| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๘. จงฺกมนทายกเตฺถรอปทานํ
8. Caṅkamanadāyakattheraapadānaṃ
๙๓.
93.
‘‘อตฺถทสฺสิสฺส มุนิโน, โลกเชฎฺฐสฺส ตาทิโน;
‘‘Atthadassissa munino, lokajeṭṭhassa tādino;
อิฎฺฐกาหิ จินิตฺวาน, จงฺกมํ การยิํ อหํฯ
Iṭṭhakāhi cinitvāna, caṅkamaṃ kārayiṃ ahaṃ.
๙๔.
94.
‘‘อุจฺจโต ปญฺจรตนํ, จงฺกมํ สาธุมาปิตํ;
‘‘Uccato pañcaratanaṃ, caṅkamaṃ sādhumāpitaṃ;
อายามโต หตฺถสตํ, ภาวนียฺยํ มโนรมํฯ
Āyāmato hatthasataṃ, bhāvanīyyaṃ manoramaṃ.
๙๕.
95.
‘‘ปฎิคฺคเหสิ ภควา, อตฺถทสฺสี นรุตฺตโม;
‘‘Paṭiggahesi bhagavā, atthadassī naruttamo;
หเตฺถน ปุลินํ คยฺห, อิมา คาถา อภาสถฯ
Hatthena pulinaṃ gayha, imā gāthā abhāsatha.
๙๖.
96.
‘‘‘อิมินา ปุลินทาเนน, จงฺกมํ สุกเตน จ;
‘‘‘Iminā pulinadānena, caṅkamaṃ sukatena ca;
สตฺตรตนสมฺปนฺนํ, ปุลินํ อนุโภสฺสติฯ
Sattaratanasampannaṃ, pulinaṃ anubhossati.
๙๗.
97.
‘‘‘ตีณิ กปฺปานิ เทเวสุ, เทวรชฺชํ กริสฺสติ;
‘‘‘Tīṇi kappāni devesu, devarajjaṃ karissati;
อนุโภสฺสติ สมฺปตฺติํ, อจฺฉราหิ ปุรกฺขโตฯ
Anubhossati sampattiṃ, accharāhi purakkhato.
๙๘.
98.
‘‘‘มนุสฺสโลกมาคนฺตฺวา , ราชา รเฎฺฐ ภวิสฺสติ;
‘‘‘Manussalokamāgantvā , rājā raṭṭhe bhavissati;
ติกฺขตฺตุํ จกฺกวตฺตี จ, มหิยา โส ภวิสฺสติ’ฯ
Tikkhattuṃ cakkavattī ca, mahiyā so bhavissati’.
๙๙.
99.
‘‘อฎฺฐารเส กปฺปสเต, ยํ กมฺมมกริํ ตทา;
‘‘Aṭṭhārase kappasate, yaṃ kammamakariṃ tadā;
ทุคฺคติํ นาภิชานามิ, จงฺกมสฺส อิทํ ผลํฯ
Duggatiṃ nābhijānāmi, caṅkamassa idaṃ phalaṃ.
๑๐๐.
100.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา จงฺกมนทายโก เถโร อิมา คาถาโย อภาสิตฺถาติฯ
Itthaṃ sudaṃ āyasmā caṅkamanadāyako thero imā gāthāyo abhāsitthāti.
จงฺกมนทายกเตฺถรสฺสาปทานํ อฎฺฐมํฯ
Caṅkamanadāyakattherassāpadānaṃ aṭṭhamaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๘. จงฺกมนทายกเตฺถรอปทานวณฺณนา • 8. Caṅkamanadāyakattheraapadānavaṇṇanā
