| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. சந்த³னபூஜனகத்தே²ரஅபதா³னவண்ணனா
3. Candanapūjanakattheraapadānavaṇṇanā
சந்த³பா⁴கா³னதீ³தீரேதிஆதி³கங் ஆயஸ்மதோ சந்த³னபூஜனகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அத்த²த³ஸ்ஸிஸ்ஸ ப⁴க³வதோ காலே ஹிமவந்தே சந்த³பா⁴கா³னதி³யா ஸமீபே கின்னரயோனியங் நிப்³ப³த்தோ புப்ப²ப⁴க்கோ² புப்ப²னிவஸனோ சந்த³னஅக³ருஆதீ³ஸு க³ந்த⁴விபூ⁴ஸிதோ ஹிமவந்தே பு⁴ம்மதே³வதா விய உய்யானகீளஜலகீளாதி³அனேகஸுக²ங் அனுப⁴வந்தோ வாஸங் கப்பேஸி. ததா³ அத்த²த³ஸ்ஸீ ப⁴க³வா தஸ்ஸானுகம்பாய ஹிமவந்தங் க³ந்த்வா ஆகாஸதோ ஓருய்ஹ ஸங்கா⁴டிங் பஞ்ஞாபெத்வா நிஸீதி³. ஸோ கின்னரோ தங் ப⁴க³வந்தங் விஜ்ஜோதமானங் தத்த² நிஸின்னங் தி³ஸ்வா பஸன்னமானஸோ ஸுக³ந்த⁴சந்த³னேன பூஜேஸி. தஸ்ஸ ப⁴க³வா அனுமோத³னங் அகாஸி.
Candabhāgānadītīretiādikaṃ āyasmato candanapūjanakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavante candabhāgānadiyā samīpe kinnarayoniyaṃ nibbatto pupphabhakkho pupphanivasano candanaagaruādīsu gandhavibhūsito himavante bhummadevatā viya uyyānakīḷajalakīḷādianekasukhaṃ anubhavanto vāsaṃ kappesi. Tadā atthadassī bhagavā tassānukampāya himavantaṃ gantvā ākāsato oruyha saṅghāṭiṃ paññāpetvā nisīdi. So kinnaro taṃ bhagavantaṃ vijjotamānaṃ tattha nisinnaṃ disvā pasannamānaso sugandhacandanena pūjesi. Tassa bhagavā anumodanaṃ akāsi.
17. ஸோ தேன புஞ்ஞேன தேன ஸோமனஸ்ஸேன யாவதாயுகங் ட²த்வா ததோ சுதோ தே³வலோகே நிப்³ப³த்தோ அபராபரங் ச² காமாவசரஸம்பத்தியோ அனுப⁴வித்வா மனுஸ்ஸேஸு சக்கவத்திரஜ்ஜபதே³ஸரஜ்ஜஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ பப்³ப³ஜித்வா நசிரஸ்ஸேவ அரஹத்தங் பத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ சந்த³பா⁴கா³னதீ³தீரேதிஆதி³மாஹ. தத்த² சந்த³ங் மனங் ருசிங் அஜ்ஜா²ஸயங் ஞத்வா விய ஜாதோதி சந்தோ³. சந்த³மண்ட³லேன பஸன்னநிம்மலோத³கேன உபோ⁴ஸு பஸ்ஸேஸு முத்தாத³லஸதி³ஸஸந்த²ரத⁴வலபுலினதலேன ச ஸமன்னாக³தத்தா சந்தே³ன பா⁴கா³ ஸதி³ஸாதி சந்த³பா⁴கா³, தஸ்ஸா சந்த³பா⁴கா³ய நதி³யா தீரே ஸமீபேதி அத்தோ². ஸேஸங் ஸப்³ப³ங் ஹெட்டா² வுத்தனயத்தா ஸுவிஞ்ஞெய்யமேவாதி.
17. So tena puññena tena somanassena yāvatāyukaṃ ṭhatvā tato cuto devaloke nibbatto aparāparaṃ cha kāmāvacarasampattiyo anubhavitvā manussesu cakkavattirajjapadesarajjasampattiyo anubhavitvā imasmiṃ buddhuppāde kulagehe nibbatto viññutaṃ patto pabbajitvā nacirasseva arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tattha candaṃ manaṃ ruciṃ ajjhāsayaṃ ñatvā viya jātoti cando. Candamaṇḍalena pasannanimmalodakena ubhosu passesu muttādalasadisasantharadhavalapulinatalena ca samannāgatattā candena bhāgā sadisāti candabhāgā, tassā candabhāgāya nadiyā tīre samīpeti attho. Sesaṃ sabbaṃ heṭṭhā vuttanayattā suviññeyyamevāti.
சந்த³னபூஜனகத்தே²ரஅபதா³னவண்ணனா ஸமத்தா.
Candanapūjanakattheraapadānavaṇṇanā samattā.
அட்ட²மபா⁴ணவாரவண்ணனா ஸமத்தா.
Aṭṭhamabhāṇavāravaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. சந்த³னபூஜனகத்தே²ரஅபதா³னங் • 3. Candanapūjanakattheraapadānaṃ
