೧-೮. ಚಕ್ಖುಸುತ್ತಾದಿವಣ್ಣನಾ

1-8. Cakkhusuttādivaṇṇanā

೧೮೮-೧೯೫. ಏಕವಿಹಾರೀತಿ ಚತೂಸುಪಿ ಇರಿಯಾಪಥೇಸು ಏಕಾಕೀ ಹುತ್ವಾ ವಿಹರನ್ತೋ। ವಿವೇಕಟ್ಠೋತಿ ವಿವಿತ್ತಟ್ಠೋ, ತೇನಾಹ ‘‘ನಿಸ್ಸದ್ದೋ’’ತಿ। ಸತಿಯಾ ಅವಿಪ್ಪವಸನ್ತೋತಿ ಸತಿಯಾ ಅವಿಪ್ಪವಾಸೇನ ಠಿತೋ, ಸಬ್ಬದಾ ಅವಿಜಹನವಸೇನ ಪವತ್ತೋ। ಆತಾಪೀತಿ ವೀರಿಯಸಮ್ಪನ್ನೋತಿ ಸಬ್ಬಸೋ ಕಿಲೇಸಾನಂ ಆತಾಪನಪರಿತಾಪನವಸೇನ ಪವತ್ತವೀರಿಯಸಮಙ್ಗೀಭೂತೋ। ಪಹಿತತ್ತೋತಿ ತಸ್ಮಿಂ ವಿಸೇಸಾಧಿಗಮೇ ಪೇಸಿತಚಿತ್ತೋ, ತತ್ಥ ನಿನ್ನೋ ತಪ್ಪಬ್ಭಾರೋತಿ ಅತ್ಥೋ। ಹುತ್ವಾ ಅಭಾವಾಕಾರೇನಾತಿ ಉಪ್ಪತ್ತಿತೋ ಪುಬ್ಬೇ ಅವಿಜ್ಜಮಾನೋ ಪಚ್ಚಯಸಮವಾಯೇನ ಹುತ್ವಾ ಉಪ್ಪಜ್ಜಿತ್ವಾ ಭಙ್ಗುಪರಮಸಙ್ಖಾತೇನ ಅಭಾವಾಕಾರೇನ। ಅನಿಚ್ಚನ್ತಿ ನಿಚ್ಚಧುವತಾಭಾವತೋ। ಉಪ್ಪಾದವಯವನ್ತತಾಯಾತಿ ಖಣೇ ಖಣೇ ಉಪ್ಪಜ್ಜಿತ್ವಾ ನಿರುಜ್ಝನತೋ। ತಾವಕಾಲಿಕತಾಯಾತಿ ತಙ್ಖಣಿಕತಾಯ। ವಿಪರಿಣಾಮಕೋಟಿಯಾತಿ ವಿಪರಿಣಾಮವನ್ತತಾಯ। ಚಕ್ಖುಞ್ಹಿ ಉಪಾದಾಯ ವಿಕಾರಾಪಜ್ಜನೇನ ವಿಪರಿಣಮನ್ತಂ ವಿನಾಸಂ ಪಟಿಪೀಳಂ ಪಾಪುಣಾತಿ। ನಿಚ್ಚಪಟಿಕ್ಖೇಪತೋತಿ ನಿಚ್ಚತಾಯ ಪಟಿಕ್ಖಿಪಿತಬ್ಬತೋ ಲೇಸಮತ್ತಸ್ಸಪಿ ಅನುಪಲಬ್ಭನತೋ। ದುಕ್ಖಮನಟ್ಠೇನಾತಿ ನಿರನ್ತರದುಕ್ಖತಾಯ ದುಕ್ಖೇನ ಖಮಿತಬ್ಬತೋ। ದುಕ್ಖವತ್ಥುಕಟ್ಠೇನಾತಿ ನಾನಪ್ಪಕಾರದುಕ್ಖಾಧಿಟ್ಠಾನತೋ। ಸತತಸಮ್ಪೀಳನಟ್ಠೇನಾತಿ ಅಭಿಣ್ಹತಾಪಸಭಾವತೋ। ಸುಖಪಟಿಕ್ಖೇಪೇನಾತಿ ಸುಖಭಾವಸ್ಸ ಪಟಿಕ್ಖಿಪಿತಬ್ಬತೋ। ತಣ್ಹಾಗಾಹೋ ಮಮಂಕಾರಭಾವತೋ। ಮಾನಗಾಹೋ ಅಹಂಕಾರಭಾವತೋ। ದಿಟ್ಠಿಗಾಹೋ ‘‘ಅತ್ತಾ ಮೇ’’ತಿ ವಿಪಲ್ಲಾಸಭಾವತೋ। ವಿರಾಗವಸೇನಾತಿ ವಿರಾಗಗ್ಗಹಣೇನ। ತಥಾ ವಿಮುತ್ತಿವಸೇನಾತಿ ವಿಮುತ್ತಿಗ್ಗಹಣೇನ।

