| Library / Tipiṭaka / д̇ибидага • Tipiṭaka / жарияаабидага-адтагат̇аа • Cariyāpiṭaka-aṭṭhakathā |
7. жанд̣̇агумааражарияааван̣н̣анаа
7. Candakumāracariyāvaṇṇanā
45. сад̇д̇амз згарааж̇асса ад̇раж̇од̇и згарааж̇асса наама гаасиран̃н̃о орасабуд̇д̇о. наг̇арз бубпавад̇ияаад̇и бубпавад̇инаамагз наг̇арз. жанд̣̇асавхаяод̇и жанд̣̇асад̣̇д̣̇зна авхаад̇аб̣б̣о, жанд̣̇анаамод̇и ад̇т̇о.
45. Sattame ekarājassa atrajoti ekarājassa nāma kāsirañño orasaputto. Nagare pupphavatiyāti pupphavatināmake nagare. Candasavhayoti candasaddena avhātabbo, candanāmoti attho.
ад̇ийд̇з гира аяам̣ б̣аараан̣асий бубпавад̇ий наама ахоси. д̇ад̇т̇а васавад̇д̇иран̃н̃о буд̇д̇о згарааж̇аа наама раж̇ж̇ам̣ гаарзси. б̣од̇хисад̇д̇о д̇асса г̇од̇амияаа наама аг̇г̇амахзсияаа гужчимхи бадисанд̇хим̣ аг̇г̇ахзси. ‘‘жанд̣̇агумааро’’д̇исса наамамагам̣су. д̇асса бад̣̇асаа г̇аманагаалз абароби буд̇д̇о уббанно, д̇асса ‘‘суурияагумааро’’д̇и наамамагам̣су. д̇асса бад̣̇асаа г̇аманагаалз згаа д̇хийд̇аа уббаннаа, ‘‘сзлаа’’д̇иссаа наамамагам̣су. взмаад̇игаа жа нзсам̣ бхад̣̇д̣̇асзно сууро жаад̇и д̣̇вз бхаад̇аро ахзсум̣. б̣од̇хисад̇д̇о анубуб̣б̣зна вуд̣̇д̇хиббад̇д̇о сиббзсу жа виж̇ж̇аадтаанзсу жа баарам̣ аг̇амааси. д̇асса рааж̇аа анужчавигам̣ жанд̣̇ам̣ наама рааж̇ад̇хийд̇арам̣ аанзд̇ваа убараж̇ж̇ам̣ ад̣̇ааси. б̣од̇хисад̇д̇асса зго буд̇д̇о уббанно, д̇асса ‘‘ваасуло’’д̇и наамамагам̣су. д̇асса бана ран̃н̃о кан̣д̣ахаало наама бурохид̇о, д̇ам̣ рааж̇аа винижчаяз табзси. со лан̃ж̇авид̇д̇аго худ̇ваа лан̃ж̇ам̣ г̇ахзд̇ваа ассаамигз саамигз гарод̇и, саамигз жа ассаамигз гарод̇и. ат̇згад̣̇ивасам̣ аддабарааж̇ид̇о зго бурисо винижчаяадтаанз убаггосзнд̇о нигкамид̇ваа рааж̇уубадтаанам̣ г̇ажчанд̇ам̣ б̣од̇хисад̇д̇ам̣ д̣̇исваа д̇асса баад̣̇зсу нибад̇ид̇ваа ‘‘саами кан̣д̣ахаало винижчаяз вилобам̣ каад̣̇ад̇и, ахам̣ д̇зна лан̃ж̇ам̣ г̇ахзд̇ваа барааж̇аяам̣ баабид̇о’’д̇и аддассарамагааси. б̣од̇хисад̇д̇о ‘‘маа бхааяий’’д̇и д̇ам̣ ассаасзд̇ваа винижчаяам̣ нзд̇ваа саамигамзва саамигам̣ агааси. махааж̇ано махаасад̣̇д̣̇зна саад̇хугаарамад̣̇ааси.
Atīte kira ayaṃ bārāṇasī pupphavatī nāma ahosi. Tattha vasavattirañño putto ekarājā nāma rajjaṃ kāresi. Bodhisatto tassa gotamiyā nāma aggamahesiyā kucchimhi paṭisandhiṃ aggahesi. ‘‘Candakumāro’’tissa nāmamakaṃsu. Tassa padasā gamanakāle aparopi putto uppanno, tassa ‘‘sūriyakumāro’’ti nāmamakaṃsu. Tassa padasā gamanakāle ekā dhītā uppannā, ‘‘selā’’tissā nāmamakaṃsu. Vemātikā ca nesaṃ bhaddaseno sūro cāti dve bhātaro ahesuṃ. Bodhisatto anupubbena vuddhippatto sippesu ca vijjāṭṭhānesu ca pāraṃ agamāsi. Tassa rājā anucchavikaṃ candaṃ nāma rājadhītaraṃ ānetvā uparajjaṃ adāsi. Bodhisattassa eko putto uppanno, tassa ‘‘vāsulo’’ti nāmamakaṃsu. Tassa pana rañño khaṇḍahālo nāma purohito, taṃ rājā vinicchaye ṭhapesi. So lañjavittako hutvā lañjaṃ gahetvā assāmike sāmike karoti, sāmike ca assāmike karoti. Athekadivasaṃ aṭṭaparājito eko puriso vinicchayaṭṭhāne upakkosento nikkhamitvā rājūpaṭṭhānaṃ gacchantaṃ bodhisattaṃ disvā tassa pādesu nipatitvā ‘‘sāmi khaṇḍahālo vinicchaye vilopaṃ khādati, ahaṃ tena lañjaṃ gahetvā parājayaṃ pāpito’’ti aṭṭassaramakāsi. Bodhisatto ‘‘mā bhāyī’’ti taṃ assāsetvā vinicchayaṃ netvā sāmikameva sāmikaṃ akāsi. Mahājano mahāsaddena sādhukāramadāsi.
