| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๒๑. จมฺมนิเทฺทสวณฺณนา
21. Cammaniddesavaṇṇanā
๑๗๓. อิทานิ ‘‘อนุชานามิ, ภิกฺขเว, สพฺพปจฺจนฺติเมสุ ชนปเทสุ จมฺมานิ อตฺถรณานิ เอฬกจมฺมํ อชจมฺมํ มิคจมฺม’’นฺติ (มหาว. ๒๕๙) เอวํ วุตฺตจมฺมานิ ทเสฺสตุํ ‘‘มิคาเชฬกจมฺมานี’’ติอาทิมาหฯ ปริภุญฺชิตุนฺติ (มหาว. อฎฺฐ. ๒๖๒) มญฺจาทีสุ ยตฺถ กตฺถจิ อตฺถริตฺวา นิปชฺชิตุํ วา นิสีทิตุํ วา วฎฺฎนฺตีติ อโตฺถฯ โรหิเตณีปสทา จ กุรุงฺคา จ จ-สเทฺทน อเญฺญปิ วาฬมิคา มิคมาตุกาทโยปิ มิคชาติกา เอวาติ อธิปฺปาโยฯ
173. Idāni ‘‘anujānāmi, bhikkhave, sabbapaccantimesu janapadesu cammāni attharaṇāni eḷakacammaṃ ajacammaṃ migacamma’’nti (mahāva. 259) evaṃ vuttacammāni dassetuṃ ‘‘migājeḷakacammānī’’tiādimāha. Paribhuñjitunti (mahāva. aṭṭha. 262) mañcādīsu yattha katthaci attharitvā nipajjituṃ vā nisīdituṃ vā vaṭṭantīti attho. Rohiteṇīpasadā ca kuruṅgā ca ca-saddena aññepi vāḷamigā migamātukādayopi migajātikā evāti adhippāyo.
๑๗๔. อนุญฺญาตตฺตยา อญฺญนฺติ –
174.Anuññātattayā aññanti –
‘‘มกฺกโฎ กาฬสีโห จ, สรโภ กทลีมิโค;
‘‘Makkaṭo kāḷasīho ca, sarabho kadalīmigo;
เย จ วาฬมิคา เกจิ, เตสํ จมฺมํ น วฎฺฎตี’’ติฯ –
Ye ca vāḷamigā keci, tesaṃ cammaṃ na vaṭṭatī’’ti. –
เอตฺถ วาฬมิคคฺคหเณน วุตฺตาวเสสา อนฺตมโส โคมหิํสาทโย คหิตาติ เวทิตพฺพาฯ ถวิกาติ อุปาหนโกสกสตฺถโกสกกุญฺจิกโกสกาติ เวทิตพฺพา, น ปตฺตตฺถวิกาทโยฯ จมฺมวินิจฺฉโยฯ
Ettha vāḷamigaggahaṇena vuttāvasesā antamaso gomahiṃsādayo gahitāti veditabbā. Thavikāti upāhanakosakasatthakosakakuñcikakosakāti veditabbā, na pattatthavikādayo. Cammavinicchayo.
จมฺมนิเทฺทสวณฺณนา นิฎฺฐิตาฯ
Cammaniddesavaṇṇanā niṭṭhitā.
