| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৩. চন্দনপূজনকত্থেরঅপদানৰণ্ণনা
3. Candanapūjanakattheraapadānavaṇṇanā
চন্দভাগানদীতীরেতিআদিকং আযস্মতো চন্দনপূজনকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে হিমৰন্তে চন্দভাগানদিযা সমীপে কিন্নরযোনিযং নিব্বত্তো পুপ্ফভক্খো পুপ্ফনিৰসনো চন্দনঅগরুআদীসু গন্ধৰিভূসিতো হিমৰন্তে ভুম্মদেৰতা ৰিয উয্যানকীল়জলকীল়াদিঅনেকসুখং অনুভৰন্তো ৰাসং কপ্পেসি। তদা অত্থদস্সী ভগৰা তস্সানুকম্পায হিমৰন্তং গন্ত্ৰা আকাসতো ওরুয্হ সঙ্ঘাটিং পঞ্ঞাপেত্ৰা নিসীদি। সো কিন্নরো তং ভগৰন্তং ৰিজ্জোতমানং তত্থ নিসিন্নং দিস্ৰা পসন্নমানসো সুগন্ধচন্দনেন পূজেসি। তস্স ভগৰা অনুমোদনং অকাসি।
Candabhāgānadītīretiādikaṃ āyasmato candanapūjanakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavante candabhāgānadiyā samīpe kinnarayoniyaṃ nibbatto pupphabhakkho pupphanivasano candanaagaruādīsu gandhavibhūsito himavante bhummadevatā viya uyyānakīḷajalakīḷādianekasukhaṃ anubhavanto vāsaṃ kappesi. Tadā atthadassī bhagavā tassānukampāya himavantaṃ gantvā ākāsato oruyha saṅghāṭiṃ paññāpetvā nisīdi. So kinnaro taṃ bhagavantaṃ vijjotamānaṃ tattha nisinnaṃ disvā pasannamānaso sugandhacandanena pūjesi. Tassa bhagavā anumodanaṃ akāsi.
১৭. সো তেন পুঞ্ঞেন তেন সোমনস্সেন যাৰতাযুকং ঠত্ৰা ততো চুতো দেৰলোকে নিব্বত্তো অপরাপরং ছ কামাৰচরসম্পত্তিযো অনুভৰিত্ৰা মনুস্সেসু চক্কৰত্তিরজ্জপদেসরজ্জসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো পব্বজিত্ৰা নচিরস্সেৰ অরহত্তং পত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো চন্দভাগানদীতীরেতিআদিমাহ। তত্থ চন্দং মনং রুচিং অজ্ঝাসযং ঞত্ৰা ৰিয জাতোতি চন্দো। চন্দমণ্ডলেন পসন্ননিম্মলোদকেন উভোসু পস্সেসু মুত্তাদলসদিসসন্থরধৰলপুলিনতলেন চ সমন্নাগতত্তা চন্দেন ভাগা সদিসাতি চন্দভাগা, তস্সা চন্দভাগায নদিযা তীরে সমীপেতি অত্থো। সেসং সব্বং হেট্ঠা ৰুত্তনযত্তা সুৰিঞ্ঞেয্যমেৰাতি।
17. So tena puññena tena somanassena yāvatāyukaṃ ṭhatvā tato cuto devaloke nibbatto aparāparaṃ cha kāmāvacarasampattiyo anubhavitvā manussesu cakkavattirajjapadesarajjasampattiyo anubhavitvā imasmiṃ buddhuppāde kulagehe nibbatto viññutaṃ patto pabbajitvā nacirasseva arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tattha candaṃ manaṃ ruciṃ ajjhāsayaṃ ñatvā viya jātoti cando. Candamaṇḍalena pasannanimmalodakena ubhosu passesu muttādalasadisasantharadhavalapulinatalena ca samannāgatattā candena bhāgā sadisāti candabhāgā, tassā candabhāgāya nadiyā tīre samīpeti attho. Sesaṃ sabbaṃ heṭṭhā vuttanayattā suviññeyyamevāti.
চন্দনপূজনকত্থেরঅপদানৰণ্ণনা সমত্তা।
Candanapūjanakattheraapadānavaṇṇanā samattā.
অট্ঠমভাণৰারৰণ্ণনা সমত্তা।
Aṭṭhamabhāṇavāravaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৩. চন্দনপূজনকত্থেরঅপদানং • 3. Candanapūjanakattheraapadānaṃ
