| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. চন্দূপমসুত্তৰণ্ণনা
3. Candūpamasuttavaṇṇanā
১৪৬. পিযমনাপনিচ্চনৰকাদিগুণেহি চন্দো উপমা এতেসন্তি চন্দূপমা। সন্থৰাদীনি পদানি অঞ্ঞমঞ্ঞৰেৰচনানি। পরিযুট্ঠানং পুন চিত্তে কিলেসাধিগমো। সব্বেহিপি পদেহি কত্থচি সত্তে অনুরোধরোধাভাৰমাহ। অত্তনো পন সোম্মভাৰেন মহাজনস্স পিযো মনাপো। যদত্থমেত্থ চন্দূপমা আহটা, তং দস্সেন্তো ‘‘এৰ’’ন্তিআদিমাহ। ন কেৰলং চন্দূপমতায এত্তকো এৰ গুণো, অথ খো অঞ্ঞেপি সন্তীতি তে দস্সেতুং ‘‘অপিচা’’তিআদি ৰুত্তং। এৰমাদীহীতি আদি-সদ্দেন যথা। চন্দো লোকানুগ্গহেন অজৰীথিআদিকা নানাৰীথিযো পটিপজ্জতি, এৰং ভিক্খু তং তং দিসং উপগচ্ছতি কুলানুদ্দযায। যথা চন্দো কণ্হপক্খতো সুক্কপক্খং উপগচ্ছন্তো কলাহি ৰড্ঢমানো হুত্ৰা নিচ্চনৰো হোতি, এৰং ভিক্খু কণ্হপক্খং পহায সুক্কপক্খং উপগন্ত্ৰা গুণেহি ৰড্ঢমানো লোকস্স ৰা পামোজ্জপাসংসত্থো নিচ্চনৰতায চন্দসমচিত্তো অধুনুপসম্পন্নো ৰিয চ নিচ্চনৰো হুত্ৰা চরতি।
146. Piyamanāpaniccanavakādiguṇehi cando upamā etesanti candūpamā. Santhavādīni padāni aññamaññavevacanāni. Pariyuṭṭhānaṃ puna citte kilesādhigamo. Sabbehipi padehi katthaci satte anurodharodhābhāvamāha. Attano pana sommabhāvena mahājanassa piyo manāpo. Yadatthamettha candūpamā āhaṭā, taṃ dassento ‘‘eva’’ntiādimāha. Na kevalaṃ candūpamatāya ettako eva guṇo, atha kho aññepi santīti te dassetuṃ ‘‘apicā’’tiādi vuttaṃ. Evamādīhīti ādi-saddena yathā. Cando lokānuggahena ajavīthiādikā nānāvīthiyo paṭipajjati, evaṃ bhikkhu taṃ taṃ disaṃ upagacchati kulānuddayāya. Yathā cando kaṇhapakkhato sukkapakkhaṃ upagacchanto kalāhi vaḍḍhamāno hutvā niccanavo hoti, evaṃ bhikkhu kaṇhapakkhaṃ pahāya sukkapakkhaṃ upagantvā guṇehi vaḍḍhamāno lokassa vā pāmojjapāsaṃsattho niccanavatāya candasamacitto adhunupasampanno viya ca niccanavo hutvā carati.
অপকস্সিত্ৰাতি কিলেসকামৰত্থুকামেহি ৰিৰেচেত্ৰা। তং নেক্খম্মাভিমুখং কাযচিত্তানং আকড্ঢনং কাযতো অপনযনঞ্চ হোতীতি আহ ‘‘আকড্ঢিত্ৰা অপনেত্ৰাতি অত্থো’’তি। চতুক্কঞ্চেত্থ সম্ভৰতীতি তং দস্সেতুং ‘‘যো হি ভিক্খূ’’তিআদি ৰুত্তং।
Apakassitvāti kilesakāmavatthukāmehi vivecetvā. Taṃ nekkhammābhimukhaṃ kāyacittānaṃ ākaḍḍhanaṃ kāyato apanayanañca hotīti āha ‘‘ākaḍḍhitvā apanetvāti attho’’ti. Catukkañcettha sambhavatīti taṃ dassetuṃ ‘‘yo hi bhikkhū’’tiādi vuttaṃ.
