| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
६. चालासुत्तं
6. Cālāsuttaṃ
१६७. सावत्थिनिदानं। अथ खो चाला भिक्खुनी पुब्बण्हसमयं निवासेत्वा…पे॰… अञ्ञतरस्मिं रुक्खमूले दिवाविहारं निसीदि। अथ खो मारो पापिमा येन चाला भिक्खुनी तेनुपसङ्कमि; उपसङ्कमित्वा चालं भिक्खुनिं एतदवोच – ‘‘किं नु त्वं, भिक्खुनि, न रोचेसी’’ति? ‘‘जातिं ख्वाहं, आवुसो, न रोचेमी’’ति।
167. Sāvatthinidānaṃ. Atha kho cālā bhikkhunī pubbaṇhasamayaṃ nivāsetvā…pe… aññatarasmiṃ rukkhamūle divāvihāraṃ nisīdi. Atha kho māro pāpimā yena cālā bhikkhunī tenupasaṅkami; upasaṅkamitvā cālaṃ bhikkhuniṃ etadavoca – ‘‘kiṃ nu tvaṃ, bhikkhuni, na rocesī’’ti? ‘‘Jātiṃ khvāhaṃ, āvuso, na rocemī’’ti.
‘‘किं नु जातिं न रोचेसि, जातो कामानि भुञ्जति।
‘‘Kiṃ nu jātiṃ na rocesi, jāto kāmāni bhuñjati;
को नु तं इदमादपयि, जातिं मा रोच 1 भिक्खुनी’’ति॥
Ko nu taṃ idamādapayi, jātiṃ mā roca 2 bhikkhunī’’ti.
बन्धं वधं परिक्लेसं, तस्मा जातिं न रोचये॥
Bandhaṃ vadhaṃ pariklesaṃ, tasmā jātiṃ na rocaye.
‘‘बुद्धो धम्ममदेसेसि, जातिया समतिक्कमं।
‘‘Buddho dhammamadesesi, jātiyā samatikkamaṃ;
सब्बदुक्खप्पहानाय, सो मं सच्चे निवेसयि॥
Sabbadukkhappahānāya, so maṃ sacce nivesayi.
‘‘ये च रूपूपगा सत्ता, ये च अरूपट्ठायिनो।
‘‘Ye ca rūpūpagā sattā, ye ca arūpaṭṭhāyino;
निरोधं अप्पजानन्ता, आगन्तारो पुनब्भव’’न्ति॥
Nirodhaṃ appajānantā, āgantāro punabbhava’’nti.
अथ खो मारो पापिमा ‘‘जानाति मं चाला भिक्खुनी’’ति दुक्खी दुम्मनो तत्थेवन्तरधायीति।
Atha kho māro pāpimā ‘‘jānāti maṃ cālā bhikkhunī’’ti dukkhī dummano tatthevantaradhāyīti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ६. चालासुत्तवण्णना • 6. Cālāsuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ६. चालासुत्तवण्णना • 6. Cālāsuttavaṇṇanā
