| Library / Tipiṭaka / д̇ибидага • Tipiṭaka / т̇зрийг̇аат̇аа-адтагат̇аа • Therīgāthā-aṭṭhakathā |
12. жанд̣̇аат̇зрийг̇аат̇ааван̣н̣анаа
12. Candātherīgāthāvaṇṇanā
д̣̇уг̇г̇ад̇аахам̣ бурз аасинд̇иаад̣̇игаа жанд̣̇ааяа т̇зрияаа г̇аат̇аа. аяамби буримаб̣уд̣̇д̇хзсу гад̇аад̇хигаараа д̇ад̇т̇а д̇ад̇т̇а бхавз виваддуубаниссаяам̣ гусалам̣ убажинанд̇ий ануггамзна самбхад̇авимогкасамбхаараа барибагган̃аан̣аа имасмим̣ б̣уд̣̇д̇хуббаад̣̇з ан̃н̃ад̇арасмим̣ б̣раахман̣аг̇аамз абан̃н̃аад̇асса б̣раахман̣асса г̇зхз бадисанд̇хим̣ г̇ан̣хи. д̇ассаа ниб̣б̣ад̇д̇ид̇о бадтааяам̣ д̇ам̣ гулам̣ бхог̇зхи баригкаяам̣ г̇ад̇ам̣. саа ануггамзна вин̃н̃уд̇ам̣ бад̇ваа д̣̇угкзна ж̇ийвад̇и. ат̇а д̇асмим̣ г̇зхз ахиваад̇арог̇о уббаж̇ж̇и. д̇знассаа саб̣б̣зби н̃аад̇агаа маран̣аб̣яасанам̣ баабун̣им̣су. саа н̃аад̇игкаяз ж̇аад̇з ан̃н̃ад̇т̇а ж̇ийвид̇ум̣ асаггонд̇ий габаалахад̇т̇аа гулз гулз вижарид̇ваа лад̣̇д̇халад̣̇д̇хзна бхигкаахаарзна яаабзнд̇ий згад̣̇ивасам̣ бадаажаарааяа т̇зрияаа бхад̇д̇ависсаг̇г̇адтаанам̣ аг̇амааси. бхигкунияо д̇ам̣ д̣̇угкид̇ам̣ куд̣̇д̣̇аабхибхууд̇ам̣ д̣̇исваана сан̃ж̇аад̇агаарун̃н̃аа бияасамуд̣̇аажаарзна сан̇г̇ахзд̇ваа д̇ад̇т̇а виж̇ж̇амаанзна убажаараманохарзна аахаарзна санд̇аббзсум̣. саа д̇аасам̣ аажаарасийлз басийд̣̇ид̇ваа т̇зрияаа санд̇игам̣ убасан̇гамид̇ваа ванд̣̇ид̇ваа згаманд̇ам̣ нисийд̣̇и. д̇ассаа т̇зрий д̇хаммам̣ гат̇зси. саа д̇ам̣ д̇хаммам̣ суд̇ваа саасанз абхиббасаннаа сам̣саарз жа сан̃ж̇аад̇асам̣взг̇аа баб̣б̣аж̇и . баб̣б̣аж̇ид̇ваа жа т̇зрияаа оваад̣̇з тад̇ваа вибассанам̣ бадтабзд̇ваа бхааванам̣ ануяун̃ж̇анд̇ий гад̇аад̇хигаарад̇ааяа н̃аан̣асса жа барибаагам̣ г̇ад̇ад̇д̇аа на жирассзва саха бадисамбхид̣̇аахи арахад̇д̇ам̣ бад̇ваа ад̇д̇ано бадибад̇д̇им̣ бажжавзгкид̇ваа –
Duggatāhaṃ pure āsintiādikā candāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī anukkamena sambhatavimokkhasambhārā paripakkañāṇā imasmiṃ buddhuppāde aññatarasmiṃ brāhmaṇagāme apaññātassa brāhmaṇassa gehe paṭisandhiṃ gaṇhi. Tassā nibbattito paṭṭhāyaṃ taṃ kulaṃ bhogehi parikkhayaṃ gataṃ. Sā anukkamena