| Library / Tipiṭaka / ਤਿਪਿਟਕ • Tipiṭaka / ਜਾਤਕ-ਅਟ੍ਠਕਥਾ • Jātaka-aṭṭhakathā |
[੧੩੫] ੫. ਚਨ੍ਦਾਭਜਾਤਕવਣ੍ਣਨਾ
[135] 5. Candābhajātakavaṇṇanā
ਚਨ੍ਦਾਭਨ੍ਤਿ ਇਦਂ ਸਤ੍ਥਾ ਜੇਤવਨੇ વਿਹਰਨ੍ਤੋ ਸਙ੍ਕਸ੍ਸਨਗਰਦ੍વਾਰੇ ਥੇਰਸ੍ਸੇવ ਪਞ੍ਹਬ੍ਯਾਕਰਣਂ ਆਰਬ੍ਭ ਕਥੇਸਿ। ਅਤੀਤੇ ਕਿਰ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਅਰਞ੍ਞਾਯਤਨੇ ਕਾਲਂ ਕਰੋਨ੍ਤੋ ਅਨ੍ਤੇવਾਸਿਕੇਹਿ ਪੁਚ੍ਛਿਤੋ ‘‘ਚਨ੍ਦਾਭਂ ਸੂਰਿਯਾਭ’’ਨ੍ਤਿ વਤ੍વਾ ਆਭਸ੍ਸਰੇ ਨਿਬ੍ਬਤ੍ਤੋ। ਤਾਪਸਾ ਜੇਟ੍ਠਨ੍ਤੇવਾਸਿਕਸ੍ਸ ਨ ਸਦ੍ਦਹਿਂਸੁ। ਬੋਧਿਸਤ੍ਤੋ ਆਭਸ੍ਸਰਤੋ ਆਗਨ੍ਤ੍વਾ ਆਕਾਸੇ ਠਿਤੋ ਇਮਂ ਗਾਥਮਾਹ –
Candābhanti idaṃ satthā jetavane viharanto saṅkassanagaradvāre therasseva pañhabyākaraṇaṃ ārabbha kathesi. Atīte kira bārāṇasiyaṃ brahmadatte rajjaṃ kārente bodhisatto araññāyatane kālaṃ karonto antevāsikehi pucchito ‘‘candābhaṃ sūriyābha’’nti vatvā ābhassare nibbatto. Tāpasā jeṭṭhantevāsikassa na saddahiṃsu. Bodhisatto ābhassarato āgantvā ākāse ṭhito imaṃ gāthamāha –
੧੩੫.
135.
‘‘ਚਨ੍ਦਾਭਂ ਸੂਰਿਯਾਭਞ੍ਚ, ਯੋਧ ਪਞ੍ਞਾਯ ਗਾਧਤਿ।
‘‘Candābhaṃ sūriyābhañca, yodha paññāya gādhati;
ਅવਿਤਕ੍ਕੇਨ ਝਾਨੇਨ, ਹੋਤਿ ਆਭਸ੍ਸਰੂਪਗੋ’’ਤਿ॥
Avitakkena jhānena, hoti ābhassarūpago’’ti.