рааж̇аа ‘‘б̣од̇хисад̇д̇зна гира аддо сувинижчид̇о’’д̇и суд̇ваа д̇ам̣ ааманд̇зд̇ваа ‘‘д̇аад̇а, ид̇о бадтааяа д̇вамзва аддагаран̣з винижчаяам̣ винижчинаахий’’д̇и винижчаяам̣ б̣од̇хисад̇д̇асса ад̣̇ааси. кан̣д̣ахааласса ааяо бажчиж̇ж̇и. со д̇ад̇о бадтааяа б̣од̇хисад̇д̇з аагхаад̇ам̣ б̣анд̇хид̇ваа од̇аараабзгко вижари. со бана рааж̇аа муд̇хаббасанно. со згад̣̇ивасам̣ субинанд̇зна д̣̇звалогам̣ бассид̇ваа д̇ад̇т̇а г̇анд̇угаамо худ̇ваа ‘‘бурохид̇ам̣ б̣рахмалогаг̇аамимаг̇г̇ам̣ аажигкаа’’д̇и ааха. со ‘‘ад̇ид̣̇аанам̣ д̣̇ад̣̇анд̇о саб̣б̣ажад̇уггзна яан̃н̃ам̣ яаж̇ассуу’’д̇и вад̇ваа ран̃н̃аа ‘‘гим̣ ад̇ид̣̇аана’’нд̇и будто ‘‘ад̇д̇ано бияабуд̇д̇аа бияабхарияаа бияад̇хийд̇аро махаавибхавасздтино ман̇г̇алахад̇т̇иассаад̣̇аяод̇и зд̇з жад̇д̇ааро жад̇д̇ааро гад̇ваа д̣̇вибад̣̇ажад̇уббад̣̇з яан̃н̃ад̇т̇ааяа барижжаж̇ид̇ваа д̇зсам̣ г̇алалохид̇зна яаж̇анам̣ ад̇ид̣̇аанам̣ наамаа’’д̇и сан̃н̃аабзси. ид̇и со ‘‘саг̇г̇амаг̇г̇ам̣ аажигкиссаамий’’д̇и нираяамаг̇г̇ам̣ аажигки.
Rājā ‘‘bodhisattena kira aṭṭo suvinicchito’’ti sutvā taṃ āmantetvā ‘‘tāta, ito paṭṭhāya tvameva aṭṭakaraṇe vinicchayaṃ vinicchināhī’’ti vinicchayaṃ bodhisattassa adāsi. Khaṇḍahālassa āyo pacchijji. So tato paṭṭhāya bodhisatte āghātaṃ bandhitvā otārāpekkho vicari. So pana rājā mudhappasanno. So ekadivasaṃ supinantena devalokaṃ passitvā tattha gantukāmo hutvā ‘‘purohitaṃ brahmalokagāmimaggaṃ ācikkhā’’ti āha. So ‘‘atidānaṃ dadanto sabbacatukkena yaññaṃ yajassū’’ti vatvā raññā ‘‘kiṃ atidāna’’nti puṭṭho ‘‘attano piyaputtā piyabhariyā piyadhītaro mahāvibhavaseṭṭhino maṅgalahatthiassādayoti ete cattāro cattāro katvā dvipadacatuppade yaññatthāya pariccajitvā tesaṃ galalohitena yajanaṃ atidānaṃ nāmā’’ti saññāpesi. Iti so ‘‘saggamaggaṃ ācikkhissāmī’’ti nirayamaggaṃ ācikkhi.
