| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. சந்தூ³பமஸுத்தங்
3. Candūpamasuttaṃ
146. ஸாவத்தி²யங் விஹரதி…பே॰… ‘‘சந்தூ³பமா, பி⁴க்க²வே, குலானி உபஸங்கமத² – அபகஸ்ஸேவ காயங், அபகஸ்ஸ சித்தங், நிச்சனவகா குலேஸு அப்பக³ப்³பா⁴ 1. ஸெய்யதா²பி , பி⁴க்க²வே, புரிஸோ ஜருத³பானங் வா ஓலோகெய்ய பப்³ப³தவிஸமங் வா நதீ³விது³க்³க³ங் வா – அபகஸ்ஸேவ காயங், அபகஸ்ஸ சித்தங்; ஏவமேவ கோ², பி⁴க்க²வே, சந்தூ³பமா குலானி உபஸங்கமத² – அபகஸ்ஸேவ காயங், அபகஸ்ஸ சித்தங், நிச்சனவகா குலேஸு அப்பக³ப்³பா⁴’’.
146. Sāvatthiyaṃ viharati…pe… ‘‘candūpamā, bhikkhave, kulāni upasaṅkamatha – apakasseva kāyaṃ, apakassa cittaṃ, niccanavakā kulesu appagabbhā 2. Seyyathāpi , bhikkhave, puriso jarudapānaṃ vā olokeyya pabbatavisamaṃ vā nadīviduggaṃ vā – apakasseva kāyaṃ, apakassa cittaṃ; evameva kho, bhikkhave, candūpamā kulāni upasaṅkamatha – apakasseva kāyaṃ, apakassa cittaṃ, niccanavakā kulesu appagabbhā’’.
‘‘கஸ்ஸபோ, பி⁴க்க²வே, சந்தூ³பமோ குலானி உபஸங்கமதி – அபகஸ்ஸேவ காயங், அபகஸ்ஸ சித்தங், நிச்சனவகோ குலேஸு அப்பக³ப்³போ⁴. தங் கிங் மஞ்ஞத², பி⁴க்க²வே, கத²ங்ரூபோ பி⁴க்கு² அரஹதி குலானி உபஸங்கமிது’’ந்தி? ‘‘ப⁴க³வங்மூலகா நோ, ப⁴ந்தே, த⁴ம்மா ப⁴க³வங்னெத்திகா ப⁴க³வங்படிஸரணா. ஸாது⁴ வத, ப⁴ந்தே, ப⁴க³வந்தங்யேவ படிபா⁴து ஏதஸ்ஸ பா⁴ஸிதஸ்ஸ அத்தோ². ப⁴க³வதோ ஸுத்வா பி⁴க்கூ² தா⁴ரெஸ்ஸந்தீ’’தி.
‘‘Kassapo, bhikkhave, candūpamo kulāni upasaṅkamati – apakasseva kāyaṃ, apakassa cittaṃ, niccanavako kulesu appagabbho. Taṃ kiṃ maññatha, bhikkhave, kathaṃrūpo bhikkhu arahati kulāni upasaṅkamitu’’nti? ‘‘Bhagavaṃmūlakā no, bhante, dhammā bhagavaṃnettikā bhagavaṃpaṭisaraṇā. Sādhu vata, bhante, bhagavantaṃyeva paṭibhātu etassa bhāsitassa attho. Bhagavato sutvā bhikkhū dhāressantī’’ti.
அத² கோ² ப⁴க³வா ஆகாஸே பாணிங் சாலேஸி. ‘‘ஸெய்யதா²பி, பி⁴க்க²வே, அயங் ஆகாஸே பாணி ந ஸஜ்ஜதி ந க³ய்ஹதி ந ப³ஜ்ஜ²தி; ஏவமேவ கோ², பி⁴க்க²வே, யஸ்ஸ கஸ்ஸசி பி⁴க்கு²னோ குலானி உபஸங்கமதோ குலேஸு சித்தங் ந ஸஜ்ஜதி ந க³ய்ஹதி ந ப³ஜ்ஜ²தி – ‘லப⁴ந்து லாப⁴காமா, புஞ்ஞகாமா கரொந்து புஞ்ஞானீ’தி; யதா²ஸகேன லாபே⁴ன அத்தமனோ ஹோதி ஸுமனோ, ஏவங் பரேஸங் லாபே⁴ன அத்தமனோ ஹோதி ஸுமனோ; ஏவரூபோ கோ², பி⁴க்க²வே, பி⁴க்கு² அரஹதி குலானி உபஸங்கமிதுங்.
Atha kho bhagavā ākāse pāṇiṃ cālesi. ‘‘Seyyathāpi, bhikkhave, ayaṃ ākāse pāṇi na sajjati na gayhati na bajjhati; evameva kho, bhikkhave, yassa kassaci bhikkhuno kulāni upasaṅkamato kulesu cittaṃ na sajjati na gayhati na bajjhati – ‘labhantu lābhakāmā, puññakāmā karontu puññānī’ti; yathāsakena lābhena attamano hoti sumano, evaṃ paresaṃ lābhena attamano hoti sumano; evarūpo kho, bhikkhave, bhikkhu arahati kulāni upasaṅkamituṃ.
‘‘கஸ்ஸபஸ்ஸ, பி⁴க்க²வே, குலானி உபஸங்கமதோ குலேஸு சித்தங் ந ஸஜ்ஜதி ந க³ய்ஹதி ந ப³ஜ்ஜ²தி – ‘லப⁴ந்து லாப⁴காமா, புஞ்ஞகாமா கரொந்து புஞ்ஞானீ’தி; யதா²ஸகேன லாபே⁴ன அத்தமனோ ஹோதி ஸுமனோ; ஏவங் பரேஸங் லாபே⁴ன அத்தமனோ ஹோதி ஸுமனோ.
‘‘Kassapassa, bhikkhave, kulāni upasaṅkamato kulesu cittaṃ na sajjati na gayhati na bajjhati – ‘labhantu lābhakāmā, puññakāmā karontu puññānī’ti; yathāsakena lābhena attamano hoti sumano; evaṃ paresaṃ lābhena attamano hoti sumano.
‘‘தங் கிங் மஞ்ஞத², பி⁴க்க²வே, கத²ங்ரூபஸ்ஸ பி⁴க்கு²னோ அபரிஸுத்³தா⁴ த⁴ம்மதே³ஸனா ஹோதி, கத²ங்ரூபஸ்ஸ பி⁴க்கு²னோ பரிஸுத்³தா⁴ த⁴ம்மதே³ஸனா ஹோதீ’’தி? ‘‘ப⁴க³வங்மூலகா நோ, ப⁴ந்தே, த⁴ம்மா ப⁴க³வங்னெத்திகா ப⁴க³வங்படிஸரணா. ஸாது⁴ வத, ப⁴ந்தே, ப⁴க³வந்தங்யேவ படிபா⁴து ஏதஸ்ஸ பா⁴ஸிதஸ்ஸ அத்தோ² . ப⁴க³வதோ ஸுத்வா பி⁴க்கூ² தா⁴ரெஸ்ஸந்தீ’’தி. ‘‘தேன ஹி, பி⁴க்க²வே, ஸுணாத², ஸாது⁴கங் மனஸி கரோத²; பா⁴ஸிஸ்ஸாமீ’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
‘‘Taṃ kiṃ maññatha, bhikkhave, kathaṃrūpassa bhikkhuno aparisuddhā dhammadesanā hoti, kathaṃrūpassa bhikkhuno parisuddhā dhammadesanā hotī’’ti? ‘‘Bhagavaṃmūlakā no, bhante, dhammā bhagavaṃnettikā bhagavaṃpaṭisaraṇā. Sādhu vata, bhante, bhagavantaṃyeva paṭibhātu etassa bhāsitassa attho . Bhagavato sutvā bhikkhū dhāressantī’’ti. ‘‘Tena hi, bhikkhave, suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘யோ ஹி கோசி, பி⁴க்க²வே, பி⁴க்கு² ஏவங்சித்தோ பரேஸங் த⁴ம்மங் தே³ஸேதி – ‘அஹோ வத மே த⁴ம்மங் ஸுணெய்யுங், ஸுத்வா ச பன த⁴ம்மங் பஸீதெ³ய்யுங், பஸன்னா ச மே பஸன்னாகாரங் கரெய்யு’ந்தி; ஏவரூபஸ்ஸ கோ², பி⁴க்க²வே, பி⁴க்கு²னோ அபரிஸுத்³தா⁴ த⁴ம்மதே³ஸனா ஹோதி.
