| Library / Tipiṭaka / д̇ибидага • Tipiṭaka / т̇зрийг̇аат̇аа-адтагат̇аа • Therīgāthā-aṭṭhakathā |
2. жаалаат̇зрийг̇аат̇ааван̣н̣анаа
2. Cālātherīgāthāvaṇṇanā
сад̇им̣ убадтабзд̇ваанаад̇иаад̣̇игаа жаалааяа т̇зрияаа г̇аат̇аа. аяамби буримаб̣уд̣̇д̇хзсу гад̇аад̇хигаараа д̇ад̇т̇а д̇ад̇т̇а бхавз виваддуубаниссаяам̣ гусалам̣ убажинид̇ваа имасмим̣ б̣уд̣̇д̇хуббаад̣̇з маг̇ад̇хзсу наалагаг̇аамз руубасаариб̣раахман̣ияаа гужчимхи ниб̣б̣ад̇д̇и. д̇ассаа наамаг̇г̇ахан̣ад̣̇ивасз жаалаад̇и наамам̣ агам̣су, д̇ассаа ганидтааяа убажаалаад̇и, ат̇а д̇ассаа ганидтааяа сийсуубажаалаад̇и . имаа д̇иссоби д̇хаммасзнаабад̇исса ганидтабхаг̇инияо, имаасам̣ буд̇д̇аанамби д̇ин̣н̣ам̣ ид̣̇амзва наамам̣. яз санд̇хааяа т̇зраг̇аат̇ааяа ‘‘жаалз убажаалз сийсуубажаалз’’д̇и (т̇зраг̇аа. 42) ааг̇ад̇ам̣.
Satiṃupaṭṭhapetvānātiādikā cālāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinitvā imasmiṃ buddhuppāde magadhesu nālakagāme rūpasāribrāhmaṇiyā kucchimhi nibbatti. Tassā nāmaggahaṇadivase cālāti nāmaṃ akaṃsu, tassā kaniṭṭhāya upacālāti, atha tassā kaniṭṭhāya sīsūpacālāti . Imā tissopi dhammasenāpatissa kaniṭṭhabhaginiyo, imāsaṃ puttānampi tiṇṇaṃ idameva nāmaṃ. Ye sandhāya theragāthāya ‘‘cāle upacāle sīsūpacāle’’ti (theragā. 42) āgataṃ.
имаа бана д̇иссоби бхаг̇инияо ‘‘д̇хаммасзнаабад̇и баб̣б̣аж̇ий’’д̇и суд̇ваа ‘‘на хи нууна со ораго д̇хаммавинаяо, на саа оригаа баб̣б̣аж̇ж̇аа, яад̇т̇а амхаагам̣ аяяо баб̣б̣аж̇ид̇о’’д̇и уссаахаж̇аад̇аа д̇иб̣б̣ажчанд̣̇аа ассумукам̣ руд̣̇амаанам̣ н̃аад̇ибариж̇анам̣ бахааяа баб̣б̣аж̇им̣су. баб̣б̣аж̇ид̇ваа жа гхадзнд̇ияо вааяаманд̇ияо нажирассзва арахад̇д̇ам̣ баабун̣им̣су. арахад̇д̇ам̣ бана бад̇ваа ниб̣б̣аанасукзна паласукзна вихаранд̇и.
Imā pana tissopi bhaginiyo ‘‘dhammasenāpati pabbajī’’ti sutvā ‘‘na hi nūna so orako dhammavinayo, na sā orikā pabbajjā, yattha amhākaṃ ayyo pabbajito’’ti ussāhajātā tibbacchandā assumukhaṃ rudamānaṃ ñātiparijanaṃ pahāya pabbajiṃsu. Pabbajitvā ca ghaṭentiyo vāyamantiyo nacirasseva arahattaṃ pāpuṇiṃsu. Arahattaṃ pana patvā nibbānasukhena phalasukhena viharanti.