рааж̇ааби д̇асмим̣ бан̣д̣ид̇асан̃н̃ий худ̇ваа ‘‘д̇зна вуд̇д̇авид̇хи саг̇г̇амаг̇г̇о’’д̇и сан̃н̃ааяа д̇ам̣ бадибаж̇ж̇ид̇угаамо маханд̇ам̣ яан̃н̃ааваадам̣ гаараабзд̇ваа д̇ад̇т̇а б̣од̇хисад̇д̇аад̣̇игз жад̇д̇ааро рааж̇агумаарз аад̣̇им̣ гад̇ваа кан̣д̣ахаалзна вуд̇д̇ам̣ саб̣б̣ам̣ д̣̇вибад̣̇ажад̇уббад̣̇ам̣ яан̃н̃абасуд̇адтаанз нзт̇аад̇и аан̣аабзси. саб̣б̣ан̃жа яан̃н̃асамбхаарам̣ убагкадам̣ ахоси. д̇ам̣ суд̇ваа махааж̇ано маханд̇ам̣ голаахалам̣ агааси. рааж̇аа виббадисаарий худ̇ваа кан̣д̣ахаалзна убад̇т̇амбхид̇о бунаби д̇ат̇аа д̇ам̣ аан̣аабзси. б̣од̇хисад̇д̇о ‘‘кан̣д̣ахаалзна винижчаяадтаанам̣ алабханд̇зна маяи аагхаад̇ам̣ б̣анд̇хид̇ваа мамзва маран̣ам̣ ижчанд̇зна махааж̇анасса анаяаб̣яасанам̣ уббаад̣̇ид̇а’’нд̇и ж̇аанид̇ваа наанаавид̇хзхи убааязхи рааж̇аанам̣ д̇ад̇о д̣̇уг̇г̇ахид̇аг̇г̇аахад̇о вивзжзд̇ум̣ вааяамид̇вааби наасагки. махааж̇ано барид̣̇зви, маханд̇ам̣ гаарун̃н̃амагааси. махааж̇анасса барид̣̇званд̇ассзва яан̃н̃ааваадз саб̣б̣агаммаани нидтаабзси. рааж̇абуд̇д̇ам̣ нзд̇ваа г̇ийвааяа наамзд̇ваа нисийд̣̇аабзсум̣. кан̣д̣ахаало суван̣н̣абаад̇им̣ убанаамзд̇ваа каг̇г̇ам̣ аад̣̇ааяа ‘‘д̇асса г̇ийвам̣ чинд̣̇иссаамий’’д̇и адтааси. д̇ам̣ д̣̇исваа жанд̣̇аа наама рааж̇абуд̇д̇асса д̣̇звий ‘‘ан̃н̃ам̣ мз бадисаран̣ам̣ над̇т̇и, ад̇д̇ано сажжаб̣алзна саамигасса сод̇т̇им̣ гариссаамий’’д̇и ан̃ж̇алим̣ баг̇г̇аяха барисааяа анд̇арз вижаранд̇ий ‘‘ид̣̇ам̣ зганд̇знзва баабагаммам̣, яам̣ кан̣д̣ахаало саг̇г̇амаг̇г̇од̇и гарод̇и. иминаа маяхам̣ сажжаважанзна мама саамигасса сод̇т̇и ход̇у.
Rājāpi tasmiṃ paṇḍitasaññī hutvā ‘‘tena vuttavidhi saggamaggo’’ti saññāya taṃ paṭipajjitukāmo mahantaṃ yaññāvāṭaṃ kārāpetvā tattha bodhisattādike cattāro rājakumāre ādiṃ katvā khaṇḍahālena vuttaṃ sabbaṃ dvipadacatuppadaṃ yaññapasutaṭṭhāne nethāti āṇāpesi. Sabbañca yaññasambhāraṃ upakkhaṭaṃ ahosi. Taṃ sutvā mahājano mahantaṃ kolāhalaṃ akāsi. Rājā vippaṭisārī hutvā khaṇḍahālena upatthambhito punapi tathā taṃ āṇāpesi. Bodhisatto ‘‘khaṇḍahālena vinicchayaṭṭhānaṃ alabhantena mayi āghātaṃ bandhitvā mameva maraṇaṃ icchantena mahājanassa anayabyasanaṃ uppādita’’nti jānitvā nānāvidhehi upāyehi rājānaṃ tato duggahitaggāhato vivecetuṃ vāyamitvāpi nāsakkhi. Mahājano paridevi, mahantaṃ kāruññamakāsi. Mahājanassa paridevantasseva yaññāvāṭe sabbakammāni niṭṭhāpesi. Rājaputtaṃ netvā gīvāya nāmetvā nisīdāpesuṃ. Khaṇḍahālo suvaṇṇapātiṃ upanāmetvā khaggaṃ ādāya ‘‘tassa gīvaṃ chindissāmī’’ti aṭṭhāsi. Taṃ disvā candā nāma rājaputtassa devī ‘‘aññaṃ me paṭisaraṇaṃ natthi, attano saccabalena sāmikassa sotthiṃ karissāmī’’ti añjaliṃ paggayha parisāya antare vicarantī ‘‘idaṃ ekanteneva pāpakammaṃ, yaṃ khaṇḍahālo saggamaggoti karoti. Iminā mayhaṃ saccavacanena mama sāmikassa sotthi hotu.
