| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๒. อนาถปิณฺฑิกวโคฺค
2. Anāthapiṇḍikavaggo
๑. จนฺทิมสสุตฺตวณฺณนา
1. Candimasasuttavaṇṇanā
๙๒. ปพฺพตตฎา สนฺทมาโน ตถารูโป นทีนิวตฺตนปเทโสปิ สมฺพาธฎฺฐานตาย กโจฺฉ วิยาติ อาห ‘‘ปพฺพตกเจฺฉปี’’ติฯ ปฎิปกฺขทูรีภาเวน เสฎฺฐเฎฺฐน จ เอโก อุเทตีติ เอโกทิ, เอกคฺคตาฯ ตสฺมิํ โยคโต เอกคฺคจิตฺตา อิธ เอโกทีฯ ปฎิปกฺขโต อตฺตานํ นิปยนฺติ วิโสเธนฺตีติ นิปกา, ปญฺญวโนฺตฯ เตนาห ‘‘เอกคฺคจิตฺตา เจวา’’ติอาทิฯ กายาทิเภทํ อารมฺมณํ สาติสยาย สติยา สรนฺตีติ สตาฯ เตนาห ‘‘สติมโนฺต’’ติฯ โสตฺถิํ คมิสฺสนฺตีติ ยถาวุตฺตปเทเส มคา โสตฺถิมนุปทฺทเวน วตฺติสฺสนฺติ, เอวํ ฌานลาภิโน โสตฺถิํ กิเลเสหิ อนุปทฺทุตา วตฺติสฺสนฺติฯ อยํ กิร เทวปุโตฺต พฺรหฺมโลเก นิพฺพานสญฺญี, ตสฺมา เอวมาหฯ ภควา ‘‘อยํ เทวปุโตฺต อนิพฺพานคามี สมาโน นิพฺพานคามิสญฺญี, หนฺทสฺส นิพฺพานคามิโน ทเสฺสมี’’ติ ทุติยํ คาถมาหฯ จตุนฺนํ โอฆานํ, สํสารมโหฆเสฺสว วา ปรตีรภาวโต ปรตีรนฺติ นิพฺพานํฯ อมฺพุนิ ชาโต อมฺพุโช, มโจฺฉฯ สุตฺตชาลํ ฉินฺทิตฺวา มจฺฉา วิย กิเลสชาลํ ภินฺทิตฺวา คมิสฺสนฺตีติฯ
92. Pabbatataṭā sandamāno tathārūpo nadīnivattanapadesopi sambādhaṭṭhānatāya kaccho viyāti āha ‘‘pabbatakacchepī’’ti. Paṭipakkhadūrībhāvena seṭṭhaṭṭhena ca eko udetīti ekodi, ekaggatā. Tasmiṃ yogato ekaggacittā idha ekodī. Paṭipakkhato attānaṃ nipayanti visodhentīti nipakā, paññavanto. Tenāha ‘‘ekaggacittā cevā’’tiādi. Kāyādibhedaṃ ārammaṇaṃ sātisayāya satiyā sarantīti satā. Tenāha ‘‘satimanto’’ti. Sotthiṃ gamissantīti yathāvuttapadese magā sotthimanupaddavena vattissanti, evaṃ jhānalābhino sotthiṃ kilesehi anupaddutā vattissanti. Ayaṃ kira devaputto brahmaloke nibbānasaññī, tasmā evamāha. Bhagavā ‘‘ayaṃ devaputto anibbānagāmī samāno nibbānagāmisaññī, handassa nibbānagāmino dassemī’’ti dutiyaṃ gāthamāha. Catunnaṃ oghānaṃ, saṃsāramahoghasseva vā paratīrabhāvato paratīranti nibbānaṃ. Ambuni jāto ambujo, maccho. Suttajālaṃ chinditvā macchā viya kilesajālaṃ bhinditvā gamissantīti.
จนฺทิมสสุตฺตวณฺณนา นิฎฺฐิตาฯ
Candimasasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๑. จนฺทิมสสุตฺตํ • 1. Candimasasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑. จนฺทิมสสุตฺตวณฺณนา • 1. Candimasasuttavaṇṇanā