ਤਤ੍ਥ ਚਨ੍ਦਾਭਨ੍ਤਿ ਓਦਾਤਕਸਿਣਂ ਦਸ੍ਸੇਤਿ। ਸੂਰਿਯਾਭਨ੍ਤਿ ਪੀਤਕਸਿਣਂ। ਯੋਧ ਪਞ੍ਞਾਯ ਗਾਧਤੀਤਿ ਯੋ ਪੁਗ੍ਗਲੋ ਇਧ ਸਤ੍ਤਲੋਕੇ ਇਦਂ ਕਸਿਣਦ੍વਯਂ ਪਞ੍ਞਾਯ ਗਾਧਤਿ, ਆਰਮ੍ਮਣਂ ਕਤ੍વਾ ਅਨੁਪવਿਸਤਿ, ਤਤ੍ਥੇવ ਪਤਿਟ੍ਠਹਤਿ । ਅਥ વਾ ਚਨ੍ਦਾਭਂ ਸੂਰਿਯਾਭਞ੍ਚ, ਯੋਧ ਪਞ੍ਞਾਯ ਗਾਧਤੀਤਿ ਯਤ੍ਤਕਂ ਠਾਨਂ ਚਨ੍ਦਾਭਾ ਚ ਸੂਰਿਯਾਭਾ ਚ ਪਤ੍ਥਟਾ, ਤਤ੍ਥਕੇ ਠਾਨੇ ਪਟਿਭਾਗਕਸਿਣਂ વਡ੍ਢੇਤ੍વਾ ਤਂ ਆਰਮ੍ਮਣਂ ਕਤ੍વਾ ਝਾਨਂ ਨਿਬ੍ਬਤ੍ਤੇਨ੍ਤੋ ਉਭਯਮ੍ਪੇਤਂ ਆਭਂ ਪਞ੍ਞਾਯ ਗਾਧਤਿ ਨਾਮ। ਤਸ੍ਮਾ ਅਯਮ੍ਪੇਤ੍ਥ ਅਤ੍ਥੋਯੇવ। ਅવਿਤਕ੍ਕੇਨ ਝਾਨੇਨ, ਹੋਤਿ ਆਭਸ੍ਸਰੂਪਗੋਤਿ ਸੋ ਪੁਗ੍ਗਲੋ ਤਥਾ ਕਤ੍વਾ ਪਟਿਲਦ੍ਧੇਨ ਦੁਤਿਯੇਨ ਝਾਨੇਨ ਆਭਸ੍ਸਰਬ੍ਰਹ੍ਮਲੋਕੂਪਗੋ ਹੋਤੀਤਿ।
Tattha candābhanti odātakasiṇaṃ dasseti. Sūriyābhanti pītakasiṇaṃ. Yodha paññāya gādhatīti yo puggalo idha sattaloke idaṃ kasiṇadvayaṃ paññāya gādhati, ārammaṇaṃ katvā anupavisati, tattheva patiṭṭhahati . Atha vā candābhaṃ sūriyābhañca, yodha paññāya gādhatīti yattakaṃ ṭhānaṃ candābhā ca sūriyābhā ca patthaṭā, tatthake ṭhāne paṭibhāgakasiṇaṃ vaḍḍhetvā taṃ ārammaṇaṃ katvā jhānaṃ nibbattento ubhayampetaṃ ābhaṃ paññāya gādhati nāma. Tasmā ayampettha atthoyeva. Avitakkena jhānena, hoti ābhassarūpagoti so puggalo tathā katvā paṭiladdhena dutiyena jhānena ābhassarabrahmalokūpago hotīti.
ਏવਂ ਬੋਧਿਸਤ੍ਤੋ ਤਾਪਸੇ ਬੋਧੇਤ੍વਾ ਜੇਟ੍ਠਨ੍ਤੇવਾਸਿਕਸ੍ਸ ਗੁਣਂ ਕਥੇਤ੍વਾ ਬ੍ਰਹ੍ਮਲੋਕਮੇવ ਗਤੋ।
Evaṃ bodhisatto tāpase bodhetvā jeṭṭhantevāsikassa guṇaṃ kathetvā brahmalokameva gato.
ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍વਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਜੇਟ੍ਠਨ੍ਤੇવਾਸਿਕੋ ਸਾਰਿਪੁਤ੍ਤੋ, ਮਹਾਬ੍ਰਹ੍ਮਾ ਪਨ ਅਹਮੇવ ਅਹੋਸਿ’’ਨ੍ਤਿ।
Satthā imaṃ dhammadesanaṃ āharitvā jātakaṃ samodhānesi – ‘‘tadā jeṭṭhantevāsiko sāriputto, mahābrahmā pana ahameva ahosi’’nti.
ਚਨ੍ਦਾਭਜਾਤਕવਣ੍ਣਨਾ ਪਞ੍ਚਮਾ।
Candābhajātakavaṇṇanā pañcamā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਜਾਤਕਪਾਲ਼ਿ • Jātakapāḷi / ੧੩੫. ਚਨ੍ਦਾਭਜਾਤਕਂ • 135. Candābhajātakaṃ