188-195.Ekavihārīti catūsupi iriyāpathesu ekākī hutvā viharanto. Vivekaṭṭhoti vivittaṭṭho, tenāha ‘‘nissaddo’’ti. Satiyā avippavasantoti satiyā avippavāsena ṭhito, sabbadā avijahanavasena pavatto. Ātāpīti vīriyasampannoti sabbaso kilesānaṃ ātāpanaparitāpanavasena pavattavīriyasamaṅgībhūto. Pahitattoti tasmiṃ visesādhigame pesitacitto, tattha ninno tappabbhāroti attho. Hutvā abhāvākārenāti uppattito pubbe avijjamāno paccayasamavāyena hutvā uppajjitvā bhaṅguparamasaṅkhātena abhāvākārena. Aniccanti niccadhuvatābhāvato. Uppādavayavantatāyāti khaṇe khaṇe uppajjitvā nirujjhanato. Tāvakālikatāyāti taṅkhaṇikatāya. Vipariṇāmakoṭiyāti vipariṇāmavantatāya. Cakkhuñhi upādāya vikārāpajjanena vipariṇamantaṃ vināsaṃ paṭipīḷaṃ pāpuṇāti. Niccapaṭikkhepatoti niccatāya paṭikkhipitabbato lesamattassapi anupalabbhanato. Dukkhamanaṭṭhenāti nirantaradukkhatāya dukkhena khamitabbato. Dukkhavatthukaṭṭhenāti nānappakāradukkhādhiṭṭhānato. Satatasampīḷanaṭṭhenāti abhiṇhatāpasabhāvato. Sukhapaṭikkhepenāti sukhabhāvassa paṭikkhipitabbato. Taṇhāgāho mamaṃkārabhāvato. Mānagāho ahaṃkārabhāvato. Diṭṭhigāho ‘‘attā me’’ti vipallāsabhāvato. Virāgavasenāti virāgaggahaṇena. Tathā vimuttivasenāti vimuttiggahaṇena.

ಪಸಾದಾವ ಗಹಿತಾ ದ್ವಾರಭಾವಪ್ಪತ್ತಸ್ಸ ಅಧಿಪ್ಪೇತತ್ತಾ। ಸಮ್ಮಸನಚಾರಚಿತ್ತಂ ದ್ವಾರಭೂತಮನೋತಿ ಅಧಿಪ್ಪಾಯೋ।

Pasādāva gahitā dvārabhāvappattassa adhippetattā. Sammasanacāracittaṃ dvārabhūtamanoti adhippāyo.

ಛಟ್ಠೇ ಆರಮ್ಮಣೇ ತೇಭೂಮಕಧಮ್ಮಾ ಸಮ್ಮಸನಚಾರಸ್ಸ ಅಧಿಪ್ಪೇತತ್ತಾ। ಯಥಾ ಪಠಮಸುತ್ತೇ ಪಞ್ಚ ಪಸಾದಾ ಗಹಿತಾ, ನ ಸಸಮ್ಭಾರಚಕ್ಖುಆದಯೋ, ಏವಂ ತತಿಯಸುತ್ತೇ ನ ಪಸಾದವತ್ಥುಕಚಿತ್ತಮೇವ ಗಹಿತಂ। ನ ತಂಸಮ್ಪಯುತ್ತಾ ಧಮ್ಮಾ। ಏವಞ್ಹಿ ಅವಧಾರಣಂ ಸಾತ್ಥಕಂ ಹೋತಿ ಅಞ್ಞಥಾ ತೇನ ಅಪನೇತಬ್ಬಸ್ಸ ಅಭಾವತೋ। ಸಬ್ಬತ್ಥಾತಿ ಸಬ್ಬೇಸು ಚತುತ್ಥಸುತ್ತಾದೀಸು। ಜವನಪ್ಪತ್ತಾತಿ ಜವನಚಿತ್ತಸಂಯುತ್ತಾ।

Chaṭṭhe ārammaṇe tebhūmakadhammā sammasanacārassa adhippetattā. Yathā paṭhamasutte pañca pasādā gahitā, na sasambhāracakkhuādayo, evaṃ tatiyasutte na pasādavatthukacittameva gahitaṃ. Na taṃsampayuttā dhammā. Evañhi avadhāraṇaṃ sātthakaṃ hoti aññathā tena apanetabbassa abhāvato. Sabbatthāti sabbesu catutthasuttādīsu. Javanappattāti javanacittasaṃyuttā.

ಚಕ್ಖುಸುತ್ತಾದಿವಣ್ಣನಾ ನಿಟ್ಠಿತಾ।

Cakkhusuttādivaṇṇanā niṭṭhitā.

Next: ೯. ಧಾತುಸುತ್ತವಣ್ಣನಾ • 9. Dhātusuttavaṇṇanā

ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧-೮. ಚಕ್ಖುಸುತ್ತಾದಿವಣ್ಣನಾ • 1-8. Cakkhusuttādivaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact