| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༧. ཙནྡངྒཔཉྷོ
7. Candaṅgapañho
༧. ‘‘བྷནྟེ ནཱགསེན, ‘ཙནྡསྶ པཉྩ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི པཉྩ ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, ཙནྡོ སུཀྐཔཀྑེ ཨུདཡནྟོ ཨུཏྟརུཏྟརིཾ ཝཌྜྷཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཱཙཱརསཱིལགུཎཝཏྟཔྤཊིཔཏྟིཡཱ ཨཱགམཱདྷིགམེ པཊིསལླཱནེ སཏིཔཊྛཱནེ ཨིནྡྲིཡེསུ གུཏྟདྭཱརཏཱཡ བྷོཛནེ མཏྟཉྙུཏཱཡ ཛཱགརིཡཱནུཡོགེ ཨུཏྟརུཏྟརིཾ ཝཌྜྷིཏབྦཾ། ཨིདཾ, མཧཱརཱཛ, ཙནྡསྶ པཋམཾ ཨངྒཾ གཧེཏབྦཾ།
7. ‘‘Bhante nāgasena, ‘candassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, cando sukkapakkhe udayanto uttaruttariṃ vaḍḍhati, evameva kho, mahārāja, yoginā yogāvacarena ācārasīlaguṇavattappaṭipattiyā āgamādhigame paṭisallāne satipaṭṭhāne indriyesu guttadvāratāya bhojane mattaññutāya jāgariyānuyoge uttaruttariṃ vaḍḍhitabbaṃ. Idaṃ, mahārāja, candassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཙནྡོ ཨུལཱ༹རཱདྷིཔཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨུལཱ༹རེན ཚནྡཱདྷིཔཏིནཱ བྷཝིཏབྦཾ། ཨིདཾ, མཧཱརཱཛ, ཙནྡསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, cando uḷārādhipati, evameva kho, mahārāja, yoginā yogāvacarena uḷārena chandādhipatinā bhavitabbaṃ. Idaṃ, mahārāja, candassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཙནྡོ ནིསཱཡ ཙརཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན པཝིཝིཏྟེན བྷཝིཏབྦཾ། ཨིདཾ, མཧཱརཱཛ, ཙནྡསྶ ཏཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, cando nisāya carati, evameva kho, mahārāja, yoginā yogāvacarena pavivittena bhavitabbaṃ. Idaṃ, mahārāja, candassa tatiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཙནྡོ ཝིམཱནཀེཏུ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སཱིལཀེཏུནཱ བྷཝིཏབྦཾ། ཨིདཾ, མཧཱརཱཛ, ཙནྡསྶ ཙཏུཏྠཾ ཨངྒཾ གཧེཏབྦཾ།
‘‘Puna caparaṃ, mahārāja, cando vimānaketu, evameva kho, mahārāja, yoginā yogāvacarena sīlaketunā bhavitabbaṃ. Idaṃ, mahārāja, candassa catutthaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཙནྡོ ཨཱཡཱཙིཏཔཏྠིཏོ ཨུདེཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཱཡཱཙིཏཔཏྠིཏེན ཀུལཱནི ཨུཔསངྐམིཏབྦཱནི། ཨིདཾ, མཧཱརཱཛ, ཙནྡསྶ པཉྩམཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, བྷགཝཏཱ དེཝཱཏིདེཝེན སཾཡུཏྟནིཀཱཡཝརེ ‘ཙནྡཱུཔམཱ, བྷིཀྑཝེ, ཀུལཱནི ཨུཔསངྐམཐ, ཨཔཀསྶེཝ ཀཱཡཾ ཨཔཀསྶ ཙིཏྟཾ ནིཙྩནཝཀཱ ཀུལེསུ ཨཔྤགབྦྷཱ’’’ཏི 1།
‘‘Puna caparaṃ, mahārāja, cando āyācitapatthito udeti, evameva kho, mahārāja, yoginā yogāvacarena āyācitapatthitena kulāni upasaṅkamitabbāni. Idaṃ, mahārāja, candassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare ‘candūpamā, bhikkhave, kulāni upasaṅkamatha, apakasseva kāyaṃ apakassa cittaṃ niccanavakā kulesu appagabbhā’’’ti 2.
ཙནྡངྒཔཉྷོ སཏྟམོ།
Candaṅgapañho sattamo.
Footnotes:
