| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. অনাথপিণ্ডিকৰগ্গো
2. Anāthapiṇḍikavaggo
১. চন্দিমসসুত্তৰণ্ণনা
1. Candimasasuttavaṇṇanā
৯২. পব্বততটা সন্দমানো তথারূপো নদীনিৰত্তনপদেসোপি সম্বাধট্ঠানতায কচ্ছো ৰিযাতি আহ ‘‘পব্বতকচ্ছেপী’’তি। পটিপক্খদূরীভাৰেন সেট্ঠট্ঠেন চ একো উদেতীতি একোদি, একগ্গতা। তস্মিং যোগতো একগ্গচিত্তা ইধ একোদী। পটিপক্খতো অত্তানং নিপযন্তি ৰিসোধেন্তীতি নিপকা, পঞ্ঞৰন্তো। তেনাহ ‘‘একগ্গচিত্তা চেৰা’’তিআদি। কাযাদিভেদং আরম্মণং সাতিসযায সতিযা সরন্তীতি সতা। তেনাহ ‘‘সতিমন্তো’’তি। সোত্থিং গমিস্সন্তীতি যথাৰুত্তপদেসে মগা সোত্থিমনুপদ্দৰেন ৰত্তিস্সন্তি, এৰং ঝানলাভিনো সোত্থিং কিলেসেহি অনুপদ্দুতা ৰত্তিস্সন্তি। অযং কির দেৰপুত্তো ব্রহ্মলোকে নিব্বানসঞ্ঞী, তস্মা এৰমাহ। ভগৰা ‘‘অযং দেৰপুত্তো অনিব্বানগামী সমানো নিব্বানগামিসঞ্ঞী, হন্দস্স নিব্বানগামিনো দস্সেমী’’তি দুতিযং গাথমাহ। চতুন্নং ওঘানং, সংসারমহোঘস্সেৰ ৰা পরতীরভাৰতো পরতীরন্তি নিব্বানং। অম্বুনি জাতো অম্বুজো, মচ্ছো। সুত্তজালং ছিন্দিত্ৰা মচ্ছা ৰিয কিলেসজালং ভিন্দিত্ৰা গমিস্সন্তীতি।
92. Pabbatataṭā sandamāno tathārūpo nadīnivattanapadesopi sambādhaṭṭhānatāya kaccho viyāti āha ‘‘pabbatakacchepī’’ti. Paṭipakkhadūrībhāvena seṭṭhaṭṭhena ca eko udetīti ekodi, ekaggatā. Tasmiṃ yogato ekaggacittā idha ekodī. Paṭipakkhato attānaṃ nipayanti visodhentīti nipakā, paññavanto. Tenāha ‘‘ekaggacittā cevā’’tiādi. Kāyādibhedaṃ ārammaṇaṃ sātisayāya satiyā sarantīti satā. Tenāha ‘‘satimanto’’ti. Sotthiṃ gamissantīti yathāvuttapadese magā sotthimanupaddavena vattissanti, evaṃ jhānalābhino sotthiṃ kilesehi anupaddutā vattissanti. Ayaṃ kira devaputto brahmaloke nibbānasaññī, tasmā evamāha. Bhagavā ‘‘ayaṃ devaputto anibbānagāmī samāno nibbānagāmisaññī, handassa nibbānagāmino dassemī’’ti dutiyaṃ gāthamāha. Catunnaṃ oghānaṃ, saṃsāramahoghasseva vā paratīrabhāvato paratīranti nibbānaṃ. Ambuni jāto ambujo, maccho. Suttajālaṃ chinditvā macchā viya kilesajālaṃ bhinditvā gamissantīti.
চন্দিমসসুত্তৰণ্ণনা নিট্ঠিতা।
Candimasasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. চন্দিমসসুত্তং • 1. Candimasasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. চন্দিমসসুত্তৰণ্ণনা • 1. Candimasasuttavaṇṇanā
