| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. උප්‌පාදසංයුත්‌තං
5. Uppādasaṃyuttaṃ
1. චක්‌ඛුසුත්‌තං
1. Cakkhusuttaṃ
312. සාවත්‌ථිනිදානං . ‘‘යො ඛො, භික්‌ඛවෙ, චක්‌ඛුස්‌ස උප්‌පාදො ඨිති අභිනිබ්‌බත්‌ති පාතුභාවො, දුක්‌ඛස්‌සෙසො උප්‌පාදො, රොගානං ඨිති, ජරාමරණස්‌ස පාතුභාවො. යො සොතස්‌ස උප්‌පාදො ඨිති…පෙ.… යො ඝානස්‌ස උප්‌පාදො ඨිති… යො ජිව්‌හාය උප්‌පාදො ඨිති… යො කායස්‌ස උප්‌පාදො ඨිති… යො මනස්‌ස උප්‌පාදො ඨිති අභිනිබ්‌බත්‌ති පාතුභාවො, දුක්‌ඛස්‌සෙසො උප්‌පාදො, රොගානං ඨිති, ජරාමරණස්‌ස පාතුභාවො. යො ච, භික්‌ඛවෙ, චක්‌ඛුස්‌ස නිරොධො වූපසමො අත්‌ථඞ්‌ගමො, දුක්‌ඛස්‌සෙසො නිරොධො, රොගානං වූපසමො, ජරාමරණස්‌ස අත්‌ථඞ්‌ගමො. යො සොතස්‌ස නිරොධො…පෙ.… යො ඝානස්‌ස නිරොධො… යො ජිව්‌හාය නිරොධො… යො කායස්‌ස නිරොධො… යො මනස්‌ස නිරොධො වූපසමො අත්‌ථඞ්‌ගමො, දුක්‌ඛස්‌සෙසො නිරොධො, රොගානං වූපසමො, ජරාමරණස්‌ස අත්‌ථඞ්‌ගමො’’ති. පඨමං.
312. Sāvatthinidānaṃ . ‘‘Yo kho, bhikkhave, cakkhussa uppādo ṭhiti abhinibbatti pātubhāvo, dukkhasseso uppādo, rogānaṃ ṭhiti, jarāmaraṇassa pātubhāvo. Yo sotassa uppādo ṭhiti…pe… yo ghānassa uppādo ṭhiti… yo jivhāya uppādo ṭhiti… yo kāyassa uppādo ṭhiti… yo manassa uppādo ṭhiti abhinibbatti pātubhāvo, dukkhasseso uppādo, rogānaṃ ṭhiti, jarāmaraṇassa pātubhāvo. Yo ca, bhikkhave, cakkhussa nirodho vūpasamo atthaṅgamo, dukkhasseso nirodho, rogānaṃ vūpasamo, jarāmaraṇassa atthaṅgamo. Yo sotassa nirodho…pe… yo ghānassa nirodho… yo jivhāya nirodho… yo kāyassa nirodho… yo manassa nirodho vūpasamo atthaṅgamo, dukkhasseso nirodho, rogānaṃ vūpasamo, jarāmaraṇassa atthaṅgamo’’ti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. උප්‌පාදසංයුත්‌තවණ්‌ණනා • 5. Uppādasaṃyuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. උප්‌පාදසංයුත්‌තවණ්‌ණනා • 5. Uppādasaṃyuttavaṇṇanā
