| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. சம்பகபுப்பி²யத்தே²ரஅபதா³னவண்ணனா
6. Campakapupphiyattheraapadānavaṇṇanā
கணிகாரங்வ ஜோதந்தந்திஆதி³கங் ஆயஸ்மதோ சம்பகபுப்பி²யத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ வெஸ்ஸபு⁴ஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ வுத்³தி⁴ப்பத்தோ ஸகஸிப்பேஸு நிப்ப²த்திங் பத்வா தத்த² ஸாரங் அபஸ்ஸந்தோ க⁴ராவாஸங் பஹாய தாபஸபப்³ப³ஜ்ஜங் பப்³ப³ஜித்வா வனந்தரே வஸந்தோ வெஸ்ஸபு⁴ங் ப⁴க³வந்தங் உத்³தி³ஸ்ஸ ஸிஸ்ஸேஹி ஆனீதேஹி சம்பகபுப்பே²ஹி பூஜேஸி. ப⁴க³வா அனுமோத³னங் அகாஸி. ஸோ தேனேவ குஸலேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பாபுணித்வா புப்³ப³வாஸனாப³லேன க⁴ராவாஸே அனல்லீனோ பப்³ப³ஜித்வா நசிரஸ்ஸேவ அரஹா அஹோஸி.
Kaṇikāraṃvajotantantiādikaṃ āyasmato campakapupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vessabhussa bhagavato kāle brāhmaṇakule nibbatto vuddhippatto sakasippesu nipphattiṃ patvā tattha sāraṃ apassanto gharāvāsaṃ pahāya tāpasapabbajjaṃ pabbajitvā vanantare vasanto vessabhuṃ bhagavantaṃ uddissa sissehi ānītehi campakapupphehi pūjesi. Bhagavā anumodanaṃ akāsi. So teneva kusalena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto viññutaṃ pāpuṇitvā pubbavāsanābalena gharāvāse anallīno pabbajitvā nacirasseva arahā ahosi.
41. ஸோ அபரபா⁴கே³ அத்தனோ புப்³ப³புஞ்ஞகம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ கணிகாரங்வ ஜோதந்தந்திஆதி³மாஹ. தத்த² கணிகாரந்தி ஸகலபத்தபலாஸானி பரிப⁴ஜ்ஜ பாதெத்வா புப்ப²க³ஹணஸமயே கண்ணிகாப³த்³தோ⁴ ஹுத்வா புப்ப²மகுளானங் க³ஹணதோ கண்ணிகாகாரேன பகதோதி கணிகாரோ, ‘‘கண்ணிகாரோ’’தி வத்தப்³பே³ நிருத்தினயேன ஏகஸ்ஸ புப்³ப³ ண-காரஸ்ஸ லோபங் கத்வா ‘‘கணிகார’’ந்தி வுத்தந்தி த³ட்ட²ப்³ப³ங். தங் புப்பி²தங் கணிகாரருக்க²ங் இவ ஜோதந்தங் பு³த்³த⁴ங் அத்³த³ஸந்தி அத்தோ². ஸேஸங் உத்தானத்த²மேவாதி.
41. So aparabhāge attano pubbapuññakammaṃ saritvā somanassajāto pubbacaritāpadānaṃ pakāsento kaṇikāraṃva jotantantiādimāha. Tattha kaṇikāranti sakalapattapalāsāni paribhajja pātetvā pupphagahaṇasamaye kaṇṇikābaddho hutvā pupphamakuḷānaṃ gahaṇato kaṇṇikākārena pakatoti kaṇikāro, ‘‘kaṇṇikāro’’ti vattabbe niruttinayena ekassa pubba ṇa-kārassa lopaṃ katvā ‘‘kaṇikāra’’nti vuttanti daṭṭhabbaṃ. Taṃ pupphitaṃ kaṇikārarukkhaṃ iva jotantaṃ buddhaṃ addasanti attho. Sesaṃ uttānatthamevāti.
சம்பகபுப்பி²யத்தே²ரஅபதா³னவண்ணனா ஸமத்தா.
Campakapupphiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 6. சம்பகபுப்பி²யத்தே²ரஅபதா³னங் • 6. Campakapupphiyattheraapadānaṃ