д̇аасу жаалаа бхигкуний згад̣̇ивасам̣ бажчаабхад̇д̇ам̣ бин̣д̣абаад̇абадигганд̇аа анд̇хаванам̣ бависид̇ваа д̣̇иваавихаарам̣ нисийд̣̇и. ат̇а нам̣ мааро убасан̇гамид̇ваа гаамзхи убанзси. яам̣ санд̇хааяа суд̇д̇з вуд̇д̇ам̣ –
Tāsu cālā bhikkhunī ekadivasaṃ pacchābhattaṃ piṇḍapātapaṭikkantā andhavanaṃ pavisitvā divāvihāraṃ nisīdi. Atha naṃ māro upasaṅkamitvā kāmehi upanesi. Yaṃ sandhāya sutte vuttaṃ –
‘‘ат̇а ко жаалаа бхигкуний буб̣б̣ан̣хасамаяам̣ ниваасзд̇ваа бад̇д̇ажийварам̣ аад̣̇ааяа саавад̇т̇им̣ бин̣д̣ааяа баависи. саавад̇т̇ияам̣ бин̣д̣ааяа жарид̇ваа бажчаабхад̇д̇ам̣ бин̣д̣абаад̇абадигганд̇аа язна анд̇хаванам̣, д̇знубасан̇гами д̣̇иваавихаарааяа. анд̇хаванам̣ аж̇жхог̇аахзд̇ваа ан̃н̃ад̇арасмим̣ ругкамуулз д̣̇иваавихаарам̣ нисийд̣̇и. ат̇а ко мааро баабимаа язна жаалаа бхигкуний, д̇знубасан̇гами, убасан̇гамид̇ваа жаалам̣ бхигкуним̣ зд̇ад̣̇авожаа’’д̇и (сам̣. ни. 1.167).
‘‘Atha kho cālā bhikkhunī pubbaṇhasamayaṃ nivāsetvā pattacīvaraṃ ādāya sāvatthiṃ piṇḍāya pāvisi. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena andhavanaṃ, tenupasaṅkami divāvihārāya. Andhavanaṃ ajjhogāhetvā aññatarasmiṃ rukkhamūle divāvihāraṃ nisīdi. Atha kho māro pāpimā yena cālā bhikkhunī, tenupasaṅkami, upasaṅkamitvā cālaṃ bhikkhuniṃ etadavocā’’ti (saṃ. ni. 1.167).
анд̇хаванамхи д̣̇иваавихаарам̣ нисиннам̣ мааро убасан̇гамид̇ваа б̣рахмажарияаваасад̇о вижчинд̣̇ид̇угаамо ‘‘гам̣ ну уд̣̇д̣̇исса мун̣д̣аасий’’д̇иаад̣̇им̣ бужчи. ат̇асса сад̇т̇у г̇ун̣з д̇хаммасса жа нияяаанигабхаавам̣ багаасзд̇ваа ад̇д̇ано гад̇агижжабхаававибхааванзна д̇асса висаяаад̇иггамам̣ бавзд̣̇зси. д̇ам̣ суд̇ваа мааро д̣̇угкий д̣̇уммано д̇ад̇т̇званд̇арад̇хааяи. ат̇а саа ад̇д̇анаа маарзна жа бхаасид̇аа г̇аат̇аа уд̣̇аанавасзна гат̇знд̇ий –
Andhavanamhi divāvihāraṃ nisinnaṃ māro upasaṅkamitvā brahmacariyavāsato vicchinditukāmo ‘‘kaṃ nu uddissa muṇḍāsī’’tiādiṃ pucchi. Athassa satthu guṇe dhammassa ca niyyānikabhāvaṃ pakāsetvā attano katakiccabhāvavibhāvanena tassa visayātikkamaṃ pavedesi. Taṃ sutvā māro dukkhī dummano tatthevantaradhāyi. Atha sā attanā mārena ca bhāsitā gāthā udānavasena kathentī –
182.
182.
‘‘сад̇им̣ убадтабзд̇ваана, бхигкуний бхаавид̇инд̣̇рияаа;
‘‘Satiṃ upaṭṭhapetvāna, bhikkhunī bhāvitindriyā;
бадивиж̇жхи бад̣̇ам̣ санд̇ам̣, сан̇кааруубасамам̣ сукам̣.
Paṭivijjhi padaṃ santaṃ, saṅkhārūpasamaṃ sukhaṃ.
183.
183.
‘‘гам̣ ну уд̣̇д̣̇исса мун̣д̣ааси, саман̣ий вияа д̣̇иссад̇и;
‘‘Kaṃ nu uddissa muṇḍāsi, samaṇī viya dissati;
на жа рожзси баасан̣д̣з, гимид̣̇ам̣ жараси момухаа.
Na ca rocesi pāsaṇḍe, kimidaṃ carasi momuhā.
184.
184.
‘‘ид̇о б̣ахид̣̇д̇хаа баасан̣д̣аа, д̣̇идтияо убаниссид̇аа;
‘‘Ito bahiddhā pāsaṇḍā, diṭṭhiyo upanissitā;
на д̇з д̇хаммам̣ виж̇аананд̇и, на д̇з д̇хаммасса говид̣̇аа.
Na te dhammaṃ vijānanti, na te dhammassa kovidā.
185.
185.
‘‘ад̇т̇и сагяагулз ж̇аад̇о, б̣уд̣̇д̇хо аббадибуг̇г̇ало;
‘‘Atthi sakyakule jāto, buddho appaṭipuggalo;
со мз д̇хаммамад̣̇зсзси, д̣̇идтийнам̣ самад̇иггамам̣.
So me dhammamadesesi, diṭṭhīnaṃ samatikkamaṃ.
186.
186.
‘‘д̣̇угкам̣ д̣̇угкасамуббаад̣̇ам̣, д̣̇угкасса жа ад̇иггамам̣;
‘‘Dukkhaṃ dukkhasamuppādaṃ, dukkhassa ca atikkamaṃ;
арияам̣ жадтан̇г̇игам̣ маг̇г̇ам̣, д̣̇угкуубасамаг̇ааминам̣.
Ariyaṃ caṭṭhaṅgikaṃ maggaṃ, dukkhūpasamagāminaṃ.
187.
187.
‘‘д̇ассаахам̣ важанам̣ суд̇ваа, вихарим̣ саасанз рад̇аа;
‘‘Tassāhaṃ vacanaṃ sutvā, vihariṃ sāsane ratā;
д̇иссо виж̇ж̇аа ануббад̇д̇аа, гад̇ам̣ б̣уд̣̇д̇хасса саасанам̣.
Tisso vijjā anuppattā, kataṃ buddhassa sāsanaṃ.
188.
188.
‘‘саб̣б̣ад̇т̇а вихад̇аа нанд̣̇ий, д̇амогканд̇хо бад̣̇аалид̇о;
‘‘Sabbattha vihatā nandī, tamokkhandho padālito;
звам̣ ж̇аанаахи баабима, нихад̇о д̇вамаси анд̇агаа’’д̇и. –
Evaṃ jānāhi pāpima, nihato tvamasi antakā’’ti. –
имаа г̇аат̇аа абхааси.
Imā gāthā abhāsi.
д̇ад̇т̇а сад̇им̣ убадтабзд̇ваанаад̇и сад̇ибадтаанабхааванаавасзна гааяаад̣̇ийсу асубхад̣̇угкаанижжаанад̇д̇авасзна сад̇им̣ судту убадтид̇ам̣ гад̇ваа. бхигкунийд̇и ад̇д̇аанам̣ санд̇хааяа вад̣̇ад̇и. бхаавид̇инд̣̇рияаад̇и арияамаг̇г̇абхааванааяа бхаавид̇асад̣̇д̇хаад̣̇ибан̃жинд̣̇рияаа. бадивиж̇жхи бад̣̇ам̣ санд̇анд̇и санд̇ам̣ бад̣̇ам̣ ниб̣б̣аанам̣ сажчигирияаабадивзд̇хзна бадивиж̇жхи сажчаагааси. сан̇кааруубасаманд̇и саб̣б̣асан̇каараанам̣ убасамахзд̇убхууд̇ам̣. суканд̇и ажжанд̇асукам̣.
Tattha satiṃ upaṭṭhapetvānāti satipaṭṭhānabhāvanāvasena kāyādīsu asubhadukkhāniccānattavasena satiṃ suṭṭhu upaṭṭhitaṃ katvā. Bhikkhunīti attānaṃ sandhāya vadati. Bhāvitindriyāti ariyamaggabhāvanāya bhāvitasaddhādipañcindriyā. Paṭivijjhi padaṃ santanti santaṃ padaṃ nibbānaṃ sacchikiriyāpaṭivedhena paṭivijjhi sacchākāsi. Saṅkhārūpasamanti sabbasaṅkhārānaṃ upasamahetubhūtaṃ. Sukhanti accantasukhaṃ.
‘‘гам̣ ну уд̣̇д̣̇иссаа’’д̇и г̇аат̇аа маарзна вуд̇д̇аа. д̇ад̇рааяам̣ сан̇кзбад̇т̇о – имасмим̣ логз б̣ахуу самаяаа д̇зсан̃жа д̣̇зсзд̇ааро б̣ахуу зва д̇ид̇т̇агараа, д̇зсу гам̣ ну ко д̇вам̣ уд̣̇д̣̇исса мун̣д̣ааси мун̣д̣ид̇агзсаа аси. на гзвалам̣ мун̣д̣аава, ат̇а ко гаасаавад̇хааран̣зна жа саман̣ий вияа д̣̇иссад̇и. на жа рожзси баасан̣д̣зд̇и д̇аабасабариб̣б̣ааж̇агаад̣̇ийнам̣ аад̣̇аасабхууд̇з баасан̣д̣з д̇з д̇з самаяанд̇арз нзва рожзси. гимид̣̇ам̣ жараси момухаад̇и гим̣ наамид̣̇ам̣, яам̣ баасан̣д̣авихид̇ам̣ уж̇ум̣ ниб̣б̣аанамаг̇г̇ам̣ бахааяа аж̇ж̇а гаалигам̣ гумаг̇г̇ам̣ бадибаж̇ж̇анд̇ий ад̇ивияа муул̣хаа жараси бариб̣бхамасийд̇и.
‘‘Kaṃ nu uddissā’’ti gāthā mārena vuttā. Tatrāyaṃ saṅkhepattho – imasmiṃ loke bahū samayā tesañca desetāro bahū eva titthakarā, tesu kaṃ nu kho tvaṃ uddissa muṇḍāsi muṇḍitakesā asi. Na kevalaṃ muṇḍāva, atha kho kāsāvadhāraṇena ca samaṇī viya dissati. Na ca rocesi pāsaṇḍeti tāpasaparibbājakādīnaṃ ādāsabhūte pāsaṇḍe te te samayantare neva rocesi. Kimidaṃ carasi momuhāti kiṃ nāmidaṃ, yaṃ pāsaṇḍavihitaṃ ujuṃ nibbānamaggaṃ pahāya ajja kālikaṃ kumaggaṃ paṭipajjantī ativiya mūḷhā carasi paribbhamasīti.
д̇ам̣ суд̇ваа т̇зрий бадиважанад̣̇аанамукзна д̇ам̣ д̇аж̇ж̇знд̇ий ‘‘ид̇о б̣ахид̣̇д̇хаа’’д̇иаад̣̇имааха. д̇ад̇т̇а ид̇о б̣ахид̣̇д̇хаа баасан̣д̣аа наама ид̇о саммаасамб̣уд̣̇д̇хасса саасанад̇о б̣ахид̣̇д̇хаа гудийсагаб̣ахугаараад̣̇игаа. д̇з хи сад̇д̇аанам̣ д̇ан̣хаабаасам̣ д̣̇идтибаасан̃жа д̣знд̇и од̣д̣знд̇ийд̇и баасан̣д̣аад̇и вужжад̇и. д̇знааха – ‘‘д̣̇идтияо убаниссид̇аа’’д̇и сассад̇ад̣̇идтиг̇ад̇аани убзжжа ниссид̇аа, д̣̇идтиг̇ад̇аани аад̣̇ияим̣сууд̇и ад̇т̇о. яад̣̇аг̇г̇зна жа д̣̇идтисанниссид̇аа, д̇ад̣̇аг̇г̇зна баасан̣д̣асанниссид̇аа. на д̇з д̇хаммам̣ виж̇аананд̇ийд̇и яз баасан̣д̣ино сассад̇ад̣̇идтиг̇ад̇асанниссид̇аа ‘‘аяам̣ бавад̇д̇и звам̣ бавад̇д̇ад̇ий’’д̇и бавад̇д̇ид̇хаммамби яат̇аабхууд̇ам̣ на виж̇аананд̇и. на д̇з д̇хаммасса говид̣̇аад̇и ‘‘аяам̣ нивад̇д̇и звам̣ нивад̇д̇ад̇ий’’д̇и нивад̇д̇ид̇хаммассааби агусалаа, бавад̇д̇ид̇хаммамаг̇г̇зби хи д̇з сам̣муул̣хаа, гиман̇г̇ам̣ бана нивад̇д̇ид̇хаммзд̇и.
Taṃ sutvā therī paṭivacanadānamukhena taṃ tajjentī ‘‘ito bahiddhā’’tiādimāha. Tattha ito bahiddhā pāsaṇḍā nāma ito sammāsambuddhassa sāsanato bahiddhā kuṭīsakabahukārādikā. Te hi sattānaṃ taṇhāpāsaṃ diṭṭhipāsañca ḍenti oḍḍentīti pāsaṇḍāti vuccati. Tenāha – ‘‘diṭṭhiyo upanissitā’’ti sassatadiṭṭhigatāni upecca nissitā, diṭṭhigatāni ādiyiṃsūti attho. Yadaggena ca diṭṭhisannissitā, tadaggena pāsaṇḍasannissitā. Na te dhammaṃ vijānantīti ye pāsaṇḍino sassatadiṭṭhigatasannissitā ‘‘ayaṃ pavatti evaṃ pavattatī’’ti pavattidhammampi yathābhūtaṃ na vijānanti. Na te dhammassa kovidāti ‘‘ayaṃ nivatti evaṃ nivattatī’’ti nivattidhammassāpi akusalā, pavattidhammamaggepi hi te saṃmūḷhā, kimaṅgaṃ pana nivattidhammeti.
звам̣ баасан̣д̣аваад̣̇аанам̣ анияяаанигад̇ам̣ д̣̇ассзд̇ваа ид̣̇аани гам̣ ну уд̣̇д̣̇исса мун̣д̣аасийд̇и бан̃хам̣ виссаж̇ж̇зд̇ум̣ ‘‘ад̇т̇и сагяагулз ж̇аад̇о’’д̇иаад̣̇и вуд̇д̇ам̣. д̇ад̇т̇а д̣̇идтийнам̣ самад̇иггаманд̇и саб̣б̣аасам̣ д̣̇идтийнам̣ самад̇иггаманубааяам̣ д̣̇идтиж̇аалавинивзтанам̣. сзсам̣ вуд̇д̇анаяамзва.
Evaṃ pāsaṇḍavādānaṃ aniyyānikataṃ dassetvā idāni kaṃ nu uddissa muṇḍāsīti pañhaṃ vissajjetuṃ ‘‘atthi sakyakule jāto’’tiādi vuttaṃ. Tattha diṭṭhīnaṃ samatikkamanti sabbāsaṃ diṭṭhīnaṃ samatikkamanupāyaṃ diṭṭhijālaviniveṭhanaṃ. Sesaṃ vuttanayameva.
жаалаат̇зрийг̇аат̇ааван̣н̣анаа нидтид̇аа.
Cālātherīgāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зрийг̇аат̇аабаал̣и • Therīgāthāpāḷi / 2. жаалаат̇зрийг̇аат̇аа • 2. Cālātherīgāthā
