| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၇. စန္ဒင္ဂပဉ္ဟော
7. Candaṅgapañho
၇. ‘‘ဘန္တေ နာဂသေန, ‘စန္ဒသ္သ ပဉ္စ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, စန္ဒော သုက္ကပက္ခေ ဥဒယန္တော ဥတ္တရုတ္တရိံ ဝဍ္ဎတိ, ဧဝမေဝ ခော, မဟာရာဇ, ယောဂိနာ ယောဂာဝစရေန အာစာရသီလဂုဏဝတ္တပ္ပဋိပတ္တိယာ အာဂမာဓိဂမေ ပဋိသလ္လာနေ သတိပဋ္ဌာနေ ဣန္ဒ္ရိယေသု ဂုတ္တဒ္ဝာရတာယ ဘောဇနေ မတ္တညုတာယ ဇာဂရိယာနုယောဂေ ဥတ္တရုတ္တရိံ ဝဍ္ဎိတဗ္ဗံ။ ဣဒံ, မဟာရာဇ, စန္ဒသ္သ ပဌမံ အင္ဂံ ဂဟေတဗ္ဗံ။
7. ‘‘Bhante nāgasena, ‘candassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, cando sukkapakkhe udayanto uttaruttariṃ vaḍḍhati, evameva kho, mahārāja, yoginā yogāvacarena ācārasīlaguṇavattappaṭipattiyā āgamādhigame paṭisallāne satipaṭṭhāne indriyesu guttadvāratāya bhojane mattaññutāya jāgariyānuyoge uttaruttariṃ vaḍḍhitabbaṃ. Idaṃ, mahārāja, candassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, စန္ဒော ဥဠာရာဓိပတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ဥဠာရေန ဆန္ဒာဓိပတိနာ ဘဝိတဗ္ဗံ။ ဣဒံ, မဟာရာဇ, စန္ဒသ္သ ဒုတိယံ အင္ဂံ ဂဟေတဗ္ဗံ။
‘‘Puna caparaṃ, mahārāja, cando uḷārādhipati, evameva kho, mahārāja, yoginā yogāvacarena uḷārena chandādhipatinā bhavitabbaṃ. Idaṃ, mahārāja, candassa dutiyaṃ aṅgaṃ gahetabbaṃ.
‘‘ပုန စပရံ, မဟာရာဇ, စန္ဒော နိသာယ စရတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ပဝိဝိတ္တေန ဘဝိတဗ္ဗံ။ ဣဒံ, မဟာရာဇ, စန္ဒသ္သ တတိယံ အင္ဂံ ဂဟေတဗ္ဗံ။
‘‘Puna caparaṃ, mahārāja, cando nisāya carati, evameva kho, mahārāja, yoginā yogāvacarena pavivittena bhavitabbaṃ. Idaṃ, mahārāja, candassa tatiyaṃ aṅgaṃ gahetabbaṃ.
‘‘ပုန စပရံ, မဟာရာဇ, စန္ဒော ဝိမာနကေတု, ဧဝမေဝ ခော, မဟာရာဇ, ယောဂိနာ ယောဂာဝစရေန သီလကေတုနာ ဘဝိတဗ္ဗံ။ ဣဒံ, မဟာရာဇ, စန္ဒသ္သ စတုတ္ထံ အင္ဂံ ဂဟေတဗ္ဗံ။
‘‘Puna caparaṃ, mahārāja, cando vimānaketu, evameva kho, mahārāja, yoginā yogāvacarena sīlaketunā bhavitabbaṃ. Idaṃ, mahārāja, candassa catutthaṃ aṅgaṃ gahetabbaṃ.
‘‘ပုန စပရံ, မဟာရာဇ, စန္ဒော အာယာစိတပတ္ထိတော ဥဒေတိ, ဧဝမေဝ ခော, မဟာရာဇ, ယောဂိနာ ယောဂာဝစရေန အာယာစိတပတ္ထိတေန ကုလာနိ ဥပသင္ကမိတဗ္ဗာနိ။ ဣဒံ, မဟာရာဇ, စန္ဒသ္သ ပဉ္စမံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝာတိဒေဝေန သံယုတ္တနိကာယဝရေ ‘စန္ဒူပမာ, ဘိက္ခဝေ, ကုလာနိ ဥပသင္ကမထ, အပကသ္သေဝ ကာယံ အပကသ္သ စိတ္တံ နိစ္စနဝကာ ကုလေသု အပ္ပဂဗ္ဘာ’’’တိ 1။
‘‘Puna caparaṃ, mahārāja, cando āyācitapatthito udeti, evameva kho, mahārāja, yoginā yogāvacarena āyācitapatthitena kulāni upasaṅkamitabbāni. Idaṃ, mahārāja, candassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare ‘candūpamā, bhikkhave, kulāni upasaṅkamatha, apakasseva kāyaṃ apakassa cittaṃ niccanavakā kulesu appagabbhā’’’ti 2.
စန္ဒင္ဂပဉ္ဟော သတ္တမော။
Candaṅgapañho sattamo.
Footnotes:
