| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
២. អនាថបិណ្ឌិកវគ្គោ
2. Anāthapiṇḍikavaggo
១. ចន្ទិមសសុត្តវណ្ណនា
1. Candimasasuttavaṇṇanā
៩២. បព្ពតតដា សន្ទមានោ តថារូបោ នទីនិវត្តនបទេសោបិ សម្ពាធដ្ឋានតាយ កច្ឆោ វិយាតិ អាហ ‘‘បព្ពតកច្ឆេបី’’តិ។ បដិបក្ខទូរីភាវេន សេដ្ឋដ្ឋេន ច ឯកោ ឧទេតីតិ ឯកោទិ, ឯកគ្គតា។ តស្មិំ យោគតោ ឯកគ្គចិត្តា ឥធ ឯកោទី។ បដិបក្ខតោ អត្តានំ និបយន្តិ វិសោធេន្តីតិ និបកា, បញ្ញវន្តោ។ តេនាហ ‘‘ឯកគ្គចិត្តា ចេវា’’តិអាទិ។ កាយាទិភេទំ អារម្មណំ សាតិសយាយ សតិយា សរន្តីតិ សតា។ តេនាហ ‘‘សតិមន្តោ’’តិ។ សោត្ថិំ គមិស្សន្តីតិ យថាវុត្តបទេសេ មគា សោត្ថិមនុបទ្ទវេន វត្តិស្សន្តិ, ឯវំ ឈានលាភិនោ សោត្ថិំ កិលេសេហិ អនុបទ្ទុតា វត្តិស្សន្តិ។ អយំ កិរ ទេវបុត្តោ ព្រហ្មលោកេ និព្ពានសញ្ញី, តស្មា ឯវមាហ។ ភគវា ‘‘អយំ ទេវបុត្តោ អនិព្ពានគាមី សមានោ និព្ពានគាមិសញ្ញី, ហន្ទស្ស និព្ពានគាមិនោ ទស្សេមី’’តិ ទុតិយំ គាថមាហ។ ចតុន្នំ ឱឃានំ, សំសារមហោឃស្សេវ វា បរតីរភាវតោ បរតីរន្តិ និព្ពានំ។ អម្ពុនិ ជាតោ អម្ពុជោ, មច្ឆោ។ សុត្តជាលំ ឆិន្ទិត្វា មច្ឆា វិយ កិលេសជាលំ ភិន្ទិត្វា គមិស្សន្តីតិ។
92. Pabbatataṭā sandamāno tathārūpo nadīnivattanapadesopi sambādhaṭṭhānatāya kaccho viyāti āha ‘‘pabbatakacchepī’’ti. Paṭipakkhadūrībhāvena seṭṭhaṭṭhena ca eko udetīti ekodi, ekaggatā. Tasmiṃ yogato ekaggacittā idha ekodī. Paṭipakkhato attānaṃ nipayanti visodhentīti nipakā, paññavanto. Tenāha ‘‘ekaggacittā cevā’’tiādi. Kāyādibhedaṃ ārammaṇaṃ sātisayāya satiyā sarantīti satā. Tenāha ‘‘satimanto’’ti. Sotthiṃ gamissantīti yathāvuttapadese magā sotthimanupaddavena vattissanti, evaṃ jhānalābhino sotthiṃ kilesehi anupaddutā vattissanti. Ayaṃ kira devaputto brahmaloke nibbānasaññī, tasmā evamāha. Bhagavā ‘‘ayaṃ devaputto anibbānagāmī samāno nibbānagāmisaññī, handassa nibbānagāmino dassemī’’ti dutiyaṃ gāthamāha. Catunnaṃ oghānaṃ, saṃsāramahoghasseva vā paratīrabhāvato paratīranti nibbānaṃ. Ambuni jāto ambujo, maccho. Suttajālaṃ chinditvā macchā viya kilesajālaṃ bhinditvā gamissantīti.
ចន្ទិមសសុត្តវណ្ណនា និដ្ឋិតា។
Candimasasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. ចន្ទិមសសុត្តំ • 1. Candimasasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. ចន្ទិមសសុត្តវណ្ណនា • 1. Candimasasuttavaṇṇanā
