| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
6. චම්‌පකපුප්‌ඵියත්‌ථෙරඅපදානවණ්‌ණනා
6. Campakapupphiyattheraapadānavaṇṇanā
කණිකාරංව ජොතන්‌තන්‌තිආදිකං ආයස්‌මතො චම්‌පකපුප්‌ඵියත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො වෙස්‌සභුස්‌ස භගවතො කාලෙ බ්‍රාහ්‌මණකුලෙ නිබ්‌බත්‌තො වුද්‌ධිප්‌පත්‌තො සකසිප්‌පෙසු නිප්‌ඵත්‌තිං පත්‌වා තත්‌ථ සාරං අපස්‌සන්‌තො ඝරාවාසං පහාය තාපසපබ්‌බජ්‌ජං පබ්‌බජිත්‌වා වනන්‌තරෙ වසන්‌තො වෙස්‌සභුං භගවන්‌තං උද්‌දිස්‌ස සිස්‌සෙහි ආනීතෙහි චම්‌පකපුප්‌ඵෙහි පූජෙසි. භගවා අනුමොදනං අකාසි. සො තෙනෙව කුසලෙන දෙවමනුස්‌සෙසු සංසරන්‌තො උභයසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො විඤ්‌ඤුතං පාපුණිත්‌වා පුබ්‌බවාසනාබලෙන ඝරාවාසෙ අනල්‌ලීනො පබ්‌බජිත්‌වා නචිරස්‌සෙව අරහා අහොසි.
Kaṇikāraṃvajotantantiādikaṃ āyasmato campakapupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vessabhussa bhagavato kāle brāhmaṇakule nibbatto vuddhippatto sakasippesu nipphattiṃ patvā tattha sāraṃ apassanto gharāvāsaṃ pahāya tāpasapabbajjaṃ pabbajitvā vanantare vasanto vessabhuṃ bhagavantaṃ uddissa sissehi ānītehi campakapupphehi pūjesi. Bhagavā anumodanaṃ akāsi. So teneva kusalena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto viññutaṃ pāpuṇitvā pubbavāsanābalena gharāvāse anallīno pabbajitvā nacirasseva arahā ahosi.
41. සො අපරභාගෙ අත්‌තනො පුබ්‌බපුඤ්‌ඤකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො කණිකාරංව ජොතන්‌තන්‌තිආදිමාහ. තත්‌ථ කණිකාරන්‌ති සකලපත්‌තපලාසානි පරිභජ්‌ජ පාතෙත්‌වා පුප්‌ඵගහණසමයෙ කණ්‌ණිකාබද්‌ධො හුත්‌වා පුප්‌ඵමකුළානං ගහණතො කණ්‌ණිකාකාරෙන පකතොති කණිකාරො, ‘‘කණ්‌ණිකාරො’’ති වත්‌තබ්‌බෙ නිරුත්‌තිනයෙන එකස්‌ස පුබ්‌බ ණ-කාරස්‌ස ලොපං කත්‌වා ‘‘කණිකාර’’න්‌ති වුත්‌තන්‌ති දට්‌ඨබ්‌බං. තං පුප්‌ඵිතං කණිකාරරුක්‌ඛං ඉව ජොතන්‌තං බුද්‌ධං අද්‌දසන්‌ති අත්‌ථො. සෙසං උත්‌තානත්‌ථමෙවාති.
41. So aparabhāge attano pubbapuññakammaṃ saritvā somanassajāto pubbacaritāpadānaṃ pakāsento kaṇikāraṃva jotantantiādimāha. Tattha kaṇikāranti sakalapattapalāsāni paribhajja pātetvā pupphagahaṇasamaye kaṇṇikābaddho hutvā pupphamakuḷānaṃ gahaṇato kaṇṇikākārena pakatoti kaṇikāro, ‘‘kaṇṇikāro’’ti vattabbe niruttinayena ekassa pubba ṇa-kārassa lopaṃ katvā ‘‘kaṇikāra’’nti vuttanti daṭṭhabbaṃ. Taṃ pupphitaṃ kaṇikārarukkhaṃ iva jotantaṃ buddhaṃ addasanti attho. Sesaṃ uttānatthamevāti.
චම්‌පකපුප්‌ඵියත්‌ථෙරඅපදානවණ්‌ණනා සමත්‌තා.
Campakapupphiyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 6. චම්‌පකපුප්‌ඵියත්‌ථෙරඅපදානං • 6. Campakapupphiyattheraapadānaṃ
