| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೬. ಚಮ್ಪಕಪುಪ್ಫಿಯತ್ಥೇರಅಪದಾನವಣ್ಣನಾ
6. Campakapupphiyattheraapadānavaṇṇanā
ಕಣಿಕಾರಂವ ಜೋತನ್ತನ್ತಿಆದಿಕಂ ಆಯಸ್ಮತೋ ಚಮ್ಪಕಪುಪ್ಫಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ವೇಸ್ಸಭುಸ್ಸ ಭಗವತೋ ಕಾಲೇ ಬ್ರಾಹ್ಮಣಕುಲೇ ನಿಬ್ಬತ್ತೋ ವುದ್ಧಿಪ್ಪತ್ತೋ ಸಕಸಿಪ್ಪೇಸು ನಿಪ್ಫತ್ತಿಂ ಪತ್ವಾ ತತ್ಥ ಸಾರಂ ಅಪಸ್ಸನ್ತೋ ಘರಾವಾಸಂ ಪಹಾಯ ತಾಪಸಪಬ್ಬಜ್ಜಂ ಪಬ್ಬಜಿತ್ವಾ ವನನ್ತರೇ ವಸನ್ತೋ ವೇಸ್ಸಭುಂ ಭಗವನ್ತಂ ಉದ್ದಿಸ್ಸ ಸಿಸ್ಸೇಹಿ ಆನೀತೇಹಿ ಚಮ್ಪಕಪುಪ್ಫೇಹಿ ಪೂಜೇಸಿ। ಭಗವಾ ಅನುಮೋದನಂ ಅಕಾಸಿ। ಸೋ ತೇನೇವ ಕುಸಲೇನ ದೇವಮನುಸ್ಸೇಸು ಸಂಸರನ್ತೋ ಉಭಯಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪಾಪುಣಿತ್ವಾ ಪುಬ್ಬವಾಸನಾಬಲೇನ ಘರಾವಾಸೇ ಅನಲ್ಲೀನೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Kaṇikāraṃvajotantantiādikaṃ āyasmato campakapupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vessabhussa bhagavato kāle brāhmaṇakule nibbatto vuddhippatto sakasippesu nipphattiṃ patvā tattha sāraṃ apassanto gharāvāsaṃ pahāya tāpasapabbajjaṃ pabbajitvā vanantare vasanto vessabhuṃ bhagavantaṃ uddissa sissehi ānītehi campakapupphehi pūjesi. Bhagavā anumodanaṃ akāsi. So teneva kusalena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto viññutaṃ pāpuṇitvā pubbavāsanābalena gharāvāse anallīno pabbajitvā nacirasseva arahā ahosi.
೪೧. ಸೋ ಅಪರಭಾಗೇ ಅತ್ತನೋ ಪುಬ್ಬಪುಞ್ಞಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಕಣಿಕಾರಂವ ಜೋತನ್ತನ್ತಿಆದಿಮಾಹ। ತತ್ಥ ಕಣಿಕಾರನ್ತಿ ಸಕಲಪತ್ತಪಲಾಸಾನಿ ಪರಿಭಜ್ಜ ಪಾತೇತ್ವಾ ಪುಪ್ಫಗಹಣಸಮಯೇ ಕಣ್ಣಿಕಾಬದ್ಧೋ ಹುತ್ವಾ ಪುಪ್ಫಮಕುಳಾನಂ ಗಹಣತೋ ಕಣ್ಣಿಕಾಕಾರೇನ ಪಕತೋತಿ ಕಣಿಕಾರೋ, ‘‘ಕಣ್ಣಿಕಾರೋ’’ತಿ ವತ್ತಬ್ಬೇ ನಿರುತ್ತಿನಯೇನ ಏಕಸ್ಸ ಪುಬ್ಬ ಣ-ಕಾರಸ್ಸ ಲೋಪಂ ಕತ್ವಾ ‘‘ಕಣಿಕಾರ’’ನ್ತಿ ವುತ್ತನ್ತಿ ದಟ್ಠಬ್ಬಂ। ತಂ ಪುಪ್ಫಿತಂ ಕಣಿಕಾರರುಕ್ಖಂ ಇವ ಜೋತನ್ತಂ ಬುದ್ಧಂ ಅದ್ದಸನ್ತಿ ಅತ್ಥೋ। ಸೇಸಂ ಉತ್ತಾನತ್ಥಮೇವಾತಿ।
41. So aparabhāge attano pubbapuññakammaṃ saritvā somanassajāto pubbacaritāpadānaṃ pakāsento kaṇikāraṃva jotantantiādimāha. Tattha kaṇikāranti sakalapattapalāsāni paribhajja pātetvā pupphagahaṇasamaye kaṇṇikābaddho hutvā pupphamakuḷānaṃ gahaṇato kaṇṇikākārena pakatoti kaṇikāro, ‘‘kaṇṇikāro’’ti vattabbe niruttinayena ekassa pubba ṇa-kārassa lopaṃ katvā ‘‘kaṇikāra’’nti vuttanti daṭṭhabbaṃ. Taṃ pupphitaṃ kaṇikārarukkhaṃ iva jotantaṃ buddhaṃ addasanti attho. Sesaṃ uttānatthamevāti.
ಚಮ್ಪಕಪುಪ್ಫಿಯತ್ಥೇರಅಪದಾನವಣ್ಣನಾ ಸಮತ್ತಾ।
Campakapupphiyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೬. ಚಮ್ಪಕಪುಪ್ಫಿಯತ್ಥೇರಅಪದಾನಂ • 6. Campakapupphiyattheraapadānaṃ
