| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៤. ឱក្កន្តសំយុត្តំ
4. Okkantasaṃyuttaṃ
១. ចក្ខុសុត្តំ
1. Cakkhusuttaṃ
៣០២. សាវត្ថិនិទានំ ។ ‘‘ចក្ខុំ, ភិក្ខវេ, អនិច្ចំ វិបរិណាមិ អញ្ញថាភាវិ; សោតំ អនិច្ចំ វិបរិណាមិ អញ្ញថាភាវិ; ឃានំ អនិច្ចំ វិបរិណាមិ អញ្ញថាភាវិ; ជិវ្ហា អនិច្ចា វិបរិណាមី អញ្ញថាភាវី 1; កាយោ អនិច្ចោ វិបរិណាមី អញ្ញថាភាវី; មនោ អនិច្ចោ វិបរិណាមី អញ្ញថាភាវី។ យោ, ភិក្ខវេ, ឥមេ ធម្មេ ឯវំ សទ្ទហតិ អធិមុច្ចតិ – អយំ វុច្ចតិ សទ្ធានុសារី, ឱក្កន្តោ សម្មត្តនិយាមំ, សប្បុរិសភូមិំ ឱក្កន្តោ, វីតិវត្តោ បុថុជ្ជនភូមិំ; អភព្ពោ តំ កម្មំ កាតុំ, យំ កម្មំ កត្វា និរយំ វា តិរច្ឆានយោនិំ វា បេត្តិវិសយំ វា ឧបបជ្ជេយ្យ; អភព្ពោ ច 2 តាវ កាលំ កាតុំ យាវ ន សោតាបត្តិផលំ សច្ឆិករោតិ’’។
302. Sāvatthinidānaṃ . ‘‘Cakkhuṃ, bhikkhave, aniccaṃ vipariṇāmi aññathābhāvi; sotaṃ aniccaṃ vipariṇāmi aññathābhāvi; ghānaṃ aniccaṃ vipariṇāmi aññathābhāvi; jivhā aniccā vipariṇāmī aññathābhāvī 3; kāyo anicco vipariṇāmī aññathābhāvī; mano anicco vipariṇāmī aññathābhāvī. Yo, bhikkhave, ime dhamme evaṃ saddahati adhimuccati – ayaṃ vuccati saddhānusārī, okkanto sammattaniyāmaṃ, sappurisabhūmiṃ okkanto, vītivatto puthujjanabhūmiṃ; abhabbo taṃ kammaṃ kātuṃ, yaṃ kammaṃ katvā nirayaṃ vā tiracchānayoniṃ vā pettivisayaṃ vā upapajjeyya; abhabbo ca 4 tāva kālaṃ kātuṃ yāva na sotāpattiphalaṃ sacchikaroti’’.
‘‘យស្ស ខោ, ភិក្ខវេ, ឥមេ ធម្មា ឯវំ បញ្ញាយ មត្តសោ និជ្ឈានំ ខមន្តិ, អយំ វុច្ចតិ – ‘ធម្មានុសារី, ឱក្កន្តោ សម្មត្តនិយាមំ, សប្បុរិសភូមិំ ឱក្កន្តោ, វីតិវត្តោ បុថុជ្ជនភូមិំ; អភព្ពោ តំ កម្មំ កាតុំ, យំ កម្មំ កត្វា និរយំ វា តិរច្ឆានយោនិំ វា បេត្តិវិសយំ វា ឧបបជ្ជេយ្យ; អភព្ពោ ច តាវ កាលំ កាតុំ យាវ ន សោតាបត្តិផលំ សច្ឆិករោតិ’។ យោ, ភិក្ខវេ, ឥមេ ធម្មេ ឯវំ បជានាតិ ឯវំ បស្សតិ, អយំ វុច្ចតិ – ‘សោតាបន្នោ អវិនិបាតធម្មោ និយតោ សម្ពោធិបរាយនោ’’’តិ។ បឋមំ។
‘‘Yassa kho, bhikkhave, ime dhammā evaṃ paññāya mattaso nijjhānaṃ khamanti, ayaṃ vuccati – ‘dhammānusārī, okkanto sammattaniyāmaṃ, sappurisabhūmiṃ okkanto, vītivatto puthujjanabhūmiṃ; abhabbo taṃ kammaṃ kātuṃ, yaṃ kammaṃ katvā nirayaṃ vā tiracchānayoniṃ vā pettivisayaṃ vā upapajjeyya; abhabbo ca tāva kālaṃ kātuṃ yāva na sotāpattiphalaṃ sacchikaroti’. Yo, bhikkhave, ime dhamme evaṃ pajānāti evaṃ passati, ayaṃ vuccati – ‘sotāpanno avinipātadhammo niyato sambodhiparāyano’’’ti. Paṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១-១០. ចក្ខុសុត្តាទិវណ្ណនា • 1-10. Cakkhusuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១-១០. ចក្ខុសុត្តាទិវណ្ណនា • 1-10. Cakkhusuttādivaṇṇanā