‘‘яаа д̣̇звад̇аа ид̇ха логз, саб̣б̣аа д̇аа саран̣ам̣ г̇ад̇аа;
‘‘Yā devatā idha loke, sabbā tā saraṇaṃ gatā;
анаат̇ам̣ д̇ааяат̇а мамам̣, яат̇аахам̣ бад̇имаа сияа’’нд̇и. –
Anāthaṃ tāyatha mamaṃ, yathāhaṃ patimā siya’’nti. –
сажжагирияамагааси. сагго д̣̇зварааж̇аа д̇ассаа барид̣̇званасад̣̇д̣̇ам̣ суд̇ваа д̇ам̣ бавад̇д̇им̣ н̃ад̇ваа ж̇алид̇ам̣ аяогуудам̣ аад̣̇ааяа ааг̇анд̇ваа рааж̇аанам̣ д̇аасзд̇ваа саб̣б̣з виссаж̇ж̇аабзси. саггоби д̇ад̣̇аа ад̇д̇ано д̣̇иб̣б̣аруубам̣ д̣̇ассзд̇ваа самбаж̇ж̇алид̇ам̣ саж̇од̇ибхууд̇ам̣ важ̇ирам̣ бариб̣бхаманд̇о ‘‘арз, баабарааж̇а гаал̣аган̣н̣и, гад̣̇аа д̇аяаа баан̣аад̇ибаад̇зна суг̇ад̇иг̇аманам̣ д̣̇идтабуб̣б̣ам̣, жанд̣̇агумаарам̣ саб̣б̣ан̃жа имам̣ ж̇анам̣ б̣анд̇ханад̇о можзхи, но жз можзссаси, зд̇т̇зва д̇з имасса жа д̣̇удтаб̣раахман̣асса сийсам̣ паалзссаамий’’д̇и аагаасз адтааси. д̇ам̣ ажчарияам̣ д̣̇исваа рааж̇аа б̣раахман̣о жа сийгхам̣ саб̣б̣з б̣анд̇ханаа можзсум̣.
Saccakiriyamakāsi. Sakko devarājā tassā paridevanasaddaṃ sutvā taṃ pavattiṃ ñatvā jalitaṃ ayokūṭaṃ ādāya āgantvā rājānaṃ tāsetvā sabbe vissajjāpesi. Sakkopi tadā attano dibbarūpaṃ dassetvā sampajjalitaṃ sajotibhūtaṃ vajiraṃ paribbhamanto ‘‘are, pāparāja kāḷakaṇṇi, kadā tayā pāṇātipātena sugatigamanaṃ diṭṭhapubbaṃ, candakumāraṃ sabbañca imaṃ janaṃ bandhanato mocehi, no ce mocessasi, ettheva te imassa ca duṭṭhabrāhmaṇassa sīsaṃ phālessāmī’’ti ākāse aṭṭhāsi. Taṃ acchariyaṃ disvā rājā brāhmaṇo ca sīghaṃ sabbe bandhanā mocesuṃ.
ат̇а махааж̇ано згаголаахалам̣ гад̇ваа сахасаа яан̃н̃ааваадам̣ аж̇жход̇т̇арид̇ваа кан̣д̣ахааласса згзгам̣ лзд̣д̣уббахаарам̣ д̣̇знд̇о д̇ад̇т̇зва нам̣ ж̇ийвид̇агкаяам̣ баабзд̇ваа рааж̇аанамби маарзд̇ум̣ аарабхи. б̣од̇хисад̇д̇о бурзд̇арамзва бид̇арам̣ балиссаж̇ид̇ваа тид̇о маарзд̇ум̣ на ад̣̇ааси. махааж̇ано ‘‘ж̇ийвид̇ам̣ д̇аавасса баабаран̃н̃о д̣̇зма, чад̇д̇ам̣ банасса на д̣̇ассаама, наг̇арз ваасам̣ ваа на д̣̇ассаама, д̇ам̣ жан̣д̣аалам̣ гад̇ваа б̣ахинаг̇арз ваасаабзссаамаа’’д̇и рааж̇авзсам̣ хаарзд̇ваа гаасаавам̣ ниваасаабзд̇ваа халид̣̇д̣̇ибилод̇игааяа сийсам̣ взтзд̇ваа жан̣д̣аалам̣ гад̇ваа жан̣д̣аалаг̇аамам̣ бахин̣им̣су. яз бана д̇ам̣ басугхаад̇аяан̃н̃ам̣ яаж̇им̣су жзва яаж̇аабзсун̃жа анумод̣̇им̣су жа, саб̣б̣з д̇з нираяабарааяанаа ахзсум̣. д̇знааха бхаг̇аваа –
Atha mahājano ekakolāhalaṃ katvā sahasā yaññāvāṭaṃ ajjhottharitvā khaṇḍahālassa ekekaṃ leḍḍuppahāraṃ dento tattheva naṃ jīvitakkhayaṃ pāpetvā rājānampi māretuṃ ārabhi. Bodhisatto puretarameva pitaraṃ palissajitvā ṭhito māretuṃ na adāsi. Mahājano ‘‘jīvitaṃ tāvassa pāparañño dema, chattaṃ panassa na dassāma, nagare vāsaṃ vā na dassāma, taṃ caṇḍālaṃ katvā bahinagare vāsāpessāmā’’ti rājavesaṃ hāretvā kāsāvaṃ nivāsāpetvā haliddipilotikāya sīsaṃ veṭhetvā caṇḍālaṃ katvā caṇḍālagāmaṃ pahiṇiṃsu. Ye pana taṃ pasughātayaññaṃ yajiṃsu ceva yajāpesuñca anumodiṃsu ca, sabbe te nirayaparāyanā ahesuṃ. Tenāha bhagavā –
‘‘саб̣б̣з бад̇идтаа нираяам̣, яат̇аа д̇ам̣ баабагам̣ гарид̇ваана;
‘‘Sabbe patiṭṭhā nirayaṃ, yathā taṃ pāpakaṃ karitvāna;
на хи баабагаммам̣ гад̇ваа, лаб̣бхаа суг̇ад̇им̣ ид̇о г̇анд̇у’’нд̇и. (ж̇аа. 2.22.1143);
Na hi pāpakammaṃ katvā, labbhā sugatiṃ ito gantu’’nti. (jā. 2.22.1143);
ат̇а саб̣б̣ааби рааж̇абарисаа нааг̇араа жзва ж̇аанабад̣̇аа жа самааг̇анд̇ваа б̣од̇хисад̇д̇ам̣ раж̇ж̇з абхисин̃жим̣су. со д̇хаммзна раж̇ж̇ам̣ анусаасанд̇о д̇ам̣ ад̇д̇ано махааж̇анасса жа агааран̣знзва уббаннам̣ анаяаб̣яасанам̣ ануссарид̇ваа сам̣взг̇аж̇аад̇о бун̃н̃агирияаасу бхияяосомад̇д̇ааяа уссаахаж̇аад̇о махаад̣̇аанам̣ бавад̇д̇зси, сийлаани рагки, убосат̇агаммам̣ самаад̣̇ияи. д̇зна вуд̇д̇ам̣ –
Atha sabbāpi rājaparisā nāgarā ceva jānapadā ca samāgantvā bodhisattaṃ rajje abhisiñciṃsu. So dhammena rajjaṃ anusāsanto taṃ attano mahājanassa ca akāraṇeneva uppannaṃ anayabyasanaṃ anussaritvā saṃvegajāto puññakiriyāsu bhiyyosomattāya ussāhajāto mahādānaṃ pavattesi, sīlāni rakkhi, uposathakammaṃ samādiyi. Tena vuttaṃ –
46.
46.
‘‘д̇ад̣̇аахам̣ яаж̇анаа муд̇д̇о, нигканд̇о яан̃н̃аваадад̇о;
‘‘Tadāhaṃ yajanā mutto, nikkhanto yaññavāṭato;
сам̣взг̇ам̣ ж̇анаяид̇ваана, махаад̣̇аанам̣ бавад̇д̇аяи’’нд̇и. – аад̣̇и;
Saṃvegaṃ janayitvāna, mahādānaṃ pavattayi’’nti. – ādi;
д̇ад̇т̇а яаж̇анаа муд̇д̇од̇и кан̣д̣ахаалзна вихид̇аяан̃н̃авид̇хид̇о вуд̇д̇анаязна гхаад̇зд̇аб̣б̣ад̇о муд̇д̇о. нигканд̇о яан̃н̃аваадад̇од̇и абхисзгагаран̣ад̇т̇ааяа уссаахаж̇аад̇зна махааж̇анзна сад̣̇д̇хим̣ д̇ад̇о яан̃н̃абхуумид̇о ниг̇г̇ад̇о. сам̣взг̇ам̣ ж̇анаяид̇ваанаад̇и звам̣ ‘‘б̣ахуанд̇арааяо логасанниваасо’’д̇и ад̇ивияа сам̣взг̇ам̣ уббаад̣̇зд̇ваа. махаад̣̇аанам̣ бавад̇д̇аяинд̇и ча д̣̇аанасаалааяо гаараабзд̇ваа махад̇аа д̇ханабарижжааг̇зна взссанд̇арад̣̇аанасад̣̇исам̣ махаад̣̇аанамад̣̇аасим̣. зд̇зна абхисзгагаран̣ад̇о бадтааяа д̇асса махаад̣̇аанасса бавад̇д̇ид̇абхаавам̣ д̣̇ассзд̇и.
Tattha yajanā muttoti khaṇḍahālena vihitayaññavidhito vuttanayena ghātetabbato mutto. Nikkhanto yaññavāṭatoti abhisekakaraṇatthāya ussāhajātena mahājanena saddhiṃ tato yaññabhūmito niggato. Saṃvegaṃ janayitvānāti evaṃ ‘‘bahuantarāyo lokasannivāso’’ti ativiya saṃvegaṃ uppādetvā. Mahādānaṃ pavattayinti cha dānasālāyo kārāpetvā mahatā dhanapariccāgena vessantaradānasadisaṃ mahādānamadāsiṃ. Etena abhisekakaraṇato paṭṭhāya tassa mahādānassa pavattitabhāvaṃ dasseti.
47. д̣̇агкин̣зяяз ад̣̇ад̇ваанаад̇и д̣̇агкин̣аарахз буг̇г̇алз д̣̇зяяад̇хаммам̣ абарижжаж̇ид̇ваа. аби чаббан̃жа рад̇д̇ияод̇и аббзгад̣̇аа чаби бан̃жаби рад̇д̇ияо ад̇д̇ано биванакаад̣̇анабхун̃ж̇анаани на гаромийд̇и д̣̇ассзд̇и.
47.Dakkhiṇeyye adatvānāti dakkhiṇārahe puggale deyyadhammaṃ apariccajitvā. Api chappañca rattiyoti appekadā chapi pañcapi rattiyo attano pivanakhādanabhuñjanāni na karomīti dasseti.
