| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၅. စဏ္ဍာလသုတ္တံ
5. Caṇḍālasuttaṃ
၁၇၅. ‘‘ပဉ္စဟိ, ဘိက္ခဝေ, ဓမ္မေဟိ သမန္နာဂတော ဥပာသကော ဥပာသကစဏ္ဍာလော စ ဟောတိ ဥပာသကမလဉ္စ ဥပာသကပတိကုဋ္ဌော စ 1။ ကတမေဟိ ပဉ္စဟိ? အသ္သဒ္ဓော ဟောတိ; ဒုသ္သီလော ဟောတိ; ကောတူဟလမင္ဂလိကော ဟောတိ, မင္ဂလံ ပစ္စေတိ နော ကမ္မံ; ဣတော စ ဗဟိဒ္ဓာ ဒက္ခိဏေယ္ယံ ဂဝေသတိ; တတ္ထ စ ပုဗ္ဗကာရံ ကရောတိ။ ဣမေဟိ ခော, ဘိက္ခဝေ, ပဉ္စဟိ ဓမ္မေဟိ သမန္နာဂတော ဥပာသကော ဥပာသကစဏ္ဍာလော စ ဟောတိ ဥပာသကမလဉ္စ ဥပာသကပတိကုဋ္ဌော စ။
175. ‘‘Pañcahi, bhikkhave, dhammehi samannāgato upāsako upāsakacaṇḍālo ca hoti upāsakamalañca upāsakapatikuṭṭho ca 2. Katamehi pañcahi? Assaddho hoti; dussīlo hoti; kotūhalamaṅgaliko hoti, maṅgalaṃ pacceti no kammaṃ; ito ca bahiddhā dakkhiṇeyyaṃ gavesati; tattha ca pubbakāraṃ karoti. Imehi kho, bhikkhave, pañcahi dhammehi samannāgato upāsako upāsakacaṇḍālo ca hoti upāsakamalañca upāsakapatikuṭṭho ca.
‘‘ပဉ္စဟိ, ဘိက္ခဝေ, ဓမ္မေဟိ သမန္နာဂတော ဥပာသကော ဥပာသကရတနဉ္စ ဟောတိ ဥပာသကပဒုမဉ္စ ဥပာသကပုဏ္ဍရီကဉ္စ 3။ ကတမေဟိ ပဉ္စဟိ? သဒ္ဓော ဟောတိ; သီလဝာ ဟောတိ; အကောတူဟလမင္ဂလိကော ဟောတိ, ကမ္မံ ပစ္စေတိ နော မင္ဂလံ; န ဣတော ဗဟိဒ္ဓာ ဒက္ခိဏေယ္ယံ ဂဝေသတိ; ဣဓ စ ပုဗ္ဗကာရံ ကရောတိ။ ဣမေဟိ ခော, ဘိက္ခဝေ, ပဉ္စဟိ ဓမ္မေဟိ သမန္နာဂတော ဥပာသကော ဥပာသကရတနဉ္စ ဟောတိ ဥပာသကပဒုမဉ္စ ဥပာသကပုဏ္ဍရီကဉ္စာ’’တိ။ ပဉ္စမံ။
‘‘Pañcahi, bhikkhave, dhammehi samannāgato upāsako upāsakaratanañca hoti upāsakapadumañca upāsakapuṇḍarīkañca 4. Katamehi pañcahi? Saddho hoti; sīlavā hoti; akotūhalamaṅgaliko hoti, kammaṃ pacceti no maṅgalaṃ; na ito bahiddhā dakkhiṇeyyaṃ gavesati; idha ca pubbakāraṃ karoti. Imehi kho, bhikkhave, pañcahi dhammehi samannāgato upāsako upāsakaratanañca hoti upāsakapadumañca upāsakapuṇḍarīkañcā’’ti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၅. စဏ္ဍာလသုတ္တဝဏ္ဏနာ • 5. Caṇḍālasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၆. သာရဇ္ဇသုတ္တာဒိဝဏ္ဏနာ • 1-6. Sārajjasuttādivaṇṇanā