নিচ্চনৰযাতি ‘‘নিচ্চনৰকা’’ইচ্চেৰ ৰুত্তং হোতি। ক-সদ্দেন হি পদং ৰড্ঢিতং, ক-কারস্স চ য-কারাদেসো। এৰং ৰিচরিংসূতি কিঞ্জক্খৰসেন পরিগ্গহাভাৰেন যথা ইমে, এৰং ৰিচরিংসু অঞ্ঞেতি অনুকম্পমানা।
Niccanavayāti ‘‘niccanavakā’’icceva vuttaṃ hoti. Ka-saddena hi padaṃ vaḍḍhitaṃ, ka-kārassa ca ya-kārādeso. Evaṃ vicariṃsūti kiñjakkhavasena pariggahābhāvena yathā ime, evaṃ vicariṃsu aññeti anukampamānā.
দ্ৰেভাতিকৰত্থূতি দ্ৰেভাতিকত্থেরপটিবদ্ধং ৰত্থুং। অপ্পতিরূপকরণন্তি ভিক্খূনং অসারুপ্পকরণং। আধাযিত্ৰাতি আরোপনং ঠপেত্ৰা। তথাতি যথা সঙ্ঘমজ্ঝে গণমজ্ঝে চ, তথা ৰুড্ঢতরে পুগ্গলে অপ্পতিরূপকরণং। এৰমাদীতি আদি-সদ্দেন অন্তরঘরপ্পৰেসনে অঞ্ঞত্থ চ যথাৰুত্ততো অঞ্ঞং অসারুপ্পকিরিযং সঙ্গণ্হাতি। তত্থেৰাতি সঙ্ঘমজ্ঝে গণমজ্ঝে পুগ্গলস্স চ ৰুড্ঢস্স সন্তিকে।
Dvebhātikavatthūti dvebhātikattherapaṭibaddhaṃ vatthuṃ. Appatirūpakaraṇanti bhikkhūnaṃ asāruppakaraṇaṃ. Ādhāyitvāti āropanaṃ ṭhapetvā. Tathāti yathā saṅghamajjhe gaṇamajjhe ca, tathā vuḍḍhatare puggale appatirūpakaraṇaṃ. Evamādīti ādi-saddena antaragharappavesane aññattha ca yathāvuttato aññaṃ asāruppakiriyaṃ saṅgaṇhāti. Tatthevāti saṅghamajjhe gaṇamajjhe puggalassa ca vuḍḍhassa santike.
যথাৰুত্তেসু অঞ্ঞেসু চ তেসু ঠানেসু। পাপিচ্ছতাপি মনোপাগব্ভিযন্তি এতেনেৰ কোধূপনাহাদীনং সমুদাচারো মনোপাগব্ভিযন্তি দস্সিতং হোতি।
Yathāvuttesu aññesu ca tesu ṭhānesu. Pāpicchatāpi manopāgabbhiyanti eteneva kodhūpanāhādīnaṃ samudācāro manopāgabbhiyanti dassitaṃ hoti.
একতো ভারিযন্তি পিট্ঠিপস্সতো ওনতং। ৰাযুপত্থম্ভন্তি চিত্তসমুট্ঠানৰাযুনা উপত্থম্ভনং। অনুব্বেজেত্ৰা চিত্তন্তি আনেত্ৰা সম্বন্ধো। চিত্তস্স হি ততো অনুব্বেজনং তদনুনযনং। তেনাহ ‘‘সম্পিযাযমানো ওলোকেতী’’তি। ৰাযুপত্থম্ভকং গাহাপেত্ৰাতি কাযং তথা উপত্থম্ভকং কত্ৰা।
Ekato bhāriyanti piṭṭhipassato onataṃ. Vāyupatthambhanti cittasamuṭṭhānavāyunā upatthambhanaṃ. Anubbejetvā cittanti ānetvā sambandho. Cittassa hi tato anubbejanaṃ tadanunayanaṃ. Tenāha ‘‘sampiyāyamāno oloketī’’ti. Vāyupatthambhakaṃ gāhāpetvāti kāyaṃ tathā upatthambhakaṃ katvā.