‘‘Yo hi koci, bhikkhave, bhikkhu evaṃcitto paresaṃ dhammaṃ deseti – ‘aho vata me dhammaṃ suṇeyyuṃ, sutvā ca pana dhammaṃ pasīdeyyuṃ, pasannā ca me pasannākāraṃ kareyyu’nti; evarūpassa kho, bhikkhave, bhikkhuno aparisuddhā dhammadesanā hoti.
‘‘யோ ச கோ², பி⁴க்க²வே, பி⁴க்கு² ஏவங்சித்தோ பரேஸங் த⁴ம்மங் தே³ஸேதி – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீதி 3. அஹோ, வத மே த⁴ம்மங் ஸுணெய்யுங், ஸுத்வா ச பன த⁴ம்மங் ஆஜானெய்யுங், ஆஜானித்வா ச பன தத²த்தாய படிபஜ்ஜெய்யு’ந்தி. இதி த⁴ம்மஸுத⁴ம்மதங் படிச்ச பரேஸங் த⁴ம்மங் தே³ஸேதி, காருஞ்ஞங் படிச்ச அனுத்³த³யங் 4 படிச்ச அனுகம்பங் உபாதா³ய பரேஸங் த⁴ம்மங் தே³ஸேதி. ஏவரூபஸ்ஸ கோ², பி⁴க்க²வே, பி⁴க்கு²னோ பரிஸுத்³தா⁴ த⁴ம்மதே³ஸனா ஹோதி.
‘‘Yo ca kho, bhikkhave, bhikkhu evaṃcitto paresaṃ dhammaṃ deseti – ‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhīti 5. Aho, vata me dhammaṃ suṇeyyuṃ, sutvā ca pana dhammaṃ ājāneyyuṃ, ājānitvā ca pana tathattāya paṭipajjeyyu’nti. Iti dhammasudhammataṃ paṭicca paresaṃ dhammaṃ deseti, kāruññaṃ paṭicca anuddayaṃ 6 paṭicca anukampaṃ upādāya paresaṃ dhammaṃ deseti. Evarūpassa kho, bhikkhave, bhikkhuno parisuddhā dhammadesanā hoti.
‘‘கஸ்ஸபோ, பி⁴க்க²வே, ஏவங்சித்தோ பரேஸங் த⁴ம்மங் தே³ஸேதி – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீதி. அஹோ, வத மே த⁴ம்மங் ஸுணெய்யுங், ஸுத்வா ச பன த⁴ம்மங் ஆஜானெய்யுங், ஆஜானித்வா ச பன தத²த்தாய படிபஜ்ஜெய்யு’ந்தி. இதி த⁴ம்மஸுத⁴ம்மதங் படிச்ச பரேஸங் த⁴ம்மங் தே³ஸேதி, காருஞ்ஞங் படிச்ச அனுத்³த³யங் படிச்ச அனுகம்பங் உபாதா³ய பரேஸங் த⁴ம்மங் தே³ஸேதி. கஸ்ஸபேன வா ஹி வோ, பி⁴க்க²வே, ஓவதி³ஸ்ஸாமி யோ வா பனஸ்ஸ கஸ்ஸபஸதி³ஸோ, ஓவதி³தேஹி ச பன வோ தத²த்தாய படிபஜ்ஜிதப்³ப³’’ந்தி. ததியங்.
‘‘Kassapo, bhikkhave, evaṃcitto paresaṃ dhammaṃ deseti – ‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhīti. Aho, vata me dhammaṃ suṇeyyuṃ, sutvā ca pana dhammaṃ ājāneyyuṃ, ājānitvā ca pana tathattāya paṭipajjeyyu’nti. Iti dhammasudhammataṃ paṭicca paresaṃ dhammaṃ deseti, kāruññaṃ paṭicca anuddayaṃ paṭicca anukampaṃ upādāya paresaṃ dhammaṃ deseti. Kassapena vā hi vo, bhikkhave, ovadissāmi yo vā panassa kassapasadiso, ovaditehi ca pana vo tathattāya paṭipajjitabba’’nti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. சந்தூ³பமஸுத்தவண்ணனா • 3. Candūpamasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. சந்தூ³பமஸுத்தவண்ணனா • 3. Candūpamasuttavaṇṇanā
