| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. චණ්‌ඩාලසුත්‌තං
5. Caṇḍālasuttaṃ
175. ‘‘පඤ්‌චහි, භික්‌ඛවෙ, ධම්‌මෙහි සමන්‌නාගතො උපාසකො උපාසකචණ්‌ඩාලො ච හොති උපාසකමලඤ්‌ච උපාසකපතිකුට්‌ඨො ච 1. කතමෙහි පඤ්‌චහි? අස්‌සද්‌ධො හොති; දුස්‌සීලො හොති; කොතූහලමඞ්‌ගලිකො හොති, මඞ්‌ගලං පච්‌චෙති නො කම්‌මං; ඉතො ච බහිද්‌ධා දක්‌ඛිණෙය්‍යං ගවෙසති; තත්‌ථ ච පුබ්‌බකාරං කරොති. ඉමෙහි ඛො, භික්‌ඛවෙ, පඤ්‌චහි ධම්‌මෙහි සමන්‌නාගතො උපාසකො උපාසකචණ්‌ඩාලො ච හොති උපාසකමලඤ්‌ච උපාසකපතිකුට්‌ඨො ච.
175. ‘‘Pañcahi, bhikkhave, dhammehi samannāgato upāsako upāsakacaṇḍālo ca hoti upāsakamalañca upāsakapatikuṭṭho ca 2. Katamehi pañcahi? Assaddho hoti; dussīlo hoti; kotūhalamaṅgaliko hoti, maṅgalaṃ pacceti no kammaṃ; ito ca bahiddhā dakkhiṇeyyaṃ gavesati; tattha ca pubbakāraṃ karoti. Imehi kho, bhikkhave, pañcahi dhammehi samannāgato upāsako upāsakacaṇḍālo ca hoti upāsakamalañca upāsakapatikuṭṭho ca.
‘‘පඤ්‌චහි, භික්‌ඛවෙ, ධම්‌මෙහි සමන්‌නාගතො උපාසකො උපාසකරතනඤ්‌ච හොති උපාසකපදුමඤ්‌ච උපාසකපුණ්‌ඩරීකඤ්‌ච 3. කතමෙහි පඤ්‌චහි? සද්‌ධො හොති; සීලවා හොති; අකොතූහලමඞ්‌ගලිකො හොති, කම්‌මං පච්‌චෙති නො මඞ්‌ගලං; න ඉතො බහිද්‌ධා දක්‌ඛිණෙය්‍යං ගවෙසති; ඉධ ච පුබ්‌බකාරං කරොති. ඉමෙහි ඛො, භික්‌ඛවෙ, පඤ්‌චහි ධම්‌මෙහි සමන්‌නාගතො උපාසකො උපාසකරතනඤ්‌ච හොති උපාසකපදුමඤ්‌ච උපාසකපුණ්‌ඩරීකඤ්‌චා’’ති. පඤ්‌චමං.
‘‘Pañcahi, bhikkhave, dhammehi samannāgato upāsako upāsakaratanañca hoti upāsakapadumañca upāsakapuṇḍarīkañca 4. Katamehi pañcahi? Saddho hoti; sīlavā hoti; akotūhalamaṅgaliko hoti, kammaṃ pacceti no maṅgalaṃ; na ito bahiddhā dakkhiṇeyyaṃ gavesati; idha ca pubbakāraṃ karoti. Imehi kho, bhikkhave, pañcahi dhammehi samannāgato upāsako upāsakaratanañca hoti upāsakapadumañca upāsakapuṇḍarīkañcā’’ti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. චණ්‌ඩාලසුත්‌තවණ්‌ණනා • 5. Caṇḍālasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-6. සාරජ්‌ජසුත්‌තාදිවණ්‌ණනා • 1-6. Sārajjasuttādivaṇṇanā