д̇ад̣̇аа гира б̣од̇хисад̇д̇о сагалаж̇амб̣уд̣̇ийбам̣ уннан̇г̇алам̣ гад̇ваа махаамзгхо вияа абхивассанд̇о махаад̣̇аанам̣ бавад̇д̇зси. д̇ад̇т̇а гин̃жааби д̣̇аанасаалаасу аннабаанаад̣̇иул̣аарул̣аарабан̣ийд̇абан̣ийд̇амзва яаажагаанам̣ яат̇ааружид̇ам̣ д̣̇ивасз д̣̇ивасз д̣̇ийяад̇и, д̇ат̇ааби ад̇д̇ано саж̇ж̇ид̇ам̣ аахаарам̣ рааж̇аарахабхож̇анамби яаажагаанам̣ ад̣̇ад̇ваа на бхун̃ж̇ад̇и, д̇ам̣ санд̇хааяа вуд̇д̇ам̣ ‘‘наахам̣ биваамий’’д̇иаад̣̇и.
Tadā kira bodhisatto sakalajambudīpaṃ unnaṅgalaṃ katvā mahāmegho viya abhivassanto mahādānaṃ pavattesi. Tattha kiñcāpi dānasālāsu annapānādiuḷāruḷārapaṇītapaṇītameva yācakānaṃ yathārucitaṃ divase divase dīyati, tathāpi attano sajjitaṃ āhāraṃ rājārahabhojanampi yācakānaṃ adatvā na bhuñjati, taṃ sandhāya vuttaṃ ‘‘nāhaṃ pivāmī’’tiādi.
48. ид̣̇аани д̇ат̇аа яаажагаанам̣ д̣̇аанз гааран̣ам̣ д̣̇ассзнд̇о убамам̣ д̇аава аахарад̇и ‘‘яат̇ааби ваан̣иж̇о наамаа’’д̇иаад̣̇инаа. д̇ассад̇т̇о – яат̇аа наама ваан̣иж̇о бхан̣д̣адтаанам̣ г̇анд̇ваа аббзна баабхад̇зна б̣ахум̣ бхан̣д̣ам̣ виггин̣ид̇ваа вибулам̣ бхан̣д̣асаннижаяам̣ гад̇ваа д̣̇зсагаалам̣ ж̇аананд̇о яад̇т̇асса лаабхо уд̣̇аяо махаа ход̇и, д̇ад̇т̇а д̣̇зсз гаалз ваа д̇ам̣ бхан̣д̣ам̣ харад̇и убанзд̇и виггин̣аад̇и.
48. Idāni tathā yācakānaṃ dāne kāraṇaṃ dassento upamaṃ tāva āharati ‘‘yathāpi vāṇijo nāmā’’tiādinā. Tassattho – yathā nāma vāṇijo bhaṇḍaṭṭhānaṃ gantvā appena pābhatena bahuṃ bhaṇḍaṃ vikkiṇitvā vipulaṃ bhaṇḍasannicayaṃ katvā desakālaṃ jānanto yatthassa lābho udayo mahā hoti, tattha dese kāle vā taṃ bhaṇḍaṃ harati upaneti vikkiṇāti.
49. сагабхуд̇д̇аабийд̇и сагабхуд̇д̇ад̇оби ад̇д̇анаа барибхуд̇д̇ад̇оби. ‘‘сагабарибхуд̇д̇аабий’’д̇иби баато. барзд̇и барасмим̣ бадиг̇г̇аахагабуг̇г̇алз. сад̇абхааг̇од̇и анзгасад̇абхааг̇о ааяад̇им̣ бхависсад̇и. ид̣̇ам̣ вуд̇д̇ам̣ ход̇и – яат̇аа ваан̣иж̇зна гийд̇абхан̣д̣ам̣ д̇ад̇т̇зва авиггин̣ид̇ваа д̇ат̇ааруубз д̣̇зсз гаалз жа виггин̣ияамаанам̣ б̣ахум̣ уд̣̇аяам̣ вибулам̣ палам̣ ход̇и, д̇ат̇зва ад̇д̇ано санд̇агам̣ ад̇д̇анаа анубабхун̃ж̇ид̇ваа барасмим̣ бадиг̇г̇аахагабуг̇г̇алз д̣̇иннам̣ махабпалам̣ анзгасад̇абхааг̇о бхависсад̇и, д̇асмаа ад̇д̇анаа абхун̃ж̇ид̇вааби барасса д̣̇аад̇аб̣б̣амзваад̇и. вуд̇д̇ан̃хзд̇ам̣ бхаг̇авад̇аа – ‘‘д̇иражчаанаг̇ад̇з д̣̇аанам̣ д̣̇ад̇ваа сад̇аг̇ун̣аа д̣̇агкин̣аа баадиган̇кид̇аб̣б̣аа. бут̇уж̇ж̇анад̣̇уссийлз д̣̇аанам̣ д̣̇ад̇ваа сахассаг̇ун̣аа’’д̇и (ма. ни. 3.379) вид̇т̇ааро. абарамби вуд̇д̇ам̣ ‘‘звам̣ жз, бхигкавз, сад̇д̇аа ж̇аанзяяум̣ д̣̇аанасам̣вибхааг̇асса вибаагам̣, яат̇аахам̣ ж̇аанаами, на ад̣̇ад̇ваа бхун̃ж̇зяяум̣, на жа нзсам̣ мажчзрамалам̣ жид̇д̇ам̣ барияаад̣̇ааяа д̇идтзяяа. яоби нзсам̣ асса жаримо аалобо жаримам̣ габ̣ал̣ам̣, д̇ад̇оби на асам̣вибхаж̇ид̇ваа бхун̃ж̇зяяу’’нд̇иаад̣̇и (ид̇иву. 26).
