| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៦. ចាលាសុត្តំ
6. Cālāsuttaṃ
១៦៧. សាវត្ថិនិទានំ។ អថ ខោ ចាលា ភិក្ខុនី បុព្ពណ្ហសមយំ និវាសេត្វា…បេ.… អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា យេន ចាលា ភិក្ខុនី តេនុបសង្កមិ; ឧបសង្កមិត្វា ចាលំ ភិក្ខុនិំ ឯតទវោច – ‘‘កិំ នុ ត្វំ, ភិក្ខុនិ, ន រោចេសី’’តិ? ‘‘ជាតិំ ខ្វាហំ, អាវុសោ, ន រោចេមី’’តិ។
167. Sāvatthinidānaṃ. Atha kho cālā bhikkhunī pubbaṇhasamayaṃ nivāsetvā…pe… aññatarasmiṃ rukkhamūle divāvihāraṃ nisīdi. Atha kho māro pāpimā yena cālā bhikkhunī tenupasaṅkami; upasaṅkamitvā cālaṃ bhikkhuniṃ etadavoca – ‘‘kiṃ nu tvaṃ, bhikkhuni, na rocesī’’ti? ‘‘Jātiṃ khvāhaṃ, āvuso, na rocemī’’ti.
‘‘កិំ នុ ជាតិំ ន រោចេសិ, ជាតោ កាមានិ ភុញ្ជតិ;
‘‘Kiṃ nu jātiṃ na rocesi, jāto kāmāni bhuñjati;
កោ នុ តំ ឥទមាទបយិ, ជាតិំ មា រោច 1 ភិក្ខុនី’’តិ។
Ko nu taṃ idamādapayi, jātiṃ mā roca 2 bhikkhunī’’ti.
ពន្ធំ វធំ បរិក្លេសំ, តស្មា ជាតិំ ន រោចយេ។
Bandhaṃ vadhaṃ pariklesaṃ, tasmā jātiṃ na rocaye.
‘‘ពុទ្ធោ ធម្មមទេសេសិ, ជាតិយា សមតិក្កមំ;
‘‘Buddho dhammamadesesi, jātiyā samatikkamaṃ;
សព្ពទុក្ខប្បហានាយ, សោ មំ សច្ចេ និវេសយិ។
Sabbadukkhappahānāya, so maṃ sacce nivesayi.
‘‘យេ ច រូបូបគា សត្តា, យេ ច អរូបដ្ឋាយិនោ;
‘‘Ye ca rūpūpagā sattā, ye ca arūpaṭṭhāyino;
និរោធំ អប្បជានន្តា, អាគន្តារោ បុនព្ភវ’’ន្តិ។
Nirodhaṃ appajānantā, āgantāro punabbhava’’nti.
អថ ខោ មារោ បាបិមា ‘‘ជានាតិ មំ ចាលា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។
Atha kho māro pāpimā ‘‘jānāti maṃ cālā bhikkhunī’’ti dukkhī dummano tatthevantaradhāyīti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦. ចាលាសុត្តវណ្ណនា • 6. Cālāsuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៦. ចាលាសុត្តវណ្ណនា • 6. Cālāsuttavaṇṇanā