viññutaṃ patvā dukkhena jīvati. Atha tasmiṃ gehe ahivātarogo uppajji. Tenassā sabbepi ñātakā maraṇabyasanaṃ pāpuṇiṃsu. Sā ñātikkhaye jāte aññattha jīvituṃ asakkontī kapālahatthā kule kule vicaritvā laddhaladdhena bhikkhāhārena yāpentī ekadivasaṃ paṭācārāya theriyā bhattavissaggaṭṭhānaṃ agamāsi. Bhikkhuniyo taṃ dukkhitaṃ khuddābhibhūtaṃ disvāna sañjātakāruññā piyasamudācārena saṅgahetvā tattha vijjamānena upacāramanoharena āhārena santappesuṃ. Sā tāsaṃ ācārasīle pasīditvā theriyā santikaṃ upasaṅkamitvā vanditvā ekamantaṃ nisīdi. Tassā therī dhammaṃ kathesi. Sā taṃ dhammaṃ sutvā sāsane abhippasannā saṃsāre ca sañjātasaṃvegā pabbaji . Pabbajitvā ca theriyā ovāde ṭhatvā vipassanaṃ paṭṭhapetvā bhāvanaṃ anuyuñjantī katādhikāratāya ñāṇassa ca paripākaṃ gatattā na cirasseva saha paṭisambhidāhi arahattaṃ patvā attano paṭipattiṃ paccavekkhitvā –
122.
122.
‘‘д̣̇уг̇г̇ад̇аахам̣ бурз аасим̣, вид̇хаваа жа абуд̇д̇игаа;
‘‘Duggatāhaṃ pure āsiṃ, vidhavā ca aputtikā;
винаа мид̇д̇зхи н̃аад̇ийхи, бхад̇д̇ажол̣асса наад̇хиг̇ам̣.
Vinā mittehi ñātīhi, bhattacoḷassa nādhigaṃ.
123.
123.
‘‘бад̇д̇ам̣ д̣̇ан̣д̣ан̃жа г̇ан̣хид̇ваа, бхигкамаанаа гулаа гулам̣;
‘‘Pattaṃ daṇḍañca gaṇhitvā, bhikkhamānā kulā kulaṃ;
сийд̇ун̣хзна жа д̣аяханд̇ий, сад̇д̇а вассаани жаарихам̣.
Sītuṇhena ca ḍayhantī, satta vassāni cārihaṃ.
124.
124.
‘‘бхигкуним̣ буна д̣̇исваана, аннабаанасса лаабхиним̣;
‘‘Bhikkhuniṃ puna disvāna, annapānassa lābhiniṃ;
убасан̇гаммам̣ авожам̣, баб̣б̣аж̇ж̇ам̣ анаг̇аарияам̣.
Upasaṅkammaṃ avocaṃ, pabbajjaṃ anagāriyaṃ.
125.
125.
‘‘саа жа мам̣ анугамбааяа, баб̣б̣ааж̇зси бадаажаараа;
‘‘Sā ca maṃ anukampāya, pabbājesi paṭācārā;
д̇ад̇о мам̣ овад̣̇ид̇ваана, барамад̇т̇з нияож̇аяи.
Tato maṃ ovaditvāna, paramatthe niyojayi.
126.
126.
‘‘д̇ассаахам̣ важанам̣ суд̇ваа, агаасим̣ анусаасаним̣;
‘‘Tassāhaṃ vacanaṃ sutvā, akāsiṃ anusāsaniṃ;
амогхо аяяааяоваад̣̇о, д̇звиж̇ж̇аамхи анаасаваа’’д̇и. –
Amogho ayyāyovādo, tevijjāmhi anāsavā’’ti. –
уд̣̇аанавасзна имаа г̇аат̇аа абхааси.
Udānavasena imā gāthā abhāsi.