ওপম্মসংসন্দনং সুৰিঞ্ঞেয্যমেৰ। কামগিদ্ধতায হীনাধিমুত্তিকো, অৰিসুদ্ধসীলাচারতায মিচ্ছাপটিপন্নো।
Opammasaṃsandanaṃ suviññeyyameva. Kāmagiddhatāya hīnādhimuttiko, avisuddhasīlācāratāya micchāpaṭipanno.
অঙ্গুলীহি নিক্খন্তপভা আকাসসঞ্চলনেন দিগুণা হুত্ৰা আকাসে ৰিচরিংসূতি আহ ‘‘যমকৰিজ্জুতং চারযমানো ৰিযা’’তি। ‘‘আকাসে পাণিং চালেসী’’তি পদস্স অঞ্ঞত্থ অনাগতত্তা ‘‘অসম্ভিন্নপদ’’ন্তি ৰুত্তং। অত্তমনোতি পীতিসোমনস্সেহি গহিতমনো। যঞ্হি চিত্তং অনৰজ্জং পীতিসোমনস্সসহিতং, তং সসন্তকং হিতসুখাৰহত্তা। তেনাহ ‘‘সকমনো’’তিআদি। ন দোমনস্সেন…পে॰… গহিতমনো সকচিত্তস্স তব্বিরুদ্ধত্তা। পুরিমনযেনেৰাতি ‘‘ইদানি যো হীনাধিমুত্তিকো’’তিআদিনা পুব্বে ৰুত্তনযেনেৰ।
Aṅgulīhi nikkhantapabhā ākāsasañcalanena diguṇā hutvā ākāse vicariṃsūti āha ‘‘yamakavijjutaṃ cārayamāno viyā’’ti. ‘‘Ākāse pāṇiṃ cālesī’’ti padassa aññattha anāgatattā ‘‘asambhinnapada’’nti vuttaṃ. Attamanoti pītisomanassehi gahitamano. Yañhi cittaṃ anavajjaṃ pītisomanassasahitaṃ, taṃ sasantakaṃ hitasukhāvahattā. Tenāha ‘‘sakamano’’tiādi. Na domanassena…pe… gahitamano sakacittassa tabbiruddhattā. Purimanayenevāti ‘‘idāni yo hīnādhimuttiko’’tiādinā pubbe vuttanayeneva.
পসন্নাকারন্তি পসন্নেহি কাতব্বকিরিযং। তং সরূপতো দস্সেতি ‘‘চীৰরাদযো পচ্চযে দদেয্যু’’ন্তি। তথভাৰাযাতি যদত্থং ভগৰতা ধম্মো দেসিতো, যদত্থঞ্চ সাসনে পব্বজ্জা, তদত্থায । রক্খণভাৰন্তি অপাযভযতো চ রক্খণজ্ঝাসযং। চন্দোপমাদিৰসেনাতি আদি-সদ্দেন আকাসে চলিতপাণি ৰিয কত্থচি অলগ্গতায পরিসুদ্ধজ্ঝাসযতা সত্তেসু কারুঞ্ঞন্তি এৰমাদীনং সঙ্গহো।
Pasannākāranti pasannehi kātabbakiriyaṃ. Taṃ sarūpato dasseti ‘‘cīvarādayo paccaye dadeyyu’’nti. Tathabhāvāyāti yadatthaṃ bhagavatā dhammo desito, yadatthañca sāsane pabbajjā, tadatthāya . Rakkhaṇabhāvanti apāyabhayato ca rakkhaṇajjhāsayaṃ. Candopamādivasenāti ādi-saddena ākāse calitapāṇi viya katthaci alaggatāya parisuddhajjhāsayatā sattesu kāruññanti evamādīnaṃ saṅgaho.
চন্দূপমসুত্তৰণ্ণনা নিট্ঠিতা।
Candūpamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. চন্দূপমসুত্তং • 3. Candūpamasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. চন্দূপমসুত্তৰণ্ণনা • 3. Candūpamasuttavaṇṇanā