49.Sakabhuttāpīti sakabhuttatopi attanā paribhuttatopi. ‘‘Sakaparibhuttāpī’’tipi pāṭho. Pareti parasmiṃ paṭiggāhakapuggale. Satabhāgoti anekasatabhāgo āyatiṃ bhavissati. Idaṃ vuttaṃ hoti – yathā vāṇijena kītabhaṇḍaṃ tattheva avikkiṇitvā tathārūpe dese kāle ca vikkiṇiyamānaṃ bahuṃ udayaṃ vipulaṃ phalaṃ hoti, tatheva attano santakaṃ attanā anupabhuñjitvā parasmiṃ paṭiggāhakapuggale dinnaṃ mahapphalaṃ anekasatabhāgo bhavissati, tasmā attanā abhuñjitvāpi parassa dātabbamevāti. Vuttañhetaṃ bhagavatā – ‘‘tiracchānagate dānaṃ datvā sataguṇā dakkhiṇā pāṭikaṅkhitabbā. Puthujjanadussīle dānaṃ datvā sahassaguṇā’’ti (ma. ni. 3.379) vitthāro. Aparampi vuttaṃ ‘‘evaṃ ce, bhikkhave, sattā jāneyyuṃ dānasaṃvibhāgassa vipākaṃ, yathāhaṃ jānāmi, na adatvā bhuñjeyyuṃ, na ca nesaṃ maccheramalaṃ cittaṃ pariyādāya tiṭṭheyya. Yopi nesaṃ assa carimo ālopo carimaṃ kabaḷaṃ, tatopi na asaṃvibhajitvā bhuñjeyyu’’ntiādi (itivu. 26).
50. зд̇амад̇т̇авасам̣ н̃ад̇ваад̇и зд̇ам̣ д̣̇аанасса махабпалабхаавасан̇каад̇ан̃жзва саммаасамб̣од̇хияаа бажжаяабхаавасан̇каад̇ан̃жа ад̇т̇авасам̣ гааран̣ам̣ ж̇аанид̇ваа. на бадиггамаами д̣̇аанад̇од̇и д̣̇аанабаарамид̇о ийсагамби на нивад̇д̇аами абхиггамаами зва. гимад̇т̇ам̣? самб̣од̇химанубад̇д̇ияаад̇и самб̣од̇хим̣ саб̣б̣ан̃н̃уд̇ан̃н̃аан̣ам̣ ануббад̇д̇ияаа ануббад̇д̇ияад̇т̇ам̣, ад̇хиг̇анд̇унд̇и ад̇т̇о.
50.Etamatthavasaṃ ñatvāti etaṃ dānassa mahapphalabhāvasaṅkhātañceva sammāsambodhiyā paccayabhāvasaṅkhātañca atthavasaṃ kāraṇaṃ jānitvā. Na paṭikkamāmi dānatoti dānapāramito īsakampi na nivattāmi abhikkamāmi eva. Kimatthaṃ? Sambodhimanupattiyāti sambodhiṃ sabbaññutaññāṇaṃ anuppattiyā anuppattiyatthaṃ, adhigantunti attho.
д̇ад̣̇аа б̣од̇хисад̇д̇о махааж̇анзна бид̇ари жан̣д̣аалаг̇аамам̣ бавзсид̇з д̣̇аад̇аб̣б̣аяуд̇д̇агам̣ бариб̣б̣аяам̣ д̣̇аабзси ниваасанаани баарубанаани жа. соби наг̇арам̣ бависид̇ум̣ алабханд̇о б̣од̇хисад̇д̇з уяяаанагийл̣аад̣̇иад̇т̇ам̣ б̣ахиг̇ад̇з убасан̇гамад̇и, буд̇д̇асан̃н̃ааяа бана на ванд̣̇ад̇и, на ан̃ж̇алигаммам̣ гарод̇и, ‘‘жирам̣ ж̇ийва, саамий’’д̇и вад̣̇ад̇и. б̣од̇хисад̇д̇оби д̣̇идтад̣̇ивасз ад̇ирзгасаммаанам̣ гарод̇и. со звам̣ д̇хаммзна раж̇ж̇ам̣ гаарзд̇ваа ааяубарияосаанз сабарисо д̣̇звалогам̣ буурзси.