д̇ад̇т̇а д̣̇уг̇г̇ад̇аад̇и д̣̇алид̣̇д̣̇аа. бурзд̇и баб̣б̣аж̇ид̇ад̇о буб̣б̣з. баб̣б̣аж̇ид̇агаалад̇о бадтааяа хи ид̇ха буг̇г̇ало бхог̇зхи ад̣дхо ваа д̣̇алид̣̇д̣̇о ваад̇и на вад̇д̇аб̣б̣о. г̇ун̣зхи бана аяам̣ т̇зрий ад̣дхааязва. д̇знааха ‘‘д̣̇уг̇г̇ад̇аахам̣ бурз ааси’’нд̇и. вид̇хаваад̇и д̇хаво вужжад̇и саамиго, д̇ад̣̇абхааваа вид̇хаваа, мад̇абад̇игаад̇и ад̇т̇о. абуд̇д̇игаад̇и буд̇д̇арахид̇аа. винаа мид̇д̇зхийд̇и мид̇д̇зхи б̣анд̇хавзхи жа барихийнаа рахид̇аа. бхад̇д̇ажол̣асса наад̇хиг̇анд̇и бхад̇д̇асса жол̣асса жа баарибуурим̣ наад̇хиг̇ажчим̣, гзвалам̣ бана бхигкаабин̣д̣асса билод̇игаакан̣д̣асса жа васзна гхаасажчаад̣̇анамад̇д̇амзва алад̇т̇анд̇и ад̇хиббааяо. д̇знааха ‘‘бад̇д̇ам̣ д̣̇ан̣д̣ан̃жа г̇ан̣хид̇ваа’’д̇иаад̣̇и.
Tattha duggatāti daliddā. Pureti pabbajitato pubbe. Pabbajitakālato paṭṭhāya hi idha puggalo bhogehi aḍḍho vā daliddo vāti na vattabbo. Guṇehi pana ayaṃ therī aḍḍhāyeva. Tenāha ‘‘duggatāhaṃ pure āsi’’nti. Vidhavāti dhavo vuccati sāmiko, tadabhāvā vidhavā, matapatikāti attho. Aputtikāti puttarahitā. Vinā mittehīti mittehi bandhavehi ca parihīnā rahitā. Bhattacoḷassa nādhiganti bhattassa coḷassa ca pāripūriṃ nādhigacchiṃ, kevalaṃ pana bhikkhāpiṇḍassa pilotikākhaṇḍassa ca vasena ghāsacchādanamattameva alatthanti adhippāyo. Tenāha ‘‘pattaṃ daṇḍañca gaṇhitvā’’tiādi.
д̇ад̇т̇а бад̇д̇анд̇и мад̇д̇игаабхааж̇анам̣. д̣̇ан̣д̣анд̇и г̇он̣асунакаад̣̇ибарихаран̣ад̣̇ан̣д̣агам̣. гулаа гуланд̇и гулад̇о гулам̣. сийд̇ун̣хзна жа д̣аяханд̇ийд̇и васанаг̇зхаабхаавад̇о сийд̇зна жа ун̣хзна жа бийл̣ияамаанаа.
Tattha pattanti mattikābhājanaṃ. Daṇḍanti goṇasunakhādipariharaṇadaṇḍakaṃ. Kulā kulanti kulato kulaṃ. Sītuṇhena ca ḍayhantīti vasanagehābhāvato sītena ca uṇhena ca pīḷiyamānā.
бхигкунинд̇и бадаажаараат̇зрим̣ санд̇хааяа вад̣̇ад̇и. бунаад̇и бажчаа, сад̇д̇асам̣важчарад̇о абарабхааг̇з.
Bhikkhuninti paṭācārātheriṃ sandhāya vadati. Punāti pacchā, sattasaṃvaccharato aparabhāge.
барамад̇т̇зд̇и барамз уд̇д̇амз ад̇т̇з, ниб̣б̣аанаг̇ааминияаа бадибад̣̇ааяа ниб̣б̣аанз жа. нияож̇аяийд̇и гаммадтаанам̣ аажигканд̇ий нияож̇зси. сзсам̣ вуд̇д̇анаяамзва.
Paramattheti parame uttame atthe, nibbānagāminiyā paṭipadāya nibbāne ca. Niyojayīti kammaṭṭhānaṃ ācikkhantī niyojesi. Sesaṃ vuttanayameva.
жанд̣̇аат̇зрийг̇аат̇ааван̣н̣анаа нидтид̇аа.
Candātherīgāthāvaṇṇanā niṭṭhitā.
бан̃жаганибаад̇аван̣н̣анаа нидтид̇аа.
Pañcakanipātavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зрийг̇аат̇аабаал̣и • Therīgāthāpāḷi / 12. жанд̣̇аат̇зрийг̇аат̇аа • 12. Candātherīgāthā
