| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೪. ಓಕ್ಕನ್ತಸಂಯುತ್ತಂ
4. Okkantasaṃyuttaṃ
೧. ಚಕ್ಖುಸುತ್ತಂ
1. Cakkhusuttaṃ
೩೦೨. ಸಾವತ್ಥಿನಿದಾನಂ । ‘‘ಚಕ್ಖುಂ, ಭಿಕ್ಖವೇ, ಅನಿಚ್ಚಂ ವಿಪರಿಣಾಮಿ ಅಞ್ಞಥಾಭಾವಿ; ಸೋತಂ ಅನಿಚ್ಚಂ ವಿಪರಿಣಾಮಿ ಅಞ್ಞಥಾಭಾವಿ; ಘಾನಂ ಅನಿಚ್ಚಂ ವಿಪರಿಣಾಮಿ ಅಞ್ಞಥಾಭಾವಿ; ಜಿವ್ಹಾ ಅನಿಚ್ಚಾ ವಿಪರಿಣಾಮೀ ಅಞ್ಞಥಾಭಾವೀ 1; ಕಾಯೋ ಅನಿಚ್ಚೋ ವಿಪರಿಣಾಮೀ ಅಞ್ಞಥಾಭಾವೀ; ಮನೋ ಅನಿಚ್ಚೋ ವಿಪರಿಣಾಮೀ ಅಞ್ಞಥಾಭಾವೀ। ಯೋ, ಭಿಕ್ಖವೇ, ಇಮೇ ಧಮ್ಮೇ ಏವಂ ಸದ್ದಹತಿ ಅಧಿಮುಚ್ಚತಿ – ಅಯಂ ವುಚ್ಚತಿ ಸದ್ಧಾನುಸಾರೀ, ಓಕ್ಕನ್ತೋ ಸಮ್ಮತ್ತನಿಯಾಮಂ, ಸಪ್ಪುರಿಸಭೂಮಿಂ ಓಕ್ಕನ್ತೋ, ವೀತಿವತ್ತೋ ಪುಥುಜ್ಜನಭೂಮಿಂ; ಅಭಬ್ಬೋ ತಂ ಕಮ್ಮಂ ಕಾತುಂ, ಯಂ ಕಮ್ಮಂ ಕತ್ವಾ ನಿರಯಂ ವಾ ತಿರಚ್ಛಾನಯೋನಿಂ ವಾ ಪೇತ್ತಿವಿಸಯಂ ವಾ ಉಪಪಜ್ಜೇಯ್ಯ; ಅಭಬ್ಬೋ ಚ 2 ತಾವ ಕಾಲಂ ಕಾತುಂ ಯಾವ ನ ಸೋತಾಪತ್ತಿಫಲಂ ಸಚ್ಛಿಕರೋತಿ’’।
302. Sāvatthinidānaṃ . ‘‘Cakkhuṃ, bhikkhave, aniccaṃ vipariṇāmi aññathābhāvi; sotaṃ aniccaṃ vipariṇāmi aññathābhāvi; ghānaṃ aniccaṃ vipariṇāmi aññathābhāvi; jivhā aniccā vipariṇāmī aññathābhāvī 3; kāyo anicco vipariṇāmī aññathābhāvī; mano anicco vipariṇāmī aññathābhāvī. Yo, bhikkhave, ime dhamme evaṃ saddahati adhimuccati – ayaṃ vuccati saddhānusārī, okkanto sammattaniyāmaṃ, sappurisabhūmiṃ okkanto, vītivatto puthujjanabhūmiṃ; abhabbo taṃ kammaṃ kātuṃ, yaṃ kammaṃ katvā nirayaṃ vā tiracchānayoniṃ vā pettivisayaṃ vā upapajjeyya; abhabbo ca 4 tāva kālaṃ kātuṃ yāva na sotāpattiphalaṃ sacchikaroti’’.
‘‘ಯಸ್ಸ ಖೋ, ಭಿಕ್ಖವೇ, ಇಮೇ ಧಮ್ಮಾ ಏವಂ ಪಞ್ಞಾಯ ಮತ್ತಸೋ ನಿಜ್ಝಾನಂ ಖಮನ್ತಿ, ಅಯಂ ವುಚ್ಚತಿ – ‘ಧಮ್ಮಾನುಸಾರೀ, ಓಕ್ಕನ್ತೋ ಸಮ್ಮತ್ತನಿಯಾಮಂ, ಸಪ್ಪುರಿಸಭೂಮಿಂ ಓಕ್ಕನ್ತೋ, ವೀತಿವತ್ತೋ ಪುಥುಜ್ಜನಭೂಮಿಂ; ಅಭಬ್ಬೋ ತಂ ಕಮ್ಮಂ ಕಾತುಂ, ಯಂ ಕಮ್ಮಂ ಕತ್ವಾ ನಿರಯಂ ವಾ ತಿರಚ್ಛಾನಯೋನಿಂ ವಾ ಪೇತ್ತಿವಿಸಯಂ ವಾ ಉಪಪಜ್ಜೇಯ್ಯ; ಅಭಬ್ಬೋ ಚ ತಾವ ಕಾಲಂ ಕಾತುಂ ಯಾವ ನ ಸೋತಾಪತ್ತಿಫಲಂ ಸಚ್ಛಿಕರೋತಿ’। ಯೋ, ಭಿಕ್ಖವೇ, ಇಮೇ ಧಮ್ಮೇ ಏವಂ ಪಜಾನಾತಿ ಏವಂ ಪಸ್ಸತಿ, ಅಯಂ ವುಚ್ಚತಿ – ‘ಸೋತಾಪನ್ನೋ ಅವಿನಿಪಾತಧಮ್ಮೋ ನಿಯತೋ ಸಮ್ಬೋಧಿಪರಾಯನೋ’’’ತಿ। ಪಠಮಂ।
‘‘Yassa kho, bhikkhave, ime dhammā evaṃ paññāya mattaso nijjhānaṃ khamanti, ayaṃ vuccati – ‘dhammānusārī, okkanto sammattaniyāmaṃ, sappurisabhūmiṃ okkanto, vītivatto puthujjanabhūmiṃ; abhabbo taṃ kammaṃ kātuṃ, yaṃ kammaṃ katvā nirayaṃ vā tiracchānayoniṃ vā pettivisayaṃ vā upapajjeyya; abhabbo ca tāva kālaṃ kātuṃ yāva na sotāpattiphalaṃ sacchikaroti’. Yo, bhikkhave, ime dhamme evaṃ pajānāti evaṃ passati, ayaṃ vuccati – ‘sotāpanno avinipātadhammo niyato sambodhiparāyano’’’ti. Paṭhamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧-೧೦. ಚಕ್ಖುಸುತ್ತಾದಿವಣ್ಣನಾ • 1-10. Cakkhusuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧-೧೦. ಚಕ್ಖುಸುತ್ತಾದಿವಣ್ಣನಾ • 1-10. Cakkhusuttādivaṇṇanā
