವಸೇನ, ಮಾನಗಾಹೋ ನವವಿಧಮಾನವಸೇನ, ದಿಟ್ಠಿಗಾಹೋ ದ್ವಾಸಟ್ಠಿದಿಟ್ಠಿವಸೇನ ವೇದಿತಬ್ಬೋ। ನಿಬ್ಬಿನ್ದಂ ವಿರಜ್ಜತೀತಿ ಏತ್ಥ ವಿರಾಗವಸೇನ ಚತ್ತಾರೋ ಮಗ್ಗಾ ಕಥಿತಾ, ವಿರಾಗಾ ವಿಮುಚ್ಚತೀತಿ ಏತ್ಥ ವಿಮುತ್ತಿವಸೇನ ಚತ್ತಾರಿ ಸಾಮಞ್ಞಫಲಾನಿ।

188-195. Rāhulasaṃyuttassa paṭhame ekoti catūsu iriyāpathesu ekavihārī. Vūpakaṭṭhoti vivekaṭṭho nissaddo. Appamattoti satiyā avippavasanto. Ātāpīti vīriyasampanno. Pahitatto vihareyyanti visesādhigamatthāya pesitatto hutvā vihareyyaṃ. Aniccanti hutvā abhāvākārena aniccaṃ. Atha vā uppādavayavantatāya tāvakālikatāya vipariṇāmakoṭiyā niccapaṭikkhepatoti imehipi kāraṇehi aniccaṃ. Dukkhanti catūhi kāraṇehi dukkhaṃ dukkhamanaṭṭhena dukkhavatthukaṭṭhena satatasampīḷanaṭṭhena sukhapaṭikkhepenāti. Kallanti yuttaṃ. Etaṃ mamāti taṇhāgāho. Esohamasmīti mānagāho. Eso me attāti diṭṭhigāho. Taṇhāgāho cettha aṭṭhasatataṇhāvicaritavasena, mānagāho navavidhamānavasena, diṭṭhigāho dvāsaṭṭhidiṭṭhivasena veditabbo. Nibbindaṃ virajjatīti ettha virāgavasena cattāro maggā kathitā, virāgā vimuccatīti ettha vimuttivasena cattāri sāmaññaphalāni.

ಏತ್ಥ ಚ ಪಞ್ಚಸು ದ್ವಾರೇಸು ಪಸಾದಾವ ಗಹಿತಾ, ಮನೋತಿ ಇಮಿನಾ ತೇಭೂಮಕಂ ಸಮ್ಮಸನಚಾರಚಿತ್ತಂ। ದುತಿಯೇ ಪಞ್ಚಸು ದ್ವಾರೇಸು ಆರಮ್ಮಣಮೇವ। ತತಿಯೇ ಪಞ್ಚಸು ದ್ವಾರೇಸು ಪಸಾದವತ್ಥುಕಚಿತ್ತಮೇವ, ಮನೋವಿಞ್ಞಾಣೇನ ತೇಭೂಮಕಂ ಸಮ್ಮಸನಚಾರಚಿತ್ತಂ ಗಹಿತಂ। ಏವಂ ಸಬ್ಬತ್ಥ ನಯೋ ನೇತಬ್ಬೋ। ಛಟ್ಠೇ ತೇಭೂಮಕಧಮ್ಮಾ। ಅಟ್ಠಮೇ ಪನ ತಣ್ಹಾತಿ ತಸ್ಮಿಂ ತಸ್ಮಿಂ ದ್ವಾರೇ ಜವನಪ್ಪತ್ತಾವ ಲಬ್ಭತಿ। ಪಠಮಾದೀನಿ।

Ettha ca pañcasu dvāresu pasādāva gahitā, manoti iminā tebhūmakaṃ sammasanacāracittaṃ. Dutiye pañcasu dvāresu ārammaṇameva. Tatiye pañcasu dvāresu pasādavatthukacittameva, manoviññāṇena tebhūmakaṃ sammasanacāracittaṃ gahitaṃ. Evaṃ sabbattha nayo netabbo. Chaṭṭhe tebhūmakadhammā. Aṭṭhame pana taṇhāti tasmiṃ tasmiṃ dvāre javanappattāva labbhati. Paṭhamādīni.

Next: ೯. ಧಾತುಸುತ್ತವಣ್ಣನಾ • 9. Dhātusuttavaṇṇanā

ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧-೮. ಚಕ್ಖುಸುತ್ತಾದಿವಣ್ಣನಾ • 1-8. Cakkhusuttādivaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact