| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
२१. चम्मनिद्देसवण्णना
21. Cammaniddesavaṇṇanā
१७३. इदानि ‘‘अनुजानामि, भिक्खवे, सब्बपच्चन्तिमेसु जनपदेसु चम्मानि अत्थरणानि एळकचम्मं अजचम्मं मिगचम्म’’न्ति (महाव॰ २५९) एवं वुत्तचम्मानि दस्सेतुं ‘‘मिगाजेळकचम्मानी’’तिआदिमाह। परिभुञ्जितुन्ति (महाव॰ अट्ठ॰ २६२) मञ्चादीसु यत्थ कत्थचि अत्थरित्वा निपज्जितुं वा निसीदितुं वा वट्टन्तीति अत्थो। रोहितेणीपसदा च कुरुङ्गा च च-सद्देन अञ्ञेपि वाळमिगा मिगमातुकादयोपि मिगजातिका एवाति अधिप्पायो।
173. Idāni ‘‘anujānāmi, bhikkhave, sabbapaccantimesu janapadesu cammāni attharaṇāni eḷakacammaṃ ajacammaṃ migacamma’’nti (mahāva. 259) evaṃ vuttacammāni dassetuṃ ‘‘migājeḷakacammānī’’tiādimāha. Paribhuñjitunti (mahāva. aṭṭha. 262) mañcādīsu yattha katthaci attharitvā nipajjituṃ vā nisīdituṃ vā vaṭṭantīti attho. Rohiteṇīpasadā ca kuruṅgā ca ca-saddena aññepi vāḷamigā migamātukādayopi migajātikā evāti adhippāyo.
१७४. अनुञ्ञातत्तया अञ्ञन्ति –
174.Anuññātattayā aññanti –
‘‘मक्कटो काळसीहो च, सरभो कदलीमिगो।
‘‘Makkaṭo kāḷasīho ca, sarabho kadalīmigo;
ये च वाळमिगा केचि, तेसं चम्मं न वट्टती’’ति॥ –
Ye ca vāḷamigā keci, tesaṃ cammaṃ na vaṭṭatī’’ti. –
एत्थ वाळमिगग्गहणेन वुत्तावसेसा अन्तमसो गोमहिंसादयो गहिताति वेदितब्बा। थविकाति उपाहनकोसकसत्थकोसककुञ्चिककोसकाति वेदितब्बा, न पत्तत्थविकादयो। चम्मविनिच्छयो।
Ettha vāḷamigaggahaṇena vuttāvasesā antamaso gomahiṃsādayo gahitāti veditabbā. Thavikāti upāhanakosakasatthakosakakuñcikakosakāti veditabbā, na pattatthavikādayo. Cammavinicchayo.
चम्मनिद्देसवण्णना निट्ठिता।
Cammaniddesavaṇṇanā niṭṭhitā.
