| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
3. චන්‌දනපූජනකත්‌ථෙරඅපදානවණ්‌ණනා
3. Candanapūjanakattheraapadānavaṇṇanā
චන්‌දභාගානදීතීරෙතිආදිකං ආයස්‌මතො චන්‌දනපූජනකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො අත්‌ථදස්‌සිස්‌ස භගවතො කාලෙ හිමවන්‌තෙ චන්‌දභාගානදියා සමීපෙ කින්‌නරයොනියං නිබ්‌බත්‌තො පුප්‌ඵභක්‌ඛො පුප්‌ඵනිවසනො චන්‌දනඅගරුආදීසු ගන්‌ධවිභූසිතො හිමවන්‌තෙ භුම්‌මදෙවතා විය උය්‍යානකීළජලකීළාදිඅනෙකසුඛං අනුභවන්‌තො වාසං කප්‌පෙසි. තදා අත්‌ථදස්‌සී භගවා තස්‌සානුකම්‌පාය හිමවන්‌තං ගන්‌ත්‌වා ආකාසතො ඔරුය්‌හ සඞ්‌ඝාටිං පඤ්‌ඤාපෙත්‌වා නිසීදි. සො කින්‌නරො තං භගවන්‌තං විජ්‌ජොතමානං තත්‌ථ නිසින්‌නං දිස්‌වා පසන්‌නමානසො සුගන්‌ධචන්‌දනෙන පූජෙසි. තස්‌ස භගවා අනුමොදනං අකාසි.
Candabhāgānadītīretiādikaṃ āyasmato candanapūjanakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavante candabhāgānadiyā samīpe kinnarayoniyaṃ nibbatto pupphabhakkho pupphanivasano candanaagaruādīsu gandhavibhūsito himavante bhummadevatā viya uyyānakīḷajalakīḷādianekasukhaṃ anubhavanto vāsaṃ kappesi. Tadā atthadassī bhagavā tassānukampāya himavantaṃ gantvā ākāsato oruyha saṅghāṭiṃ paññāpetvā nisīdi. So kinnaro taṃ bhagavantaṃ vijjotamānaṃ tattha nisinnaṃ disvā pasannamānaso sugandhacandanena pūjesi. Tassa bhagavā anumodanaṃ akāsi.
17. සො තෙන පුඤ්‌ඤෙන තෙන සොමනස්‌සෙන යාවතායුකං ඨත්‌වා තතො චුතො දෙවලොකෙ නිබ්‌බත්‌තො අපරාපරං ඡ කාමාවචරසම්‌පත්‌තියො අනුභවිත්‌වා මනුස්‌සෙසු චක්‌කවත්‌තිරජ්‌ජපදෙසරජ්‌ජසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො විඤ්‌ඤුතං පත්‌තො පබ්‌බජිත්‌වා නචිරස්‌සෙව අරහත්‌තං පත්‌වා අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො චන්‌දභාගානදීතීරෙතිආදිමාහ. තත්‌ථ චන්‌දං මනං රුචිං අජ්‌ඣාසයං ඤත්‌වා විය ජාතොති චන්‌දො. චන්‌දමණ්‌ඩලෙන පසන්‌නනිම්‌මලොදකෙන උභොසු පස්‌සෙසු මුත්‌තාදලසදිසසන්‌ථරධවලපුලිනතලෙන ච සමන්‌නාගතත්‌තා චන්‌දෙන භාගා සදිසාති චන්‌දභාගා, තස්‌සා චන්‌දභාගාය නදියා තීරෙ සමීපෙති අත්‌ථො. සෙසං සබ්‌බං හෙට්‌ඨා වුත්‌තනයත්‌තා සුවිඤ්‌ඤෙය්‍යමෙවාති.
17. So tena puññena tena somanassena yāvatāyukaṃ ṭhatvā tato cuto devaloke nibbatto aparāparaṃ cha kāmāvacarasampattiyo anubhavitvā manussesu cakkavattirajjapadesarajjasampattiyo anubhavitvā imasmiṃ buddhuppāde kulagehe nibbatto viññutaṃ patto pabbajitvā nacirasseva arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tattha candaṃ manaṃ ruciṃ ajjhāsayaṃ ñatvā viya jātoti cando. Candamaṇḍalena pasannanimmalodakena ubhosu passesu muttādalasadisasantharadhavalapulinatalena ca samannāgatattā candena bhāgā sadisāti candabhāgā, tassā candabhāgāya nadiyā tīre samīpeti attho. Sesaṃ sabbaṃ heṭṭhā vuttanayattā suviññeyyamevāti.
චන්‌දනපූජනකත්‌ථෙරඅපදානවණ්‌ණනා සමත්‌තා.
Candanapūjanakattheraapadānavaṇṇanā samattā.
අට්‌ඨමභාණවාරවණ්‌ණනා සමත්‌තා.
Aṭṭhamabhāṇavāravaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 3. චන්‌දනපූජනකත්‌ථෙරඅපදානං • 3. Candanapūjanakattheraapadānaṃ
