| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
३. चन्दनपूजनकत्थेरअपदानवण्णना
3. Candanapūjanakattheraapadānavaṇṇanā
चन्दभागानदीतीरेतिआदिकं आयस्मतो चन्दनपूजनकत्थेरस्स अपदानं। अयम्पि पुरिमबुद्धेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो अत्थदस्सिस्स भगवतो काले हिमवन्ते चन्दभागानदिया समीपे किन्नरयोनियं निब्बत्तो पुप्फभक्खो पुप्फनिवसनो चन्दनअगरुआदीसु गन्धविभूसितो हिमवन्ते भुम्मदेवता विय उय्यानकीळजलकीळादिअनेकसुखं अनुभवन्तो वासं कप्पेसि। तदा अत्थदस्सी भगवा तस्सानुकम्पाय हिमवन्तं गन्त्वा आकासतो ओरुय्ह सङ्घाटिं पञ्ञापेत्वा निसीदि। सो किन्नरो तं भगवन्तं विज्जोतमानं तत्थ निसिन्नं दिस्वा पसन्नमानसो सुगन्धचन्दनेन पूजेसि। तस्स भगवा अनुमोदनं अकासि।
Candabhāgānadītīretiādikaṃ āyasmato candanapūjanakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavante candabhāgānadiyā samīpe kinnarayoniyaṃ nibbatto pupphabhakkho pupphanivasano candanaagaruādīsu gandhavibhūsito himavante bhummadevatā viya uyyānakīḷajalakīḷādianekasukhaṃ anubhavanto vāsaṃ kappesi. Tadā atthadassī bhagavā tassānukampāya himavantaṃ gantvā ākāsato oruyha saṅghāṭiṃ paññāpetvā nisīdi. So kinnaro taṃ bhagavantaṃ vijjotamānaṃ tattha nisinnaṃ disvā pasannamānaso sugandhacandanena pūjesi. Tassa bhagavā anumodanaṃ akāsi.
१७. सो तेन पुञ्ञेन तेन सोमनस्सेन यावतायुकं ठत्वा ततो चुतो देवलोके निब्बत्तो अपरापरं छ कामावचरसम्पत्तियो अनुभवित्वा मनुस्सेसु चक्कवत्तिरज्जपदेसरज्जसम्पत्तियो अनुभवित्वा इमस्मिं बुद्धुप्पादे कुलगेहे निब्बत्तो विञ्ञुतं पत्तो पब्बजित्वा नचिरस्सेव अरहत्तं पत्वा अत्तनो पुब्बकम्मं सरित्वा सोमनस्सजातो पुब्बचरितापदानं पकासेन्तो चन्दभागानदीतीरेतिआदिमाह। तत्थ चन्दं मनं रुचिं अज्झासयं ञत्वा विय जातोति चन्दो। चन्दमण्डलेन पसन्ननिम्मलोदकेन उभोसु पस्सेसु मुत्तादलसदिससन्थरधवलपुलिनतलेन च समन्नागतत्ता चन्देन भागा सदिसाति चन्दभागा, तस्सा चन्दभागाय नदिया तीरे समीपेति अत्थो। सेसं सब्बं हेट्ठा वुत्तनयत्ता सुविञ्ञेय्यमेवाति।
17. So tena puññena tena somanassena yāvatāyukaṃ ṭhatvā tato cuto devaloke nibbatto aparāparaṃ cha kāmāvacarasampattiyo anubhavitvā manussesu cakkavattirajjapadesarajjasampattiyo anubhavitvā imasmiṃ buddhuppāde kulagehe nibbatto viññutaṃ patto pabbajitvā nacirasseva arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tattha candaṃ manaṃ ruciṃ ajjhāsayaṃ ñatvā viya jātoti cando. Candamaṇḍalena pasannanimmalodakena ubhosu passesu muttādalasadisasantharadhavalapulinatalena ca samannāgatattā candena bhāgā sadisāti candabhāgā, tassā candabhāgāya nadiyā tīre samīpeti attho. Sesaṃ sabbaṃ heṭṭhā vuttanayattā suviññeyyamevāti.
चन्दनपूजनकत्थेरअपदानवण्णना समत्ता।
Candanapūjanakattheraapadānavaṇṇanā samattā.
अट्ठमभाणवारवण्णना समत्ता।
Aṭṭhamabhāṇavāravaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ३. चन्दनपूजनकत्थेरअपदानं • 3. Candanapūjanakattheraapadānaṃ