Tadā bodhisatto mahājanena pitari caṇḍālagāmaṃ pavesite dātabbayuttakaṃ paribbayaṃ dāpesi nivāsanāni pārupanāni ca. Sopi nagaraṃ pavisituṃ alabhanto bodhisatte uyyānakīḷādiatthaṃ bahigate upasaṅkamati, puttasaññāya pana na vandati, na añjalikammaṃ karoti, ‘‘ciraṃ jīva, sāmī’’ti vadati. Bodhisattopi diṭṭhadivase atirekasammānaṃ karoti. So evaṃ dhammena rajjaṃ kāretvā āyupariyosāne sapariso devalokaṃ pūresi.
д̇ад̣̇аа кан̣д̣ахаало д̣̇звад̣̇ад̇д̇о ахоси, г̇од̇амий д̣̇звий махаамааяаа, жанд̣̇аа рааж̇ад̇хийд̇аа раахуламаад̇аа, ваасуло раахуло, сзлаа уббалаван̣н̣аа, сууро махаагассабо, бхад̣̇д̣̇асзно махаамог̇г̇аллаано, суурияагумааро саарибуд̇д̇о, жанд̣̇арааж̇аа логанаат̇о.
Tadā khaṇḍahālo devadatto ahosi, gotamī devī mahāmāyā, candā rājadhītā rāhulamātā, vāsulo rāhulo, selā uppalavaṇṇā, sūro mahākassapo, bhaddaseno mahāmoggallāno, sūriyakumāro sāriputto, candarājā lokanātho.
д̇асса ид̇хааби буб̣б̣з вуд̇д̇анаязнзва яат̇аарахам̣ сзсабаарамияо нид̣̇д̇хаарзд̇аб̣б̣аа. д̇ад̣̇аа кан̣д̣ахааласса гагкал̣апарусабхаавам̣ ж̇аананд̇оби аж̇жхубзгкид̇ваа д̇хаммзна самзна аддасса винижчаяо, ад̇д̇аанам̣ маарзд̇угаамассзва кан̣д̣ахааласса д̇ат̇аа яан̃н̃авид̇хаанам̣ ж̇аанид̇вааби д̇асса убари жид̇д̇аббагобаабхааво, ад̇д̇ано барисам̣ г̇ахзд̇ваа бид̇у сад̇д̇у бхавид̇ум̣ самад̇т̇оби ‘‘маад̣̇исасса наама г̇аруухи вирод̇хо на яуд̇д̇о’’д̇и ад̇д̇аанам̣ бурисабасум̣ гад̇ваа гхаад̇аабзд̇угаамасса бид̇у аан̣ааяам̣ авадтаанам̣, госияаа асим̣ г̇ахзд̇ваа сийсам̣ чинд̣̇ид̇ум̣ убаггаманд̇з бурохид̇з ад̇д̇ано бид̇ари буд̇д̇з саб̣б̣асад̇д̇зсу жа мзд̇д̇аапаран̣зна самажид̇д̇ад̇аа, махааж̇анз бид̇арам̣ маарзд̇ум̣ убаггаманд̇з саяам̣ балиссаж̇ид̇ваа д̇асса ж̇ийвид̇ад̣̇аанан̃жа, д̣̇ивасз д̣̇ивасз взссанд̇арад̣̇аанасад̣̇исам̣ махаад̣̇аанам̣ д̣̇ад̣̇ад̇оби д̣̇аанзна ад̇ид̇д̇абхааво, махааж̇анзна жан̣д̣аалзсу ваасаабид̇асса бид̇у д̣̇аад̇аб̣б̣аяуд̇д̇агам̣ д̣̇ад̇ваа босанам̣, махааж̇анам̣ бун̃н̃агирияаасу бад̇идтаабананд̇и звамаад̣̇аяо г̇ун̣аанубхааваа нид̣̇д̇хаарзд̇аб̣б̣аад̇и.
Tassa idhāpi pubbe vuttanayeneva yathārahaṃ sesapāramiyo niddhāretabbā. Tadā khaṇḍahālassa kakkhaḷapharusabhāvaṃ jānantopi ajjhupekkhitvā dhammena samena aṭṭassa vinicchayo, attānaṃ māretukāmasseva khaṇḍahālassa tathā yaññavidhānaṃ jānitvāpi tassa upari cittappakopābhāvo, attano parisaṃ gahetvā pitu sattu bhavituṃ samatthopi ‘‘mādisassa nāma garūhi virodho na yutto’’ti attānaṃ purisapasuṃ katvā ghātāpetukāmassa pitu āṇāyaṃ avaṭṭhānaṃ, kosiyā asiṃ gahetvā sīsaṃ chindituṃ upakkamante purohite attano pitari putte sabbasattesu ca mettāpharaṇena samacittatā, mahājane pitaraṃ māretuṃ upakkamante sayaṃ palissajitvā tassa jīvitadānañca, divase divase vessantaradānasadisaṃ mahādānaṃ dadatopi dānena atittabhāvo, mahājanena caṇḍālesu vāsāpitassa pitu dātabbayuttakaṃ datvā posanaṃ, mahājanaṃ puññakiriyāsu patiṭṭhāpananti evamādayo guṇānubhāvā niddhāretabbāti.
жанд̣̇агумааражарияааван̣н̣анаа нидтид̇аа.
Candakumāracariyāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / жарияаабидагабаал̣и • Cariyāpiṭakapāḷi / 7. жанд̣̇агумааражарияаа • 7. Candakumāracariyā
